Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Yesu wākapempwile inandi-muko wa Petelo ne kumubelula.—Mateo 8:14, 15; Mako 1:29-31

Lelo Bukunga I Kisakibwa ku Bengidi Bene Kidishitu?

Lelo Bukunga I Kisakibwa ku Bengidi Bene Kidishitu?

BIPWILO pano pa ntanda—kimfwa Kipwilo kya Katolika Loma, bipwilo palapala bya Orthodoxe, bya bene Budha, ne bipwilo bikwabo—biningilanga bendeji ne bengidi babo baleke kusonga nansha kusongwa. Inoko, bantu bavule i bamone amba kino kibidiji kyo kyalengeja busekese bwa munyanji bulongwa na bendeji mu bipwilo palapala.

Nanshi i kyendele’mo kwiipangula shi bukunga i kisakibwa kya mu Bisonekwa ku bengidi bene Kidishitu. Pa kulondolola uno mwanda, tubandaulei nsulo mine ya kino kibidiji, muswelo okyasambakana ne mwikimwena Leza.

BUKUNGA MU MĀNGA YA BIPWILO

Kitabo Encyclopædia Britannica kishintulula bukunga amba i “kwikala wampikwa kusonga nansha kusongwa, kwijiba ku kusambakena pamo, divule pa mwanda wa mingilo ya mu kipwilo nansha kwipānina’mo.” Mu 2006, Papa Bénoit XVI pa kwisamba ku meso a Bamupe ba Loma watelele bukunga “bu kibidiji kya tamba mu kitatyi kya kubwipi na kyādi’ko Batumibwa.”

Inoko, bukunga kebwādipo buvudile mu bene Kidishitu ba mu myaka katwa kabajinji. O mwanda, mutumibwa Polo wādi’ko mu myaka katwa kabajinji, wādyumwine boba betabije bepuke bantu ba “binenwa bya kyongo bya mishipiditu” ne “bakakankaja bantu kwisonga.”1 Temote 4:1-3.

Mu myaka katwa ka bubidi mo mwāshilwile kuzambalala kibidiji kya bukunga mu bipwilo bya “Bwine Kidishitu” bya Kushika. Dibuku Bukunga ne Bibidiji bya Bipwilo, dya Angele, dinena’mba uno mwanda “wakwatañene na kivula kipya kya kukankaja bulādi kyaikele’ko mu Umbikalo wa Loma.”

Mu myaka tutwa yalondele’po, kitango kya bantu bendeja kipwilo ne boba betwa bu Bashandya  Bipwilo baningile bendeji bekale bankunga. Badi balanga’mba kusambakena pamo i kwisubija kadi kekukwatañenepo na mingilo ya bwendeji bwa kipwilo. Inoko, dibuku Encyclopædia Britannica dinena patōkelela’mba “ku mfulo kwa myaka katwa ka 10, bamumpe ne baeveke bavule badi na bakaji.”

Bukunga ku bendeji ba bipwilo bwakomejibwe mu Kitango kya Lateran kya 1123 ne kya 1139, kyalongelwe mu Loma, kadi i bushadidile bulondwa na Kipwilo kya Katolika Loma ne didi kūlu dino. Bamwene amba buno butyibi bukakwasha kipwilo kileke kujimija bukomo ne lupeto byokyadi kibwanya kujimija shi bamumpe badi basonge ne kwikala na bana.

MUMWENA LEZA BUKUNGA

Muswelo umona Leza bukunga i mulombolwe patōka mu Kinenwa kyandi, Bible. Tutana’mo binenwa bya Yesu bitala boba bāshele bankunga bwa aye “pa mwanda wa Bulopwe bwa mūlu.” (Mateo 19:12) Pa mwanda umo onka, mutumibwa Polo nandi wēsambīle pa boba bātongele kulonda kimfwa kyandi kya bunkunga “pa mwanda wa myanda miyampe.”1 Kodinda 7:37, 38; 9:23.

Inoko, Yesu ne Polo kebāningīlepo nansha dimo bengidi bashale bankunga. Yesu wānenene amba bukunga i “kyabuntu” kekyādipo na balondi bandi bonso. Polo pa kusoneka pa “bajike,” wānenene patōkelela amba: “Nkidipo na kijila nansha kimo kya kudi Mfumwetu, ino naleta mulangwe wami.”Mateo 19:11; 1 Kodinda 7:25.

Bible ulombola’mba bengidi bavule bene Kidishitu ba mu myaka katwa kabajinji, kubadila’mo ne mutumibwa Petelo, bādi basonge. (Mateo 8:14; Mako 1:29-31; 1 Kodinda 9:5) Ino, pa mwanda wa busekese bwāvudile mu Loma kitatyi’kya, Polo wālembele amba shi mutadi mwine Kidishitu i musonge, ufwaninwe kwikala “mulume wa mukaji umo” kadi “wa bana bakōkele bininge.”1 Temote 3:2, 4.

Buno ke busongipo bwa bukunga, mwanda Bible unena pampikwa kafinda amba, “Mulume ape mukajandi kyokya kimufwaninwe” kadi boba besonge kebafwaninwepo ‘kwisuminwa abo bene na bene’ mu mwanda utala kusambakena pamo. (1 Kodinda 7:3-5) Nanshi, bukunga ke kisakibwapo kudi Leza, kadi ke kya kuningilapo bengidi bene Kidishitu.

PA MWANDA WA MYANDA MIYAMPE

Shi bukunga ke bwa kuningilwapo, mwanda waka ba Yesu ne Polo bānenēne bukunga māya? I pa mwanda bukunga bupanga muntu mikenga mivule ya kusapwila bantu bakwabo myanda miyampe. Bankunga bamo bepānanga bininge, mwanda kebadipo na makambakano adi na boba besongele.1 Kodinda 7:32-35.

Tala kimfwa kya David, wakwete butyibi bwa kuleka kaji kandi ka mfutwa miyampe mu Meksike mwanda wa kuvilukila mufula mwa Kosta Rika kukafundija bantu Bible. Le David wamwene amba bukunga bwamukweshe’ko? Aye amba, “Bine. Byadi bikomo pa kwibidila bibidiji bipya ne ngikadilo palapala mu būmi, ino byonadi nkungulume, napēlelwe kwibidila’byo.”

Claudia, nkungakaji mwine Kidishitu wakengidile kokwa kusakilwa basapudi bavule unena’mba: “Ngidi na nsangaji mu mwingilo wa Leza. Lwitabijo ne kipwano kyami na Leza bikomenanga’ko pomona muswelo waunkwatakanya.”

“Kokilangalanga, wikale musonge nansha nkunga, ukekala na nsangaji shi upa Yehova Leza kyokya kitabukile kunengela.”Claudia

Bukunga kebufwaninwepo kwikala bu kiselwa. Claudia ubweja’ko amba: “Kokilangalanga, wikale musonge nansha nkunga, ukekala na nsangaji shi upa Yehova Leza kyokya kitabukile kunengela.”Ñimbo ya Mitōto 119:1, 2.