Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami—Kya Kwifunda  |  Kweji 6 2017

Le Ukata’tu Mutyima Enka ku Mumwekelo wa Panja?

Le Ukata’tu Mutyima Enka ku Mumwekelo wa Panja?

DON, Kamoni wa Yehova umo wa mu Kanada, wadi ulonga bukomo bwa kusapwila bantu bashikatanga mu mashinda. Don unena pangala pa muntu umo amba: “Sasāla umo witwa bu Peter wadi nsala wa mu meso fututu onadi nkyamwene kashā mu mashinda. Wadi mukutakane kadi i kutupu wadi uswa kumufwena. Wadi upela misunsa mivule bintu biyampe byobadi bamulongela.” Inoko Don paadi na myaka 14, walongele bukomo mwanda wa kukwasha uno sasāla na kitūkijetyima.

Difuku dimo, Peter waipangwile Don amba: “Kyounkambakenya i kika? Bantu bonso kebamfwenangapo. Abe i kika kyosaka?” Don waingidije bisonekwa bisatu na bunwa mwanda wa kutenga mutyima wa Peter. Dibajinji bidi, waipangwile Peter shi uyukile amba Leza udi na dijina ne kumunena etangile’dyo mu Bible mu Ñimbo ya Mitōto 83:18. Pa kumulombola kyaadi usaka, Don watangila Peter Loma 10:13, 14, unena’mba “ense wa kwita dijina dya Yehova ukapandanga.” Ebiya, Don watanga Mateo 9:36 ne kunena Peter nandi etangile’ye aye mwine. Uno vese unena’mba: “Aye [Yesu] pa kumona bibumbo bya bantu, webakwatyilwa lusa mwanda badi basusulwa ne kukusankanibwa bwa mikōko yampikwa mukumbi.” Aye upwa’tu kutanga kino kisonekwa, Peter waipangula koku impolo imuyengayenga mu meso amba: “Le nami mbadilwa mu ino mikōko?”

Penepo Peter waanza kushinta. Waoya, wetenda myevu senene, ne kuvwala bisandi biyampe byamupele Don. Peter waikala na bukundwe.

Peter wadi na kayé mwaadi ulemba myanda ya mu būmi bwandi. Mu bipindi bibajinji wadi mulembe’mo amba fukutu ne mfindi, inoko myanda mipya yaalembele’mo yadi mishile. Mwanda umo waalembele unena’mba: “Dyalelo nayuka dijina dya Leza. Pano shi ke nombela, i kudi Yehova kombwanya kulombela. I kya kutendelwa kuyuka dijina dyandi. Don waunombolanga’mba Yehova ubwanya kwikala Mulunda nami, kadi ubwanya kungivwana kitatyi kyonso kyomulomba kintu kyo-kyonso.”

 Bilembwa bya mfulo bya Peter, walembēle’byo kaka wandi ne nkasandi mwana-mulume. Walembele amba:

“Nkivwenepo biyampe dyalelo. Mona’mba myaka yami ibafudila pano. Nansha shi dyalelo dyo difuku dyami dya mfulo, inoko nkulupile amba tukemonanga monka na mulunda nami [Don] mu Paladisa. Pomutanga bino binenwa, yukai’mba nkikidi’kopo. Ino shi mubamone mwana-mulume umo pa lwami lufu umweka bu mwitolole, mwisambei nandi, kadi nemwisashila, tangai dino dibuku dityetye difītuluka [wadi wisambila pa dibuku dya kwifunda nadyo Bible, “Bubinebine butwala ku bumi bwa nyeke ne nyeke” dyobamupele myaka kunyuma]. * Dyaunkankamikile amba nkemonanga monka na mulunda nami mu Paladisa. Nkulupile kino na mutyima wami onso. Mwanenu muswedibwe, Peter.”

Pa kupwa kwa kidilo, Ummi kakwa Peter wanenene amba: “Pano ke padi myaka ibidi na potwesambile na Peter. Uno o wadi musunsa mubajinji waadi umweka bu musangale. Wadi’nka umungamunga.” Uno kaka wandi wasapwidile Don amba: “Nsa kutanga dino dibuku mwanda kintu kyo-kyonso kitenga mutyima wa Peter i kya pa bula.” Kadi Ummi waitabije ne kwifundila’ko bivule mu dibuku dya panopano Lelo I Bika Bine Bifundija Bible? na Kamoni wa Yehova.

Batwe netu ketufwaninwepo kuta mutyima enka ku mumwekelo wa panja wa muntu, ino tusanswei bya binebine bantu ba miswelo yonso ne kwibatūkijija mutyima. (1 Temote 2:3, 4) Shi tulonge uno muswelo, nabya tukakwasha bantu badi pamo bwa Peter, bene bamweka bu ba bule ku meso a bantu, ino abo’ko ba mityima miyampe. Tubwanya kukulupila’mba Leza, mwine “ubandilanga pa mutyima,” ukatamija bubine mu bantu ba mityima myoloke.​—1 Samwele 16:7; Yoano 6:44.

^ mus. 7 Dilupulwe na Batumoni ba Yehova, ino kedikitampwangapo.