Enda ku bidi'mo

Enda ku kifunka

Batumoni ba Yehova

Tonga Ludimi Kiluba

“I Ani Udi ku Mutamba wa Yehova?”

“I Ani Udi ku Mutamba wa Yehova?”

“Ukatyina Yehova Leza obe, ukamwingidila, ukamulamata.”​—KUPITULUKA 10:20.

ÑIMBO: 28, 32

1, 2. (a) Mwanda waka i kya mvubu kwikala ku mutamba wa Yehova? (b) Le i bika byotusa kubandaula mu kino kishinte?

I KYA mvubu tulamate nyeke kudi Yehova. I kutupu nansha umo udi na bukomo, tunangu, ne buswe pamo bwa aye! O mwanda, tusakanga nyeke kwikala ku mutamba wandi ne kumulamata. (Ñimbo ya Mitōto 96:4-6) Inoko bantu bamo bādi batōta Leza bākomenwe kufikila pa kino.

2 Mu kino kishinte, tusa kubandaula’mo bimfwa bya bantu bamo bādi betela bu badi ku mutamba wa Yehova koku kadi balonga bintu bishikilwe Yehova. Bufundiji bwa kamweno botwifunda ku bimfwa byabo bubwanya kwitukwasha tulamate nyeke kudi Yehova.

YEHOVA UBANDAULANGA MUTYIMA WETU

3. Mwanda waka Yehova wākweshe Kaini, ne i bika byaāmusapwidile?

3 Langulukila pa kimfwa kya Kaini. Kādipo utōta baleza ba bubela, ino nansha nankyo Yehova kāitabijepo butōtyi bwandi. Mwanda waka? Yehova wāmwene milangwe mibi mu  mutyima wa Kaini. (1 Yoano 3:12) Penepa Yehova wādyumuna Kaini amba: “Shi walamuke kolonga biyampe, mbulwepo kukutōkelwa mutyima monka? Ino shi kwalamukilepo kulonga biyampe, bubi butengele pa kibelo, kadi bwabilanga kukubikala; ino le ukebunekenya?” (Ngalwilo 4:6, 7) Yehova wālombwele patōka’mba shi Kaini esāse ne kutonga kwikala ku wandi mutamba, nabya Nandi ukekala ku mutamba wa Kaini.

4. Lelo Kaini wālongele namani paāpelwe mukenga wa kwikala ku mutamba wa Yehova?

4 Shi Kaini wāshintyile milangwe yandi, Yehova wādi wa kwitabija butōtyi bwandi. Inoko Kaini kātejejepo Leza, mfulo mfulō milangwe yandi mibi ne bya kusakasaka byandi byāmufikija ku bilongwa bibi. (Yakoba 1:14, 15) Kaini paākidi nkasampe, padi kādipo ufwatakanya nansha dimo amba ubwanya kukatombokela Yehova. Inoko pano wāfutulwile kidyumu kya Leza, wātombokela Leza, ne kwipaya mwanabo!

5. Le i milangwe’ka ibwanya kwitulengeja tujimije dyese dya kwitabijibwa na Yehova?

5 Pamo bwa Kaini, mwine Kidishitu dyalelo ubwanya kwitela’mba utōtanga Yehova koku kadi ulonga bintu bishikilwe Yehova. (Yude 11) Ubwanya kusapula bininge ne kutanwa ku kupwila kitatyi ne kitatyi. Inoko kadi, ubwanya kutādilwa na milangwe ya busekese, makomwa-meso, nansha na mushikwa. (1 Yoano 2:15-17; 3:15) Ino milangwe ibwanya kumufikija ku bilongwa bibi. Nansha shi bantu bakwabo kebayukilepo byotulanga ne byotulonga, inoko Yehova wibiyukile. Uyukile shi ketudipo ku mutamba wandi na mutyima umo.​—Tanga Yelemia 17:9, 10.

6. Le Yehova witukwashanga namani tunekenye bya kusakasaka bibi?

6 Nansha shi tubalonga bilubo, Yehova ketwelangapo bukidibukidi. Shi ketwiendeja mu muswelo uleta kyaka, Yehova witwitanga’mba: “Jokelai kondi, nami nkajokela komudi.” (Malaki 3:7) Yehova wivwanije amba tulwanga na bukōkekōke. Inoko witusakilanga twimanije nyeke ne kulwa na bibi. (Isaya 55:7) Shi tulonge namino, i mulaye amba uketukwasha ne kwitupa bukomo botusakilwa pa kunekenya bya kusakasaka byetu bibi.​—Ngalwilo 4:7.

KOKIONGOLA

7. Le Solomone wājimije namani kipwano kyandi na Yehova?

7 Solomone paādi nkasampe, wādi mu kipwano kiyampe na Yehova. Leza wāpele Solomone tunangu tuvule ne mwingilo wa mvubu wa kūbaka tempelo milumbuluke mu Yelusalema. Ino yō, Solomone wājimije kipwano kyandi na Yehova. (1 Balopwe 3:12; 11:1, 2) Bijila bya Leza byānenene amba mulopwe “kafwaninwepo kusonga bakaji bavule kutyina’mba mutyima wandi wakasāsuka.” (Kupituluka 17:17) Solomone kākōkelepo kino kijila. Ku mfulo, wāikala na bakaji 700 ne bakaji 300 ba pafula! (1 Balopwe 11:3) Bavule mu bano bana-bakaji bādi ba mizo ingi bene bādi batōta baleza ba bubela. Kadi Solomone kākōkelepo kijila kya Leza kya kuleka kusonga bana-bakaji ba mizo ingi.​—Kupituluka 7:3, 4.

8. Le Solomone wālubīle Yehova muswelo’ka?

8 Solomone wājimije bityebitye buswe bwaādi usenswe bijila bya Yehova. Mfulo mfulō, wālonga bintu bibibibi. Wāubakila leza mukaji Ashetolete ne Kemoshi leza wa bubela bisōkelo, kupwa waānza kutōta bano baleza ba bubela pamo na bandi bakaji. Solomone wāubakile bino bisōkelo pa lūlu lwitadidile na Yelusalema, mwine mwaāubakile tempelo ya Yehova! (1 Balopwe 11:5-8; 2 Balopwe 23:13) Padi Solomone  weongwele na kulanga’mba Yehova kamwenepo bino bilongwa bibibibi byaādi ulonga koku kadi wendelela na kulambula bitapwa ku tempelo.

9. Le i bika byālongekele pāpelele Solomone kuteja bidyumu bya Leza?

9 Inoko Yehova kāidilwepo buno bubi nansha dimo. Bible unena’mba: “Yehova wakalabela Solomone, mwanda mutyima wandi wasāsukile kudi Yehova.” Leza wātompele kukwasha Solomone. Yehova “wamumwekele misunsa ibidi ne wamudyumwine pa uno mwanda amba kufwaninwepo kulonda baleza bangi. Ino aye kakōkelepo byamusoñenye Yehova.” Mfulo mfulō, wābulwa kwitabijibwa ne kukwashibwa na Leza. Yehova kālekelepo bana ba Solomone babikale pa Isalela yense, kadi bālwile na makambakano mavule mu bula bwa myaka tutwa na tutwa.​—1 Balopwe 11:9-13.

10. Le i bika bibwanya konakanya kipwano kyetu na Yehova?

10 Shi tutonge balunda bapela kuteja nansha kulēmeka misoñanya ya Leza, nabya babwanya kwikala na lupusa lubi pa mulangilo wetu ne kutyumuna kipwano kyetu na Yehova. Babwanya kwikala ba mu kipwilo, inoko kebadipo mu kipwano kikomo na Yehova. Pakwabo i babutule, balondakani, bakwetu ba ku kaji, nansha bakwetu ba ku masomo kebatōtapo Yehova. Shi bantu botupityija nabo kitatyi kilampe kebalondangapo misoñanya ya Yehova mu bwabo būmi, babwanya kwitulengeja netu tujimije kipwano kyetu na Leza.

Lelo bantu bopwene nabo badi na lupusa’ka pa kipwano kyobe na Yehova? (Tala musango 11)

11. Le i bika bibwanya kwitukwasha pa kutonga balunda?

11 Tanga 1 Kodinda 15:33. Bantu bavule badi na ngikadila imoimo miyampe. Kadi boba kebatōtangapo Yehova kebaloñangapo nyeke bintu bibi. Padi uyukile’ko bantu bamo badi namino. Le ko kunena’mba i balunda bayampe? Eyo, ino i muswelo’ka obakekala na lupusa pa kipwano kyobe na Yehova? Lelo bakakukwasha ufwene kudi Leza? Le bano bantu bamwene bintu’ka na mvubu? Le i bika byobavudile kwisambila’po? Lelo bavudile kwisambila pa myondele ya bisandi, lupeto, bingidilwa bya busendwe, kwipwija mukose, ne bikwabokwabo bidi bwa bino? Le bafutululanga bantu bakwabo? Le basenswe mizaulo mibi? Yesu wādyumwine amba: “Kyakanwa kinenanga byobya biyudile ku mutyima.” (Mateo 12:34) Shi ubajingulula’mba bantu bopityija nabo kitatyi babwanya kōna kipwano kyobe na Yehova, nabya longa’po kintu pampikwa kwija! Tyepeja kitatyi kya kwitana nabo, kadi shi i byendele’mo, tyiba nabo bulunda.​—Nkindi 13:20.

 YEHOVA USAKANGA TUMULAMATE

12. (a) Lelo Yehova wālombwele bene Isalela bika pobāpwile’tu kutamba mu Edipito? (b) Le bene Isalela bānenene bika pebālombele Leza bamulamate?

12 Kadi tubwanya kuboila ñeni ku byobya byālongekele pākūdile Yehova bene Isalela mu Edipito. Bantu pa kwibungila ku Lūlu lwa Shinai, Yehova wēlombwele kobadi mu kingelengele! Bāmona dikumbi difita fututu, mapeni, ne mwishi, kupwa bāivwana mikungulo ne lunwa lukatampe pamo bwa kuvuma kwa lusengo. (Divilu 19:16-19) Ku mfulo bāivwana Yehova unenena’mba aye i “Leza usakanga kulamatwa bunka.” Wālaile amba ukalamata boba bamusenswe ne kukōkela mbila yandi. (Tanga Divilu 20:1-6.) Yehova wādi usaka bene Isalela bayuke amba shi bekale nyeke ku mutamba wandi, nabya nandi ukekala ku wabo mutamba. Shi wādi mu kino kibumbo, le wadi wa kwiivwana namani pa kwivwana bino binenwa bya Yehova? Padi wadi wa kulondolola pamo bwa bene Isalela bānenene amba: “Binenwa byonso byanena Yehova, twitabije kwibilonga.” (Divilu 24:3) Ino ne kwija kwine mpika, kwālongeka kintu kimo kyātūdile lulamato lwa bene Isalela kudi Leza pa ditompo. Le kyādi kintu’ka?

13. Lelo i kika kyātūdile lulamato lwa bene Isalela pa ditompo?

13 Bene Isalela bāzakele pobāmwene bukomo bwa Leza mu kingelengele, penepa Mosesa wākanda ku Lūlu lwa Shinai ne kwisamba na Yehova pa kyabo kyaba. (Divilu 20:18-21) Ino pāpita kitatyi kilampe Mosesa kutupu kujokela mu nkambi. Bimweka’mba bantu bāshele mu ntanda mutuputupu pampikwa mwendeji wabo. Le bālongele’po namani? Bimweka’mba bene Isalela bādi bakulupile bininge muntu, ke mwendeji wabo Mosesa kadi. Bāloba ne kunena Alone amba: “Witulongele leza wa kwitutangidila kumeso, mwanda ketuyukilepo kyafikila uno Mosesa, mwine wetulupwile mu ntanda ya Edipito.”​—Divilu 32:1, 2.

14. Le bene Isalela bēongwele namani, ne Yehova wālongele’po namani?

14 Bene Isalela bādi bayukile amba i bibi kutōta bankishi. (Divilu 20:3-5) Inoko bukidi bonka bāshilula kutōta kyana kya ñombe kya olo! Nansha byobāpelele kukōkela mbila ya Yehova, ino bēongwele abo bene na kulanga’mba bakidi ku mutamba wa Yehova. Alone wāityile’nka ne butōtyi bwa kino kyana kya ñombe bu “masobo a Yehova”! Le Yehova wālongele’po namani? Wāsapwidile Mosesa amba bantu “abalonga bya kiboja” ne kuleka dishinda “dyonebalombwele kwenda’mo.” Yehova wāfitwa bininge kasake konakanya muzo onso mutuntulu.​—Divilu 32:5-10.

15, 16. Le ba Mosesa ne Alone bālombwele namani amba balamete bininge ku mutamba wa Yehova? (Tala kifwatulo ku ngalwilo.)

15 Inoko Yehova i Leza wa lusa. Wālekele konakanya uno muzo. Ino, wāpa bene Isalela mukenga wa kulombola shi basakanga kushala ku mutamba wandi. (Divilu 32:14) Mosesa paāmwene bantu batūta kyungwe, bemba, ne kujila uno nkishi, wālala bibesebibese kino kyana kya ñombe kya olo ne kwikitwa bukula. Kupwa wāela lubila’mba: “I ani udi ku mutamba wa Yehova? Āye kondi!” Penepo “bene Levi bonso bamubumba.”​—Divilu 32:17-20, 26.

16 Nansha Alone byaālongele kyana kya ñombe kya olo, wēsāshile pamo na bene Levi bakwabo, bātonga kwikala ku mutamba wa Yehova. Bano bantu ba lulamato bēlombwele patōkelela’mba kebadipo ku mutamba wa banonga-bibi. Buno bwādi  butongi bwa tunangu, mwanda enka mu dine difuku’dya kwāfwile bantu tununu ne tununu bātōtele kyana kya ñombe kya olo. Ino boba bādi ku mutamba wa Yehova bāpanda, kadi Leza wālaile kwibesela.​—Divilu 32:27-29.

17. Lelo i ñeni’ka yotuboila ku byobya byālembele Polo pa mwanda utala kyana kya ñombe kya olo?

17 Le i ñeni’ka yotuboila’ko? Mutumibwa Polo wānenene amba: “Bino bintu’bi byāikele ke bimfwa kotudi,” amba tuleke “kutōta bilezaleza.” Polo wāshintulwile amba bino bintu “byālembelwe bu kidyumu kotudi batwe bafikilwa na mfulo ya ngikadilo ya bintu. Nanshi yewa ulanga’mba wimene atadije kutyina’mba wakapona.” (1 Kodinda 10:6, 7, 11, 12) Enka na mwānenene’kyo Polo, nansha ke boba batōta Yehova bene bakokeja kuponena mu bilongwa bibi. Babwanya’nka ne kulanga’mba bakidi betabijibwe na Yehova. Ino shi muntu ufwatakanya’tu kwikala mulunda na Yehova nansha kwitela bitupu amba udi na lulamato, kino kekishintululapo amba i mwitabijibwe na Yehova.​—1 Kodinda 10:1-5.

18. Le i bika bibwanya kwitusonsolola kudi Yehova, ne i bika bibwanya kulupuka’ko?

18 Mosesa pakātūkilepo bukidibukidi ku Lūlu lwa Shinai na mwādi musakila bene Isalela, penepo bene Isalela bāloba. Shi mfulo ya ino ngikadilo nayo keifikilepo bukidibukidi na motwibisakila, padi netu tubwanya kuloba. Tubwanya ne kushilula kulanga’mba milao ya kutendelwa ilaile Yehova ikidi kulampe ne kwiitatana, kadi tubwanya kwanza kuta mutyima ku masakila etu kupita’ko ku byobya bitusakila Yehova. Shi ketutele’kopo mutyima, tubwanya kusonsoloka kudi Yehova ne kulonga bintu byoketwadipo tufwatakanya nansha dimo.

19. Le i bika byotufwaninwe kuvuluka nyeke, ne mwanda waka?

19 Yehova usakanga tumukōkele bininge ne kumutōta’nka aye kete. (Divilu 20:5) Mwanda waka witusakila tulonge kino? Mwanda witusenswe. Shi ketulongapo byobya bitusakila Yehova, nabya tukalonga byobya bitusakila Satana, ne kino kiketusansa bininge. Polo wānenene amba: “Kemubwanyapo kutoma kitomeno kya Yehova ne kitomeno kya bandemona; kemubwanyapo kudya ku “meza a Yehova” ne ku meza a bandemona.”​—1 Kodinda 10:21.

IKALA NYEKE PABWIPI NA YEHOVA!

20. Le Yehova ubwanya kwitukwasha namani nansha shi tubalonga kilubo?

20 Kaini, Solomone, ne bene Isalela, bonso bāpelwe mukenga wa kwisāsa ne kushinta mwiendelejo wabo. (Bilongwa 3:19) Bine, Yehova kepejejangapo kwela bantu mwanda’po’tu abalonga kilubo. Langulukila pa muswelo waāfwidile Alone lusa. Dyalelo, Yehova witupanga bidyumu bya buswe mwanda wa kwitukinga ku kulonga bibi. Wingidijanga Bible, mabuku etu, ne bakwetu bene Kidishitu. Shi tuta mutyima ku bidyumu bya Yehova, nabya tubwanya kukulupila’mba uketufwila lusa.

21. Lelo i bika byotufwaninwe kulonga shi lulamato lwetu kudi Yehova lubatūlwa pa ditompo?

21 Kanye ka Yehova ka ku buntu bitupu kadi na kitungo. (2 Kodinda 6:1) Ketupanga mukenga wa “kupela bumpikwa bwine Leza ne bya kusakasaka bya ino ntanda.” (Tanga Tetusa 2:11-14.) Mu ino ngikadilo, mukekala nyeke bintu bitūla lulamato lwetu kudi Yehova pa ditompo. Nanshi sumininwa kushala nyeke ku mutamba wa Yehova, kadi vuluka’mba ‘ufwaninwe kutyina Yehova Leza obe, kumwingidila, ne kumulamata!’​—Kupituluka 10:20.