Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami—Kya Kwifunda  |  Kweji 3 2017

Asa, Yehoshafata, Hezekia, ne Yoshia

Ingidila Yehova na Mutyima Mubwaninine

Ingidila Yehova na Mutyima Mubwaninine

“Yo! a Yehova nakwisashila, bamvuluke bidi byo nananga ku meso obe mu bu-binebine ne mutyima mubwaninine.”2 BALOPWE 20:3.

ÑIMBO: 52, 65

1-3. Lelo kwingidila Yehova na “mutyima mubwaninine” kushintulula bika? Leta kimfwa.

BATWE bonso twi ba kubulwa kubwaninina kadi tuloñanga bilubo. Dyese, Yehova i mwitupe kinkūlwa kadi udi na mutyima wa lubilo wa kulekela. Nanshi, shi twityepeje ne kwisāsa, nabya tukamulomba etufwile lusa. Tukulupilei amba Yehova kaketulongelapo “mwendele mambo etu.” (Ñimbo ya Mitōto 103:10) Ne papo pene, tufwaninwe “kumwingidila ne mutyima mubwaninine.” (1 Bilongwa 28:9) I muswelo’ka otubwanya kulonga kino nansha byotudi ba kubulwa kubwaninina?

2 Pa kumwingidila na mutyima mubwaninine, tudingakanyei būmi bwa Mulopwe Asa na bwa Mulopwe Amazia. Abo bonso bubidi bālongele bintu biyampe, ino kadi byobādi bampikwa kubwaninina, bālongele ne bilubo. Nansha nankyo Bible unena’mba “mutyima wa Asa wādi mubwaninine mafuku andi onso.” (2 Bilongwa 15:16, 17; 25:1, 2; Nkindi 17:3) Wādi ulonga nyeke bukomo bwa kusangaja Yehova kadi wēpēne kwadi na “mutyima mubwaninine.” (1 Bilongwa 28:9) Inoko Amazia, kāingidilepo Yehova na “mutyima mubwaninine.” Leza paāmukweshe  kunekenya balwana, aye wāpaika’ko ne bilezaleza byabo kaebitōta.2 Bilongwa 25:11-16.

3 Muntu wingidila Leza na “mutyima mubwaninine” usanswanga Yehova bingine kadi usakanga kumutōta nyeke ne nyeke. Mu Bible, kishima “mutyima” kifunkilanga divule pa muntu wa munda. Kifunkila pa muswelo otulanga, pa bintu byotusenswe, pa byotusaka kulonga mu būmi bwetu, ne pa kine kyotulongela bintu kampanda. Nansha byotudi bampikwa kubwaninina, tubwanya kutōta Yehova na mutyima mubwaninine. Tumwingidilanga mwanda ye byotusaka binebine, ke na kuningilwapo nansha bu kibidiji bitupu.2 Bilongwa 19:9.

4. I bika byotusa kubandaula?

4 Tubwanya kwivwanija ne pa mfulo mushintulwila kwingidila Leza na mutyima mubwaninine na kubandaula būmi bwa Asa ne būmi bwa balopwe bakwabo basatu ba kikōkeji ba Yuda. I ba Yehoshafata, Hezekia, ne Yoshia. Nansha bano balopwe baná byobālongele bilubo, inoko bādi basangaja Yehova. Wāmwene amba bamwingidilanga na mutyima mubwaninine. Mwanda waka Leza wēbamwene uno muswelo, ne i muswelo’ka otubwanya kwibeula?

MUTYIMA WA ASA “WADI MUBWANININE NE YEHOVA”

5. I bika byālongele Asa paābikele bu mulopwe?

5 Asa wādi mulopwe wa busatu wa Yuda pa kupwa kwa muzo wa Isalela kwabanibwa mu bulopwe bwa Yuda ne bwa Isalela. Pāikele Asa bu mulopwe wa Yuda, wādi usumininwe kufundula butōtyi bwa bubela ne busekese mu bulopwe bwandi. Wāonakenye bilezaleza byādi bitōta bantu ne kupanga bandumba ba mu tempelo. Asa wātalwile’nka ne nkambo wandi pa kitenta kya bu “inamfumu, mwanda walongele kyelekejo kyamunyanji.” (1 Balopwe 15:11-13) Kadi Asa wākankamikile bantu “kukimba Yehova” ne kukōkela “mukanda-wabijila, ne kijila kine kumo.” Asa wālongele byonso byabwanya pa kukwasha bantu batōte Yehova.2 Bilongwa 14:4.

6. I bika byālongele Asa bene Efyopia pobātambile Yuda bulwi?

6 Mu myaka dikumi imbajinji ya buludiki bwa Asa, bulopwe bwa Yuda kebwātambilwepo divita. Kupwa basola mudiyo umo bene Efyopia ne makalo tutwa tusatu bāiya kulwa na Yuda. (2 Bilongwa 14:1, 6, 9, 10) Lelo i bika byālongele’po Asa? Wādi ukulupile pampikwa kutatana amba Yehova ukakwasha bantu bandi. O mwanda wālombele Yehova ebakwashe banekenye bulwi. (Tanga 2 Bilongwa 14:11.) Kyaba kimo, Yehova wādi utonga kupa bandi bantu bushindañani pa balwana nabo, nansha shi balopwe kebamukōkelepo. Wādi ulonga namino mwanda wa kwilombola’mba i Leza wa bine. (1 Balopwe 20:13, 26-30) Ino mu kino kitatyi, Yehova wākweshe bantu bandi mwanda Asa wāmukulupile. Yehova wālondolwele milombelo ya Asa, nandi wānekenya bulwi. (2 Bilongwa 14:12, 13) Mwenda mafuku, Asa wālonga kilubo kikatampe na kulomba’ko mulopwe wa Shidea bukwashi, pa kyaba kya kulomba Yehova. (1 Balopwe 15:16-22) Nansha nankyo, Yehova wāmwene amba Asa umusenswe. Mutyima wandi wādi “mubwaninine ne Yehova mafuku andi onsololo.” I muswelo’ka otubwanya kwiula kimfwa kiyampe kya Asa?1 Balopwe 15:14.

7, 8. Le ukeula Asa namani?

7 Le tukayuka namani shi twi bepāne na mutyima mubwaninine kudi Yehova? Tubwanya kwiipangula’mba: ‘Le nkakōkela Yehova nansha pobimweka bu bikomo? Lelo ne musumininwe ne pa mfulo  kulama butōki bwa kipwilo?’ Vuluka bukankamane bwādi na Asa pa kubikula nkambo wandi pa kitenta kya bu inamfumu! Padi kyaba kimo nobe usakilwa bukankamane na bwa Asa. Kimfwa, le ukalonga namani shi muntu wa mu kisaka nansha mulunda nobe walonga bubi ne kupela kwisāsa, ku mfulo wapangwa? Le ukasumininwa kuleka kupwana na uno muntu? Le mutyima obe ukakutonona ulonge bika?

8 Pamo bwa Asa, kyaba kimo tubwanya kulanga’mba bantu bonso betulwanga. Padi bakwenu ba ku masomo nansha badimu bakuzawilanga amba mwanda wi Kamoni wa Yehova. Pakwabo i ku kaji kobakumona bu kilubi pa kulomba konje mwanda’tu wa kwenda ku kitango nansha amba kwingilangapo mansá a ntentekelo ku kaji. Mu ino myanda, kulupila mudi Leza mwālongele Asa. Lomba Yehova, kankamana, ne kulonga nyeke byoloke. Vuluka’mba Leza wākomeje Asa, nanshi nobe ukakukomeja.

9. I muswelo’ka otubwanya kusangaja Yehova potusapula?

9 Asa kādipo wilangila aye mwine, ino wākankamikile bakwabo “kukimba Yehova.” Netu tukwashanga bantu batōte Yehova. Umonanga potusapwila bakwabo myanda yandi. Bine usangalanga bininge pa kumona’mba tuloñanga namino mwanda tumusenswe ne amba mwanda tutele bantu mutyima ne kwibasakila būmi bwa kumeso!

YEHOSHAFATA WĀKIMBILE YEHOVA

10, 11. I muswelo’ka otubwanya kwiula Yehoshafata?

10 Yehoshafata mwanā Asa “wananga mu dishinda dya shandi Asa.” (2 Bilongwa 20:31, 32) Namani le? Pamo bwa shandi, Yehoshafata wākankamikile bantu bendelele kutōta Yehova. Wātumine bana-balume mu bibundi bya Yuda bakafundije bantu “mukanda-wabijila wa Yehova.” (2 Bilongwa 17:7-10) Wāendele’nka ne ku bifuko bya kungala kwa bulopwe bwa Isalela, ku bantu ba mu ngulu ya Efelaimi, “webajokeja kudi Yehova.” (2 Bilongwa 19:4) Yehoshafata i mulopwe “wakimbile Yehova ne mutyima wandi onso.”2 Bilongwa 22:9.

11 Dyalelo, Yehova usakanga bantu ba ntanda yonso bafundijibwe myanda yandi, kadi netu tubwanya kukwasha ku uno mwingilo. Le wi mwitungile kitungo kya kwingila uno mwingilo kweji ne kweji? Le usenswe kufundija bakwabo Bible amba nabo bashilule kutōta Yehova? Le ulombelanga pa uno mwanda? Shi wielele’ko, Yehova ukakukwasha ushilule kifundwa kya Bible. Lelo usangelanga kwifunda na muntu Bible nansha shi bikulomba kujimija’ko kyobe kitatyi kya kukōkolokwa? Pamo bwa Yehoshafata wālongele bukomo bwa kukwasha bakwabo bashilule monka kwingidila Yehova, netu tubwanya kulonga bukomo bwa kukwasha boba kebakingilanga. Kadi bakulumpe pa kipwilo bakwatanga’ko mpangiko ya kukwasha bapangwe badi mu mwaba wa kyabo kipwilo, boba ke baleke bubi bobadi balonga.

12, 13. (a) Pāzakele Yehoshafata, le wālongele’po namani? (b) Mwanda waka tufwaninwe kulonda kimfwa kya Yehoshafata?

12 Pamo bwa shandi Asa, Yehoshafata nandi wākulupile mudi Yehova pāile kibumbo kikatampe kulwa na Yuda. (Tanga 2 Bilongwa 20:2-4.) Wākwetwe moyo, wālomba Yehova amukwashe. Mu milombelo yandi, wānenene’mo amba abo bene kebabwanyapo kunekenya balwana. Wānena monka amba aye ne bandi bantu kebayukilepo ne kya kulonga kine. Yehoshafata kātatenepo amba Yehova ubwanya kwibakwasha. Wānenene amba: “Meso etu adi podi.”2 Bilongwa 20:12.

 13 Pamo bwa Yehoshafata, tubwanya kitatyi kimo kukomenwa kya kulonga mu mwanda kampanda, kadi twazakala’nka ne kuzakala. (2 Kodinda 4:8, 9) Ino vuluka byālongele Yehoshafata. Wālombele Yehova ku meso a bonso, ne kumusapwila mobazozele. (2 Bilongwa 20:5) Mitwe ya bisaka ibwanya kwiula kimfwa kya Yehoshafata. Lomba Yehova akukwashe pamo na kisaka mulwe na makambakano ne kuyuka kya kulonga’po. Kokikwatwa bumvu amba ba mu kisaka basa kwivwana ino milombelo. Bakajingulula mokulupidile Yehova. Byaākweshe Yehoshafata, nobe ukakukwasha.

HEZEKIA WĀENDELELE KULONGA KYOKYA KIYAMPE

14, 15. I muswelo’ka wākulupile Hezekia mudi Leza ne pa mfulo?

14 Hezekia i mulopwe mukwabo “walamete kudi Yehova.” Wāmulamete nansha byāshile shandi kimfwa kibi na kutōta bilezaleza. Hezekia “Wafundula mitenta, ne kutyumuna bipanda, ne kutema Ashela; ne kutyumuna tutyetutye nyoka wa mukuba wapungile Mosesa,” wāmutyumwine mwanda bene Isalela bādi ke batōta nyoka wa mukuba’wa. Hezekia wādi mwipāne na mutyima mutuntulu kudi Yehova. Wāendelele kulama “bijila bya Yehova byāsoñenye Mosesa.”2 Balopwe 18:1-6.

15 Pādi pabikele Hezekia, kibumbo kya basola bakomokomo ba Ashidia kyāiya kutekela Yuda kasāla ne kwibazakaja amba kisa konakanya Yelusalema. Senakediba, mulopwe wa Ashidia, wāfutulwile Yehova, kanena Hezekia etūle kwadi. Mu kino kitatyi kya makambakano, Hezekia wākulupile ne pa mfulo mudi Yehova ne kumulomba bukwashi. Wāyukile amba Leza udi na bukomo kupita bene Ashidia ne amba ubwanya kupandija bantu bandi. (Tanga Isaya 37:15-20.) Leza wālondolwele milombelo yandi na kutuma mwikeulu wāipaya basola bene Ashidia 185 000.—Isaya 37:36, 37.

16, 17. I muswelo’ka obwanya kwiula Hezekia?

16 Mwenda mafuku Hezekia wābela ke lufu lonka. Mu kino kitatyi kya makambakano, wālombele Yehova avuluke kikōkeji kyandi ne kumukwasha. (Tanga 2 Balopwe 20:1-3.) Yehova wāivwene milombelo ya Hezekia ne kumubelula. Kupityila ku Bible, tuyukile amba dyalelo ketukatengelapo Leza etubelule nansha kwitulepeleja’ko būmi mu kingelengele. Ino pamo bwa Hezekia, netu tubwanya kukulupila mudi Yehova etukwashe. Tubwanya kumulomba’mba: “Yo! a Yehova nakwisashila, bamvuluke bidi byo nananga ku meso obe mu bu-binebine ne mutyima mubwaninine.” Lelo ukulupile amba Yehova ukakuta nyeke mutyima, nansha ke podi mu misongo?Ñimbo ya Mitōto 41:3.

17 I muswelo’ka mukwabo otubwanya kwiula’mo Hezekia? Padi kudi bintu bitukambakanya mu kipwano kyetu na Yehova nansha kwitujimijija kitatyi kya kumwingidila. Kimfwa, bantu bavule dyalelo bamonanga bantu bwa bilezaleza. Batumbijanga bantu enka ne bantu bokebayukilepo bene. Bavule bajimijanga kitatyi kivule na kutanga yabo myanda ne kutala mafoto abo. Nansha divule bengidijanga makela a kyungwija nansha bingidilwa bikwabo bya kwisamba na bantu pa Entelenete. Shako, tubwanya kwisamba na ba mu kisaka kyetu nansha na balunda netu kupityila ku bino bingidilwa. Inoko tubwanya kujimija kitatyi kivule na kutwela pa mateba a kyungwija. Tubwanya’nka ne kwitatula shi bantu bavule betulombola’mba basenswe mafoto etu ne myanda yotunenene pa Entelenete. Kadi shi abetulombola’mba bantu kebakitalenga’byopo, tubwanya kufītwa. Tubwanya kuboila ñeni ku kimfwa kya  mutumibwa Polo, Akwila, ne Pishila. Le ulanga bādi bapityija kitatyi difuku ne difuku na kubandila kakintu ne kakintu kalongele bantu, nakampata boba kebengidilapo Yehova? Bible unena’mba Polo wēpene “bininge na kufundija mwanda.” Kadi ba Akwila ne Pishila bādi bapityija kitatyi na kusapula ne kushintulwila bakwabo “dishinda dya Leza mobyolokele kutabuka.” (Bilongwa 18:4, 5, 26) Tubwanya kwiipangula’mba: ‘Lelo ntadijanga kutyina bantu bakangikadila bwa bilezaleza? Lelo ngepukanga kujimija kitatyi ku bintu bya mvubu mityetye?’Tanga Efisesa 5:15, 16.

YOSHIA WĀKŌKELE BIJILA BYA YEHOVA

18, 19. I muswelo’ka otubwanya kwiula Yoshia?

18 Mulopwe Yoshia nandi wākōkele bijila bya Yehova na “mutyima wandi onsololo.” (2 Bilongwa 34:31) Yoshia wādi nkanununa wa Hezekia. Pa bwanuke, “washilula kukimba Leza wa Davida.” Aye pa kubwanya myaka 20, wāfundula butōtyi bwa bilezaleza mu ntanda ya Yuda. (Tanga 2 Bilongwa 34:1-3.) Yoshia wālongele bukomo bwa kusangaja Yehova kutabuka balopwe bavule ba Yuda. Difuku dimo, kitobo mukatampe wāsokola mukanda wa bijila wa Leza mu tempelo. Padi uno mukanda wālembelwe na Mosesa mwine! Mulembi pa kumutangila’o, Yoshia wājingulula’mba ufwaninwe kulonga bivule pa kwingidila Yehova ne pa mfulo. Wākankamika ne bakwabo balonge mwalongela. Ku mfulo, bantu “kebafundukilepo ku kulonda Yehova” mu mafuku onsololo a Yoshia.2 Bilongwa 34:27, 33.

19 Shi wi nkasampe, ubwanya kwiula Yoshia ne kuyuka Yehova senene. Padi Yoshiya wāboile ñeni ku byātene Mulopwe Manase, nkambo wandi wēsāshile, amba Yehova udi na mutyima wa kulekela. Nobe ubwanya kuboila ñeni ku bantu batame ba mu kyenu kisaka ne ba mu kipwilo. Babwanya kukusekunwina bintu bivule bibalongele Yehova. Kadi, vuluka mweivwanine Yoshia pa kupwa kwivwana binena Bisonekwa. Wādi na kipyupyu kya kusangaja Yehova ne kushinta kiponka na ponka. Shi utange Bisonekwa, nobe ukasumininwa bininge kukōkela Yehova. Ku mfulo, kipwano kyobe nandi kikaninga kadi ukekala na nsangaji. Ebiya ukekala na mutyima wa kusapwila bantu bakwabo myanda yandi. (Tanga 2 Bilongwa 34:18, 19.) Powifunda Bible, padi ukamona’mba kudi miswelo mikwabo yobwanya kwilumbulula poingidila Leza. Shi bidi nankyo, longa bukomo bwa kushinta na mwālongele Yoshia.

INGIDILA YEHOVA NA MUTYIMA MUBWANININE!

20, 21. (a) Lelo bano balopwe baná botwesambila’po bādi beifwane mu myanda’ka? (b) I bika byotukabandaula mu kishinte kilonda’ko?

20 I bika byotwefunda ku bano balopwe baná ba Yuda bāingidile Yehova na mutyima mubwaninine? Bano bana-balume bādi basumininwe kusangaja Yehova ne kumutōta mu būmi bwabo bonso. Bādi bakulupila Yehova pādi pebatamba balwana bakomokomo. Ino kya mvubu kutabuka, bāingidile Yehova mwanda wa buswe bobādi bamuswele.

21 Nansha bano balopwe baná byobālongele bilubo mwanda wa kubulwa kubwaninina, ino bāsangeje Yehova. Wāmwene bidi mu mutyima wabo ne kumona’mba bamusenswe bya binebine. Netu twi bampikwa kubwaninina kadi tuloñanga bilubo. Inoko tukasangaja Yehova shi wetumona tumwingidila na mutyima mubwaninine. Mu kishinte kilonda’ko, tukesambila pa ñeni yotubwanya kuboila ku bilubo bya bano balopwe.