Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Shi Koabila Kufwa

Shi Koabila Kufwa

Adriana, wa mu Brezile unena’mba: “Ino milangwe yadi ingiya kitatyi ne kitatyi. Penepo nafula kukunena’mba i biyampe’tu mfwe.”

LELO kashā kodi mwiivwane bibi waabila’nka ne kufwa? Nabya ubwanya kwivwanija muswelo weivwene Adriana. Wadi uzumbija mutyima bininge kadi wivwene bulanda ne kukomenwa kya kulonga. Adriana bamukwete misongo ya kutyumukwa mutyima kyaba kyonso.

Langulukila ne pa kimfwa kya Kaoru, wa mu Jampani wadi ulelele bambutwile banunu babelabela. Ushintulula’mba: “Kyaba kimo ñeni yadi imvutakana bininge ku kaji. Kyaba kikwabo nkyadipo ngivwana buya bwa kudya kadi nkomenwa’nka ne kulāla. Nkenanga’mba i biyampe’tu mfwe makambakano ampwe.”

Ojebode, wa mu Nijeria unena’mba: “Nadi ngivwana nyeke bulanda nsūmija ne impolo, o mwanda nadi kenkimbe muswelo wa kwiipaya.” Na bya dyese ba Ojebode, Kaoru, ne Adriana, kebeipailepo. Inoko bantu tununu ne tununu beipayanga mwaka ne mwaka.

KWA KUTANA BUKWASHI

Bantu bavule beipayanga i bana-balume, kadi bavule bevwananga bumvu bwa kulomba bukwashi. Yesu wānenene amba muntu ubela usakilwa muñanga. (Luka 5:31) Nobe shi wiivwananga uno muswelo kokafwa bumvu bwa kulomba bukwashi. Bantu bavule badi batyumukwe mutyima bamwene amba, kundapibwa kubwanya kwibakwasha bevwane biyampe. Ba Ojebode, Kaoru, ne Adriana bonso baundapilwe kadi pano badi biyampe.

Badokitele babwanya kwingidija malawa, kuleta madingi a kiñanga nansha kwingidija byonso bibidi pa kundapa muntu utyumukilwe mutyima. Boba babela nabo basakilwa kukwashibwa na kitūkijetyima na kisaka ne balunda. Yehova i mulunda muyampe kupita bonso, mwine witupanga madingi malumbuluke, adi mu Kinenwa kyandi Bible.

LELO KUDI MWA KUPWILA’BYO LONSO?

Divule bantu batyumukwe mutyima basakilwa kundapibwa kitatyi kilampe kadi bafwaninwe ne kushinta bibidiji byabo pa kwikala biyampe. Ino nansha shi wi mutyumukwe mutyima, ubwanya kutengela būmi bulumbuluke bwa kumeso na mwalongele Ojebode. Unena’mba: “Ntengēle kumona kufikidila kwa Isaya 33:24, ulaile kitatyi kekikanenapo muntu pano panshi amba ‘nabela.’” Pamo bwa Ojebode, nobe sengibwa na mulao wa Leza wa “ntanda mipya” mwine kemukekalapo “misanshi.” (Kusokwelwa 21:1, 4) Uno mulao ushintulula’mba misanshi yonso ya mu ñeni ne ya mu malango ikapwa. Misanshi yonso yoivwana keikekala’kopo dikwabo. Misanshi yoivwana ‘keikavulukwapo nansha kwiya’yo ku mutyima kwine mpika.’​—Isaya 65:17.