Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KISHINTE KYA KWIFUNDA 27

Witeakanye ku Kupangwapangwa Tamba’nka Pano

Witeakanye ku Kupangwapangwa Tamba’nka Pano

“Bonso basaka kwikala na būmi bwa bwine Leza mu bumo na Kidishitu Yesu nabo bakapangwapangwa.”​—2 TM. 3:12.

LWIMBO 129 Tūmininei Nyeke

BIDI MU KISHINTE *

1. Mwanda waka tufwaninwe kwiteakanya ku kupangwapangwa?

MU BUFUKU bukya ke lufu lwa Mfumwetu Yesu, wānenene amba bonso batonga kwikala bandi bana ba bwanga bakebashikwa. (Yoa. 17:14) Kufika ne dyalelo, bene Kidishitu ba kikōkeji Batumoni ba Yehova bapangwapañwanga na boba bashikilwe mutōtelo wa bine. (2 Tm. 3:12) Mfulo ya ino ngikadilo ya bintu byoyafwena, tuyukile amba balwana netu basa kwitulwa bininge.​—Mat. 24:9.

2-3. (a) Le i bika byotufwaninwe kuyuka pa mwanda utala moyo? (b) Le i bika byotusa kwisambila’po mu kino kishinte?

2 Le tubwanya kwiteakanya namani tamba’nka pano mwa kulwila na kupangwapangwa? Ketufwaninwepo kulangulukila pa bintu byonso bibi bibwanya kwitufikila. Shi tulangulukila’po, nabya tukalēmenenwa na moyo ne kuzumbija mutyima. Tubwanya kutādilwa na moyo wa kutyina matompo a kufwatakanya ao papo keafikile. (Nki. 12:25; 17:22) Moyo i kyabulwi kikomo kingidija ‘walwana netu Dyabola,’ mwanda wa kwitulwa. (1 Pe. 5:8, 9) Le i bika byotubwanya kulonga tamba’nka pano pa kwikomeja?

3 Mu kino kishinte, tusa kwisambila pa muswelo otubwanya kuningija kipwano kyotupwene na Yehova, ne mwanda waka i biyampe kuningija’kyo tamba’nka pano. Kadi tusa kwisambila’mo ne pa byotubwanya kulonga pa kwikala na bukankamane bukatampe. Ku mfulo, tusa kwisambila pa muswelo otubwanya kulwa na mushikwa wa bantu betulwa.

MUSWELO WA KUNINGIJA KIPWANO KYOBE NA YEHOVA

4. Mungya Bahebelu 13:5, 6, le i bika byotufwaninwe kukulupila, ne mwanda waka?

4 Kulupila’mba Yehova ukusenswe ne amba kakakwelapo nansha dimo. (Tanga Bahebelu 13:5, 6.) Pano kepadi myaka mivule, Kiteba kya Mulami kyanenene amba: “Muntu uyukile  Leza senene ukamukulupila bininge mu kitatyi kya matompo.” I bya bine! Pa kukomena kupangwapangwa, tufwaninwe kusanswa Yehova ne kumukulupila bininge, kadi tufwaninwe kuyuka’mba witusenswe.​—Mat. 22:36-38; Yak. 5:11.

5. Le i bika bikakukwasha umone amba Yehova ukusenswe?

5 Tanga Bible difuku ne difuku na kitungo kya kufwena kudi Yehova. (Yak. 4:8) Potanga Bible, tá mutyima ku ngikadila miyampe ya Yehova. Jingulula buswe ne kisanso kyandi kimwekela ku bintu byanena ne byalonga. (Div. 34:6) Bamo babwanya kukomenwa kwitabija’mba Leza wibasenswe mwanda kebebalombwele buswe nansha dimo. Shi nobe udi na ano makambakano, nabya tompa kulemba difuku ne difuku bintu bilombola’mba Yehova ukulombolanga lusa ne kanye. (Ñim. 78:38, 39; Loma 8:32) Pobandaula myanda ikutene ne kulangulukila pa byotanga mu Kinenwa kya Leza, padi ukabwanya kulemba bintu bivule bikulongēle Yehova. Shi usangele bininge byobya bikulongēle Yehova, kipwano kyopwene nandi kikaningila’ko.​—Ñim. 116:1, 2.

6. Mungya Ñimbo ya Mitōto 94:17-19, le milombelo itamba ku mutyima ibwanya kukukwasha namani?

6 Lombela kitatyi ne kitatyi. Langa’po bidi mwana obaselele kudi shandi wa buswe. Uno mwana udi na mutyima-ntenke, ulombola shandi pampikwa kafinda bintu biyampe ne bibi byamutananga mu bula bwa difuku. Nobe ubwanya kupwana na Yehova uno muswelo shi umufwena difuku ne difuku kupityila ku milombelo itamba ku mutyima. (Tanga Ñimbo ya Mitōto 94:17-19.) Polombela kudi Yehova, “pungulula mutyima obe pamo bwa mema,” kadi lombola Shobe wa buswe moyo ne kuzumbija mutyima kobe konso. (Mad. 2:19) Le bikekala namani? Ukekala na ndoe itelelwe na Bible bu “ndoe ya Leza itabukile ñeni yonso.” (Fid. 4:6, 7) Shi ulombela bininge uno muswelo, ukemona’mba udi pabwipi na Yehova.​—Loma 8:38, 39.

Bukankamane butambanga ku kukulupila Yehova ne Bulopwe bwandi

Stanley Jones wakankamikilwe na myanda ya Bulopwe bwa Leza yaadi uyukile (Tala musango 7)

7. Mwanda waka ufwaninwe kukulupila’mba milao ya Leza itala Bulopwe bwandi ikafikidila?

7 Kulupila’mba madyese a Bulopwe bwa Leza akafikidila. (Umb. 23:19) Shi lwitabijo lobe mu ino milao luzoze, nabya Satana ne bantu bandi bakapēlelwa kukuzakaja. (Nki. 24:10; Bah. 2:15) Le i muswelo’ka obwanya kukulupila bininge mu Bulopwe bwa Leza tamba’nka pano? Witūdile’ko kitatyi kya kwifunda milao ya Leza itala Bulopwe bwandi, ne kine kyobwanya kukulupidila’mba ikafikidila. Le kulonga namino kukakukwasha namani? Langulukila pa kimfwa kya Stanley Jones, wakutyilwe myaka isamba-ibidi pa mwanda wa lwitabijo lwandi. * Le i bika byamukweshe ōminine na kikōkeji? Unena’mba: “Nakankamikilwe na myanda ya Bulopwe bwa Leza yonadi ndyukile, kwibukulupila, kuleka kwibutatana nansha dimo, kadi  nkyashetukilepo.” Shi udi na lwitabijo lukomo mu milao ya Leza, ukafwena kudi Yehova kadi kukakwatwapo moyo.—Nki. 3:25, 26.

8. Le muswelo otumona kupwila ulombola bika? Shintulula.

8 Tanwa ku kupwila kitatyi ne kitatyi. Kupwila kwitukwashanga tufwene kudi Yehova. Muswelo otumona kupwila ulombola shi tukabwanya kukomena kupangwapangwa mu mafuku a kumeso. (Bah. 10:24, 25) Mwanda waka? Shi dyalelo ketutanwangapo ku kupwila pa mwanda wa tubikoleja tutyetutye, le bikekala namani mu mafuku a kumeso shi bibaketulombe kutūla būmi bwetu mu kyaka mwanda wa kwibunga na banabetu mu lwitabijo? Pakwabo kadi, shi tusumininwe kutanwa ku kupwila, ketukaleka’byopo nansha shi balwana betukankaja kwibungila pamo. Kino kyo kitatyi kya kusanswa kupwila kwetu. Shi tusenswe kupwila, kupangwapangwa nansha kukankajibwa na balupusa, kekukalengejapo tuleke kukōkela Leza kupita’ko bantu.​—Bil. 5:29.

Kukwatyila bisonekwa ne ñimbo ya Bulopwe tamba’nka pano kukakukwasha mu kitatyi kya kupangwapangwa (Tala musango 9) *

9. Mwanda waka kukwatyila bisonekwa i muswelo muyampe wa kwiteakanya ku kupangwapangwa?

9 Kwatyila bisonekwa byosenswe. (Mat. 13:52) Nansha luté lobe byokelubwanininepo, ino Yehova ubwanya kwingidija mushipiditu wandi ujila wa bukomo mwanda wa kukuvuluja bisonekwa. (Yoa. 14:26) Tutu umo wakutyilwe mu Alemanye wa Kutunduka mu kifungo kya bunka unena’mba: “Dyadi dyese dikatampe mwanda mu kine kitatyi’kya nadi mukwatyile pa mutwe bisonekwa tutwa na tutwa! Nadi mbwanya kupityija mafuku onso nangulukila pa myanda palapala ya mu Bible.” Bino bisonekwa byakweshe uno tutu ekale pabwipi na Yehova ne kūminina na kikōkeji.

(Tala musango 10) *

10. Mwanda waka tufwaninwe kukwatyila ñimbo?

10 Kwatyila ne kwimba ñimbo itumbija Yehova. Ba Polo ne Shilasa pobākutyilwe mu Fidipai, bāimbile ñimbo ya ku mushipiditu yobādi bakwatyile pa mutwe. (Bil. 16:25) Mu muswelo umo onka, kitatyi kyaselelwe banabetu ba mu Inio Sovietike wa kala baenda nabo bu misungi ku Siberi, le bekomeje namani? Kaka Mariya Fedun uvuluka’mba: “Twadi twimba ñimbo yonso yotwadi tuyukile, ñimbo ya mu dibuku dya ñimbo.” Wanenene amba, ino ñimbo yebakankamikile abo bonso ne kwibakwasha bemone bu badi pabwipi na Yehova. Le nobe ukankamananga kitatyi kyoimba ñimbo ya ku mushipiditu yosenswe? Nanshi kwatyila ino ñimbo tamba’nka pano!—Tala kapango kanena’mba “ Nkankamike.”

 MWA KWIKADILA NA BUKANKAMANE BUKATAMPE

11-12. (a) Mungya 1 Samwele 17:37, 45-47, mwanda waka Davida wādi na bukankamane? (b) Le i ñeni’ka ya kamweno yotuboila ku kimfwa kya Davida?

11 Pa kulwa na kupangwapangwa, usakilwa bukankamane. Le i bika byobwanya kulonga shi umona’mba kudipo na ino ngikadila? Vuluka’mba bukankamane bwa bine kebulondangapo kimano, bukomo, nansha bwino bobe. Langulukila pa kimfwa kya nkasampe Davida kitatyi kyaākalwile na Ngodiata. Shi tumudingakanye na uno kampangala, Davida wādi mutyetye, wampikwa bukomo ne bya bulwi. Davida kādipo nansha na kipete kine. Inoko, wādi na bukankamane bukatampe. Davida wāendele pampikwa moyo kukalwa na uno kampangala wa kibengo.

12 Mwanda waka Davida wādi na bukankamane bukatampe? Wādi ukulupile bya binebine amba Yehova udi nandi. (Tanga 1 Samwele 17:37, 45-47.) Davida kātelepo mutyima ku bukata bwa Ngodiata. Inoko, wādi uyukile amba Ngodiata i mutyetyetyetye shi tumudingakanye na Yehova. Le i ñeni’ka yotuboila ku ino nsekununi? Tukekala na bukankamane shi tukulupile amba Yehova udi netu ne amba balwana netu i batyetyetyetye shi twibadingakanye na Leza Mwinē Bukomo Bonso. (2 Bi. 20:15; Ñim. 16:8) Le i muswelo’ka otubwanya kwikala na bukankamane bukatampe tamba’nka pano​—kepashilwile kupangwapangwa?

13. Le i muswelo’ka otubwanya kwikala na bukankamane bukatampe? Shintulula.

13 Tubwanya kwikala na bukankamane bukatampe tamba’nka pano na kusapwila bantu bonso myanda miyampe ya Bulopwe bwa Leza. Mwanda waka? Mwanda kusapula kwitufundijanga tukulupile mudi Yehova ne kwitupwa moyo wa kutyina bantu. (Nki. 29:25) Monka mukomenanga misunya yetu kitatyi kyotwitamuna bidyoma, netu twikalanga na bukankamane bukatampe kitatyi kyotusapula ku njibo ne njibo, mu bīkwe, bya kiponka na ponka, ne mu bifuko bya busunga. Shi twikale na bukankamane bwa kusapula tamba’nka pano, tuketeakanya biyampe mwa kusapwila nansha shi mwingilo wetu ubakankajibwa.​—1 Ts. 2:1, 2.

Nancy Yuen kaitabijepo kuleka kusapula myanda miyampe (Tala musango 14)

14-15. Le i ñeni’ka yotubwanya kuboila ku kimfwa kya ba Nancy Yuen ne Valentina Garnovskaya?

14 Tubwanya kuboila ñeni mivule ku kimfwa kya bakaka babidi ba kikōkeji balombwele bukankamane bwa binebine.  Nancy Yuen wadi’tu na bula bwa metele amo ne kipindi, ino kadipo uzakajibwa. * Kaitabijepo kuleka kusapula myanda miyampe ya Bulopwe bwa Leza. Mfulo mfulō, bamukuta kintu kya myaka 20 mu Shine. Balupusa badi bamusambija banenene amba, mu yabo ntanda aye ye “muntu wadi na mutyima mukomo bininge.”

Valentina Garnovskaya wadi ukulupile amba Yehova udi nandi (Tala musango 15)

15 Valentina Garnovskaya nandi wakutyilwe mu Inio Sovietike wa kala misunsa isatu mu bula bwa kintu kya myaka 21. * Mwanda waka? Wadi musumininwe kusapula nyeke, balupusa kebamwite bu “muntu uleta kyaka kikatampe.” Le i bika byakweshe bano bakaka babidi ba kikōkeji bekale na bukankamane bukatampe? Badi bakulupile amba Yehova udi nabo.

16. Le i bika bitukwasha twikale bakankamane?

16 Monka motwanenanga, pa kwikala bakankamane, ketufwaninwepo kwisumbidila bukomo ne bwino bwetu. Ino, tufwaninwe kukulupila’mba Yehova udi netu ne amba i aye witulwila. (Kup. 1:29, 30; Zek. 4:6) Kino kyo kitukwasha twikale bakankamane.

MWA KULWILA NA MUSHIKWA WA BANTU

17-18. Mungya Yoano 15:18-21, le i kidyumu’ka kitupele Yesu? Shintulula.

17 Tusakanga bakwetu betulēmeke, ino ketufwaninwepo kwimona bu ketudipo na mvubu shi bantu kebetusenswepo. Yesu wānenene amba: “Mwi ba nsangaji kitatyi kyonso kyobemushikwa, kitatyi kyobemupanga, bemufutulula, ne kutuluja dijina dyenu amba mwi babi pa mwanda wa Mwanā muntu.” (Luka 6:22) Le Yesu wādi ukimba kunena bika?

18 Yesu kādipo usaka kunena’mba bene Kidishitu bafwaninwe kusangala shi abebashikwe. Ino wālombwele bintu bivudile kulongeka. Ketudipo ba ino ntanda. Tulondanga bufundiji bwa Yesu mu būmi bwetu ne kusapula musapu waādi usapula. O mwanda ntanda i mitushikwe.  (Tanga Yoano 15:18-21.) Tusakanga kusangaja Yehova. Shi bantu abetushikwe mwanda’po’tu tusenswe Tata wetu, bibatala abo bene.

19. Le i muswelo’ka otubwanya kwiula kimfwa kya batumibwa?

19 Kokaleka kintu nansha kimo kinena nansha kilonga bantu ba bitupu kikulengeje ufwe bumvu bwa kwikala Kamoni wa Yehova. (Mika 4:5) Tubwanya kwifunda muswelo wa kukomena moyo wa kutyina bantu na kulangulukila pa kimfwa kyāshile batumibwa mu Yelusalema kinondanonda na kwipaibwa kwa Yesu. Bādi bayukile amba bendeji ba bipwilo bya Bayuda i bebashikwe bininge. (Bil. 5:17, 18, 27, 28) Inoko, bādi benda ku tempelo difuku ne difuku ne kwiyukanya ku bantu bonso amba i bana ba bwanga ba Yesu. (Bil. 5:42) Kebātādilwepo na moyo. Netu tubwanya kukomena moyo wa kutyina bantu na kwiyukanya kitatyi ne kitatyi amba twi Batumoni ba Yehova​—ku kaji, ku masomo, ne ku balondakani netu.​—Bil. 4:29; Loma 1:16.

20. Mwanda waka batumibwa bādi na nsangaji nansha byobādi bebashikwe?

20 Mwanda waka batumibwa bādi na nsangaji? Bādi bayukile kine kyobebashikīlwe, kadi bādi bamwene amba i dyese kususulwa pa mwanda wa kulonga kiswa-mutyima kya Yehova. (Luka 6:23; Bil. 5:41) Mutumibwa Petelo wālembele mwenda mafuku amba: “Nansha shi mususuke pa mwanda wa boloke, mwi ba nsangaji.” (1 Pe. 2:19-21; 3:14) Shi tujingulwile amba i betushikwe pa mwanda wa boloke, ketukalekapo mushikwa wa bantu witukwatyije moyo.

UKAMWENA MU KWITEAKANYA

21-22. (a) Le ubasumininwa kulonga bika pa kwiteakanya ku kupangwapangwa? (b) Le i bika byotukesambila’po mu kishinte kilonda’ko?

21 Ketuyukilepo kitatyi kyobaketupangapanga nansha kyobaketukankaja kutōta Yehova. Inoko, tuyukile amba tubwanya kwiteakanya tamba’nka pano na kuningija kipwano kyetu na Yehova, kwikala na bukankamane bukatampe, ne kwifunda mwa kulwila na mushikwa wa bantu. Kwiteakanya kotwiteakanya tamba’nka pano kuketukwasha tukemanije pototo mu mafuku a kumeso.

22 Ino le bikekala namani shi abetukankaja kutōta? Mu kishinte kilonda’ko, tukesambila pa misoñanya iketukwasha twendelele kwingidila Yehova nansha shi abetukankaja.

LWIMBO 118 “Witubweje’ko Lwitabijo”

^ mus. 5 Ketusakengapo betushikwe. Inoko panopano nansha mu mafuku a kumeso, batwe bonso tukatanwa na kupangwapangwa. Kino kishinte kisa kwitukwasha tumone muswelo wa kukomena kupangwapangwa na bukankamane.

^ mus. 7 Tala Kiteba kya Mulami kya Falanse, 1 Kweji 4, 1966, p. 212-223.

^ mus. 14 Tala Kiteba kya Mulami kya Falanse, 15 Kweji 10, 1979, p. 4-7. Tala ne video inena’mba Le nom de Jéhovah sera connu pa JW Téledifusion. Twela mu INTERVIEWS ET TÉMOIGNAGES.

^ mus. 15 Tala dibuku Annuaire 2008 des Témoins de Jéhovah, p. 191-192.

^ mus. 67 NSHINTULWILO YA KIFWATULO: Mu butōtyi bwa kisaka, bambutwile bengidija tulata mwanda wa kukwasha babo bana bakwatyile bisonekwa.

^ mus. 70 NSHINTULWILO YA KIFWATULO: Kisaka kimo kimba ñimbo ya Bulopwe mu motoka pobenda ku kupwila.