Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Bipangujo bya Batangi

Bipangujo bya Batangi

Mwanda waka Batumoni ba Yehova bafwatulanga mutumibwa Polo na dibala ne na nywene mīpi?

Kunena na bubine, i kutupu muntu nansha umo dyalelo uyukile senene mwādi mwikadile kilungi kya Polo. Bifwatulo ne mafoto adi mu etu mabuku biloñwanga na basendwe, ke mafotopo a bintu bya kala bisokwelwe.

Inoko, kudi bintu bimobimo bilombola mwine mwādi mwikadile kilungi kya Polo. Kimfwa, Kiteba kya Mulami kya Ziona kya 1 Kweji 3, 1902, kitela’ko kintu kimo amba: “Pa mwanda utala kilungi kya Polo: . . . Mu [dibuku] ‘Acts of Paul and Thecla,’ . . . dyālembelwe dya mu mwaka wa 150 Yesu Ke Mwiye, i mushintululwe myanda itala Polo mine imweka bu ya bine, ne bishi bya bine. Mu dino dibuku i mushintululwe’mo bu ‘mwīpi, wa dibala, wa matea, muyampe ku mpala, wa makiki mavwambile; ne mulu mulampe.’”

Dibuku The Oxford Dictionary of the Christian Church (dya mu 1997) disambila pa bino bilembwa bya kala’mba: “Mu dibuku The Acts of Paul and Thecla mudi ne myanda ya bine ya mu mānga.” Dibuku The Acts of Paul and Thecla dyādi dilēmekibwe bininge na bantu mu myaka ya tutwa tubajinji, enka na mwikilombwela bilembwa 80 bya mu Kingidiki bikidi’ko, ne bilembwa bivule bya mu ndimi mikwabo. O mwanda bifwatulo byetu ne mafoto i bikwatañane na myanda imo ya kala ilombola mwādi mwikadile mumwekelo wa mutumibwa Polo.

Inoko tuvulukei amba kudi bintu bya mvubu mpata kupita mumwekelo wa Polo. Nansha Polo byaādi usapula bininge, bantu bamo bādi bamufutulula’mba “shi aye mwine udi’po i muzoze kadi muneneno wandi i wa bitupu’tu.” (2 Kodinda 10:10) Inoko ketufwaninwepo kwilwa’mba wāikele ke mwine Kidishitu kupityila ku kingelengele kyālongele Yesu padi. Kadi tubwanya ne kulangulukila pa bintu byālongele Polo paāikele bu ‘kingidilwa kitongelwe na Kidishitu mwanda wa kuselela dijina dya Yesu ku mizo.’ (Bilongwa 9:3-5, 15; 22:6-8) Kadi langulukila ne pa byabuyabuya bivule byotubwanya kumwena mu mikanda ya mu Bible yālembelwe na Polo kupityila ku bukomo bwa mushipiditu ujila wa Yehova.

Polo kādipo wianya pa mwanda wa bintu byaālongele kumeso kwa kwikala mwine Kidishitu; nansha kwisambila pa mumwekelo wandi. (Bilongwa 26:4, 5; Fidipai 3:4-6) Wānenene amba: “Ne mutyetyetyetye mu batumibwa, kadi nkifwaninwepo nansha kwitwa bu mutumibwa.” (1 Kodinda 15:9) Kadi wālembele mwenda mafuku amba: “Ami mutyetye kutabuka ne mutyetyetyetye mu bajila bonsololo, napelwe kano kanye kakatampe, amba nkasapwile mizo myanda miyampe ya bupeta bwa ntanda ne miseke bwa Kidishitu.” (Efisesa 3:8) Na bubine uno musapu o wa mvubu mpata kutabuka kintu kyo-kyonso kitala mumwekelo wa Polo.