Enda ku bidi'mo

Enda ku kifunka

Batumoni ba Yehova

Tonga Ludimi Kiluba

A Bankasampe—Komenai Dyabola

A Bankasampe—Komenai Dyabola

“Vwalai bivwalwa byonso bya bulwi bya kwa Leza amba muyuke kwimanija pototo ku bilongwa bya bukosoke bya Dyabola.”​—EFISESA 6:11.

ÑIMBO: 79, 140

1, 2. (a) Mwanda waka bankasampe bene Kidishitu banekenyanga bulwi bobalwa na Satana ne bandemona? (Tala kifwatulo ku ngalwilo.) (b) Lelo i bika byotusa kwisambila’po?

MUTUMIBWA Polo wādingakenye bene Kidishitu na basola. Tudi mu bulwi, kadi balwana netu i bantu badi’ko bine! Ino bulwi bwetu ke bwa kulwapo na bantu; abo i bwa kulwa na Satana ne bandemona. Ke balwe divita mu tununu ne tununu twa myaka kadi bayukile’byo kulwa senene. O mwanda bibwanya kumweka’mba ketubwanyapo kunekenya dino divita, nakampata shi tukidi bankasampe. Le bankasampe babwanya kunekenya bano balwana bakomokomo? En-en babwanya, kadi bebanekenyanga! Namani? Yehova wibapanga bukomo. Kadi, pamo bwa basola bafundijibwe bulwi senene, bavwalanga “bivwalwa byonso bya bulwi bya kwa Leza” mwanda wa bekale beteakanye mwa kulwila.​—Tanga Efisesa 6:10-12.

2 Polo pa kwingidija kino kyelekejo, padi wāfwatakenye mu ñeni bya bulwi byādi bivwala basola bene Loma. (Bilongwa 28:16) Mu kino kishinte, tusa kubandaula’mo kino kyelekejo kilumbuluke. Kadi tusa kwisambila’mo ne pa binenwa bya bankasampe bitala pa bikoleja ne byabuyabuya bidi mu kuvwala  kipindi ne kipindi kya bya bulwi byetu bya ku mushipiditu.

Lelo Uvwele Kipindi ne Kipindi kya bya Bulwi Byobe?

‘MUKABA WA BUBINE’

3, 4. Le bubine bwa mu Bible budi pamo bwa mukaba wa sola mwine Loma muswelo’ka?

3 Tanga Efisesa 6:14. Mukaba wa basola bene Loma wādi wa kyuma kipapakane, wādi ukinga kifuka kya sola ne kusela bulēmi bwa kilama-kyadi. Kadi mikaba imo yādi ne na mwa kusomeka lupete ne kipete. Shi sola i mwikute senene mukaba, wādi umona bu ubwanya kwenda ku bulwi kwa kubulwa makambakano.

4 Pamo bwa mukaba, bubine botwifunda mu Kinenwa kya Leza bwitukiñanga ku bufundiji bwa bubela. (Yoano 8:31, 32; 1 Yoano 4:1) Potwenda twifunda kusanswa bininge bubine bwa mu Kinenwa kya Leza, po pene biketupēlela kwiendeja mungya misoñanya ya Leza, nansha kuvwala “kilama-kyadi.” (Ñimbo ya Mitōto 111:7, 8; 1 Yoano 5:3) Kadi, shi twivwanije senene buno bubine, nabya tukabwanya kulwa na balwana netu.​—1 Petelo 3:15.

5. Mwanda waka tufwaninwe kwisamba nyeke bya bine?

5 Byotumwene bubine bwa mu Kinenwa kya Leza na mvubu, o mwanda tukōkelanga byobya binena Bible na kunena nyeke bya bine. Bubela i kya bulwi kifike’po kya Satana. Bubela busanshijanga mwine ubepa’bo ne boba bebukulupila. (Yoano 8:44) O mwanda tuloñanga bukomo bwetu bonso bwa kuleka kubepa nansha byotudi ba kubulwa kubwaninina. (Efisesa 4:25) Kino kibwanya kwikala kikomo. Abigail, wa myaka 18, unena’mba: “Kunena bya bine kumwekanga nyeke bu ke kuyampepo, nakampata shi bubela’bwa bubwanya kukwepeja ku mwanda.” Penepa mwanda waka uloñanga bukomo bwa kwisamba nyeke bya bine? Unena’mba: “Shi nesamba bya bine, ngikalanga na mutyima wa mundamunda utōka ku meso a Yehova. Bambutwile bami ne balunda nami bayukile amba babwanya kunkulupila.” Victoria, wa myaka 23, unena’mba: “Babwanya padi kukuzawila shi wisamba bya bine ne kulwila nkulupilo yobe. Ino umwenanga’mo nyeke byabuyabuya bilumbuluke: Bantu bakakukulupila, ukemona bu udi pabwipi na Yehova, kadi baswe bobe bakakulēmeka.” Le ubamone mwanda waka i biyampe kuvwala ‘mukaba wa bubine’ kyaba kyonso?

Mukaba wa bubine (Tala musango 3-5)

“KILAMA-KYADI KYA BOLOKE”

6, 7. Mwanda waka boloke i budingakanibwe na kilama-kyadi?

6 Divule kilama-kyadi kya sola mwine Loma kyādi kipungwe na byuma bipapakane bitonte mwanda wa kujika kyadi. Bino byuma byādi bikwatyijibwa ku myonji ya kiseba na malobo ne bisulo (bukle). Mapuji andi ādi mapūtwe na byuma bingi byādi bilamete ku kiseba. Kilama-kyadi kyādi kimujikakanya kujinajina, kadi byādi bimulomba kwikibandaula kitatyi ne kitatyi shi i kutupu pashele pululu. Kino kilama-kyadi kyādi kikinga mutyima wandi ne bipindi bikwabo ku bui bwa kipete nansha ku nsongo ya muketo!

7 Misoñanya myoloke ya Yehova, mine ikiñanga “mutyima” wetu, nansha bumuntu bwetu bwa munda, ibwanya kudingakanibwa na kino kilama-kyadi. (Nkindi 4:23) Sola kādipo ufwaninwe kushinta kilama-kyadi kya byuma bikomo na kya byuma bya bulebule. Mu muswelo umo onka, netu ketufwaninwepo kushinta nansha dimo misoñanya myoloke ya Yehova na milangwe yotumona batwe bene bu myoloke. Ketubwanyapo kukinga mutyima wetu batwe bene. (Nkindi 3:5, 6) O mwanda tufwaninwe kubandaula kyaba kyonso amba kyetu “kilama-kyadi” kikilamine mutyima wetu.

8. Mwanda waka tufwaninwe kukōkela misoñanya ya Yehova?

8 Le kyaba kimo umonga’mba misoñanya  ya Yehova ibakutyinye mbavu nansha kukukankaja ulonge byosaka? Daniel, wa myaka 21, unena’mba: “Badimu ne bakwetu ba ku masomo badi bansepa, mwanda nadi neendeja mungya misoñanya ya mu Bible. Kitatyi kimo, neivwene bibi, natyumukwa ne mutyima.” Ino le pano wiivwananga namani? Unena’mba: “Mwenda mafuku, nemwenine byabuyabuya bya kwiendeja mungya misoñanya ya Yehova. Balunda nami bamo bashilwile kutoma dyamba; bakwabo baleka ne masomo mene. I bya bulanda pa kumona mwabipile būmi bwabo. Bine Yehova witukiñanga.” Madison, wa myaka 15, unena’mba: “Nekondanga pa kulamata ku misoñanya ya Yehova ne pa kupela kulonda byobya bimona bakwetu bu biyampe nansha bisangaja.” Penepa, le i bika bimukwashanga? “Mvulukanga’mba nselele dijina dya Yehova kadi ano matompo i muswelo wa Satana wa kulwa nami. Shi nanekenya matompo, neivwananga biyampe.”

Kilama-kyadi kya boloke (Tala musango 6-8)

“KUVWALA KU MAULU BILATO BYA MUTYIMA WA KUSAPULA MYANDA MIYAMPE YA NDOE”

9-11. (a) Lelo i bilato’ka bya kyelekejo bifwaninwe kuvwala bene Kidishitu? (b) Le i bika bibwanya kwitukwasha tuleke kwivwana moyo potusapula?

9 Tanga Efisesa 6:15. Sola mwine Loma kādipo ubwanya kwenda ku bulwi pa kubulwa bilato. Byādi bipungwe na myonji ya kiseba ya mpambo isatu, mine yādi ibikomeja bininge. Kadi bino bilato byādi biyampe, o mwanda sola wādi ubwanya kwenda pampikwa kutyina kintu kadi pampikwa kushetemuka.

10 Bilato byādi bivwala basola bene Loma byādi bibakwasha banekenye ku bulwi, netu bilato bya kyelekejo byotuvwala bitukwashanga tusapule “myanda miyampe ya bintu biyampe.” (Isaya 52:7; Loma 10:15) Kyaba kimo, bilombanga bukankamane bukatampe pa kusapula. Bo, wa myaka 20, unena’mba: “Nadi ngivwana moyo pa kusapwila bakwetu ba ku masomo. Nadi ngivwana bumvu. Shi mvuluke, nkiyukilepo kine kyonadi neivwanina uno muswelo. Inoko pano ngidi na nsangaji ya kusapwila bakwetu.”

11 Bankasampe bavule bene Kidishitu bamonanga’mba kebekalangapo na moyo pa kusapula shi i beteakanye kumeso kwa kitatyi. Le i bika byobwanya kulonga pa kwiteakanya? Julia, wa myaka 16, unena’mba: “Nselanga bitabo mu sakoshi yami ya ku masomo, kadi ntejanga bakwetu ba ku masomo pobesambila pa mumweno wabo ne nkulupilo yabo. Penepa nalangulukila pa bintu bibwanya kwibakwasha. Shi ne mwiteakanye, mbwanyanga kwibasapwila bine bibwanya kwibakwasha.” Makenzie, wa myaka 23, unena’mba: “Shi udi biyampe na bakwenu ne kwibateja na katentekeji, nabya ukasokola milangwe yobekonda nayo. Noñanga bukomo bwa kutanga myanda yonso ilupwilwa bankasampe. Mu uno muswelo mbwanyanga kukwasha bakwetu na myanda ya mu Bible nansha yoya idi pa jw.org.” Kwiteakanya senene mwanda wa busapudi kudi pamo bwa kuvwala “bilato” bikubwane.

Kuvwala ku maulu bilato bya mutyima wa kusapula (Tala musango 9-11)

“NGABO MIKATAMPE YA LWITABIJO”

12, 13. Lelo i ‘miketo’ka ya mudilo’ imoimo ya Satana?

12 Tanga Efisesa 6:16. Sola mwine Loma wādi usela ngabo mikatampe myende mu bula. Yādi imujika kutamba ku mapuji kufika ne ku manwi kadi yādi imukinga ku bipete, ku mikobe, ne ku miketo.

13 Lelo i ‘miketo’ka ya mudilo’ ibwanya kukwasa Satana? Padi ubwanya kukutamba na bubela pa myanda itala padi Yehova. Satana ukusakilanga wimone amba Yehova kakusenswepo ne amba i kutupu muntu nansha umo ukutele mutyima. Ida, wa myaka 19, unena’mba: “Divule nadi nemona’mba Yehova kadipo nami pabwipi kadi kasakengapo kwikala Mulunda nami.” Le i bika byaadi ulonga shi weivwana uno  muswelo? “Kupwila kukomejanga lwitabijo lwami. Nadi nsenswe kushikata’mo pampikwa kulondolola, nanga’mba i kutupu muntu nansha umo usa kusangela byonsa kulondolola. Inoko pano, nteakanyanga kupwila ne kulonga bukomo bwa kulondolola’ko dibidi nansha disatu. Ke bimpēlelangapo, ino neivwananga biyampe shi nalonga namino. Kadi batutu ne bakaka bankankamikanga bininge. Divule njokanga ku kupwila koku ndyukile amba Yehova unsenswe.”

14. Le i ñeni’ka yotuboila ku kimfwa kya Ida?

14 Ngabo ya sola mwine Loma yādi nyeke na bukata bumo. Ino monka motwekimwena mu kimfwa kya Ida, lwitabijo lwetu keludipo uno muswelo. Lwitabijo lwetu lubwanya kutamina’ko nansha kushinika, kukomena’ko nansha kuzoza. I batwe bene ba kutonga. (Mateo 14:31; 2 Tesalonika 1:3) ‘Ngabo yetu ya lwitabijo’ byoitulama, nanshi twiibaijei nyeke ne kwiikomeja!

Ngabo mikatampe ya lwitabijo (Tala musango 12-14)

“KILAMA-MUTWE KYA LUPANDILO”

15, 16. Lelo lukulupilo lwetu ludi namani pamo bwa kilama-mutwe?

15 Tanga Efisesa 6:17. Sola mwine Loma wādi uvwala kilama-mutwe mwanda wa kukinga mutwe wandi, nshingo, ne mpala. Kilama-mutwe kyādi na kwa kwikikwatyila, o mwanda kyaba kimo sola wādi ubwanya ne kwikisela ku makasa.

16 Monka mulaminanga kilama-mutwe bongolo bwa sola, “lukulupilo lwa lupandilo” lwetu nalo lulamanga milangwe yetu. (1 Tesalonika 5:8; Nkindi 3:21) Lukulupilo lwitukwashanga tute mutyima ku milao ya Leza ne kuleka kutyumukwa mutyima pa mwanda  wa makambakano etu. (Ñimbo ya Mitōto 27:1, 14; Bilongwa 24:15) Pa kusaka’mba lukulupilo lwitulame, lufwaninwe kwikala lwa bine kotudi. Tufwaninwe kuvwala “kilama-mutwe” ku mutwe wetu, ke kusela’kyopo ku makasa!

17, 18. (a) Lelo Satana ubwanya kwitudimba namani tuvūle kilama-mutwe kyetu? (b) Lelo i muswelo’ka otubwanya kwilombola’mba ketudimbilwepo na Satana?

17 Lelo Satana ubwanya kwitudimba namani tuvūle kilama-mutwe kyetu? Langulukila pa byobya byaālongele Yesu. Satana wādi uyukile amba Yesu ukekalanga mulopwe wa muzo wa muntu. Inoko, Yesu wādi ufwaninwe bidi kususuka ne kufwa. Kadi pa kwikala bu Mulopwe, wādi ufwaninwe kwilaija kitatyi kitungile Yehova. O mwanda Satana wāmupele mukenga wa kubikala bukidibukidi. Satana wālaile Yesu amba shi alonge’tu kilongwa nansha kimo kya kumutōta, nabya ukekala mulopwe wa ino ntanda ponka na ponka. (Luka 4:5-7) Kadi Satana uyukile amba Yehova i mulaye kuketupa bintu bilumbuluke mu ntanda mipya. Ino tufwaninwe kwilaija kufika’nka ne bikafikidila uno mulao, kadi pano potukilaija tubwanya kutanwa na makambakano mavule. O mwanda Satana witupanga mukenga wa kwikala na būmi buyampe dyalelo. Usakanga tutangidije kumeso tumweno twetu, ino twa Bulopwe bwa Leza kunyuma.​—Mateo 6:31-33.

18 Bankasampe bavule bene Kidishitu kebadimbilwepo na Satana. Kimfwa, Kiana, wa myaka 20, unena’mba: “Ndyukile amba Bulopwe bwa Leza lo lukulupilo lumo kete lwa kupwija makambakano etu.” Lelo luno lukulupilo ludi na lupusa’ka pa mulangilo ne pa mwikadilo wandi wa umbūmi? Lumukwashanga avuluke amba bintu bya mu ino ntanda i bya lupito. Pa kyaba kya kwipeneneka mu kaji ka mu ino ngikadilo, Kiana wingidijanga kitatyi kyandi ne bukomo mu mwingilo wa Yehova.

Kilama-mutwe kya lupandilo (Tala musango 15-18)

“KIPETE KYA MUSHIPIDITU,” KINENWA KYA LEZA

19, 20. Le i muswelo’ka otubwanya kwikala na bwino buvule bwa kwingidija Kinenwa kya Leza?

19 Basola bene Loma bādi bengidija kipete kyādi na bula busenselela ku masantimetele 50. Bano basola bādi na bwino bwa kwingidija bipete mwanda bādi beibidija nabyo difuku ne difuku.

20 Mutumibwa Polo wānenene amba Kinenwa kya Leza kidi bwa kipete. Yehova i mwitupe’kyo. Ino tufwaninwe kwifunda mwa kwikingidijija na bunwa pa kubingija lwitabijo lwetu nansha kusendulula mulangilo wetu. (2 Kodinda 10:4, 5; 2 Temote 2:15) Le i muswelo’ka obwanya kulumbulula bwino bobe? Sebastian, wa myaka 21, unena’mba: “Nadi nembanga vese umo mu shapita ne shapita mu butangi bwami bwa Bible. Nakongakenye pamo mavese onsenswe.” Kino kyamukweshe evwanije senene mulangilo wa Yehova. Daniel ubweja’ko amba: “Mu butangi bwami bwa Bible, ntoñanga mavese omona’mba akakwasha bantu bonketana nabo mu busapudi. Najingulwile amba bantu batejanga biyampe shi abamone amba abe mwine usangedile byobya binena Bible kadi uloñanga bukomo bwa kwibakwasha.”

Kipete kya mushipiditu (Tala musango 19-20)

21. Mwanda waka ketufwaninwepo kutyina Satana ne bandemona?

21 Enka na motwefundila’kyo mu kino kishinte kupityila ku bimfwa bya bankasampe, ketufwaninwepo kutyina Satana ne bandemona. Shako i bakomo, ino ke bakomopo kupita Yehova. Kadi kebakekala’kopo nyeke. Bakakutwa mu kifungo kadi kebakabwanyapo kulonga muntu nansha umo kibi mu Umbikalo wa Kidishitu wa Myaka Kanunu, kadi kupwa papo bakonakanibwa lonso. (Kusokwelwa 20:1-3, 7-10) Tuyukile walwana netu, manwa andi, ne kitungo kyandi. Tubwanya kumukomena na bukwashi bwa Yehova!