Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Būmi Bobe bwa Kumeso Bwimanine pa Butongi Bobe!

Būmi Bobe bwa Kumeso Bwimanine pa Butongi Bobe!

LE BINE UDI NA BUTONGI BWA KUTONGA MUKEKADILA BŪMI BOBE BWA KUMESO? Bantu bamo bakulupile amba būmi bwabo bwimanine pa dyese nansha kulaibwa, ke pa butongipo. Shi abatunya kufikila pa bitungo kampanda, banenanga’tu amba mo mokilailwe. Banenanga’mba, “kyandailwe amba nkikafikilangapo pa bino bitungo!”

Bakwabo batyumukwanga mutyima pobamona’mba i kutupu muswelo wa kupwija masusu ne bukondame bidi mu ino ntanda yotushikete’mo. Babwanya kulonga bukomo bwa kulumbulula bwabo būmi​—ino bintu pamo bwa mavita, butapani, bimpengele bya kipangila, ne misongo bibwanya kuvutakanya mpango yabo kitatyi ne kitatyi. Kebeipangula’mba, ‘Le kyonepuñenya i kika?’

Na bubine, myanda ya kubulwa kulaya itutana mu būmi ibwanya kupalakanya mpango yetu. (Musapudi 9:11) Inoko, pa mwanda utala būmi bobe bwa kumeso, bine udi na butongi bwa kwitongela. Na bubine, Bible ulombola’mba būmi bobe bwa kumeso bwimanine pa butongi bobe. Bandaula byobya byanena.

Mosesa, mwendeji wa muzo wa Isalela wa kala, wāsapwidile bantu pobādi kebatwela mu Ntanda ya Mulao amba: ‘Nakubikila ku meso obe būmi ne lufu, dyese ne mafingo, ino tonga bidi būmi amba wikale mūmi, abewa ne lukunwa lobe lwine; mu kusanswa Yehova Leza obe, mu kwivwana diwi dyandi, ne kumulamata.’​Kupituluka 30:15, 19, 20.

“Nakubikila ku meso obe bumi ne lufu, dyese ne mafingo, ino tonga bidi bumi.”​—Kupituluka 30:19

Bine! Leza wānyongolwele bene Isalela mu bupika bwa mu Edipito ne kwibapa kyepelo kya kwikala na būmi bwa bwanapabo kadi bwa nsangaji mu Ntanda ya Mulao. Inoko, kino kekyādipo kya kwiya mu kitulumukila. Pa kumona ano madyese, bādi bafwaninwe ‘kutonga būmi.’ Namani? ‘Na kusanswa Leza, kwivwana diwi dyandi, ne kumulamata.’

Dyalelo nadyo, udi na buno butongi, kadi byobya byotonga bilombolanga mukekadila būmi bobe bwa kumeso. Shi utonge kusanswa Leza, kwivwana diwi dyandi, ne kumulamata, nabya na bubine ubatonge būmi​—ke būmi bwa nyeke mu paladisa pano pa ntanda kadi. Ino le kutabula ano matabula kulomba bika ne bika?

TONGA KUSANSWA LEZA

Buswe i ngikadila mikatampe ya Leza. “Leza i buswe,” mo mwālembele mutumibwa Yoano ku bukomo bwa mushipiditu. (1 Yoano 4:8) O mwanda, pobāipangwile Yesu mbila mikatampe kupita yonso, wālondolwele amba: “Sanswa Yehova Leza obe na mutyima obe onso ne na muya obe onso ne na ñeni yobe yonso.” (Mateo 22:37) Kipwano kya bine na Yehova Leza kifwaninwe kwimanina pa buswe, ke pa moyopo wa bitupubitupu nansha kikōkeji kyampikwa kwendela’mo. Penepa, mwanda waka tufwaninwe kutonga kumusanswa?

Buswe bwa Yehova pa bantu budi pamo bwa buswe bwa bambutwile na babo bana. Nansha byobadi bampikwa kubwaninina, bambutwile ba buswe bafundijanga, kukankamika, kukwatakanya, ne kulemununa babo bana mwanda bebasakilanga bekale na nsangaji ne na būmi buyampe. Le bambutwile nabo basakanga bika ku babo bana? Basakanga babo bana bebasanswe ne kulama byobya bibafundija bambutwile pa mwanda wa kamweno kabo. Le ke byendele’mopo Tata wetu wa mūlu nandi etulombe tulombole mutyima wa kufwija’ko na buswe pa bintu byonso byaetulongela?

 IVWANA DIWI DYANDI

Mu ludimi lubajinji lwālembelwe’mo Bible, kishima “kwivwana” divule kikalanga na mulangwe wa “kukōkela.” Mwene ye byotusakanga kitatyi kyotunena mwana’mba, “Ivwana bambutwile bobe”? Nanshi, kwivwana diwi dya Leza kulomba kwifunda ne kukōkela byobya byanena. Nansha byoketubwanyapo kwivwana diwi dya Leza dinedine, ino tumwivwananga na kutanga ne kwingidija byobya bidi mu Kinenwa kyandi Bible.​—1 Yoano 5:3.

Pa kulombola mvubu ya kwivwana diwi dya Leza, Yesu wānenene difuku dimo amba: “Muntu kakokejapo kwikala mūmi na mikate yonka kete mhm, ino i na kinenwa kyonso kitamba mu kyakanwa kya Yehova.” (Mateo 4:4) Enka na mwikadile bidibwa bya ku ngitu na mvubu kotudi, kwikala na buyuki butala padi Leza ko kwine kwa mvubu mpata. Mwanda waka? Solomone mulopwe wa tunangu wāshintulwile amba: “Ñeni i bwa nsakwa, monka mwikadile bupeta i nsakwa; ino butabuke bwa ñeni i bwino bwa kwilama būmi bwa yewa udi nayo.” (Musapudi 7:12) Buyuki ne tunangu bitamba kudi Leza bibwanya kwitulama dyalelo ne kwitukwasha tukwate butyibi bulumbuluke buketulengeja tukamone būmi bwa nyeke mu mafuku āya kumeso.

LAMATA KWADI

Vuluka kyelekejo kya Yesu kyotwabandaulanga mu kishinte kibadikile, mwine mwaānenene amba: “Kakibelo i katyetye ne dishinda ditwala ku būmi nadyo i dityinye, ne ba kwidisokola bene i batyetye.” (Mateo 7:13, 14) Byotwenda mu dino dishinda, bitulomba kumwena mu buludiki bwa mwendeji wa bwino ne kumulamata na kusumininwa shi tusaka kukafika kotwenda​—ke ku būmi bwa nyeke kadi. Nanshi tudi na bubinga bwendele’mo bwa kulameta Leza. (Ñimbo ya Mitōto 16:8) Ino, le i muswelo’ka otukamulamata?

Difuku ne difuku, kudi bintu bivule byotufwaninwe kulonga ne bintu bivule mpata byotwabila kulonga. Bino bintu byonso’bi bibwanya kwitwelela kyaba nansha kwitulabika twaikala na kitatyi kityetye nansha kubulwa kitatyi kya kulonga bisaka Leza kotudi. O mwanda Bible wituvuluja’mba: “Tadijai’nka kutadija bya binebine amba muswelo omunanga ke pamopo bwa bampikwa tunangu, aa, ino i pamo bwa ba tunangu, mwingidija biyampe shē kitatyi kyenu, mwanda mafuku i mabi.” (Efisesa 5:15, 16) Tulamatanga Leza na kumona kipwano kyetu nandi bu kintu kya mvubu mpata mu bwetu būmi.​—Mateo 6:33.

I ABE MWINE WA KUTONGA

Nansha byokekudipo kintu kyobwanya kulonga pa kushinta būmi bobe bwa pa kala, ino kudi kintu kyobwanya kulonga mwanda wa kulumbulula būmi bobe bwa kumeso ne bwa baswe bobe. Bible ulombola’mba Tata wetu wa mūlu, Yehova Leza, witusenswe bininge kadi i mwitulombole byobya byaetusakila tulonge. Langulukila pa binenwa bya mupolofeto Mika bya’mba:

“Lelo i kika kyaswele Yehova kodi, a? Poso’nka kulonga buluji, ne kusanswa kanye, ne kunanga mu kwiubija na Leza obe.”​Mika 6:8.

Le ubaitabija lwito lwa Yehova lwa kunanga pamo nandi ne kukemwena madyese a nyeke abikīle boba bananga nandi? I abe mwine wa kutonga!