Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | LELO UKETABIJA KYABUNTU KIKATAKATA KYA LEZA?

Kyabuntu Kikatakata kya Leza—Mwanda Waka I Kilēme Mpata?

Kyabuntu Kikatakata kya Leza—Mwanda Waka I Kilēme Mpata?

I kika kilengejanga kyabuntu kikale kilēme mpata kodi? Padi i bino bintu biná: (1) mwine ukupēle kyabuntu, (2) kine kyakupedile’kyo, (3) byajimije pa kukupa’kyo, ne (4) shi kyabuntu’kya i kivuije bisakibwa byobe bine. Kulangulukila pa bino bintu kubwanya kwitukwasha tutamije mutyima wetu wa kufwija’ko pa kinkūlwa—kyabuntu kikatakata kya Leza.

LE I ANI UPĒNE’KYO?

Byabuntu bimo bimwekanga bu bilēme kotudi, mwanda witupele’byo i muntu wa lupusa nansha otulēmekele bininge. Byabuntu bikwabo, nansha i bya lupoto lutyetye bisangelwanga mwanda bibatambe kudi muntu wa mu kisaka otusenswe nansha mulunda otukulupile. Ye mwadi mwikadile ne kyabuntu kyobapele Jordan kudi Russell kitelelwe mu kishinte kibadikile. Le uno mwanda utala namani kyabuntu kya kinkūlwa?

Kibajinji, Bible unena’mba “Leza watumine wandi Mwana mubutulwe bunka mu ino ntanda amba tumwene būmi ponka padi aye.” (1 Yoano 4:9) Kino kibalengeja kino kyabuntu kikale kilēme bininge. I kutupu upityile Leza lupusa. Mulembi wa mitōto Muhebelu wisambila padi amba: “Abe enka, wa dijina dya bu-Yehova, wi Mwinemukatakatamwine panopantanda ponsololo.” (Ñimbo ya Mitōto 83:18) Ketwadipo ba kutambula kyabuntu kitamba kudi mwine mukatakata mwine.

Kya bubidi, Leza i “Tata wetu.” (Isaya 63:16) Namani? I mwitupe būmi. Kadi witutele nyeke mutyima bwa tata wipānina bandi bana. Leza pa kusapwila bantu bandi bamo pa kala, kimfwa bene Efelaimi, wāipangwile amba: “Lelo Efalaimi i wami mwana mwana-mulume muswedibwe’ni? Lelo i mwana muyampe’ni? . . . po pa mwanda munda mwami mujina padi aye; . . . i binebine nkamufwila lusa.” (Yelemia 31:20) Ye mumwena Leza ne batōtyi bandi ba dyalelo. Aye kadipo’tu enka bu Umpangi mwinē bukomo bonso, ino kadi i Tata wetu wa binebine kadi Mulunda netu. Lelo kino kekilengejapo kyabuntu kyonso kitamba kwadi kikale kilēme mpata?

 MWANDA WAKA WĀPĒNE’KYO?

Byabuntu bimo bikalanga bilēme mwanda i bipānwe na buswe bwa binebine, ke na kuningilwapo, mhm. Shi upāna i wa buntu kakasakepo bamwalwije.

Leza wētupele wandi Mwana mwanda witusenswe. Bible unena’mba, “Pano e pasokokēle buswe bwa Leza kotudi, mwanda Leza watumine wandi Mwana mubutulwe bunka mu ino ntanda.” Mwanda waka? “Amba tumwene būmi ponka padi aye.” (1 Yoano 4:9) Lelo kudi wāningile Leza alonge namino? Nansha dimo! “Kinkūlwa kyafutyile Kidishitu Yesu” i kilomboji kya “kanye kakatampe” ka Leza.Loma 3:24.

Mwanda waka kyabuntu kya Leza i kilongwa kya “kanye kakatampe”? Bible ushintulula’mba: “Leza wetulombola buswe bwandi mu uno muswelo amba, potwadi tukidi babipya-mambo, Kidishitu wetufwidile.” (Loma 5:8) Buswe bwa Leza bwampikwa kwisakila bo bwāmutonwene akwashe bazoze, bafudilwe, ne babipya-mambo. Ketwingidile’bopo, kadi ketudipo na kya kumufuta. Kyabuntu kyandi i kilomboji kikatampe kya buswe kupita bonso mu mānga.

I BIKA BYAĀJIMIJE?

Byabuntu bimo i bilēme mwanda bilombolanga byobya bijimije mwine upēne’byo. Shi muntu waitabija kwibudija kintu kyamwene na mvubu mikatampe mwanda wa kwitupa’kyo, tukekimona bu kilēme mpata mwanda wēpāna.

Leza “wapēne wandi Mwana mubutulwe bunka.” (Yoano 3:16) Wētupele enka muntu wasenswe kutabuka. Leza paādi upanga bintu mu bula bwa myaka keibadika, Yesu wāingile nandi, wikele bu “nsangaji yandi.” (Nkindi 8:30) Yesu i “Mwana wasenswe” kadi “i kyelekejo kya Leza wampikwa kumweka.” (Kolose 1:13-15) Kijimba kibakutyile umbumo i kijimba kekyamwekele kashā.

Nansha nankyo, Leza “kaelēlepo kunyuma nansha wandi Mwana mwine.” (Loma 8:32) Yehova wētupele kyokya kitabukile kunengela. I kutupu kyabuntu kipityile kino ku lupoto.

KUVUIJA BISAKIBWA

Byabuntu bimo bikalanga bilēme mwanda bivuijanga bisakibwa binebine, enka ne byobya bya bukidibukidi. Kimfwa, ubulwe’po kufwija’ko bininge shi muntu wakufutyila lupitalo lokwadipo wa kubwanya kwifutyila? Bine kino kyabuntu kikekala na mvubu kodi!

“Monka mufwilanga bonso mudi Adama, ne mudi Kidishitu namo mo monka, bonso bakapebwa būmi.” (1 Kodinda 15:22) Byotutambile kudi Adama, batwe bonso ‘tufwanga,’ ketubwanyapo kwepuka lunonga lwa misongo ne lufu nansha kupwana batwe bene na Leza ne kwikala bampikwa mambo kwadi. Byoketudipo na bukomo, ketubwanyapo kwijokejeja “būmi” nansha kujokejeja’bo muntu mukwabo. Bible unena patōkelela amba: “Nansha umo uyukile kukūla mwanabo, shi ku ka, shi ku ka, Nansha kupana kudi Leza kikūlwa kyandi. . . . I bwa kuleka bitupu nyeke e mo kyendele.” (Ñimbo ya Mitōto 49:7, 8) Tusakilwanga bukwashi mwanda ketubwanyapo kufuta kinkūlwa. Shi kutupu witukwasha, nankyo i lufu’tu.

Pa buswe bwandi bukatampe, Yehova udi na aye witufutyile “lupitalo,” amba kupityila mudi Yesu ‘bonso bakapebwe būmi.’ Lelo kinkūlwa i kivuije uno mwanda namani? “Mashi a Yesu wandi Mwana etutōkejanga ku bubi bonso.” Bine, lwitabijo mu mashi āmwangile Yesu lushitulanga kibelo kya kulekelwa  bubi ne kukamona būmi bwa nyeke. (1 Yoano 1:7; 5:13) Lelo i bika bikalonga kinkūlwa ku baswe betu bafwile? “Lufu byolwāidile pa muntu umo, lusangukilo lwa bafwe nalo lubaila pa muntu umo [Yesu].”1 Kodinda 15:21. *

Kekudipo kyabuntu kitambile kudi muntu wa peulu kadi kipēnwe na buswe bukatampe kutabuka kitapwa kya Yesu. Kekudipo mukwabo upēne bintu bivule kutabuka bitupele Yehova Leza. Kadi kekudipo kyabuntu nansha kimo kivuija bisakibwa byetu kutabuka kitapwa kitunyongolwele ku bubi ne lufu. Bine, i kutupu kyabuntu kibwanya nansha’tu kusenselela bityetye ku bulēme kebuneneka bwa kinkūlwa.

 

^ mus. 19 Pa kuyukila’ko myanda mikwabo itala mpango ya Leza ya kusangula bafwe, tala shapita 7 wa dibuku Lelo I Bika Bine Bifundija Bible? dilupwilwe na Batumoni ba Yehova, ditūdilwe ne pa www.jw.org.