Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami—Kya Kwifunda  |  Kweji 7 2017

Yehova “Afikije Monsomonso Mōfwatakenya Ñeni”

Yehova “Afikije Monsomonso Mōfwatakenya Ñeni”

“Wisangaje mudi Yehova; Nandi ukakupanga bisakasaka mutyima obe.”​—ÑIMBO YA MITŌTO 37:4.

ÑIMBO: 89, 140

1. I butyibi bwa muswelo’ka bufwaninwe kukwata bankasampe? I bika bibwanya kwibakwasha baleke kukambakanya mutyima bipitepite? (Tala kifwatulo ku ngalwilo.)

A NKASAMPE padi nobe witabije’mba kumeso kwa kwenda lwendo, i byampe kukwata’ko mpango. Būmi budi pamo bwa lwendo, kadi pokidi nkasampe kyo kitatyi kya kukwata’ko mpango. Na bubine kukwata ino mpango kekupēlangapo. Nsongwakaji umo witwa bu Heather unena’mba: “Biletanga moyo. Mwanda bilombanga kukwata butyibi bwa bintu byonso byokalonga mu būmi bobe.” Shi nobe ye mowiivwaninanga, nabya vuluka binenwa bya Yehova bya amba: “Kokizumbazumbapo, mwanda ami ne Leza obe, nkakukomeja; eyo, nkakukwasha.”​—Isaya 41:10.

2. Le ubayuka namani amba Yehova ukusakilanga ukwate mpango ikakuletala nsangaji kumeso?

2 Yehova ukukankamika ukwate mpango ya kumeso na tunangu. (Musapudi 12:1; Mateo 6:20) Ukusakilanga wikale na nsangaji. Kino kimwekanga kitatyi kyomona, kyoivwana, ne kyotompa butobaji bwa bintu byapangile. Kadi Yehova witutele mutyima mu miswelo mikwabo. Witupanga madingi ne kwitufundija mwa kwikadila senene mu būmi. O mwanda ufītwanga shi bantu abapele kulonda madingi andi a tunangu. Usapwilanga boba bapela kulonda buludiki bwandi amba: Mubatonge “kyokya  kyampikwapo kuloelelwa ami. . . . Talapo bidi, bengidi bami bakasepelela, ino banwe mukafwijibwa bumvu. Talapo bidi, bengidi bami bakemba ne tusepo ku mutyima.” (Isaya 65:12-14) Shi tukwata butyibi bwa tunangu mu būmi, nabya tutumbijanga Yehova.​—Nkindi 27:11.

MPANGO IKAKULETELA NSANGAJI

3. Lelo Yehova ukusakilanga bika?

3 Lelo Yehova ukusakilanga ukwate mpango’ka? Pa kwikala na nsangaji, ufwaninwe kuyuka Yehova ne kumwingidila. Kyo kyāpangile Yehova bantu. (Ñimbo ya Mitōto 128:1; Mateo 5:3) Banyama kyabo i enka kudya, kutoma, ne kubutula. Inoko Yehova ukusakilanga ukwate mpango ikakuletela nsangaji ne kwikala na būmi bwa kitungo. Umpangi obe i “Leza wa buswe,” “Leza wa nsangaji,” mwine wāpangile bantu “mu bu-kyelekejo” kyandi. (2 Kodinda 13:11; 1 Temote 1:11; Ngalwilo 1:27) Shi wiule Leza wetu wa buswe, nabya ukekala na nsangaji. Bible unena’mba: “Nsangaji ya kupāna itabukile ya kupebwa.” (Bilongwa 20:35) Le nobe kwemwenine uno mwanda? Buno i buyuki bwa mvubu mpata bwa mu būmi. Nanshi, Yehova ukusakilanga ukwate mpango ya kumeso imanine pa buswe boswele Yehova ne bantu bakwabo.​—Tanga Mateo 22:36-39.

4, 5. I bika byālengeje Yesu ekale na nsangaji?

4 A nkasampe, Yesu Kidishitu i mukushile kimfwa kiyampe. Paākidi mwanuke wādi ukaya na bakwabo ne kwisangaja. Enka na mwikilombwela Kinenwa kya Leza, kudi “kitatyi kya kusepa” ne “kitatyi kya kuja.” (Musapudi 3:4) Kadi Yesu wādi ufwena kudi Yehova na kwifunda Bisonekwa. Paādi na myaka 12, bafundiji ba mu tempelo baānine “lūku lwandi ne bilondololwa byandi.”​—Luka 2:42, 46, 47.

5 Yesu paātamine, wādi usangela kulonga byobya byādi bimulomba Leza kulonga. Kimfwa, Leza wādi umusakila asapule “myanda miyampe ku balanda” ne “kupūtula meso a bampofu.” (Luka 4:18) Ñimbo ya Mitōto 40:8 ilombola mwādi mwiivwanina Yesu amba: “Ndoelelwe monka mu kulonga kiswa-mutyima obe, abe Leza wami.” Yesu wādi usangela kusapwila bantu myanda itala padi Shandi. (Tanga Luka 10:21.) Difuku dimo, pa kupwa kwisamba na mwana-mukaji umo pa myanda itala butōtyi bwa bine, Yesu wālombwele bana bandi ba bwanga’mba: “Byami byakudya i kulonga kiswa-mutyima kya yewa wantumine ne kupwa mwingilo wandi.” (Yoano 4:31-34) Yesu wādi na nsangaji mwanda wādi usenswe Leza ne bantu bakwabo. Nobe ukekala na nsangaji shi usanswe Leza ne bantu bakwabo.

6. Mwanda waka kidi na mvubu kwisambila na bantu bakwabo pa mpango yobe ya kumeso?

6 Bene Kidishitu bavule bashilwile mwingilo wa bupania bakidi bankasampe, ne kino i kibaletele nsangaji. Le wabulwa’po kwisambila nabo pa mpango yobe? “Kokwa kekudipo kukala-ñeni biswa-mutyima bilāla: Ino pa bakala ñeni ba ntanda ne ntanda byakomejibwa.” (Nkindi 15:22) Padi bano batutu ne bakaka kebakatunyapo kukulombola amba mwingilo wa bupania ukakuteakanya ku myanda imoimo ya mu būmi bobe. Yesu wēfundile bintu bivule kudi Shandi paākidi mūlu. Kadi, wāendelele na kwifunda ne paādi wingila mwingilo wandi pano pa ntanda. Wādi usangela kusapwila bantu bakwabo myanda miyampe ne kulama bululame bwandi mu bitatyi bikomo. (Tanga Isaya 50:4; Bahebelu 5:8; 12:2) Leka bidi tubandaule mwanda waka mwingilo wa kitatyi kyonso ubwanya kukuletela nsangaji.

KINE KIKADILE KULONGA BANA BA BWANGA BU MWINGILO MUYAMPE MPATA

7. Mwanda waka bankasampe bavule basangelanga kulonga bana ba bwanga?

7 Yesu wetusoñenye twende tukalonge “bana ba bwanga” ne kufundija bantu. (Mateo 28:19, 20) Shi ukwate mpango ya kulonga uno mwingilo bu kobe kaji,  nabya ukekala na būmi bwa nsangaji kadi butumbija Leza. Enka mwikadilanga kaji ko-konso, bikakulomba kitatyi pa kwikala’mo na bwino. Tutu umo witwa bu Timothy, mwine washilwile mwingilo wa bupania paakidi nkasampe wanenene amba: “Nsangedile kwingidila Yehova kitatyi kyonso mwanda o muswelo umo ombwanya kumulombola’mba muswele. Dibajinji, nkyadipo mbwanya kushilula bifundwa bya Bible, inoko mwenda mafuku ponavilukidile mu mwaba ungi, nashilwile bifundwa bya Bible bivule mu kipindi’tu kya kweji. Mwifundi umo washilula ne kwiya ku kupwila ku Njibo ya Bulopwe. Kupwa nakafunda Masomo a Bible a Batutu Bankungulume afundwanga mu bula bwa myeji ibidi, bauntuma mu mwingilo mupya kwine konashilwile bifundwa biná. Nsenswe kufundija bantu kadi nebamonanga bashinta na bukwashi bwa mushipidi ujila.” * (Tala kunshi kwa dyani.)​—1 Tesalonika 2:19.

8. I bika byalongele bankasampe bamo pa kusapwila bantu bavule?

8 Kudi bankasampe bamo bakwete mpango ya kwifunda ludimi lweni. Kimfwa kimo bidi i kya Jacob, wa mu Amerika wa Kungala, walembele amba: “Ponadi na myaka isamba-ibidi, bakwetu bavule ba ku masomo badi besamba Kivietname. Nadi nsaka kwibasapwila myanda itala padi Yehova, kupwa nakwata mpango ya kwifunda lwabo ludimi. Divule, nadi nefunda Kivietname na kudingakanya Kiteba kya Mulami kya Angele na kya Kivietname. Kadi napwene na balunda ba mu kipwilo kya ludimi lwa Kivietname kya kubwipi na kwetu. Ponabwenye myaka 18, nashilula kwingila bu pania. Kitatyi pa kupita’po, nakafunda Masomo a Bible a Batutu Bankungulume. Kino i kinkwashe mu mwingilo wa bupania oñingila mu kisumpi kya ludimi lwa Kivietname, mwine mondi bu mukulumpe bunka bwami. Bantu bavule besamba Kivietname batulumukanga pa kuyuka’mba nefundile lwabo ludimi. Bangitanga nebasapwile, kadi divule nefundanga nabo Bible. Bamo baendelele kufika ne kukubatyijibwa.”—Dingakanya na Bilongwa 2:7, 8.

9. Le mwingilo wa kulonga bana ba bwanga witufundijanga bika?

9 Bine mwingilo wa kulonga bana ba bwanga ukufundijanga bibidiji biyampe bya mu mwingilo, mwa kwisambila senene, ne mwa kwikadila na kikulupiji ne bwino. (Nkindi 21:5; 2 Temote 2:24) Inoko uno mwingilo i usangaja nakampata mwanda ukufundijanga muswelo wa kubingija nkulupilo yobe na Bisonekwa. Kadi ukufundijanga ne mwa kwingidila pamo na Yehova.​—1 Kodinda 3:9.

10. I muswelo’ka obwanya kutana nsangaji mu mwingilo wa kulonga bana ba bwanga nansha shi mu obe mwaba mudi bikoleja?

10 Ubwanya kwikala na nsangaji mu mwingilo wa kulonga bana ba bwanga nansha shi mu obe mwaba mudi’tu bantu batyetye kete basangela kwifunda Bible. Pa kulonga bana ba bwanga, kipwilo kyonso kingidilanga pamo. Padi tutu umo nansha kaka ye ubwanya kufikija muntu ku kwikala bu mwanā bwanga, nansha nankyo batwe bonso tusangalanga mwanda twingilanga mwingilo umo. Kimfwa, Brandon, waingile bu pania mu bula bwa myaka kitema mu mwaba mwadi bantu batyetye basangela kwifunda Bible, unena’mba: “Nsenswe kusapula myanda miyampe mwanda kyo kintu kitulomba Yehova kulonga. Nashilwile mwingilo wa bupania ponapwile’tu masomo. Nsangelanga kukankamika bankasampe ba mu kyetu kipwilo ne kwibamona bendelela ku mushipiditu. Ponapwile kufunda Masomo a Bible a Batutu Bankungulume, natuminwe kukengila bu pania mu mwaba mupya. Na bubine, mu uno mwaba nkyasokwele’mopo muntu nansha umo waendelele kufika ne kukubatyijibwa, ino abo’ko bakwabo badi bebasokola. Ngidi na nsangaji mwanda nakwete mpango ya kwingila ne pa mfulo mwingilo wa kulonga bana ba bwanga.”​—Musapudi 11:6.

 KOKWA KUBWANYA KUKUFIKIJA MPANGO YOBE

11. Lelo bankasampe bavule bengidilanga Yehova mwingilo’ka?

11 Kudi mikenga mivule ya kwingidila Yehova. Kimfwa, bankasampe bavule bakwashanga ku mwingilo wa lūbako. Pano kusakilwanga Mobo a Bulopwe mapya tutwa na tutwa. Bino bifuko bitumbijanga Yehova, o mwanda ukekala na nsangaji shi ukwasha’ko pa kwibyūbaka. Kadi ubwanya ne kwikala na nsangaji ya kwingidila pamo na batutu ne bakaka. Ubwanya kwifunda bintu bivule, kimfwa mwa kwingidila senene kaji pampikwa kyaka ne mwa kwingidila pamo na batadi.

Boba batwela mu mwingilo wa kitatyi kyonso bemwenanga madyese mavule (Tala musango 11-13)

12. Le mwingilo wa bupania uletanga namani mikenga mikwabo ya mingilo?

12 Tutu umo witwa bu Kevin unena’mba: “Tamba ponadi nakidi mwanuke, nadi ngabilanga kwingidila Yehova kitatyi kyonso. Mfulo mfulō, nashilula mwingilo wa bupania ponabwenye myaka 19. Kitatyi kimo nadi ñingila na tutu umo wadi ūbaka. Nefundile’ko mwa kwelela misaka, madidisha ne milango. Kupwa, nakengila myaka ibidi na kisumpi kikwasha boba baponenwe na bimpengele, tūbaka Mobo a Bulopwe ne a banabetu. Ponaivwene amba kusakilwa bantu ba kukwasha ku lūbako mu Afrika wa Kunshi, nayujije fomu kupwa baungita. Muno mu Afrika, tupwanga Njibo ya Bulopwe mu mayenga matyetye kupwa twakashilula mikwabo. Botwingila nabo ku lūbako badi pamo’nka bwa bamwanetu ba ku mashi. Tushikatanga nabo pamo, twifunda nabo Bible pamo, kadi twingidila pamo. Kadi nsangelanga kusapwila pamo na banabetu ba mu kibundi yenga ne yenga. Bine mpango yonakwete ponakidi mwanuke i mimpe nsangaji mu muswelo onkyadipo nangila.”

13. Mwanda waka bankasampe bavule bengidila Yehova ku Betele badi na nsangaji?

13 Banabetu bamo badi bapania pano bengilanga ku Betele. Mwingilo wa ku Betele  i mwingilo uleta nsangaji mu būmi mwanda kintu kyonso kyolonga’ko i Yehova olongela’kyo. Kisaka kya Betele kikwashanga ku kutuma Mabible ne mabuku pa kusaka’mba bantu befunde bubine. Mwanetu umo wa mu kisaka kya Betele witwa bu Dustin unena’mba: “Netungile kitungo kya kwingila mwingilo wa kitatyi kyonso ponadi na myaka kitema, kadi ami mpwa’tu masomo nashilula bupania. Apo papita mwaka umo ne kipindi baungita ku Betele, kwine’kwa nefundile’ko mwa kwingidila ku kitampilo ne mwenda mafuku nefunda mwa kutūdila mpangiko ya mu olodinatele. Kinsangajanga bininge ku Betele i kwivwana kwendelela kwa mwingilo wa ntanda yonso wa kulonga bana ba bwanga. Nsangedile kwingidila kuno, mwanda byotulonga’ko bikwashanga bantu bafwene kudi Yehova.”

LE I MPANGO’KA YOKWETE?

14. Le i bika byobwanya kulonga tamba pano mwanda wa kwiteakanya mwa kwingidila mwingilo wa kitatyi kyonso?

14 Le i muswelo’ka obwanya kwiteakanya mwanda wa kwingila mwingilo wa kitatyi kyonso? Pa kwingidila Yehova senene, ufwaninwe kutamija ngikadila ya bwine Kidishitu. Wifunde Kinenwa kya Leza kitatyi ne kitatyi, langulukila’po na mushike, ne kulonga bukomo bwa kulondolola ku kupwila. Myaka yokidi ku masomo ubwanya kulumbulula manwa obe na kusapwila bakwenu myanda miyampe. Wifunde kuta bantu mutyima na kwibepangula na bunwa byobalanga pa mwanda kampanda ne kuteja malondololo abo. Kadi ubwanya kwituma mwanda wa kwingila mingilo ya pa kipwilo, kimfwa kukwasha ku kukundula ne kulongolola Njibo ya Bulopwe. Yehova usangelanga kwingidija boba betyepeje kadi badi na mutyima wa kwingila. (Tanga Ñimbo ya Mitōto 110:3; Bilongwa 6:1-3) Mutumibwa Polo wāselele Temote bengile nandi bumishonele mwanda wādi “unenenwa biyampe na banabetu.”​—Bilongwa 16:1-5.

15. Le i bika byobwanya kulonga pa kusokola’ko kaji kakakukwasha wingile bupania?

15 Bengidi ba kitatyi kyonso bavule basakilwa kwikala na kaji. (Bilongwa 18:2, 3) Padi ubwanya kufunda’ko masomo mu kitatyi kityetye, mene akakukwasha usokole’ko kaji ka kitatyi kityetye mu kyenu kibundi. Wisambe na mutadi wenu wa kipindi ne na bapania bakwabo pa mpango yokwete, kadi wibalombe madingi. Kupwa enka na munenena’kyo Bible, “tūla mingilo yobe kudi Yehova, nankyo mifwatakanyo yobe ikakomejibwa.”​—Nkindi 16:3; 20:18.

16. Le mwingilo wa kitatyi kyonso ubwanya kukuteakanya namani ku biselwa bikwabo bya kumeso?

16 Kulupila’mba Yehova ukusakilanga ukwatyije “pototo” nsangaji ya kumeso. (Tanga 1 Temote 6:18, 19.) Mwingilo wa kitatyi kyonso ukakukwasha wikale mwine Kidishitu mupye ku mushipiditu pomwingila pamo na bengidi bakwabo ba kitatyi kyonso. Kadi, banabetu bavule bashilwile mwingilo wa kitatyi kyonso bakidi bankasampe, i bamone’mba kino kyebakweshe mwenda mafuku mu busongi bwabo. Divule, boba badi bengila bupania kumeso kwa kwisonga, bendelelanga na kwibwingila ne mu busongi bwabo mwine.​—Loma 16:3, 4.

17, 18. Le kukwata mpango kutala namani ne mutyima obe?

17 Ñimbo ya Mitōto 20:4 inenena padi Yehova amba: “Akupe musakila mutyima obe, kadi afikije monsomonso mōfwatakenya ñeni.” Pokwata mpango ya kumeso, langulukila pa byobya bine byosaka kulonga mu bobe būmi. Langulukila pa bilonga Yehova mu ano etu mafuku ne pa byobwanya kulonga mu mwingilo wandi. Kupwa kwata mpango imusangaja.

18 Shi wingidile Yehova ne kumutumbija mu būmi bobe bonso, nabya ukekala na nsangaji. Ukesangaja “mudi Yehova; nandi ukakupanga bisakasaka mutyima obe.”​—Ñimbo ya Mitōto 37:4.

^ mus. 7 Ano masomo apingakanibwe na Masomo a Basapudi ba Bulopwe.