Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | LELO UKETABIJA KYABUNTU KIKATAKATA KYA LEZA?

Kyabuntu Kipite Byonso

Kyabuntu Kipite Byonso

KAKINGIDILWA ka kusōnga nako kidiyo kadi mu kuboko kwa Jordan kamweka bu ka bitupubitupu. Inoko kwadi, i kintu kya bulēme bukatampe. Jordan unena’mba, “Russell, mununu umo wadi upwene na kyetu kisaka ye waumpele’ko ponadi mwanuke.” Russell pa kufwa, Jordan wayuka’mba Russell wakweshe bininge nkambo wandi ne bambutwile bandi, wibakankamika mu bitatyi bikomo. Jordan unena’mba, “Dyalelo byongyukile bivule padi, pano kano kakingidilwa kabaikala na mvubu kutabuka.”

Enka na mwikilombwela kimfwa kya Jordan, kyabuntu kibwanya kumweka bu kityetye nansha bu kyampikwa mvubu ku bantu bamo. Ku boba bayukile kufwija’ko, kintu kyonso, ne kya bei mityetye kine, kimwekanga bu kilēme kobadi. Bible i mutele kyabuntu kimo kya lupoto lukande mu bino bishima biyukane bya amba: “Leza byaasenswe ino ntanda bikatampe mpata, wapēne wandi Mwana mubutulwe bunka, amba ense ulombola lwitabijo mudi aye kakyonakanibwa, ino amone būmi bwa nyeke.”Yoano 3:16.

Langa, kyabuntu kipa muntu būmi bwa nyeke! Le kudi kipityile kino ku bulēme? Nansha bamo byokebayukilepo mvubu ya kino kyabuntu, inoko bene Kidishitu ba bine bekimwene bu ‘kilēme.’ (Ñimbo ya Mitōto 49:8; 1 Petelo 1:18, 19) Ino, mwanda waka Leza wāpele ino ntanda būmi bwa wandi Mwana bu kyabuntu?

Mutumibwa Polo ulombola mwanda mwine na kunena’mba: “Monka mwātwelele bubi mu ino ntanda kupityila ku muntu umo ne lufu kupityila ku bubi, ne lufu nalo lwasambakana ku bantu bonso.” (Loma 5:12) Adama, muntu mubajinji wālongele bubi na kutombokela Leza ku kusaka, o mwanda wāpelwe mfuto ya lufu. Kupityila kudi Adama, lufu i lusambakane pa bana bandi bonso—muzo wa muntu pano pa ntanda.

 “Mpalo ipala bubi i lufu, ino kyabuntu kipāna Leza i būmi bwa nyeke mudi Kidishitu Yesu Mfumwetu.” (Loma 6:23) Pa kunyongolola bantu ku mfuto ya lufu, Leza wātumine Yesu Kidishitu, wandi Mwana āye pano pa ntanda mwanda wa kupa ino ntanda būmi bwandi bubwaninine bu kitapwa. Kupityila ku kino kitapwa, kiyukene bu “kinkūlwa,” bonso balombola lwitabijo mudi Yesu bakamona būmi bwa nyeke.Loma 3:24.

Polo, pa kwisambila pa madyese apāna Leza ku batōtyi bandi kupityila kudi Yesu Kidishitu, i munene amba: “Leza afwijibwe’ko pa kyabuntu kyandi kya ku bitupu kekineneka.” (2 Kodinda 9:15) I bine, kinkūlwa i kyabuntu kya kutendelwa kyoketubwanyapo kushintulula ne pa mfulo. Ino mwanda waka mu byabuntu byonso bipēne Leza ku bantu, kinkūlwa kyo kipityile byonso? I mu muswelo’ka okipityile byabuntu bikwabo byonso bipēne Leza? * Ne tufwaninwe kulonga’po bika? Tukwita utange byobya bilondolwele Bible ku bino bipangujo mu bishinte bibidi bilonda’ko.

^ mus. 8 Yesu “wetupānine muya wandi” na mutyima umo. (1 Yoano 3:16) Bino bishinte bisa kwimanina pa kutela Leza bu Mwine upēne kinkūlwa, mwanda kitapwa kibadilwa mu mpango yandi.