Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Ingila Pamo na Yehova Difuku ne Difuku

Ingila Pamo na Yehova Difuku ne Difuku

“Twi bengidi bengila pamo na Leza.”​—1 KODINDA 3:9.

ÑIMBO: 64, 111

1. Le i mu miswelo’ka motubwanya kwingila pamo na Yehova?

YEHOVA paāpangile bantu, wādi usaka bengile nandi pamo. Nansha dyalelo bantu byobadi ba kubulwa kubwaninina, inoko bantu ba kikōkeji bengilanga pamo na Yehova difuku ne difuku. Kimfwa, “twi bengidi bengila pamo na Leza” potusapula myanda miyampe ya Bulopwe bwandi ne kulonga bana ba bwanga. (1 Kodinda 3:5-9) I dyese dikatampe’po kashā kutongwa na Mupangi Mwinē Bukomo Bonso twingile uno mwingilo wa mvubu! Inoko, ke enkapo’tu kusapula kete kwitulengejanga twingile pamo na Yehova. Mu kino kishinte, tusa kwifunda’mo muswelo otwingilanga nandi pamo potukwasha kyetu kisaka ne bakwabo mu kipwilo, potulombola kizaji, potukwasha ku mingilo ingilwa mu bulongolodi ntanda yonso, ne potutandabula mwingilo otwingidila Yehova.​—Kolose 3:23.

2. Mwanda waka ketufwaninwepo kudingakanya nansha dimo byobya byotulongela Yehova na bimulongela bantu bakwabo?

2 Potwifunda kino kishinte, i biyampe tuvuluke amba muntu ne muntu i mwishile na mukwabo. Myaka yetu, bukomo bwa ngitu, ngikadilo yotudi’mo, ne bwino bwetu i bishile. O mwanda ke biyampepo kudingakanya byobya byobwanya kulongela Yehova na byobya bimulongela bantu bakwabo. Mutumibwa Polo wānenene  amba: “Muntu ne muntu abandaule bilongwa byandi, nabya ukekala na buluji bwa kusepelela pa mwanda wandi aye mwine, ke na kwidingakanyapo na muntu mukwabo, aa.”​—Ngalatea 6:4.

KWASHA KYOBE KISAKA NE BAKWABO MU KIPWILO

3. Mwanda waka tubwanya kunena’mba muntu ense uvuija bisakibwa bya kyandi kisaka wingilanga pamo na Leza?

3 Yehova witusakila tukwatakanye byetu bisaka. Kimfwa, ufwaninwe kukimba’ko kalupeto mwanda wa kuvuija bisakibwa bya kyobe kisaka. Balolo bavule bashalanga ku mobo mwanda wa kulela babo bana. Ne kadi shi bambutwile betu kebakibwanyapo kwikwatakanya abo bene, nankyo tufwaninwe kwibakwatakanya. Bino i bintu bya mvubu. Bible unena’mba: “Shi muntu kasasaketapo bandi, nakampata boba ba mu njibo yandi, nabya watune lwitabijo kadi i mubi kutabuka ne wampikwa lwitabijo mwine.” (1 Temote 5:8) Shi udi na biselwa bya mu kisaka, padi kubwanyangapo kulonga bintu bivule mu mwingilo wa Yehova na mowadi wa kulongela shi kwadipo na bino biselwa. Ino kokazoza! Yehova usangalanga povuija bisakibwa bya kyobe kisaka.​—1 Kodinda 10:31.

4. Lelo bambutwile batūlanga namani tumweno twa Bulopwe pa kifuko kibajinji, ne i bika bilupukanga’ko pobalonga namino?

4 Bambutwile bene Kidishitu babwanya kwingila pamo na Yehova na kukwasha babo bana betungile bitungo mu mwingilo wa Yehova. Bambutwile bavule balongele uno muswelo. Ne mwenda mafuku babo bana bana-balume ne bana-bakaji bakwete butyibi bwa kwingidila Yehova kitatyi kyonso, enka ne kuvilukila kulampe na kwabo. Bamo i bamishonele, bakwabo bengilanga bu bapania kokwa kusakilwa basapudi bavule, ne bangi nabo bengilanga ku Betele. Na bubine, shi bana badi kulampe na kwabo, bambutwile kebabwanyapo kushikata nabo pamo na mobadi balongela. Inoko pampikwa kwisakila bakankamikanga babo bana bendelele na kwingidila Yehova konso kobadi. Mwanda waka? Mwanda basangalanga pa kumona babo bana batūla Yehova pa kifuko kibajinji mu bwabo būmi. (3 Yoano 4) Bambutwile bavule mu bano beivwananga pamo bwa Hana, wānenene amba ‘wāpēne’ wandi mwana Samwele kudi Yehova. Bamonanga’mba i dyese dikatampe kwingila pamo na Yehova mu uno muswelo.​—1 Samwele 1:28.

5. Le i muswelo’ka obwanya kukwasha batutu ne bakaka ba mu kyenu kipwilo? (Tala kifwatulo ku ngalwilo.)

5 Shi kudipo na biselwa bivule bya mu kisaka, le ubulwe’po kukwasha batutu ne bakaka babela nansha banunu ne bakwabo basakilwa bukwashi? Nansha le ubulwe’po kukwasha’ko boba bebalelele? Kimba’ko mu kyenu kipwilo boba basakilwa buno bukwashi. Kimfwa, padi kudi kaka ulelele mbutwile wandi mununu. Le ubulwe’po kunangila mbutwile wandi pa kusaka’mba uno kaka avuije bintu bikwabo bya mvubu? Pakwabo napo ubwanya kukwasha muntu na kumusela mwende nandi ku kupwila, ku nsoko, nansha kukapempula muntu kampanda ku lupitalo. Shi ulonge namino, ukokeja kwingila pamo na Yehova pa kulondolola milombelo yabo.​—Tanga 1 Kodinda 10:24.

IKALA NA KIZAJI

6. Lelo i muswelo’ka otubwanya kulombola kizaji?

6 Boba bengila pamo na Leza bayukene bu bantu ba kizaji. Mu Bible, kishima kya Kingidiki kingidijibwe bu “kizaji” kishintulula’mba “kanye ku beni.” (Bahebelu 13:2; kunshi kwa dyani) Mu Kinenwa kya Leza tubwanya kutanga’mo bimfwa bitufundija mwa kulombwela kano kanye. (Ngalwilo 18:1-5) Tubwanya kadi tufwaninwe kukwasha bakwabo ponso potumona mukenga wa  kulonga namino, ekale “botubutulwa nabo mu lwitabijo” nansha ba panja.​—Ngalatea 6:10.

7. Le i byabuyabuya’ka byokemwena polombola kizaji ku bengidi ba kitatyi kyonso?

7 Le ubwanya kwingila pamo na Yehova na kulombola kizaji ku bengidi ba kitatyi kyonso basakilwa mwa kwikala? (Tanga 3 Yoano 5, 8.) Shi tulonge namino, nabya bakamwena’mo ne batwe bene kumo. Bible utela kino bu ‘kwikankamika batwe bonso.’ (Loma 1:11, 12) Tala myanda yemwenine Olaf. Paadi ukidi nkasampe, mutadi wa kipindi umo nkungulume wakapempwile kyabo kipwilo kadi wadi usakilwa kwa kufikila, inoko i kutupu muntu nansha umo mu kipwilo wanenene afikile kwandi. Olaf wakepangula bambutwile bandi ke Batumonipo shi mutadi ukokeja kufikila kwabo. Bambutwile bandi baitabija, ino basapwila Olaf amba abe ukanza kulāla mu kityi kya foteye. Ye mwalongele Olaf, kadi kealakenyepo. Bapityije yenga mulumbuluke na mutadi wa kipindi! Difuku ne difuku shi ababūka lubanga, badi besamba mīsambo mivule isangaja pobadya bidibwa bya lubanga. Mutadi wa kipindi wakankamikile Olaf bininge, mfulo mfulō nandi wakwata butyibi bwa kwingidila Yehova kitatyi kyonso. Mu myaka 40 ipityile’i, Olaf i mwingile bu mishonele mu matanda mavule.

8. Mwanda waka tufwaninwe kulombola kanye ku bantu bakwabo nansha shi dibajinji kebetufwijije’kopo? Leta kimfwa.

8 Ubwanya kulombola buswe ku beni mu miswelo mivule, nansha shi dibajinji kebetufwijije’kopo. Kimfwa, kaka umo wa mu Eshipanye wadi wifunda Bible na Yesica, mwana-mukaji umo watambile mu Ekwatere. Difuku dimo pobadi befunda Bible, Yesica wadi udila’nka kudila. Penepa uno kaka wamwipangula kyadidila. Yesica wanena’mba kumeso kwa kwiya’ye mu Eshipanye, wadi mulanda bininge. Difuku dimo kadipo na byakudya bya kupa wandi mwana mwana-mukaji, wadi’nka na mema. Kupwa Yesica pa kukalādika wandi mwana, walombela mwanda wa bamukwashe. Kitatyi kityetye pa kupita’po, Batumoni babidi bafika kwa Yesica, bamupa dipepala. Webatuka ne kusana dipepala’dya, kaebanena’mba: “Le bino byo byakudya byomfwaninwe kupa wami mwana?” Bano bakaka batompa kumusenga, inoko Yesica aye kutupu. Mafuku pa kupita’po, bakaka’ba bamushila kitunga kya bidibwa pa kibelo. Ino pano pobadi befunda wadi udila mwanda wajingulwile amba wafutulwile malondololo a Leza ku milombelo yandi. Yesica wakwete butyibi bwa kwingidila Yehova. Bine, buntu bwa bano bakaka bwalupwile bipa biyampe.​—Musapudi 11:1, 6.

INGILA MINGILO YA KWILANGA YA MU BULONGOLODI

9, 10. (a) Lelo bene Isalela bādi na mikenga’ka imoimo ya kwingila mingilo ya kwilanga? (b) Le dyalelo batutu babwanya kukwasha muswelo’ka mu kipwilo?

9 Pa kala, bene Isalela bādi na mikenga mivule ya kwingila mingilo ya kwilanga. (Divilu 36:2; 1 Bilongwa 29:5; Nehemia 11:2) Dyalelo, nobe udi na mikenga mivule ya kwingila mingilo ya kwilanga na kwingidija kyobe kitatyi, bintu bya ku ngitu, ne bwino bobe mwanda wa kukwasha batutu ne bakaka. Shi ulonge namino, ukekala na nsangaji kadi Yehova ukakwesela.

10 Kinenwa kya Leza kikankamika bana-balume mu kipwilo bengile pamo na Yehova na kwingidila bakwabo bu bengidi ba mingilo ne bu bakulumpe. (1 Temote 3:1, 8, 9; 1 Petelo 5:2, 3) Boba balonga namino bekalanga na mutyima wa kukwasha bakwabo mu miswelo mipotoloke ne mu butōtyi. (Bilongwa 6:1-4) Le bakulumpe bakunenene wimanine nansha kukwasha ku mabuku, ku mwaba, ku bukundwe, nansha ku mwingilo  mukwabo? Batutu bakwasha mu uno muswelo banenanga’mba bibasangajanga bininge.

Boba bengila mingilo ya kwilanga mu bulongolodi, kyaba kyonso bapwananga na balunda bapya (Tala musango 11)

11. Le i byabuyabuya’ka byemwenine kaka umo pawangile ku lūbako?

11 Boba bengila mingilo ya kwilanga ku lūbako, kyaba kyonso bapwananga na balunda bapya. Kaka umo witwa bu Margie waingile ku lūbako lwa Mobo a Bulopwe mu bula bwa myaka 18. Mu uno mwingilo, wadi uta bakaka bankasampe mutyima ne kwibafundija mwa kwingidila. Unena’mba uno i mukenga muyampe wa kwingila mingilo ya kwilanga mwanda wa kukankamika bakwabo. (Loma 1:12) Inoko, paadi utanwa na bitatyi bya makambakano, balunda baapwene nabo mu uno mwingilo badi bamukankamika. Lelo kwaingile kashā mingilo ya kwilanga ku lūbako? Ubwanya kukwasha’ko nansha shi kudipo na bwino kampanda bwa pa bula.

12. Le i muswelo’ka obwanya kukwasha’ko pa kupwa kwa kimpengele?

12 Kadi tubwanya kwingila pamo na Yehova na kukwasha batutu ne bakaka shi kubalongeka kimpele kya kipangila. Kimfwa, tubwanya kutūla byabuntu bya lupeto. (Yoano 13:34, 35; Bilongwa 11:27-30) Kadi muswelo mukwabo otubwanya kukwasha’ko i kukundula nansha kulongolola byobya byonekele pa kupwa kwa kimpengele. Gabriela, kaka umo wa mu Polonye, paonekele bininge yandi njibo na dilobe, wasangele bininge pa kumona banabetu ba mu bipwilo bya pabwipi bāya kumukwasha. Palangulukilanga pa uno mwanda, unenanga’mba kalañangapo bintu byonso bya ku ngitu byaajimije, ino utanga mutyima pa byadi nabyo. Unena’mba: “Uno mwanda onemwenine unkulupija’mba kwikala mu kipwilo kya bwine Kidishitu i dyese dya pa bula kadi i nsulo ya nsangaji ne ndoe.” Boba bakwashibwe pa kupwa kwa kimpengele, banenanga’mba nabo beivwananga uno muswelo. Kadi ne boba bengila pamo na Yehova mwanda wa kukwasha bano banabetu bevwananga nsangaji ne kuloelelwa.​—Tanga Bilongwa 20:35; 2 Kodinda 9:6, 7.

13. Le tukomejanga namani buswe botuswele Yehova potwingila mingilo ya kwilanga? Leta kimfwa.

13 Kaka umo witwa bu Stephanie ne basapudi bakwabo ba mu wabo mwaba baingile  pamo na Leza mwanda wa kukwasha Batumoni balefije banyemene divita mu yabo ntanda ne kwiya mu États-Unis. Bakweshe bano balefije basokole mwa kushikata ne bintu bya mwinjibo. Unena’mba: “Twatengelwe na nsangaji yabo ne mutyima wabo wa kufwija’ko pobemwenine buswe bwa bu bana na bana bwa ntanda yonso. Bino bisaka byamwene amba twebakweshe, ino na bubine, abo’ko bo betukweshe bininge. Buswe, bumo, lwitabijo, ne kikulupiji kyabo mudi Yehova byakomeje bininge buswe botuswele Yehova, kadi kino kyetulengeje twikale na mutyima wa kufwija’ko bininge pa byonso byotutambula kupityila ku bulongolodi bwandi.”

TANDABULA MWINGILO OINGIDILA YEHOVA

14, 15. (a) Lelo mupolofeto Isaya wādi na mumweno’ka? (b) Lelo bene Kidishitu babwanya namani kwiula mumweno wa Isaya?

14 Le usakanga kwingila bininge pamo na Yehova? Le wabilanga kwenda kokwa kusakilwa basapudi bavule? Na bubine, ketusakilwapo’nka kwenda kulampe pa kwikala na buntu. Inoko kudi batutu ne bakaka babwanya kwenda. Badi na mumweno na wādi nao mupolofeto Isaya. Pāipangwile Yehova amba: “I ani le onkatuma, ne i ani uketwendela?” wālondolwele amba: “Ami uno! Ntume!” (Isaya 6:8) Lelo udi na mukenga ne mutyima wa kukwasha mu bulongolodi bwa Yehova? Le i mu miswelo’ka mobwanya kukwasha?

15 Yesu wēsambīle pa kusapula ne kulonga bana ba bwanga’mba: “Mwangulo i mukatampe, ino bengidi i batyetye. O mwanda, abijai Mwinē mwangulo atume bengidi mu mwangulo wandi.” (Mateo 9:37, 38) Lelo ubulwe’po kukengila bupania kokwa kusakilwa basapudi bavule? Nansha le ubulwe’po kukwasha muntu mukwabo mwanda wa akengile’ko? Batutu ne bakaka bavule i bamone amba muswelo muyampe wa kulombola buswe bobasenswe Leza ne bantu i wa kukengila bupania kokwa kusakilwa basapudi bavule. Le ubulwe’po kulangulukila pa miswelo mikwabo yobwanya kutandabula’mo mwingilo obe? Shi i amo, nabya ukekala na nsangaji mivule.

16, 17. Le i mu miswelo’ka mikwabo mobwanya kutandabula mwingilo oingidila Yehova?

16 Le usakanga kukengila ku Betele nansha kukwasha ku lūbako, nansha’tu kwingila’ko bu mwingidi wa kitatyi kityetye, difuku dimo nansha mavule pa yenga? Bulongolodi bwa Yehova busakilwa nyeke bantu badi na mutyima wa kwingidila konso kobebatuma ne kwingila mwingilo o-onso obapebwa nansha shi badi na bwino mu mwingilo ungi. Yehova ukwete na mvubu muntu yense udi na mutyima wa kwipāna ne kwingila kokwa kusakilwa bukwashi.​—Ñimbo ya Mitōto 110:3.

17 Lelo usakilwa bufundiji kampanda mwanda wa kwingidila Yehova bininge? Nabya ubwanya kudinga fomu wa ku Masomo a Basapudi ba Bulopwe. Ku ano masomo kufundanga batutu ne bakaka batame ku mushipiditu bengidila kala Yehova kitatyi kyonso pa kusaka’mba bulongolodi bwa Yehova bwibengidije bininge. Boba bafunda ano masomo bafwaninwe kwikala na mutyima wa kukengidila konso kobebatuma. Lelo witabije kwingidila Yehova bininge mu uno muswelo?​—1 Kodinda 9:23.

18. Lelo i byabuyabuya’ka bidi mu kwingila pamo na Yehova difuku ne difuku?

18 Byotudi bantu ba Yehova, o mvwanda tudi na buntu, buyampe, kanye, ne buswe. Tutanga bakwetu mutyima difuku ne difuku. Kino kituletelanga nsangaji, ndoe, ne kuloelelwa. (Ngalatea 5:22, 23) Nansha shi wikale mu ngikadilo’ka, ukekala na nsangaji shi wiula buntu bwa Yehova ne kwikala mwingidi nandi wa bulēme!​—Nkindi 3:9, 10.