Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Lelo Buludiki bwa Bible Budi na Mvubu Dyalelo?

Lelo Buludiki bwa Bible Budi na Mvubu Dyalelo?

BAMO BALONDOLOLANGA’MBA AA. Dokitele umo wanenene amba kuludikwa na Bible kudi pamo bwa kufundija shimi na kitabo kya mu myaka ya 1920. Muntu kakulupilepo Bible ubwanya’nka ne kukwipangula shi ubwanya kwingidija kataloge ka olodinatele ya kala mwanda wa kwingidija olodinatele ya panopano. Bamo nabo banenanga’mba Bible ke wa kala kadi kakidipo na mvubu.

Lelo muntu ubwanya namani kwingidija dino dibuku dya kala mu ano mafuku mwendelele busendwe kumeso? Kadi, pa mateba mavule patanwanga madingi amonwa na bavule bu mayampe ne bulombodi palapala bwa panopano. Ku mpangiko ya televijo nako kuletwanga madingi na befundi ba bwino ba ngikadila ya bantu, na bantu balēmekibwe, ne na balembi. Bibīko bya mabuku nabyo bipotejanga mabuku a kwikwasha nao, ne kino kitwejanga midiyo ne midiyo ya madolala mu matyapu.

Byokudi ino myanda yonso’i ya panopano, penepo mwanda waka tute mutyima ku Bible​—dibuku dyāpwile kulembwa pano ke padi kintu kya myaka 2 000? Lelo bantu kebakulupilepo Bible badi na bubinga bwa kunenena’mba, kuludikwa na dino dibuku dya kala kudi pamo bwa kufundija shimi na dibuku dya kala nansha kwingidija kataloge ka olodinatele ya kala? Na bubine, uno mulangilo wabo i mufwe-fwē. Sianse ne busendwe bishintanga lubilo lonka, ino le kipangila kya bantu kishintanga? Bantu basakanga kwikala na būmi bwa kitungo, kimfwa kwikala na nsangaji ne mutyima-ntenke, kipwano kiyampe mu kisaka, ne kwikala na balunda bayampe.

Nansha Bible byaālembelwe pa kala, inoko wisambilanga pa ino myanda ne pa mikwabo mivule mine. Kadi wilombolanga’mba i mulembwe ku bukomo bwa mushipiditu na Umpangi wetu. Wituludikanga mu myanda yonso ya mu būmi ne kwituteakanya ku makambakano o-onso. (2 Temote 3:16, 17) Kya mvubu nakampata, uletanga madingi a kamweno nyeke​—mene keakapwepo mvubu nansha dimo! Bible aye mwine unena’mba: “Kinenwa kya Leza i kyūmi.”​—Bahebelu 4:12.

Lelo byobya binena Bible i bya bine? Lelo na bubine ke wa kala’ni nansha i dibuku didi na madingi mayampe kadi a kamweno kotudi dyalelo? Kitungo kya kino Kiteba kya Mulami kibajinji mu manimelo a pa bula, i kya kukukwasha utane malondololo ku bino bipangujo.