Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Shi Mwinē Pobe Watomboka

Shi Mwinē Pobe Watomboka

“Kitatyi kyanombwele wami mulume amba waumpele wakashikata na nsongwakaji, nasakile’nka ne kufwa. Neivwene bibi bininge, nakampata kitatyi kyonadi mvuluka bintu byonesuminwe pa mwanda wandi.”​—Maria, wa mu Eshipanye.

“Kitatyi kyaumpelele wami mukaji mu kitulumukila, mutyima waumfwile. Bintu byotwadi tufwatakanya, byotwadi tutengēle, ne byotwadi tulanga kulonga byafwa. Kudi mafuku amo onkyadipo nzumbija mutyima, ino shi navuluka’byo mutyima wauntyumuka.”​—Bill, wa mu Eshipanye.

KUTOMBOKWA na mulume nansha mukaji kutyumunanga mutyima. Bine, bantu besongele babwanya kumona’mba i biyampe kulekela mwinē pabo ne kulonga bukomo bwa kulumbulula kipwano kyabo. * Ino, ekale bashikate nansha kwilubula, boba bayukile amba benē pabo batombokele, bashalanga na misanshi mikatampe. Le i muswelo’ka obabwanya kulwa na ino misanshi?

BISONEKWA BIBWANYA KUKUKWASHA

Nansha byobapepwanga mutyima, balume ne bakaji bavule ba benē pabo batombokele basengibwanga na Bisonekwa. Bayukile amba Leza umwene impolo yabo ne kwivwana misanshi yabo.​—Malaki 2:13-16.

“Kuzumbazumba pokwandēmenene, waunsengele ne kuntalaja.”​Ñimbo ya Mitōto 94:19.

Bill uvuluka’mba: “Ponatangile uno vese namwene Yehova mu ñeni utalaja misanshi yami na buswe, na mulongelanga shabana wa lusa.”

“Kudi wa lulamato nobe wikalanga na lulamato.”​Ñimbo ya Mitōto 18:25.

Carmen, watombokelwe na mulume mu bula bwa myeji ushintulula’mba: “Wami mulume wabudilwe lulamato kondi. Inoko, nadi nkulupile amba Yehova undamete nyeke. Aye kakangelapo nansha dimo.”

“Kemwakizumbijai mityima pa kintu nansha kimo, inoko mu byonso, yukijai Leza byomulomba mu milombelo ne kuzenza . . . kadi ndoe ya Leza itabukile ñeni yonso ikalama mityima yenu.”​Fidipai 4:6, 7.

Sasha unena’mba: “Natangile uno vese misunsa mivule. Nalombele Leza kyaba ne kyaba, ampe ndoe mu būmi bwami.”

Kyaba kimo bano bonso batelwa’ba bazozele. Inoko bakulupile mudi Yehova Leza ne kukomejibwa na Kinenwa kyandi. Bill unena’mba: “Lwitabijo lwami lwaunkweshe ngikale na kitungo mu būmi mu kitatyi kyadi kimweka bintu bikwabo byonso bu byoneke. Nansha kitatyi kyonapityile ‘mu musanza wa mujiñininya mukatampe,’ Leza wadi nami.”—Ñimbo ya Mitōto 23:4.

^ mus. 4 Pa kuyuka shi bilomba kumulekela nansha kuleka kumulekela, tala bishinte bidi mu Langukai! wa 22 Kweji 4, 1999, L’infidélité conjugale, ” Falanse.