Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Ba Nsangaji I Boba Bengidila “Leza wa Nsangaji”

Ba Nsangaji I Boba Bengidila “Leza wa Nsangaji”

“Ba nsangaji i boba bantu badi na Leza wabo Yehova!”​—ÑIMBO YA MITŌTO 144:15.

ÑIMBO: 44, 125

1. Mwanda waka Batumoni ba Yehova i bantu ba nsangaji? (Tala kifwatulo ku ngalwilo.)

BATUMONI BA YEHOVA i bantu ba nsangaji. Ponso pobebunga pamo, ekale ku kupwila, ku bitango, nansha ke ku mafetyi, besambanga koku basepa. Mwanda waka badi na nsangaji uno muswelo? I mwanda’tu bayukile Yehova, “Leza wa nsangaji.” Bamwingidilanga ne kulonga bukomo bwa kumwiula. (1 Temote 1:11; Ñimbo ya Mitōto 16:11) Yehova ye nsulo ya nsangaji, o mwanda usaka netu twikale na nsangaji, kadi witupanga bubinga buvule bwa kwikadila na nsangaji.​—Kupituluka 12:7; Musapudi 3:12, 13.

2, 3. (a) Le kwikala na nsangaji kushintulula bika? (b) Mwanda waka tubwanya kukomenwa kwikala na nsangaji?

2 Le abe nobe? Le udi na nsangaji? Kwikala na nsangaji i kwiivwana biyampe, kusangela bobe būmi nansha kuloelelwa bininge. Bible ulombola’mba boba beselwe na Yehova bo babwanya kwikala na nsangaji ya bine. Inoko mwanda waka tubwanya kukomenwa kwikala na nsangaji mu ntanda ya dyalelo?

3 Tubwanya kukomenwa kwikala na nsangaji potudi mu  ngikadilo mikomo, kimfwa shi muntu otusenswe wafu nansha kupangwa mu kipwilo, shi tubelubula nansha kutalulwa pa kaji. Kadi tubwanya kukomenwa kwikala na nsangaji shi mu njibo mwetu kemudipo ndoe pa mwanda wa ñuma ya kyaba kyonso, shi betuzawila kudi bakwetu ba ku kaji nansha ba ku masomo, nansha shi tupangwapangwa ne kukutwa pa mwanda wa Yehova otwingidila. Nansha padi i kubela, tubwanya kwikala na misongo ya zenzeka nansha kunyoñama pa mutyima. Ino tuvulukei amba Yesu Kidishitu, “mwine wa nsangaji kadi umo kete wa Lupusa Lukatampe,” nansha Muludiki, usenswe kusenga bantu ne kwibakwasha bekale na nsangaji. (1 Temote 6:15; Mateo 11:28-30) Mu Busapudi bwa ku Lūlu, Yesu wātelele’mo ngikadila ibwanya kwitukwasha twikale na nsangaji nansha shi tudi na makambakano mavule pa mwanda wa ntanda ya Satana yotushikete’mo.

KETUBWANYAPO KWIKALA NA NSANGAJI PAMPIKWA YEHOVA

4, 5. Le tukalonga bika pa kwikala na nsangaji ne kwiilama?

4 Kintu kibajinji kyātelele Yesu kyo kya mvubu mpata. Wānenene amba: “Ba nsangaji i boba bayukile amba kudi byobasakilwa ku mushipiditu, mwanda Bulopwe bwa mūlu i bwabo.” (Mateo 5:3) Shi tuyukile amba kudi byotusakilwa ku mushipiditu, tukajingulula’mba tusakilwa kuyuka Leza ne amba tusakilwa bukwashi ne buludiki bwandi. Le tukalombola kino namani? I na kwifunda Bible, kukōkela Leza, ne kutūla butōtyi botumutōta pa kifuko kibajinji mu bwetu būmi. Kulonga bino bintu kuketukwasha twikale na nsangaji. Kikulupiji kyotukulupile amba milao ya Leza isa kufikidila panopano kikaningila’ko. Kadi “lukulupilo lwa nsangaji” lotutana mu Bible luketukankamika.​—Tetusa 2:13.

5 Shi tusaka kwikala na nsangaji nansha shi tubatanwa na bika mu būmi, tufwaninwe kuningija nyeke kipwano kyetu na Yehova. Mutumibwa Polo wālembele amba: “Sangalai mafuku onso mudi Mfumwetu. Kadi nkanena monka’mba, Sangalai!” (Fidipai 4:4) Pa kupwana bininge na Yehova, tufwaninwe kwikala na tunangu twa bwine Leza. Kinenwa kya Leza kinena’mba: “Wa nsangaji i yewa muntu utana tunangu ne muntu utambula kusansanya. I mutyi wa būmi ku boba bakwete’to, kadi boba bakwatyije’to baketwa bu ba nsangaji.”​—Nkindi 3:13, 18.

6. Le i bika bikwabo byotufwaninwe kulonga pa kwikala nyeke na nsangaji?

6 Inoko pa kusaka twikale nyeke na nsangaji, i biyampe twingidije nyeke byobya byotwifunda mu Bible. Yesu wālombwele mvubu ya kulonga namino paānenene amba: “Shi muyukile bino bintu, mwi ba nsangaji shi mulonga’byo.” (Yoano 13:17; tanga Yakoba 1:25.) Kino kidi na kamweno shi tusaka kuvuija bisakibwa byetu bya ku mushipiditu ne kwikala nyeke na nsangaji. Ino i muswelo’ka otubwanya kwikala na nsangaji byokudi bintu bivule bikokeja kwitujimijija’yo? Tutalei bidi bintu bikwabo byānenene Yesu mu Busapudi bwa ku Lūlu.

NGIKADILA ITULETELA NSANGAJI

7. Le boba badila madilo babwanya kwikala na nsangaji namani?

7 “Ba nsangaji i boba badila madilo, mwanda bakaseñwanga.” (Mateo 5:4) Tubwanya kwiipangula’mba, ‘le boba badila madilo babwanya kwikala na nsangaji namani?’ Yesu kādipo wisambila pa muntu yense udila madilo. Bantu bavule babi badilanga madilo, nansha kwikala na bulanda, mwanda batanwanga na makambakano avutakanya ñeni mu ano “mafuku a mfulo” makomo “ne mwa kulongela.” (2 Temote 3:1) Inoko betele  mutyima’nka abo bene pa kyaba kya Yehova, o mwanda kebasakengapo kupwana nandi, kadi kebabwanyapo kwikala na nsangaji. Yesu wādi wisambila pa boba bayukile amba kudi byobasakilwa ku mushipiditu. Badilanga madilo mwanda bamonanga bantu bavule bapela Leza nansha kwiendeja mu muswelo usaka Leza. Kadi bayukile amba i babipya-mambo, kadi bamonanga bintu bibi bilongeka mu ino ntanda. Yehova umwene bano bantu badila madilo a binebine, wibasenga na Kinenwa kyandi, ne kwibapa nsangaji ne būmi.​—Tanga Ezekyele 5:11; 9:4.

8. Le kwikala na ngikadila italala kubwanya kukukwasha namani wikale na nsangaji?

8 “Ba nsangaji i ba ngikadila italala, mwanda bakapyananga ntanda.” (Mateo 5:5) Le kwikala na ngikadila italala kubwanya kukukwasha namani wikale na nsangaji? Bantu bavule badi na kibengo ne bukalabale bine bibwanya kuleta makambakano mavule. Ino shi abefunde bubine, bashintanga ne kuvwala “bumuntu bupya.” Ke balombola “kisanso kya mutyima wa lusalusa, kanye, kwityepeja, kutalala, ne kitūkijetyima.” (Kolose 3:9-12) Ku mfulo, baikala mu ndoe, kipwano kiyampe na bakwabo ne kwikala na nsangaji. Kadi Kinenwa kya Leza kilaile amba “bakapyananga ntanda.”​—Ñimbo ya Mitōto 37:8-10, 29.

9. (a) Le Yesu wādi ukimba kunena bika paānenene amba ba ngikadila italala “bakapyananga ntanda”? (b) Mwanda waka “boba badi na nzala ne kyumwa kya boloke” babwanya kwikala na nsangaji?

9 Le Yesu wādi ukimba kunena bika paānenene amba ba ngikadila italala “bakapyananga ntanda”? Bashingwe māni bakapyananga ntanda kitatyi kyobakeiludika bu balopwe ne bu babitobo. (Kusokwelwa 20:6) Midiyo ne midiyo ya bantu bakwabo kebadipo na lukulupilo lwa kwenda mūlu, bakapyananga ntanda kitatyi kyobakekala’po nyeke ne nyeke. Bakekala babwaninine, mu ndoe ne na nsangaji. Bano bantu bonso bo bānenene Yesu amba: “Ba nsangaji i boba badi na nzala ne kyumwa kya boloke.” (Mateo 5:6) Kyumwa kyabo kya boloke kikapwa kitatyi kikatalula Yehova bibi byonso. (2 Petelo 3:13) Mu ntanda mipya, bantu boloke bakekala na nsangaji, kadi kebakadilapo monka madilo pa mwanda wa bibi bilonga bantu babi.​—Ñimbo ya Mitōto 37:17.

10. Le kwikala ba lusa kushintulula bika?

10 “Ba nsangaji i ba lusa, mwanda bakafwilwanga lusa.” (Mateo 5:7) Kwikala ba lusa i kwikala na kanye, lusalusa, ko kunena’mba kwivwanina muntu ususuka bulanda. Inoko, lusa lulombanga bivule kupita’ko’tu kwikala na kanye. Bible ufundija’mba kwikala na lusa i ne kulonga’po kintu mwanda wa kukwasha bakwetu.

11. Le kyelekejo kya mwine Samadia muyampe kitufundija bika?

11 Tanga Luka 10:30-37. Kyelekejo kya Yesu kya mwine Samadia muyampe kilombola mwine mushintulwila kwikala na lusa. Mwine Samadia wāivwanine muntu wādi ususuka lusa ne bulanda, ne kino kyāmutonwene amukwashe. Yesu pa kupwa kuleta kino kyelekejo wānenene amba: “Enda, nobe ukalonge’nka nankyo.” Nanshi tubwanya kwiipangula’mba: ‘Le nami noñanga namino? Le noñanga mwālongele mwine Samadia muyampe? Shi bakwetu basusuka, le noñanga’po kintu mwanda wa kwibakwasha? Kimfwa, le mbwanya kukwasha banunu mu kipwilo, bakishala, nansha bana badi na bambutwile kebengidilapo Yehova? Le mbwanya kwisamba “mu muswelo usenga boba banyoñame pa mityima” mwanda wa kwibasenga?’​—1 Tesalonika 5:14; Yakoba 1:27.

Badikila kukwata mulangwe wa kukwasha bakwenu, ukemwena nsangaji ilupuka’ko (Tala musango 12)

12. Mwanda waka twikalanga na nsangaji shi tudi na lusa?

 12 Mwanda waka twikalanga na nsangaji shi tudi na lusa? Shi tukwatyilwa bakwetu lusa, nabya tupānanga, kadi Yesu wānenene amba kupāna kwituletelanga nsangaji. Bubinga bukwabo i buno amba tuyukile amba tusangajanga Yehova. (Bilongwa 20:35; tanga Bahebelu 13:16.) Mulopwe Davida wēsambīle pa muntu wa lusa’mba: “Yehova ukamulamanga ne kumupandija. Ukatelwa bu wa nsangaji pa ntanda.” (Ñimbo ya Mitōto 41:1, 2) Shi tukwatyilwa bantu lusa ne kanye, nabya Yehova nandi uketufwila lusa, kadi tubwanya kwikala na nsangaji nyeke ne nyeke.​—Yakoba 2:13.

KIKADILE “BA MUTYIMA UTŌKA TŌ” NA NSANGAJI

13, 14. Mwanda waka kwikala “ba mutyima utōka tō” kudi na mvubu?

13 Yesu wānenene amba: “Ba nsangaji i ba mutyima utōka tō, mwanda bakamonanga Leza.” (Mateo 5:8) Pa kwikala ba mutyima utōka tō, tufwaninwe kulama milangwe ne mutyima utōka, nansha wampikwa disubi. Kino kidi na mvubu shi tusaka Yehova etabije butōtyi bwetu.​—Tanga 2 Kodinda 4:2; 1 Temote 1:5.

14 Boba ba mutyima utōka tō babwanya kwikala mu kipwano kiyampe na Yehova mwine wānenene amba: “Ba nsangaji i boba bakenda minkukumba yabo.” (Kusokwelwa 22:14) Le ‘kukenda minkukumba yabo’ kushintulula bika? Ku bene Kidishitu bashingwe māni, kushintulula’mba Yehova wibamwene bu ba kubulwa disubi, ukebapa būmi bwa kubulwa kufwa momwa mūlu, kadi bakekala na nsangaji nyeke ne nyeke. Ku kibumbo kikatampe kya bantu bakulupile kwikala pano pa ntanda, kushintulula’mba Yehova i mwibape mukenga wa kwikala balunda nandi mwanda wibamwene bu boloke. Bible unena’mba, “i bakende minkukumba yabo ne kwiitōkeja mu mashi a Kana ka Mukōko.”​—Kusokwelwa 7:9, 13, 14.

15, 16. Le ba mutyima utōka tō babwanya ‘kumona Leza’ namani?

15 Yehova wānenene amba: “I kutupu muntu ubwanya kumona ami kadi ekale mūmi.” (Divilu 33:20) Penepa, le ba mutyima utōka tō babwanya ‘kumona Leza’ namani? Kishima kya Kingidiki kyalamwinwe bu “kumona” kibwanya kufunkila pa kufwatakanya, kwivwanija, nansha kuyuka. Nanshi ‘kumona Leza’ kushintulula kuyuka mwaikadile ne kusanswa ngikadila yandi. (Efisesa 1:18) Yesu wāiwile ngikadila ya Leza mu muswelo mubwaninine, o mwanda wānenene amba: “Yewa ense umona ami wamone ne Tata mwine.”​—Yoano 14:7-9.

16 Kadi, ‘tumonanga Leza’ potwimwena muswelo waetukwasha mu būmi bwetu. (Yoba 42:5) Ne kadi tubwanya “kumona” nansha kuta mutyima ku bintu bya kutendelwa bilaile Yehova kulongela boba balamine butōki bwabo ne kumwingidila na kikōkeji. Ino bashingwe māni abo bamonanga Yehova mpala na mpala  pobasangulwa ne kwenda mūlu.​—1 Yoano 3:2.

TUBWANYA KWIKALA NA NSANGAJI NANSHA SHI TUDI MU MAKAMBAKANO

17. Mwanda waka boba baleta ndoe badi na nsangaji?

17 Kadi Yesu wānenene amba: “Ba nsangaji i boba baleta ndoe.” (Mateo 5:9) Shi tubadikila kukwata mulangwe wa kwikala mu ndoe na bakwetu, tukekala na nsangaji. Mwanā bwanga Yakoba wānenene amba: “Kipa kya boloke kikunwanga mu ndoe mwanda wa boba baleta ndoe.” (Yakoba 3:18) Nanshi shi ukolelwanga kwiivwana na muntu kampanda mu kipwilo nansha mu kisaka, nabya zenza Yehova akukwashe wikale muntu uleta ndoe. Ebiya, Yehova ukakupa mushipiditu wandi ujila, mwine ukakukwasha ulombole ngikadila ya bwine Kidishitu, kadi ukekala na nsangaji. Yesu wālombwele mvubu ya kubadikila kukwata mulangwe mwanda wa kuleta ndoe paānenene amba: “Ebiya, shi uleta kyabuntu kyobe ku kisōkelo ino kwine’kwa ubavuluka’mba mwanenu udi nobe mwanda, shiya kyabuntu kyobe’nka kwine’kwa ku meso a kisōkelo, taluka wende. Dibajinji kapwane bidi na mwanenu, kupwa joka ulambule kyabuntu kyobe.”​—Mateo 5:23, 24.

18, 19. Mwanda waka bene Kidishitu basangalanga nansha shi bapangwapangwa?

18 “Mwi ba nsangaji shi bantu bemufutulula ne kwimupangapanga ne kwimunenena bintu bibibibi bya bubela bya miswelo yonso pa mwanda wa amiwa.” Le i bika byādi bikimba kunena Yesu? Wābwejeje’ko amba: “Sepelelai ne kusangala bininge, mwanda mpalo yenu i mikatampe mūlu, ke-pantu e monka mobādi bapangilapangila ne bapolofeto bēmubadikidile.” (Mateo 5:11, 12) Pobākupile batumibwa ne kwibapeleja kusapula, abo “bataluka ku meso a Sanedini, benda basangele.” Na bubine, kebāsangedilepo kukupilwa. Ino bāsangele “mwanda [bāmwekele] bu bantu bafwaninwe kufutululwa” pa mwanda wa dijina dya Yesu.​—Bilongwa 5:41.

19 Dyalelo nadyo, bantu ba Yehova bōmininanga na nsangaji pobapangwapangwa mwanda wa dijina dya Yesu. (Tanga Yakoba 1:2-4.) Pamo bwa batumibwa, ketusangelangapo kususulwa nansha kupangwapangwa. Ino shi tukōkele Yehova nyeke, uketupa bukankamane botusakilwa pa kūminina. Tulangulukilei bidi pa myanda yatene ba Henryk Dornik ne mwanabo. Mu Kweji 8, 1944, batuminwe mu komponi ka masusu. Boba badi bebapangapanga banenene amba: “I bikomo kwibanekenya balonge kintu kampanda. Kususulwa pa mwanda wa Leza wabo kwibaletelanga nsangaji.” Henryk wanenene amba: “Nansha byonkyadipo nsaka kususulwa, kususuka na bukankamane ne bulēmantu pa mwanda wa kulamata Yehova kwaundetele nsangaji.” Ubweja’ko amba: “Milombelo ya kininga yaumfwenyenye kudi Yehova, ebiya nandi welombola bu Mukwashi ukulupilwa.”

20. Mwanda waka tusangedile kwingidila “Leza wa nsangaji”?

20 Shi Yehova, “Leza wa nsangaji,” witusangedile, nabya netu tubwanya kwikala na nsangaji nansha shi tupangwapangwa, tulwibwa na kisaka, tubela, nansha shi tubanunupa. (1 Temote 1:11) Kadi tubwanya kwikala na nsangaji mwanda Leza wetu, mwine “kabwanyapo kubepa,” i mwitulaye bintu bivule bya kutendelwa. (Tetusa 1:2) Kitatyi kikafikidija Yehova milao yandi, ketukavulukapo nansha dimo makambakano otudi nao dyalelo. Na bubine, ketubwanyapo kufwatakanya ne pa mfulo muswelo ukalumbuluka būmi mu Paladisa ne motukekadila na nsangaji! Bine, tukaloelelwanga “bininge mu bungibungi bwa ndoe.”​—Ñimbo ya Mitōto 37:11.