Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Shi Kubalongeka Kimpengele

Shi Kubalongeka Kimpengele

“Dibajinji twatyumukilwe mutyima bininge. Mwanda bintu byonso byotwadi nabyo byaonekele na bitoto ne mema a dilobe.”​—Andrew, wa mu Siera Leone.

“Kupwa kwa kimpumpu, twajokele ku njibo yetu. Ino ketwatene’popo kintu nansha kimo. Twakomenwa’nka ne kya kunena. Wami mwana mwana-mukaji watapa manwi panshi kadila.”​—David, wa pa Kisanga kya Virjini.

SHI kodi mupande ku kimpengele, ubwanya padi kwiivwana na mweivwanine bantu bakwabo bapandile’ko: kyaso, kukomenwa kwibitabija, kuvutakanibwa ñeni, kuzumbija mutyima, ne kulotakanya bufuku. Bantu bavule bapandile’ko batyumukwe mutyima kadi bakōke, kebasakengapo kwendelela na būmi.

Shi kodi mufikilwe na kimpengele mu būmi, padi nobe weivwene amba kubwanyapo kūminina. Padi washilwile’nka ne kulanga’mba būmi bobe kebudipo na mvubu. Inoko Bible ulombola’mba būmi bobe budi na mvubu ne amba udi na bubinga bwa kukulupidila būmi bulumbuluke bwa kumeso.

KUYUKA BUBINE BWA MU BIBLE KULENGEJANGA BŪMI BWIKALE NA MVUBU

Musapudi 7:8 unena’mba: “Mfulo ya mwanda i mipite buya ngalwilo yao.” Shi ukitambatamba’tu mu kuponenwa na kimpengele, būmi bubwanya kumweka bu bukomo. Inoko bintu bibwanya kwikala biyampe shi ulonge bukomo na kitūkijetyima bwa kwaluja būmi bowadi nabo dibajinji.

Bible wābadikile kulaya kitatyi ‘kekikevwanwapo lunwa lwa madilo nansha kudila tusuwa.’ (Isaya 65:19) Bino binenwa bikafikidila kitatyi kikalamunwa ntanda ke paladisa mu Bulopwe bwa Leza. (Ñimbo ya Mitōto 37:11, 29) Bimpengele kebikalongekapo monka. Misanshi ya mu ñeni ne ku ngitu ikatalulwa’ko lonso, mwanda Leza Mwinē Bukomo Bonso ulaile amba: “Bintu bya kala kebikavulukwapo, nansha kwiya’byo ku mutyima kwine mpika.”​—Isaya 65:17.

Langa’po bidi: Mupangi udi na mulangwe wa kukupa “būmi bwa kumeso ne lukulupilo”​—būmi bwa ndoe mu bulopwe bubwaninine bwa Leza. (Yelemia 29:11) Lelo kuyuka buno bubine kubwanya kulengeja namani būmi bobe bwikale na mvubu? Sally, utelelwe mu kishinte kibadikile unena’mba, “Kulangulukila pa bintu byonso bya kutendelwa biketulongela Bulopwe bwa Leza mu mafuku a kumeso, kubwanya kukukwasha wilwe bintu bya kala ino ute mutyima ku bya dyalelo.”

Le ubulwepo kwifunda myanda itala bintu byobasa kulongela bantu panopano ponka kudi Bulopwe bwa Leza? Kwifunda’yo kubwanya kukulupija’mba nansha byosusuka na bimpengele, būmi bobe budi na mvubu dyalelo pano potengēle na kipyupyu mafuku a kumeso mene keakekala’kopo bimpengele. Pano’ko bidi, Bible uletanga madingi a kamweno abwanya kukukwasha ulwe na bintu bilupuka ku bimpengele. Tala’tu bidi bino bimfwa bityetye.