Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Panopano Ponka, Leza Usa Kupwija Masusu

Panopano Ponka, Leza Usa Kupwija Masusu

“A Yehova, le nkakwabija kufika ne kitatyi’ka, ino abe kwivwana mpika? Le nkalomba unkwashe ku lūma kufika ne kitatyi’ka, ino abe kulonga’po kintu mpika?” (Habakuka 1:2, 3) Bino i binenwa bya Habakuka, muntu muyampe wāitabijibwe na Leza. Le kwabija kwandi kulombola’mba wābudilwe lwitabijo? Nansha dimo! Leza wākulupije Habakuka amba i mutunge’ko kitatyi kya kupwija masusu.​—Habakuka 2:2, 3.

Shi abe nansha muntu osenswe mususukanga, i kipēla kunena’mba Leza waije, wadi ufwaninwe kulonga’po kintu bukidibukidi. Inoko Bible witukulupija’mba: “Yehova kejengapo pa mwanda wa mulao wandi, na mumwena bamobamo amba waije, ino aye wimutūkijije mutyima mwanda kasakilepo muntu nansha umo oneke, ino usaka bonso bafikile pa kwisāsa.”​—2 Petelo 3:9.

LELO LEZA UKALONGA’PO KINTU KITATYI’KA?

Bine panopano ponka! Yesu wālombwele amba kudi lukongo lwa pa bula lukemwena biyukeno palapala bya mu mafuku a mfulo a “mvuyo ya ngikadilo ya bintu.” (Mateo 24:3-42) Kufikidila kwa bupolofeto bwa Yesu mu ano etu mafuku kulombola’mba kitatyi kya Leza kulonga’po kintu pa masusu a bantu kibafwena pabwipi. *

Ino le Leza ukapwija masusu onso muswelo’ka? Yesu paādi pano pa ntanda wālombwele bukomo bwa Leza bwa kupwija masusu a muzo wa muntu. Tala bimfwa bimobimo.

Bimpengele bya Kipangila: Yesu ne batumibwa bandi pobādi batyibulula pa Dijila dya Ngadilea, kwātetukile kimpumpu kyādi kekisake kulobeja bwato. Inoko Yesu wālombwele amba aye ne Shandi badi na lupusa pa bintu bya kipangila. (Kolose 1:15, 16) Yesu wānenene’tu amba: “Shhh! Talala nyā!” Byāikala namani? “Ne kivula nakyo kyetūkija, ebiya kwatalala’tu nyā.”​—Mako 4:35-39.

Misongo: Yesu wādi uyukene pa mwanda wa bukomo bwaādi nabo bwa kubelula bampofu ne babilema, enka ne boba bādi na bijilangoa, ba makopo, nansha ke bantu ba bulema bwa miswelo yonso. Wābelwile “bonso badi babela.”​—Mateo 4:23, 24; 8:16; 11:2-5.

Bimpengele bya Nzala: Yesu wāingidije bukomo bwāmupele Shandi na kuvudija tubyakudya twādi tutyetye. Bible unena’mba Yesu wādishishe bantu tununu ne tununu misunsa ibidi mu bula bwa mwingilo wandi.​—Mateo 14:14-21; 15:32-38.

Lufu: Bukomo bwa Yehova bwa kupwija lufu i bumweke patōkelela kupityila ku nsekununi ya bantu basatu bāsangwilwe na Yesu. Mu bano bantu baāsangwile, umo wālongele mafuku aná mu lufu.​—Mako 5:35-42; Luka 7:11-16; Yoano 11:3-44.

^ mus. 5 Shi usaka kuyukila’ko bivule pa mafuku a mfulo, tala shapita 9 wa dibuku Lelo I Bika Bitufundija Bible? Dilupwilwe na Batumoni ba Yehova ditentulwa ne ku bitupu pa www.jw.org.