“Bino bintu’bi . . . byālembelwe bu kidyumu kotudi batwe bafikilwa na mfulo ya ino ngikadilo ya bintu.”1 KODINDA 10:11.

ÑIMBO: 11, 61

1, 2. Mwanda waka tusaka kwisambila pa bimfwa bya balopwe baná ba Yuda?

SHI ubamone muntu mu dishinda washetemuka ne kupona, kukabulwepo kuta’ko mutyima shi wendanga enka mu dishinda’dya. Muswelo umo onka, kubandaula bilubo byālongele bakwabo mu būmi kwitukwasha twepuke kulonga’byo. Kimfwa tubwanya kuboila ñeni ku bilubo bya bantu batelelwe mu Bible.

Balopwe baná ba Yuda botwamwene mu kishinte kibadikile bāingidile Yehova na mutyima mubwaninine. Inoko bālongele ne bilubo bikatampe. Myanda yabo yālembelwe mu Bible amba tulangulukile’po ne kuboila’ko ñeni mikatampe. Le i ñeni’ka yotubwanya kuboila ku byēbafikile ne i muswelo’ka otukepuka kulonga bilubo byobālongele?Tanga Loma 15:4.

KUKULUPILA TUNANGU TWA BANTU KULETA MUSALA

3-5. (a) Nansha mutyima wa Asa byowādi mubwaninine kudi Yehova, le wālongele kilubo’ka? (b) I bika padi byālengeje Asa akulupile mu bantu kitatyi kyaālwile na Basha?

3 Tushilulei bidi na kubandaula kimfwa kya Asa. Wākulupile mudi Yehova pāile kibumbo kya bene Efyopia kulwa na  Yuda. Inoko’ko, kākulupilepo mudi Yehova pa kulwa na Basha, mulopwe wa Isalela. Asa wādi usaka kukankaja Basha wakashimika Lama, kine kyādi kibundi kikatampe kya Isalela kya ku mukalo na bulopwe bwa Yuda. (2 Bilongwa 16:1-3) Asa wāmwene amba i biyampe atyibe mulopwe wa Shidea milomo mwanda wa amukwashe. Bene Shidea pa kutamba bibundi bya Isalela, Basha “waleka kushimika Lama, ne mingilo yandi yalāla.” (2 Bilongwa 16:5) Ku ñanjilo, Asa ye uno wālangile amba wākwata butyibi buyampe.

4 Ino le Yehova wāmwene’byo namani? Yehova kāsangedilepo byālongele Asa pa kubulwa kumukulupila, ko kutuma, wātuma mupolofeto Hanani kukatopeka Asa. (Tanga 2 Bilongwa 16:7-9.) Hanani wāsapwila Asa amba: “Pano ne kumeso kwine malwi akekala kodi.” Asa wāyata kibundi kya Lama, inoko mu būmi bwandi, aye ne bantu bandi bādi’nka balwalwalwa na balwana.

5 Mu kishinte kibadikile, twefundile’mo amba Asa wāsangeje Yehova. Nansha Asa byaādi wampikwa kubwaninina, Leza wāmwene mu mutyima wa Asa amba i mwipāne kwadi. (1 Balopwe 15:14) Nansha nankyo, Asa byaākwete butyibi bubi, wādi ufwaninwe’nka kwimwena bipa bibi. Mwanda waka wēkulupile ne kukulupila bantu bakwabo pa kyaba kya Yehova? Padi Asa wālangile amba ubwanya kunekenya bulwi na basola bandi ba bwino. Nansha kadi padi wātejeje madingi mabi a bantu bakwabo.

6. I ñeni’ka yotuboila ku kilubo kya Asa? Leta kimfwa.

6 I ñeni’ka yotubwanya kuboila ku kilubo kya Asa? Mu myanda yonso, tufwaninwe kukulupila’nka mudi Yehova, pa kyaba kya kukulupila milangwe yetu. Tufwaninwe kumulomba etukwashe potudi mu makambakano makatampe nansha matyetye. I biyampe kulangukila pa kino: Le kyaba kimo, twikulupilanga na kutompa kupwija makambakano mu muswelo otumona batwe bene’mba o muyampe? Nansha le tubandaulanga bidi byobya binena Bible ne kwingidija’byo pa kupwija makambakano etu? Kimfwa, langa’po bidi shi kisaka kikukankaja kwenda ku kupwila nansha ku kitango. Le ukalomba Yehova akukwashe uyuke kya kulonga mu uno mwanda? Nansha padi wadi ukimba kaji mu bula bwa kitatyi kilampe, ino pano ubekasokola kwa muntu kampanda. Le ukamusapwila amba upwilanga yenga ne yenga, koku abe na moyo wa kujimija kaji? Nansha makambakano ekale namani, tufwaninwe kuvuluka madingi a mulembi wa mitōto a amba: “Fikija dishinda dyobe kudi Yehova; umukulupile, nandi ukekifikijanga.”Ñimbo ya Mitōto 37:5.

I BIKA BIKETUFIKILA SHI TUBATONGE KUPWANA NA BALUNDA BABI?

7, 8. Lelo i bilubo’ka byālongele Yehoshafata, ne i bika byālupukile’ko? (Tala kifwatulo ku ngalwilo.)

7 Tutalei pano kimfwa kya Yehoshafata, mwanā Asa. Wādi na ngikadilo miyampe isangaja Yehova. Kadi wādi ulonga bintu bivule biyampe shi wakulupila mudi Yehova. Ino nandi wākwete ne butyibi butyani. Kimfwa, wākwete’ko mulangwe wa wandi mwana asonge mwanā Ahaba, mulopwe mubi. Mwenda mafuku, Yehoshafata wākelunga na Ahaba kukalwa na bene Shidea, nansha byāmupeleje’byo mupolofeto Mikaya. Mu buno bulwi, bene Shidea, bālonda Yehoshafata, bāsa kumwipaya. (2 Bilongwa 18:1-32) Paājokele ku Yelusalema, mupolofeto Yehu wāmwipangula’mba: “Lelo  kifwaninwe abe kukwasha bapupakane ne kusanswa boba bashikwa Yehova’ni, a?”—Tanga 2 Bilongwa 19:1-3.

8 Lelo Yehoshafata wāboile ñeni ku byāmufikile ne ku kidyumu kya mupolofeto? Aa. Nansha byaādi usenswe Yehova ne kumusangaja, Yehoshafata wāpwene monka na mulunda upela kutōta Yehova. Uno muntu i Mulopwe Ahazia, mwanā Ahaba. Yehoshafata ne Ahazia bāsōnga mato makatampe pamo. Inoko ātyumunwa ne kwenda nao mpika.2 Bilongwa 20:35-37.

9. I bika bibwanya kwitufikila shi tutonga kupwana na balunda babi?

9 I ñeni’ka yotuboila ku byāfikile Yehoshafata? Yehoshafata wālongele kyokya kyoloke kadi “wakimbile Yehova ne mutyima wandi onso.” (2 Bilongwa 22:9) Inoko wātonga kupityija kitatyi na bantu bampikwa kusanswa Yehova, ne kino kyāmuletele makambakano makatampe mu būmi. Na bubine, wādi ukokeja’nka ne kwipaibwa. Vuluka lukindi lwa mu Bible lwa amba: “Nanga ne bantu bañeni, nobe ukekala wañeni: Ino umpwani wa bivila ukamona malwa.” (Nkindi 13:20) Tusakanga kusapwila bantu myanda ya Yehova. Inoko, kupwana bininge na bantu kebamwingidilapo i kyaka.

10. (a) I ñeni’ka yotuboila kudi Yehoshafata shi tusaka kusonga nansha kusongwa? (b) I bika byotufwaninwe kuvuluka?

10 I ñeni’ka yotuboila kudi Yehoshafata kimfwa, shi tusaka kusonga nansha kusongwa? Padi tubwanya kushilula kwikena na muntu kasenswepo Yehova. Padi tubwanya kulanga’mba mu bantu ba Leza ketukatana’mopo wa kwisonga nandi. Pakwabo ba mu kisaka babwanya kwitutonona tusonge nansha kusongwa batwe papo ketwakudile. Shako Yehova wētupangile na mutyima wa kwikena. Penepo, tukalonga namani shi ketutenepo mwinē petu mufwaninwe? Kintu kimo kibwanya kwitukwasha, i kulangulukila pa byāfikile Yehoshafata. Wādi ulomba nyeke Yehova amuludike. (2 Bilongwa 18:4-6) Inoko paāpwene na Ahaba, muntu wampikwa kusanswa Yehova, Yehoshafata wāikele kupumpunya kidyumu  kya Yehova. Yehoshafata wādi ufwaninwe kuvuluka’mba, “meso a Yehova akeñenya kusambakanya ntanda yonsololo, konsokonso pi na pi, kwilomboja mukomo wa boba ba mutyima mubwaninine kwadi.” (2 Bilongwa 16:9) Netu tufwaninwe kuvuluka’mba Yehova usakanga kwitukwasha. Uyukile ngikadilo yotudi’mo kadi witusenswe. Le witabije amba Leza ukata mutyima ku bisakibwa byobe bya kukimba wa kwikala nandi? Yuka’mba ukakuta’o mu muswelo kampanda!

Kokapwana na muntu katōtapo Yehova (Tala musango 10)

KOKALEKA MUTYIMA OBE WITATULE

11, 12. (a) I bika byālongele Hezekia bilombola byādi mu mutyima wandi? (b) Mwanda waka Yehova wāfwidile Hezekia lusa?

11 I ñeni’ka yotubwanya kuboila kudi Hezekia? Yehova wākweshe Hezekia amone na bubine bidi mu mutyima wandi. (Tanga 2 Bilongwa 32:31.) Pābelele Hezekia, Leza wāmusapwidile amba usa kukoma, wāmupa ne kiyukeno kya kumukulupija. Yehova wālonga mujiñininya wa pa lukala ujoke kinyuma matabula dikumi. Kitatyi pa kupita’po, bimweka bu bamfumu ba Babiloni bāsakile kuyukila’ko bivule pa kino kiyukeno, bātuma bantu kudi Hezekia ebalombole’kyo. (2 Balopwe 20:8-13; 2 Bilongwa 32:24) Yehova kāsapwidilepo Hezekia kya kwibalonga. Bible unena’mba Yehova “wamulekelela” amone kyasaka kulonga. Hezekia wālombwele bantu bātambile ku Babiloni byabupeta byonso byaādi nabyo. Kino kyāsokwele byādi mu mutyima wa Hezekia. Muswelo’ka?

12 I kya bulanda, Hezekia wāikele na mitatulo. Mfulo mfulō “kalubwilepo biyampe monka mwalongelwe biyampe kwadi, mhm.” Bible kanenenepo kine kyāshintyile mwikadilo wandi. Padi i pa mwanda wānekenye bene Ashidia, nansha padi i mwanda Yehova wāmubelwile. Pakwabo napo padi i mwanda wātumbile ne kwikala mpeta. Nansha Hezekia byaāingidile Yehova na mutyima mubwaninine, kitatyi kimo wētatwile ne kino kekyāsangejepo Yehova. Ino mwenda mafuku, Hezekia “pa kwityepeja,” Leza nandi wāmufwila lusa.2 Bilongwa 32:25-27; Ñimbo ya Mitōto 138:6.

13, 14. (a) I myanda’ka ibwanya kusokola bidi mu mutyima wetu? (b) Tufwaninwe kulonga namani potutendelwa?

13 I ñeni’ka yotuboila kudi Hezekia ne ku kilubo kyandi? Vuluka’mba Hezekia wētatwile kinondanonda’tu na pāmukweshe Yehova anekenye bene Ashidia ne kumubelula misongo yandi. Penepa i bika byotukalonga shi abetulongela kintu kiyampe nansha shi bantu bakwabo abetutendela? Byotukalonga’po bikasokola bine bidi mu mutyima wetu. Kimfwa, tutu ubwanya kwingila bininge mwanda wa kuteakanya mwisambo ne kukeunena ku meso a bantu bavule. Bavule abamutendela pa uno mwisambo. Le ukalonga namani pa kuno kutendelwa?

14 Tufwaninwe kuvuluka nyeke byānenene Yesu amba: “Shi mubalonga bintu bimupelwe kulonga, nenai’mba, ‘Twi bapika ba bituputupu. Byotwalonga i byotwadi tunenwe kala kulonga.’” (Luka 17:10) Vuluka’mba Hezekia paāikele na mitatulo, kāmwenepo na mvubu muswelo wāmukweshe Yehova. Penepa i bika biketukwasha twikale betyepeje pobetutendela mwanda wa mwisambo otwanena? Tubwanya kulangulukila pa bitulongela Yehova. Kadi tubwanya kwisambila padi ne pa muswelo waetukweshe. Kutabukidila, i aye witupele Bible ne mushipiditu wandi ujila pa kusaka’mba tubwanye kunena mwisambo’wa senene.

 LEKA YEHOVA AKULUDIKE POKWATA BUTYIBI

15, 16. Lelo i bika byālengeje Yoshia afwe?

15 Shi ke pano, i ñeni’ka yotubwanya kuboila kudi Yoshia? Nansha byaādi mulopwe muyampe, Yoshia wālongele kilubo kyāmufikije ne ku lufu. (Tanga 2 Bilongwa 35:20-22.) Le i bika byālongekele? Yoshia wāendele kulwa na Neko, mulopwe wa Edipito pampikwa mwanda. Kadi, Neko mwine wāsapwidile Yoshia amba kaidilepo kulwa nandi. Bible unena’mba binenwa bya Neko byātambile “ku kyakanwa kya Leza.” Inoko Yoshia wāsaka’nka kulwa nandi, wāfwila’ko. Mwanda waka wākalwile na Neko? Bible kanenenepo’po kintu.

16 Yoshia wādi ufwaninwe kuyuka bidi shi binenwa bya Neko bitamba bine kudi Yehova. Muswelo’ka? Wādi wa kwipangula Yelemia, mupolofeto wa Yehova. (2 Bilongwa 35:23, 25) Kadi Yoshia wādi ufwaninwe kutala mwikadile myanda. Neko wādi wenda ku Kalekemishi kukalwa na muzo mukwabo, ke na Yelusalemapo. Neko kādipo utuka Yehova ne bantu bandi. Yoshia kālangulukilepo na katentekeji pa bino bintu kumeso kwa kukwata butyibi. Le kino kitufundija bika? Shi tubatanwa na myanda ne tusaka kukwata butyibi, tufwaninwe bidi kubandaula bine bibwanya kusaka’po Yehova tulonge.

17. Potutanwa na makambakano, i muswelo’ka otubwanya kwepuka kilubo na kyālongele Yoshia?

17 Shi tusaka kukwata butyibi, tulangulukilei bidi pa misoñanya ya mu Bible ibwanya kwitukwasha ne pa muswelo wa kwiingidija. Myanda imo ibwanya kwitulomba kukimbila’ko myanda mu mabuku nansha kulomba mukulumpe madingi. Ubwanya kwitukwasha tulangulukile pa misoñanya mikwabo ya mu Bible. Tala bidi uno mwanda: Kaka umo i musongwe na muntu ke Kamonipo. Watandika mpangiko ya kutambila mu busapudi mu difuku kampanda. (Bilongwa 4:20) Ino wandi mulume kasakilepo akasapule mu dine difuku’dya. Wamusapwila amba ano mafuku kebakipityijangapo kitatyi pamo ne amba usaka bakanange kuntu kampanda. Ebiya kaka wakimbe mavese a mu Bible abwanya kumukwasha akwate butyibi bwa tunangu. Uyukile amba ufwaninwe kukōkela Leza ne musoñanya wa Yesu wa kulonga bana ba bwanga. (Mateo 28:19, 20; Bilongwa 5:29) Ino wavuluka kadi amba mukaji ufwaninwe kukōkelelela mulumyandi ne amba bengidi ba Leza bafwaninwe kwikala na bujalale. (Efisesa 5:22-24; Fidipai 4:5) Lelo kisaka mulumyandi i kumukankaja kusapula’ni i kusaka’tu kupityija nandi kitatyi pamo? Byotudi bengidi ba Yehova, tusaka kukwata butyibi na bujalale ne bumusangaja.

LAMA MUTYIMA MUBWANININE NE NSANGAJI

18. Kulangulukila pa bino bimfwa bya balopwe baná ba Yuda kubakufundija bika?

18 Kyaba kimo netu tubwanya kulonga bilubo na byālongele bano balopwe baná ba Yuda. Padi tubwanya (1) kwikulupila batwe bene, (2) kutonga balunda babi, (3) kwikala na mitatulo, ne (4) kukwata butyibi pampikwa kutala bidi bisaka Yehova. Nansha nankyo, kekudipo bubinga bwa kwimona’mba ketukibwanyapo kusangaja Yehova. Umonanga biyampe bidi motudi, na mwaēbimwenine mu bano balopwe baná. Kadi Yehova umonanga motumusanshilwe bya binebine ne motusakila kumwingidila ne pa mfulo. O mwanda i mwitupe bimfwa bya kwitukwasha twepuke kulonga bilubo bikatampe. Tulangulukilei nyeke pa ino nsekununi ya mu Bible ne kufwija’ko Yehova mwine wālembeje’yo!