Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Bukomo bwa Lwimu

Bukomo bwa Lwimu

“TUBAIMUNA! Sapulanga?”

Ne kutatana kwine mpika divule wimunanga bantu uno muswelo. Pakwabo wibemunanga ne kwibasambija nansha kwibapamba bīpa. Bibidiji ne binenwa bingidijibwanga pa kwiimuna bibwanya kwishila mungya bifuko, inoko mvubu ya lwimu i imo yonka. Na bubine, kuleka kwimunañana nansha kuleka kwitabija lwimu kubwanya kumweka bu kubulwa buswe nansha bu kilomboji kya mwikadilo mubi.

Inoko ke bantu bonsopo bemunanga bakwabo. Bamo bekakanga kwimunañana pa mwanda wa bumvu nansha kwityepelwa. Bakwabo bakomenwanga kwimuna bantu ba lukoba ne bibidiji bingi, bantu badi na bitenta nansha bobeshidile nabo myaka. Inoko, nansha lwimu’tu lonkalonka lubwanya kwikala na lupusa luyampe ku bantu.

Wiipangule amba: ‘Le lwimu ludi na mvubu’ka? Ne le Kinenwa kya Leza kimfundija bika pa mwanda utala lwimu?’

IMUNA “BANTU BA MISWELO YONSO”

Mutumibwa Petelo paātambwile Konilusa, Mujentaila mubajinji mu kipwilo kya bwine Kidishitu, wānenene amba: “Leza kadipo na mboloji.” (Bilongwa 10:34) Mwenda mafuku, Petelo wāsonekele amba Leza “usaka bonso bafikile pa kwisāsa.” (2 Petelo 3:9) Dibajinji tubwanya kwingidija ano mavese ku bantu befunda bubine. Inoko kadi Petelo wānenene bene Kidishitu amba: “Lēmekai bantu ba miswelo yonso, sanswai kisaka kyonso kya banabetu.” (1 Petelo 2:17) Mwene netu i biyampe twimune bantu nansha shi bekale ba lukoba’ka, bibidiji, nansha bitamina? Uno i muswelo mukwabo wa kwibalombola bulēme ne buswe.

Mutumibwa Polo wāsoñenye kipwilo amba: “Mwitambulei banwe bene na bene, monka mwetutambwidile Kidishitu.” (Loma 15:7) Polo wātelele banababo pa majina bene baādi umona bu “nsulo ya kusengibwa kukatampe” kwadi. Dyalelo dyo dine disakilwa batutu ne bakaka kukankamikwa pobekonda na bulwi bwa Satana bwalwa bantu ba Leza.​—Kolose 4:11; Kusokwelwa 12:12, 17.

Bimfwa bya mu Bisonekwa bilombola’mba mvubu ya lwimu keikadikilepo’tu’nka pa kulengeja muntu eivwane bu mutambulwe biyampe.

LUKULUPIJANGA, LUKANKAMIKANGA, KADI I KILOMBOJI KYA BUSWE

Kitatyi kya kutundulwila būmi bwa Mwanā Leza mu difu dya Madia pokyābwene, Yehova wātumine mwikeulu akesambe nandi. Mwikeulu wāshilwile amba, “Wakomapo, abe obatōkelwe mutyima bikatampe, Yehova udi nobe.” Madia “wavutakanibwa bininge,” mwanda wādi kajingulwile kine kīsambila nandi mwikeulu. Mwikeulu pa kujingulula kino, wāmunena’mba: “Kokakwatwa moyo, abe Madia, mwanda Leza wakutōkelwa mutyima.” Wāmushintulwila’mba i mpango ya Leza ya aye abutule Meshiasa. Pa kyaba kya kushala muvutakanibwe, Madia wālondolola na kikōkeji amba: “Tala! ami ne umpika wa Yehova! Kinongelwe mungya binenwa byobe.”​—Luka 1:26-38.

Uno mwikeulu wādi na dyese dikatampe dya kwisamba pa kyaba kya Yehova; inoko, kēmwenepo bu kafwaninwepo kwisamba na muntu wampikwa kubwaninina. Wāshilwile bidi na lwimu. Tubulwe’po kuboila ñeni ku kino kimfwa? Tufwaninwe kubadikila kwimuna bakwetu ne kwibakankamika. Nansha na bishima’tu bityetye, tubwanya kukwasha bakwetu ne kwibakulupija’mba bine babadilwa mu bantu ba Yehova.

Polo wādi uyukile bantu bavule mu bipwilo bya mu Azia Minele ne bya mu Bulaya. Mu mikanda yandi i mwimune’mo bantu bavule pa abo majina. Kino i kimweke mu Loma shapita 16. Polo wāimwine banababo bavule bene Kidishitu. Wātelele Febe, bu “kaka wetu,” ne kusoñanya banababo amba  “mumutambule mudi Mfumwetu monka mufwaninwe kutambwilwa boba bajila, mumukwashe na bintu byonso byakokeja kubulwa.” Polo wāimwine ba Piseka ne Akwila amba, “ke’nkapo ami kete, ino i ne bipwilo byonso bya mu mizo.” Wāimwine ne bantu bamo kebayukanikilepo biyampe dyalelo​—“Epenetusa muswedibwe wami” ne “Taifena ne Taifosa, bana-bakaji bengila bikomo mudi Mfumwetu.” Bine, Polo wādi usenswe kwimuna batutu ne bakaka.​—Loma 16:1-16.

Langa’po bidi nsangaji yobāivwene pa kuyuka’mba Polo kebedilwepo. Bine buswe bobādi baswele Polo ne bobādi besenswe abo bene na bene bwātamine’ko! Bine luno lwimu lwa buswe lwākankamikile bene Kidishitu bakwabo, kadi lwēbakweshe bemanije mu lwitabijo. Na bubine, lwimu lutamba ku mutyima ne kufwija’ko bikomejanga kipwano ne bumo bwa bengidi ba Leza ba kikōkeji.

Polo paāfikile ku nkula ya Puteodi kupwa kaenda ku Loma, bene Kidishitu ba kwine’kwa batamba dya kunshi kwiya kumusambakana. Polo pa kwibamona kyaba nabya, “wafwija’ko Leza ne kukankamana wakankamana.” (Bilongwa 28:13-15) Kyaba kimo tubwanya’tu kumungijamungija muntu, nansha kumupapa kuboko pa kumwimuna. Nansha ke kulonga namino kubwanya kukankamika muntu utyumukilwe mutyima nansha udi na njia.

KYALWILO KYA KUMVWAÑANA

Mwanā bwanga Yakoba wādi ufwaninwe kupāna madingi masumininwe. Bene Kidishitu bamo baānjile kulonga makoji a ku mushipiditu na kupwana na ntanda. (Yakoba 4:4) Ino tala mwāshilwidile Yakoba mukanda wandi:

“Ami Yakoba, umpika wa Leza ne wa Mfumwetu Yesu Kidishitu, ku bisaka dikumi ne bibidi bikusankene koku ne koku: Tubaimunai!” (Yakoba 1:1) Ne kutatana kwine mpika batangi bandi bāpēlelwe kwitabija madingi andi mwanda bāmwene amba lwimu lwandi lulombola’mba bakimanije ku meso a Leza. Bine, kwimuna bantu na kwityepeja kulengejanga twiivwane nabo nansha ke mu myanda mikatampe mwine.

Lwimu luyampe nansha lwikale lwīpi, lufwaninwe kwikala lwampikwa buzazangi kadi lulombola buswe bwa bine. Lufwaninwe kwikala uno muswelo nansha shi bantu kebajingulwile’kyopo. (Mateo 22:39) Difuku dimo kaka umo wa mu Irlande wafikile ku Njibo ya Bulopwe mpangiko keishilula. Byaadi wipangila kutwela, tutu umo wamutala, wamumungijamungija, ne kumunena’mba: “Tubaimuna. Nasangala kukumona.” Uno kaka washikata’tu talala.

Mayenga matyetye pa kupita’po, uno kaka wafwena tutu’wa ne kumulombola’mba kitatyi kimo wadi wikonda na makambakano kampanda ku yandi njibo. Wanena’mba, “Mu kine kyolwa’kya nadi neivwene bibi, kadi nkyadipo nanga ne ya kwenda ku Njibo ya Bulopwe kwine. Nkikibwanyapo kuvuluka byonso byapityile ku kupwila, poso’nka lobe lwimu. Lwauntūkije mutyima bininge. Wafwa’ko.”

Uno tutu kadipo uyukile lupusa lwaikele na lwandi lwimu’tu lwīpi. Unena’mba, “Paunsapwidile uno kaka mvubu ya bino binenwa bityetye kwadi, nasangele bininge pa kulonga bukomo bwa kumwimuna. Nami neivwene biyampe.”

Solomone wālembele amba: “Ela bidībwa byobe pa mema; ino ukatana’byo mafuku mangimangi pa kupitapo.” (Musapudi 11:1) Shi tute mutyima ku mvubu idi na lwimu, nakampata ku banabetu bene Kidishitu, nabya tukakankamika bakwabo ne batwe bene kumo. Nanshi ketwakapēlekai nansha dimo bukomo bwa lwimu.