Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KISHINTE KYA KWIFUNDA 14

Le Uvuijanga ne pa Mfulo Mwingilo Obe?

Le Uvuijanga ne pa Mfulo Mwingilo Obe?

“Sapula nyeke myanda miyampe, vuija ne pa mfulo mwingilo obe.”​—2 TM. 4:5, kunshi kwa dyani.

LWIMBO 57 Kusapwila Bantu ba Miswelo Yonso

BIDI MU KISHINTE *

Yesu pa kupwa kusanguka, wetana na bandi bana ba bwanga, webanena’mba, “endai mukalonge bana ba bwanga” (Tala musango 1)

1. Lelo bengidi ba Leza bonso basakanga kulonga bika, ne mwanda waka? (Tala kifwatulo pa kibalu.)

YESU KIDISHITU wāsoñenye balondi bandi amba, “endai mukalonge bana ba bwanga mu bantu ba ku mizo yonso.” (Mat. 28:19) Bengidi ba Leza bonso ba kikōkeji basakanga kuyuka muswelo obabwanya kuvuija “ne pa mfulo” uno mwingilo obebapele kwingila. (2 Tm. 4:5) Ne kadi uno mwingilo udi na kamweno kakatampe, i mulēme bininge, kadi i wa kampeja-bukidi kupita mingilo mikwabo yonso ya mu būmi. Inoko tubwanya kukomenwa kupityija kitatyi kivule mu mwingilo na motwadi tusakila.

2. Le i makambakano’ka otwikondanga nao potuvuija mwingilo wetu?

2 Kudi mingilo mikwabo ya mvubu itulomba kitatyi ne bukomo. Padi bitulombanga kwingila twaji twa mansá mavule pa difuku mwanda wa kuvuija bisakibwa byetu bya mu būmi ne bya kyetu kisaka. Tubwanya ne kwikonda na biselwa bikwabo bya kisaka, na misongo, kutyumukwa mutyima, nansha na misanshi ya bununu. Le i muswelo’ka otubwanya kuvuija ne pa mfulo mwingilo wetu koku twikonda na ano makambakano onso’a?

3. Le binenwa bya Yesu bidi mu Mateo 13:23 bitulengeja tufule ku kunena bika?

3 Shi ngikadilo yotudi’mo keitulengejapo tupityije kitatyi kivule mu mwingilo wa Yehova, ketufwaninwepo kutyumukwa mutyima. Yesu wādi uyukile amba batwe bonso ketubwanyapo kupa bipa bya Bulopwe mu muswelo umo. (Tanga Mateo 13:23.) Yehova umwene na mvubu bintu byonso byotulonga mu mwingilo wandi kitatyi kyotwikankila’ko. (Bah. 6:10-12) Pakwabo kadi, tubwanya kumona’mba ngikadilo yotudi’mo ibwanya kwitulengeja tulonge bivule. Mu kino kishinte tusa kwisambila’mo pa muswelo otubwanya kutangidija kumeso mwingilo wetu mu būmi bwetu,  kwikala nyeke na būmi bwa kwisuminwa, ne mwa kulumbulwila bwino bwetu bwa kusapula ne kufundija. Dibajinji bidi, le kuvuija ne pa mfulo mwingilo wetu kushintulula bika?

4. Le kuvuija ne pa mfulo mwingilo wetu kushintulula bika?

4 Mu kīpi, pa kuvuija ne pa mfulo mwingilo wetu, tufwaninwe kwingila bininge mwingilo wa kusapula ne kufundija. Inoko kebilombengapo’nka kupityija’mo kitatyi kivule. Kintu kya mvubu ku meso a Yehova i kine kitutonona twingile’o. Byotusenswe Yehova ne bakwetu, twingilanga mwingilo wetu wa bwine Kidishitu na muya onso. * (Mako 12:30, 31; Kol. 3:23) Kwingidila Leza na muya onso i kwipāna batwe bene, kwingidija bukomo bwetu mu mwingilo wandi mungya bukomo botudi nabo. Shi tusangedile dyese dya kwingila mwingilo wa busapudi, nabya tukasapwila bantu bavule myanda miyampe mungya bukomo bwetu.

5-6. Leta kimfwa kilombola’mba nansha shi muntu kadipo na kitatyi kivule ubwanya kutangidija kumeso mwingilo wa busapudi.

5 Langa’po bidi nkasampe umo usenswe komba kindadi. Usangedile komba minjiki kitatyi kyonso kyasaka. Mwenda mafuku, wasokola kaji ka komba kindadi ku mfulo kwa yenga, kokwa kobapotejanga twa kutoma. Inoko mfutwa yandi i mityetye. O mwanda washilula kwingila mwingilo wa kulama lupeto mu mangajini tamba Dya Mwanzo kutūla Dya Butano. Nansha byapityija kitatyi kivule mu mangajini, mutyima wandi udi’nka ku minjiki. Wabilanga kulumbulula bwino bwandi ne komba minjiki kitatyi kyonso. Nansha nankyo, ukimbanga mikenga ya komba minjiki nansha’tu mu kakitatyi katyetye.

6 Muswelo umo onka, padi nobe kudipo na kitatyi kivule kya kwingila bininge mwingilo wa busapudi. Inoko, ye mwingilo osenswe kwingila. Uloñanga bukomo bwa kulumbulula bwino bobe bwa kutenga mityima ya bantu na myanda miyampe.  Byovudilwe padi bya kulonga, ubwanya kwiipangula i bika bya kulonga pa kutangidija kumeso mwingilo obe wa busapudi.

BYA KULONGA PA KUTANGIDIJA MWINGILO OBE KUMESO

7-8. Le tukeula namani muswelo wādi umona Yesu mwingilo?

7 Yesu wāshile kimfwa kilumbuluke pa muswelo waādi umona mwingilo. Kusapula Bulopwe bwa Leza kyo kyādi kintu kya mvubu mu būmi bwandi. (Yoa. 4:34, 35) Wādi wenda makilometele tutwa na tutwa mwanda wa kusapwila bantu bavule. Wādi ukwatakanya mikenga yonso ya kusapwila bantu mu bīkwe ne ku mobo abo. Yesu wādi utangidije mwingilo kumeso mu būmi bwandi.

8 Tubwanya kwiula Kidishitu na kukimba mikenga ya kusapula myanda miyampe kitatyi kyo-kyonso nansha ku kifuko kyo-kyonso. Twitabijanga kwisuminwa bintu kampanda mwanda wa kwingila mwingilo wa busapudi. (Mako 6:31-34; 1 Pe. 2:21) Bantu bamo mu kipwilo babwanya kwingila bu bapania ba pa bula, ba lonso, nansha bakwashi. Bakwabo i befunde ludimi lweni nansha kuvilukila kokwa kusakilwa basapudi bavule. Inoko mingilo mivule ya busapudi ingilwanga na basapudi bakwabo ba Bulopwe, bene beelela’ko. Nansha shi bikale namani, Yehova ketulombengapo bitabukile pa byotubwanya kumupa. Usakanga batwe bonso tusangele mwingilo wetu ukola kitatyi kyotusapula “myanda miyampe ya ntumbo ya Leza wa nsangaji.”—1 Tm. 1:11; Kup. 30:11.

9. (a) Le i muswelo’ka wātangidije Polo mwingilo wa busapudi kumeso nansha byaādi wingila kaji ka ku ngitu? (b) Lelo Bilongwa 28:16, 30, 31 ulombola’mba Polo wādi umwene mwingilo wandi namani?

9 Mutumibwa Polo wāshile kimfwa kiyampe kya kumona mwingilo bu kintu kya mvubu mpata mu būmi bwandi. Paādi mu Kodinda mu lwendo lwandi lwa bubidi lwa bumishonele, kādipo na lupeto luvule kadi wādi upityija kitatyi kampanda na kusona mapema. Inoko kādipo umwene mwingilo wa kusona mapema bu mwingilo wa mvubu kutabuka. Wāingile uno mwingilo mwa kwikwatakenya paingila mwingilo wa busapudi amba asapwile bene Kodinda myanda miyampe “ku bitupu.” (2 Ko. 11:7) Nansha Polo byaādi wingila’ko kaji ka ku ngitu, ino wādi nyeke utangidije mwingilo kumeso, kadi wādi usapula mu dya Sabato dyonso. Ebiya bintu pa kulumbuluka, Polo wābwenye kuta mutyima bininge ku busapudi. Wēpēne “bininge na kufundija mwanda, usapwila Bayuda bukamoni ne kubingija’mba Yesu ye aye Kidishitu.” (Bil. 18:3-5; 2 Ko. 11:9) Mwenda mafuku, paālongele myaka ibidi mu kifungo mu Loma, Polo wādi usapwila boba bādi bamupempula ne kulemba mikanda. (Tanga Bilongwa 28:16, 30, 31.) Polo kālekelepo kintu nansha kimo kikalakanye mwingilo wandi. Wālembele amba: “Byotudi na uno mwingilo . . . , ketulekanga’byopo.” (2 Ko. 4:1) Pamo bwa Polo, nansha shi tupityijanga kitatyi kivule mu kaji ka ku ngitu, tubwanya kumona mwingilo wa Bulopwe bu mwingilo wa mvubu mpata mu būmi.

Kudi miswelo mivule yotubwanya kuvuija ne pa mfulo mwingilo wetu (Tala musango 10-11)

10-11. Le i muswelo’ka otubwanya kuvuija ne pa mfulo mwingilo wetu nansha shi tubela?

10 Shi ketubwanyapo kusapula bininge ku njibo ne njibo pa mwanda wa bununu nansha misongo, tubwanya kwingidija misapwilo mikwabo. Basapudi ba mu myaka katwa kabajinji bāsapwidile bantu konso kobādi bekele. Bādi bakimba mikenga ya kusapula bubine—ku njibo ne njibo, mu bantu bavule, ne bya kiponka na ponka—konso ‘kwādi kutanwa’ bantu. (Bil. 17:17; 20:20) Shi ketubwanyapo kwenda kulampe, tubwanya kushikata pa kifuko padi bantu bavule potubwanya kusapwila bapityeshinda. Nansha padi tubwanya kusapula bya kiponka na ponka, kulemba  mikanda, nansha kusapula ku telefone. Basapudi bavule kebadipo na bukomo, bemwenanga nsangaji ne kuloelelwa kukatampe mu ino miswelo mikwabo ya busapudi.

11 Nansha shi ubelanga, ubwanya kuvuija ne pa mfulo mwingilo obe. Tulangulukilei monka pa kimfwa kya mutumibwa Polo. Wānenene amba: “Mu byonsololo ngidi na bukomo kupityila kudi yewa unkomeja.” (Fid. 4:13) Polo wādi usakilwa buno bukomo kitatyi kyaābelele mu lwendo lwandi lumo lwa bumishonele. Wāshintulwidile bene Ngalatea amba: “Misongo ya mu ngitu yo yaumpele dibajinji mukenga wa kwimusapwila myanda miyampe.” (Ngt. 4:13) Misongo yobe nayo ibwanya kukupa mikenga ya kusapwila bantu myanda miyampe, kimfwa badokitele, bamuñanga, ne boba balama babela. Bavule mu bano bantu bekalanga ku kaji kitatyi kibapempulanga basapudi ku abo mobo.

MWA KWIKADILA NYEKE NA BŪMI BWA KWISUMINWA

12. Le ‘kutala pamo sō’ kushintulula bika?

12 Yesu wānenene amba: “Kinanu kya umbidi i diso. Nanshi shi diso dyobe ditala pamo sō [nansha’mba “ditūkanye,” kunshi kwa dyani], umbidi obe onso ukekala tō.” (Mat. 6:22) Le wādi usaka kunena bika? Wādi usaka kunena’mba tufwaninwe kwikala nyeke na būmi bwa kwisuminwa nansha kutala sō pa kitungo kimo, nansha mpango, pampikwa kulabikwa nansha kupuakanibwa. Yesu aye mwine wāshile kimfwa na kuta mutyima ku mwingilo mu būmi bwandi, kadi wāfundije bana bandi ba bwanga bate nyeke mutyima ku kwingidila Yehova ne ku Bulopwe Bwandi. Twiulanga Yesu na kuta mutyima ku mwingilo  wa bwine Kidishitu mu būmi bwetu, tukimba “bidi nyeke Bulopwe ne boloke [bwa Leza].”—Mat. 6:33.

13. Le i bika bibwanya kwitukwasha tute mutyima ku mwingilo wetu wa bwine Kidishitu?

13 Muswelo umo otutanga mutyima ku mwingilo wetu, i kwikala na būmi bwa kwisuminwa mwanda wa kupityija kitatyi kivule mu kukwasha bakwetu bayuke Yehova ne kumusanswa. * Kimfwa, le tubulwepo kutyepeja’ko mansá otwingilanga twetu twaji mwanda wa tupityije kitatyi kivule mu mwingilo mu bula bwa yenga? Le tubulwepo kuleka kwipwija mukose kumokumo kubwanya kwitudīla kitatyi kivule?

14. Le i bika byajadikile ba mulume ne mukaji bamo mwanda wa kupityija kitatyi kivule mu mwingilo ne kuta’ko mutyima?

14 Bino byo byalongele mukulumpe umo, Elias ne wandi mukaji. Ushintulula’mba: “Ketwashilwilepo kwingila bupania’nka penepa, ino twadi tufwaninwe kushilula na tubintu tutyetutye. Penepa twatabula matabula matyematye pa kupityija kitatyi kivule mu mwingilo wetu. Kimfwa, twatyepeje lupeto lotwadi tulupula, kitatyi kyotwadi twipwija mukose, ne kunena bakulu betu ba kaji bajadike biyampe mpangiko ya kaji. Penepa, twaanza kusapula kyolwa, kwendeja bifundwa bya Bible bivule, enka ne kusapula mu bukata bwa yenga misunsa ibidi ku kweji. Twasangele bininge!”

MWA KULUMBULWILA BWINO BOBE BWA KUSAPULA NE KUFUNDIJA

Kwingidija byotwifunda ku kupwila kwa mu bukata bwa yenga, kuketukwasha twendelele nyeke mu mwingilo wetu (Tala musango 15-16) *

15-16. Mungya 1 Temote 4:13, 15, le batwe basapudi tubwanya kulumbulula namani bwino bwetu? (Tala ne kapango kanena’mba, “Bitungo bya Kunkwasha Mvuije ne pa Mfulo Mwingilo Wami.”)

15 Muswelo mukwabo wa kuvuija ne pa  mfulo mwingilo wetu, i kulumbulula bwino bwetu mu mwingilo wa busapudi. Bantu bengila twaji tumo basakilwanga kufundijibwa nyeke mwanda wa kwikala na buyuki buvule ne kulumbulula bwino bwabo. Ne basapudi ba Bulopwe nabo mo monka. Tufwaninwe kufundijibwa nyeke mwa kwikadila na bwino buvule mu mwingilo wetu.​—Nki. 1:5; tanga 1 Temote 4:13, 15.

16 Ino le i muswelo’ka otubwanya kwendelela nyeke mu mwingilo wetu? I na kuta mutyima bininge ku bufundiji bobetufundija ku Kupwila kwa Būmi ne Mwingilo kwa yenga ne yenga. Ku kuno kupwila betufundijanga’ko bufundiji bwa kamweno bwitukwasha tulumbulule bityebitye bwino bwetu mu mwingilo wa busapudi. Kimfwa, shi mwimaniji udingila bana ba masomo, tubwanya kwifundila’ko bintu bibwanya kwitukwasha twilumbulule mu mwingilo wetu. Tubwanya kukengidija ano madingi kitatyi kyotukasapwila bantu myanda miyampe. Tubwanya kulomba bukwashi kudi mutadi wetu wa kisumpi kya busapudi nansha kusapula nandi, kusapula na musapudi wa bwino, pania, nansha mutadi wa kipindi. Shi tubaikala na bwino buvule bwa kwingidija kingidilwa ne kingidilwa kya mu Bingidilwa bya Kufundija Nabyo, nabya tukasangela bininge mwingilo wa kusapula ne kufundija.

17. Le i bika byokemwena kitatyi kyovuija ne pa mfulo mwingilo obe?

17 Bine, tudi na dyese dikatampe ditupele Yehova dya kwikala bu “bengidi bengila pamo” nandi! (1 Ko. 3:9) Shi ‘ujingulule bintu bya mvubu mikatampe’ ne kuta mutyima ku mwingilo wa bwine Kidishitu, ukengidila “Yehova na nsangaji.” (Fid. 1:10; Ñim. 100:2) Byodi mwingidi wa Leza, ubwanya kukulupila’mba aye ukakupa bukomo bosakilwa pa kuvuija mwingilo obe nansha shi udi na makambakano’ka. (2 Ko. 4:1, 7; 6:4) Nansha shi ngikadilo yodi’mo ikulengejanga usapule bityetye nansha bininge, ubwanya kwikala “na buluji bwa kusangela” shi wingila mwingilo obe na muya onso. (Ngt. 6:4) Kitatyi kyovuija ne pa mfulo mwingilo obe, ulombolanga’mba usenswe Yehova ne bakwenu. “Shi ulonge namino ukepandija abe mwine ne boba bakwivwana.”​—1 Tm. 4:16.

LWIMBO 58 Kukimba Balunda na Ndoe

^ mus. 5 I betupe mwingilo wa kusapula myanda miyampe ya Bulopwe ne kulonga bana ba bwanga. Kino kishinte kisa kwisambila pa muswelo otubwanya kuvuija ne pa mfulo mwingilo wetu nansha shi tudi na makambakano. Kadi tusa ne kwifunda’mo mwa kusapwila biyampe amba twikale na nsangaji potusapula.

^ mus. 4 NSHINTULWILO YA BISHIMA: Mu mwingilo wetu wa bwine Kidishitu mubadilwa ne miswelo mishileshile ya kusapula ne kufundija, kūbaka ne kulama byubakwa bya kiteokratike, ne mwingilo wa kukwasha bantu baponenwa na bimpengele.​—2 Ko. 5:18, 19; 8:4.

^ mus. 13 Tala bintu bisamba-bibidi bitelelwe mu kapango kanena’mba, “Mwa Kupēlejeja Būmi Bobe” mu Kiteba kya Mulami kya Kweji 7, 2016, p. 12.

^ mus. 62 NSHINTULWILO YA BIFWATULO: Kaka umo upityija kipindi kya kujokela’mo ku kupwila kwa mu bukata bwa yenga. Kupwa, mwimaniji wa kupwila pamudingila, aye nandi ulemba mu boloshile wandi Kutanga ne Kufundija. Ebiya ku mfulo kwa yenga, kaingidija mu busapudi byobya byaefundile ku kupwila.