Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Le I Ani Ulengeja Masusu?

Le I Ani Ulengeja Masusu?

Shi masusu keatambengapo kudi Leza, penepa mwanda waka kudi bimpengele bya nzala, bulanda, mavita a kanshinyenshinye, bipupo bya misongo, ne bimpengele bya kipangila? Kinenwa kya Leza, Bible, kilombola bintu bisatu bikatampe bilengeja masusu a bantu:

  1. Kwisakila, Makomwa-Meso, ne Mushikwa. “Kitatyi muntu kyabikala muntu mwanda wa kumusanshija.” (Musapudi 8:9) Divule bantu basusukanga pa mwanda wa kubulwa kubwaninina, kwisakila, ne bukalabale bwa bantu.

  2. Kitatyi ne Myanda Yampikwa Kulaa. Divule bantu basusukanga “mwanda kitatyi ne myanda yampikwa kulaa bibafikilanga bonso.” (Musapudi 9:11) Ko kunena’mba bantu badi pa kifuko kibi mu kitatyi kibi, palongeka maakishida, bantu pobadi na kalengwa nansha kubulwa kuta mutyima ku byaka.

  3. Muludiki Mubi wa Ino Ntanda. Bible ulombola patōkelela bubinga bukatampe bulengeja masusu a bantu. Unena’mba: “Ino ntanda yonsololo idi mu lupusa lwa yewa mubi.” (1 Yoano 5:19) Uno “mubi” i Satana Dyabola, kipangwa kya bukomo kya ku mushipiditu kine kyādi dibajinji bu mwikeulu wa Leza inoko “kāimanijepo mu bubine.” (Yoano 8:44) Bipangwa bikwabo bya ku mushipiditu byēkupile ku mutamba wa Satana ne kutombokela Leza mwanda wa kulondalonda bya kusakasaka byabo, bine byēbalengeje abo bene bekale ke bandemona. (Ngalwilo 6:1-5) Tamba’tu Satana ne bandemona bandi batomboka, bengidijanga bukomo ne lupusa lubi mu myanda ilongeka pano pa ntanda ponso. Nakampata mu kino kyetu kitatyi. Pano, Dyabola udi na bulobo bukatampe kadi “ongolanga ntanda yonso ikelwe na bantu,” ne kino i kilengeje “malwa” pano pa ntanda. (Kusokwelwa 12:9, 12) Na bubine, Satana i muludiki wa kasusu. Usangalanga bininge shi bantu basusuka. Satana ye ulengeja masusu a bantu​—ke Lezapo.

LANGULUKA’PO BIDI: Enka muntu wa kasusu, wa bilongwa bya bu dyabola ye ubwanya kulengeja bantu bampikwa mwanda basusuke. Inoko Bible unena’mba: “Leza i buswe.” (1 Yoano 4:8) Kukwatañana na bumuntu bwandi bwa buswe, “kebibwanikapo Leza wa bine kulonga bintu na nshikani, nansha Mwinē Bukomo Bonso kulonga bibi!”​—Yoba 34:10.

Inoko, ke bibipo kwiipangula’mba, ‘Lelo Leza Mwinē Bukomo Bonso ukaleka Satana endelele na buludiki bwandi bwa kasusu kufika ne kitatyi’ka?’ Enka na motwekimwenanga, Leza ushikilwe bibi kadi bimusansanga paetumona tususuka. Ne kadi, Kinenwa kyandi kitusoñanya’mba: “Koku mwela kuzumbazumba kwenu konso kwadi, mwanda aye wimutele mutyima.” (1 Petelo 5:7) Leza witusenswe kadi udi na bukomo bwa kupwija masusu onso ne bukondame, enka na musa kushintulwila’kyo kishinte kilonda’ko. *

^ mus. 7 Shi usaka kuyukila’ko bivule pa kine kilekele’ko Leza masusu, tala shapita 11 wa dibuku Lelo I Bika Bitufundija Bible? Dilupwilwe na Batumoni ba Yehova, kadi ditentulwa ne ku bitupu pa www.jw.org.