Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Le Uyukile Mwa Kutelela Bitatyi?

Le Uyukile Mwa Kutelela Bitatyi?

Le shi usaka kuyuka bitatyi, uloñanga namani? Padi utalanga pa nsá ya pa kuboko nansha ya ku lubumbu. Shi mulunda nobe wakwipangula nsá, le ukeitela namani? Kudi miswelo mishileshile ya kutela nsá. Namani?

Tunenene bidi amba ke nsá imo ne minite 30 ya kyolwa. Ubwanya kulondolola’mba ke 1:30. Kukwatañana na kifuko kyoshikete ne bibidiji bidi’ko, ubwanya ne kwiitela’mba ke 13:30. Uno muswelo wa kutela nsá wimanine pa buvule bwa mansá 24 a pa difuku. Kudi enka ne bifuko kobakokeja kutela kino kitatyi kimo kyonka’mba “kubashala kipindi,” ko kunena’mba kubashala minite 30 ibwane 2:00.

Byodi mutangi wa Bible, ubwanya kwiipangula mwādi mutelelwa nsá na bantu ba mu kitatyi kyālembelwe Bible. Kekwādipo muswelo umo wa kwiitela. Kipindi kya mu Bible kya Kihebelu kitela “lubanga,” “dyuba mu mitwe,” ne “kyolwa.” (Ngalwilo 8:11; 19:27; 43:16; Kupituluka 28:29; 1 Balopwe 18:26) Inoko kudi ne patelelwe nsá minemine.

Mu bitatyi byāsonekelwe Bible, bantu bādi na kibidiji kya kwingidija batulama. Bādi bavudile kwibengidija nakampata bufuku. Myaka tutwa na tutwa Yesu kabutwilwe, bene Isalela bāabenye bufuku mu bipindi bisatu bitwa bu bilo. (Ñimbo ya Mitōto 63:6) Mu Batyibi 7:19 i mutelwe “kilo kya pa bukata bwa bufuku.” Kubwipi na mu mafuku a Yesu, Bayuda bāitabije muswelo wa Bangidiki ne bene Loma wa kwabanya bufuku mu bilo biná.

Maevanjile esambila misunsa mivule pa bino bilo. Kimfwa, mwādi mu “kilo kya buná kya bufuku” mwālandele Yesu pa mema wenda kudi bandi bana ba bwanga. (Mateo 14:25) Yesu wānenene mu kyelekejo kimo amba: “Shi mwinē njibo wadi uyukile kilo kine kīya ngivi, longa kadipo wa kulāla ne kadipo wa kuleka batūte yandi njibo.”​—Mateo 24:43.

Yesu wātelele bilo byonso biná paāsapwidile bandi bana ba bwanga’mba: “Nanshi keshai’nka kukesha mwanda kemuyukilepo kitatyi kīya mwinē njibo, shi i kyolwa bininge, shi i pa bukata bwa bufuku, shi i ku mazolo, nansha i lubanga bwē.” (Mako 13:35) Kilo kibajinji i kya “kyolwa bininge,” tamba ku kupona kwa dyuba kutūla ku kintu kya 9:00 ya bufuku. Kilo kya bubidi i kya “pa bukata bwa bufuku,” tamba ku kintu kya 9:00 ya bufuku kutūla pa bukata bwa bufuku. Kilo kya busatu kyātelelwe bu “ku mazolo,” nansha ‘nzolo pa kudila,’ tamba pa bukata bwa bufuku kutūla ku kintu kya 3:00 ya lubanga. Bimweka’mba i pa kino kilo pādidile nzolo bufuku bobākwete Yesu. (Mako 14:72) Kilo kya buná kya bufuku i kya “lubanga bwē,” tamba kintu kya 3:00 ya lubanga kutūla ne ku kutamba kwa dyuba.

Nansha bantu ba mu kitatyi kyālembelwe Bible byokebādipo na bingidilwa bya dyalelo bya kuyukila’ko kitatyi, abo nabo bādi na muswelo wa kutela nsá dyuba nansha bufuku.