Enda ku bidi'mo

Enda ku kifunka

Batumoni ba Yehova

Tonga Ludimi Kiluba

3 Bukwashi bwa Mwa Kulwila na Makambakano

3 Bukwashi bwa Mwa Kulwila na Makambakano

Dyalelo kudi makambakano amo oketubwanyapo kwepuka nansha kupwija. Kimfwa, shi wi mufwilwe muntu osenswe nansha kubela misongo ya zenzeka, kubwanyapo kupwija ano makambakano, ino usakilwa bukwashi bwa mwa kulwila na njia yobikuletela. Lelo Bible ubwanya kukukwasha mu ino ngikadilo mikomo?

MISONGO YA ZENZEKA

Rose, unena’mba: “Mbelanga misongo ya nsange mine indetela misanshi mikatampe kadi ya kyaba ne kyaba. Būmi bwami bwavutakene.” Kintu kimukambakanyanga bininge i kukomenwa kwakomenwanga kyaba kimo kwifunda Bible ne kulonga bintu bikwabo bya ku mushipiditu. Ino wakwashibwe bininge na binenwa bya Yesu bidi mu Mateo 19:26, bya amba: “Kudi Leza bintu byonso bibwanikanga.” Rose wamwene amba kudi miswelo mivule ya mwa kwifundila. Kyaba kimo, misanshi yandi byoyadi imukoleja pa kutanga, washilwile kulonda butangi bwa Bible ne bwa mabuku esambila pa Bible ku mawi makwatwe. * Unena’mba “Shi nkyalongelepo namino, nkiyukilepo mwadi mwa kwikadila būmi bwami bwa ku mushipiditu.”

Kitatyi kikomenwa Rose kulonga bintu byaadi uloñanga, usengibwanga na binenwa bidi mu 2 Kodinda 8:12, bya amba: “Shi mutyima utele’ko bidi, i kitabijibwe nakampata mungya byobya bidi na muntu, ke mungyapo byobya byakadipo nabyo, aa.” Bino binenwa byavulwije Rose amba Leza usangedile bukomo bwalonga, mwanda uloñanga byonso byabwanya kukwatañana na mikalo yandi.

 BULANDA BWA KUFWILWA

Delphine, utelelwe kala, uvuluka’mba: “Pafwile wami mwana mwana-mukaji wa myaka 18, naivwene njia mikatampe, kenanga’mba ne ami mwine nsa kufwa. Buno bulanda kebukampwepo nansha dimo.” Inoko watene busengi bukatampe mu binenwa bidi mu Ñimbo ya Mitōto 94:19, mulembi wa mitōto usapwila’mo Leza amba: “Mu bungi bwa mifwatakanyo munda mwami kusengibwa kobe kubantōkeja ku mutyima wami, tō!” Unena’mba, “Nalombele Yehova ankwashe nonge bintu bitalaja misanshi yami.”

Waanjile kwingila mingilo ya kwilanga. Kyaba kimo, wedingakenye pamo bwa tyaki​—nansha shi i mutyumuke, ulembwanga nandi. Mu muswelo umo onka, nandi wefundile amba nansha byatyumukilwe mutyima, ubwanya kukwasha bantu bakwabo. Uvuluka’mba: “Natulumukile pa kuyuka’mba kwingidija misoñanya ya mu Bible mwanda wa kukankamika bantu bonefundanga nabo Bible, amba o muswelo utalaja Yehova misanshi yami ne kunsenga.” Walembele mulongo wa bantu ba mu Bible bāivwene njia mikatampe kitatyi kimo. Wajingulwile amba, “Kyēbakweshe abo bonso i milombelo.” Kadi wefundile amba “i bikomo kunekenya makambakano shi muntu katangepo Bible.”

Kwifunda Bible kwafundije Delphine kintu kikwabo​—ke kuta mutyima ku bintu bya kumeso kadi, pa kyaba kya kuta’o ku bintu ke bipite kala. Wakankamikilwe na lukulupilo ludi mu Bilongwa 24:15, lwa amba: “Kukekalanga lusangukilo lwa boloke ne bakondame bene kumo.” Le i bika byamukulupije amba Yehova ukasangula wandi mwana mwana-mukaji? Delphine ulondolola’mba: “Mfwatakanyanga mu ñeni mukasangukila wami mwana. Tata wetu ke mutunge kala kino ‘kitatyi.’ Nemonanga twikele nandi pamo mu budimi ne kumusanswa enka na monamusanshidilwe mu difuku dyonamubutwile.”

^ mus. 4 Butangi buvule bwa uno muswelo budi pa diteba dya jw.org.

Bible ubwanya kukukwasha utane busengi nansha ke mu bitatyi bikomo mwine