Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Twi Bantu ba Yehova

Twi Bantu ba Yehova

“Muzo wa nsangaji i owa udi na Leza wao Yehova, bantu batongele bu kintu kyandi.”​—ÑIMBO YA MITŌTO 33:12.

ÑIMBO: 40, 50

1. Mwanda waka tunena’mba Yehova ye mwinē bintu byonso? (Tala kifwatulo ku ngalwilo.)

BINTU byonso i bya Yehova! Ye mwinē madiulu, “enka ne madiulu a madiulu, ne ntanda ne byonso bidi’mo.” (Kupituluka 10:14; Kusokwelwa 4:11) Yehova byaāpangile bantu, o mwanda batwe bonso twi bandi. (Ñimbo ya Mitōto 100:3) Inoko mu bantu bonso bekele’ko, Leza i mutonge’ko bamo bekale ke bantu bandi mu muswelo wa pa bula.

2. Mungya Bible, le i bāni batongelwe na Yehova mu muswelo wa pa bula bu bantu bandi?

2 Kimfwa, mu Ñimbo ya Mitōto 135 i mutelwe batōtyi ba kikōkeji ba Yehova ba mu Isalela wa kala “bu kintu kyandi kya pa bula.” (Ñimbo ya Mitōto 135:4) Kadi, Hosea wānenene bupolofeto bwa amba bantu bamo bampikwa kwikala bene Isalela bakekalanga bantu ba Yehova. (Hosea 2:23) Buno bupolofeto bwāfikidile kitatyi kyāshilwile Yehova kutonga bantu bampikwa kwikala bene Isalela mwanda wa bakabikale na Kidishitu mūlu. (Bilongwa 10:45; Loma 9:23-26) Bano bashingwe māni a mushipiditu betwanga bu “muzo ujila.” I “kintu kya pa bula” kya Yehova. (1 Petelo 2:9, 10) Ino le tunene namani pa bene Kidishitu bonso ba kikōkeji dyalelo, bene badi na lukulupilo lwa kwikala  nyeke pano pa ntanda? Nabo Yehova wibe tanga bu “bantu bami” ne bu “batongwe bami.”​—Isaya 65:22.

3. (a) Le i bāni badi mu kipwano kya pa bula na Yehova dyalelo? (b)  Le i bika byotusa kwisambila’po mu kino kishinte?

3 Dyalelo, “kaluombe katyetye,” kakulupile kukekala’ko nyeke mūlu, ne “mikōko mikwabo,” ikulupile kukekala’ko nyeke pano pa ntanda, batōtanga Yehova pamo bu “luombe lumo.” (Luka 12:32; Yoano 10:16) Tufwaninwe kulombola’mba tufwijanga’ko Yehova pa kipwano kya pa bula kyotupwene nandi. Mu kino kishinte, tusa kwisambila’mo pa muswelo otubwanya kufwija’ko Yehova pa kino kintu kilēme.

TWI BAPĀNE BŪMI BWETU KUDI YEHOVA

4. Le i muswelo’ka otubwanya kufwija’ko Yehova pa kwitupa mukenga wa kupwana nandi, ne Yesu wālongele kino namani?

4 Tulombolanga’mba tufwijanga’ko Yehova potwipāna batwe bene kwadi ne kubatyijibwa. Papo bantu bonso bakamona’mba twi bantu ba Yehova kadi tusakanga kumukōkela. (Bahebelu 12:9) Yesu nandi wālongele uno muswelo paābatyijibwe. Nansha byaādi mu muzo wa bantu bepāne kala kudi Yehova, ino wēpēne aye mwine kudi Yehova. Udi pamo na aye wānenene amba: “A Leza wami, nsakanga kulonga kiswa-mutyima kyobe.”​—Ñimbo ya Mitōto 40:7, 8, kunshi kwa dyani.

5, 6. (a) Le i bika byānenene Yehova pābatyijibwe Yesu? (b) Le i kimfwa’ka kibwanya kwitukwasha tuyuke mwiivwaninanga Yehova potwipāna kwadi?

5 Lelo Yehova wēivwene namani kitatyi kyābatyijibwe Yesu? Bible unena’mba: “Yesu pa kupwa kubatyijibwa, ponkapo waabuka mu mema; kadi tala! madiulu ashituka, wamona mushipiditu wa Leza utūka pamo bwa nkunda wiya pādi. Kadi, tala! Kwatamba ne diwi mūlu kedinena’mba: ‘Uno’u i wami Mwana, muswedibwe, ondoelelwe.’” (Mateo 3:16, 17) Yesu wādi kala muntu wa Leza. Inoko Yehova wāsangele bininge pa kumona’mba Yesu waitabija kwingidija būmi bwandi mwanda wa kumwingidila’nka aye kete. Yehova usangalanga potupāna būmi bwetu kwadi, kadi uketwesela.​—Ñimbo ya Mitōto 149:4.

6 Inoko Yehova udi kala na bintu byonso! Le i kika kyotubwanya kumupa? Fwatakanya’po bidi mwana-mulume umo udi na budimi bwandi bwa maluba mayampe. Difuku dimo wandi mwana nkasampe mwana-mukaji waape’ko diluba dimo ne kupa’dyo shandi. Nansha maluba byoadi kala andi, inoko uno mbutwile wa buswe wasangela kino kyabuntu. Kino kilombola’mba wandi mwana umusenswe. Dino diluba dyamupa wandi mwana i dilēme bininge kwadi kupita maluba makwabo ashele mu budimi. Mu muswelo umo onka, Yehova nandi usangalanga potupāna būmi bwetu na mutyima umo kwadi.​—Divilu 34:14.

7. Lelo Malaki witukwasha namani tuyuke mwiivwaninanga Yehova pa boba bamwingidila na mutyima tō?

7 Tanga Malaki 3:16. Mwanda waka kupāna būmi bobe kudi Yehova ne kubatyijibwa kudi na mvubu? Na bubine tamba’tu ushilula kwikala’ko, waikele kala wa Umpangi obe, Yehova. Ino langulukila pa mukasangela Yehova shi ubamwitabija ekale Muludiki obe ne kwipāna abe mwine kwadi! (Nkindi 23:15) Yehova uyukile boba bamwingidila na mutyima umo, kadi ulembanga majina abo mu wandi “mukanda wa kivulukilo.”

8, 9. Lelo i bika bilomba Yehova ku boba balembelwe majina abo mu wandi “mukanda wa kivulukilo”?

8 Shi tusaka dijina dyetu dishale nyeke mu “mukanda wa kivulukilo” wa Yehova, kudi kintu kyotufwaninwe kulonga. Malaki  wānenene amba tufwaninwe kutyina Yehova ne kulangulukila pa dijina dyandi. Shi tutōte muntu nansha kintu kampanda, nabya dijina dyetu dikabulwa mu mukanda wa Yehova!​—Divilu 32:33; Ñimbo ya Mitōto 69:28.

9 Nanshi kulaya’tu Yehova amba tusa kulonga kiswa-mutyima kyandi ne kubatyijibwa ke kubwenepo. Bino i bintu byotuloñanga musunsa’tu umo, inoko kutōta Yehova bo būmi bwetu. Difuku ne difuku, potukidi bōmi, tufwaninwe kulombola kupityila ku byotulonga’mba tukōkele Yehova.​—1 Petelo 4:1, 2.

TUPELEI BYA KUSAKASAKA BYA INO NTANDA

10. Lelo i kwishila’ka kwa patōkelela kufwaninwe kwikala pa bukata bwa boba bengidila Yehova ne boba kebamwingidilapo?

10 Mu kishinte kibadikile, twafundile’mo amba Kaini, Solomone, ne bene Isalela bādi betela’mba batōtanga Yehova inoko kebādipo bamukōkele. Bino bimfwa bitufundija’mba kwitela’tu amba tutōtanga Yehova ke kubwenepo. Tufwaninwe kushikwa bibi ne kusanswa biyampe. (Loma 12:9) Yehova unena’mba kufwaninwe kwikala kwishila kwa patōkelela “pa bukata bwa muntu moloke ne muntu mubi, pa bukata bwa yewa wingidila Leza ne yewa kamwingidilapo.”​—Malaki 3:18.

11. Mwanda waka tufwaninwe kulengeja bantu bakwabo bapēlelwe kwituyuka’mba tutōtanga’nka Yehova kete?

11 Tufwijanga’ko Yehova pa kwitutonga kwaetutongele twikale bu bantu bandi! Bantu bonso bafwaninwe kupēlelwa kwituyuka’mba tudi ku mutamba wa Yehova. (Mateo 5:16; 1 Temote 4:15) Wiipangule amba: ‘Le bantu bakwabo bamonanga’mba ne mukōkele bininge kudi Yehova? Lelo nsangelanga kwitela ku bantu amba ne Kamoni wa Yehova?’ Fwatakarnya’po bidi mukafityilwa Yehova shi twivwana bumvu bwa kulombola bantu bakwabo amba twi bantu bandi.​—Ñimbo ya Mitōto 119:46; tanga Mako 8:38.

Lelo mwikadilo obe wa mu būmi ukuyukanyanga patōkelela’mba wi Kamoni wa Yehova? (Tala musango 12, 13)

12, 13. Lelo Batumoni bamo i balengeje namani bantu bakomenwe kwibayuka bu Batumoni ba Yehova?

12 I kya bulanda, mwanda’nka ne Batumoni  bamo beulanga ‘mushipiditu wa ino ntanda.’ Mfulo mfulō, kebakishidilepo na boba kebatōtapo Yehova. (1 Kodinda 2:12) ‘Mushipiditu wa ino ntanda’ ulengejanga bantu bate mutyima bininge ku bya kusakasaka bya abo bene. (Efisesa 2:3) Kimfwa, nansha byotupēbwanga madingi mavule pa muvwadilo, ino bamo i batonge kuvwala pampikwa butūkanye. Bavwalanga tulamata ne bisandi bimwekeja bipindi bya bumvu, enka ne ku kupwila kwa bwine Kidishitu kwine. Kadi batoñanga myondele ya nywene mipite’byo kipimo. (1 Temote 2:9, 10) Ku mfulo, bantu bakwabo babwanya kukomenwa kwituyuka shi twi Batumoni ba Yehova, nansha shi ke twi Batumonipo.​—Yakoba 4:4.

13 Kudi mu myanda mikwabo mukomenwanga Batumoni bamo kwishiyañanya patōkelela na ino ntanda. Kimfwa ku mafetyi, bamo bajanga ne kwiendeja mu muswelo keufwaninwepo ku bene Kidishitu. Bamo batūdile abo mafoto ne binenwa pa marezo a mīsambo pa Entelenete bilombola mulangilo wabo wa bungitu. Nansha byokebalongelepo bubi bukatampe bwa kutyibilwa butyibi mu kipwilo kya bwine Kidishitu, inoko babwanya kwikala na lupusa lubi pa batutu ne bakaka beelela’ko kwishiyañanya na ntanda.​—Tanga 1 Petelo 2:11, 12.

Kokatādilwa na lupusa lubi lwa boba kebelombolapo patōkelela’mba badi ku mutamba wa Yehova

14. Lelo i bika byotufwaninwe kulonga pa kulama kipwano kyetu kya pa bula na Yehova?

14 Bintu byonso bya mu ino ntanda i bilongwe mwanda wa kwitulengeja tute mutyima ku “bya kusakasaka bya ngitu ne bya kusakasaka bya meso ne kwimwekeja na mitatulo pa byobya byodi nabyo mu būmi.” (1 Yoano 2:16) Byotudi bantu ba Yehova, twi beshile na ino ntanda. Tupelanga “bumpikwa bwine Leza ne bya kusakasaka bya ino ntanda,” ino twiendejanga “na ñeni mibwane ne boloke ne bwine Leza mu ino ngikadilo ya bintu.” (Tetusa 2:12) Mwikadilo wetu wa mu būmi, kubadila’mo ne muneneno, mudīlo, mutomeno, muvwadilo, ne mwingidilo, bifwaninwe kulengeja bantu bakwabo betuyuke patōkelela’mba twi bantu ba Yehova.​—Tanga 1 Kodinda 10:31, 32.

 ‘TWISANSWEI BININGE BATWE BENE NA BENE’

15. Mwanda waka tufwaninwe kwikala na kanye ne buswe ku bakwetu bene Kidishitu?

15 Tulombolanga’mba tukwete na mvubu kipwano kyetu na Yehova kupityila ku muswelo otwikele na batutu ne bakaka. Nabo i bantu ba Yehova pamo bwa batwe. Shi tuvuluka nyeke kino, nabya tukebalongela nyeke bintu na kanye ne buswe. (1 Tesalonika 5:15) Le kino kidi na mvubu’ka? Yesu wālombwele balondi bandi amba: “Pa kino bonso bakayuka’mba mwi bami bana ba bwanga​—shi mudi na buswe umbukata mwenu.”​—Yoano 13:35.

16. Lelo i bika byotwifunda ku Bijila bya Mosesa pa mwanda utala buswe bwa Yehova ku bantu bandi?

16 Kimfwa kimo kya mu Bijila bya Mosesa kibwanya kwitukwasha tuyuke mwa kwikadila na bakwetu mu kipwilo. Mu tempelo ya Yehova, mwādi bipungwa byādi bingidijibwa’nka pa mwanda wa butōtyi kete. Bijila byāshintulwile patōkelela muswelo wādi ufwaninwe bene Levi kulama bino bipungwa, ne ense wa kupela kulonda buno bulombodi wādi ufwaninwe kwipaibwa. (Umbadilo 1:50, 51) Shi Yehova wātele mutyima ku muswelo wādi wingidija bantu bipungwa mu mutōtelo wandi, nanshi na bubine utele mutyima bininge ku muswelo otwikele na bantu bepēne kwadi, ke batōtyi bandi ba kikōkeji kadi! I mwitukwashe tuyuke motwikadile na mvubu ku meso andi panena’mba: “Yewa ense wimutenga, uteñanga nkishi wa mu diso dyami.”​—Zekadia 2:8.

17. Lelo Yehova ‘utele mutyima ne kwivwana’ ku bika?

17 Malaki wānenene amba Yehova “utele’ko mutyima ne kwivwana” ku muswelo wikele bantu bandi abo bene na bene. (Malaki 3:16) Yehova “uyukile bandi.” (2 Temote 2:19) Uyukile bintu byonso byotunena ne byotulonga. (Bahebelu 4:13) Shi ketulongelapo batutu ne bakaka bintu na kanye, Yehova witumonanga. Ino kadi tukulupile amba Yehova witumonanga shi tudi na kizaji, buntu, lulekelo, ne kanye.​—Bahebelu 13:16; 1 Petelo 4:8, 9.

“YEHOVA KAKELAPO BANTU BANDI”

18. Le tukafwija’ko Yehova namani pa kwitutonga kwaetutongele twikale bantu bandi?

18 Tufwaninwe kulombola’mba tufwijanga’ko Yehova pa kwikala bu bantu bandi. Tuyukile amba potwapēne būmi bwetu kwadi, twakwete butyibi bwa tunangu mpata. Nansha byotudi “mu lukongo lukondame ne lunyengakane,” tubwanya kwikala “bampikwa kutopekwa ne bampikwa mambo” ne kumunika “pamo bwa bimuni mu ino ntanda.” (Fidipai 2:15) Nanshi tusumininwei kwepuka kulonga kintu kyo-kyonso kishikilwe Yehova. (Yakoba 4:7) Kadi tusanswei ne kulēmeka batutu ne bakaka, mwanda nabo i bantu ba Yehova.​—Loma 12:10.

19. Lelo Yehova ukapala bantu bandi namani?

19 Bible wālaile amba: “Yehova kakelapo bantu bandi.” (Ñimbo ya Mitōto 94:14) Kino kitupa kikulupiji kya binebine. Nansha shi kubalongeka kintu’ka, Yehova ukekala netu. Nansha tufwe, kaketwilwapo. (Loma 8:38, 39) “Shi twi bōmi, twi bōmi pa mwanda wa Yehova, kadi shi tufwe, tubafu pa mwanda wa Yehova. Nanshi shi twikale bōmi nansha tufwe, twi bantu ba Yehova.” (Loma 14:8) Tutengele kitatyi kikasangula Yehova balunda nandi bonso ba kikōkeji bafwile. (Mateo 22:32) Kadi tamba’nka pano tudi na byabuntu bya kutendelwa bitupele Tata wetu. Enka na munenena’kyo Bible, “muzo wa nsangaji i owa udi na Leza wao Yehova, bantu batongele bu kintu kyandi.”​—Ñimbo ya Mitōto 33:12.