Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 NSEKUNUNI YA MU BŪMI

Kipyanwa Kilēme kya Bwine Kidishitu Kyaunkweshe Mone Biyampe

Kipyanwa Kilēme kya Bwine Kidishitu Kyaunkweshe Mone Biyampe

DIFUKU dimo bufuku, twadi tusaka kwabuka Munonga mukatampe wa Nijer—ukukanga mulungu bininge kadi udi na bukata bwa kintu kya kilometele imo ne kupita. Pashilwile Divita dya Basivile mu Nijeria, kwabuka munonga wa Nijer kwadi kwitūla mu kyaka. Nansha nankyo twadi tutūla būmi bwetu mu kyaka misunsa mivule. Le i bika byaunengeje ntanwe mu ino ngikadilo? Lekai nemusapwile bidi bintu byalongekele ami nkyabutwilwe.

Mu 1913, tata wami John Mills wabatyijibwe na myaka 25 mu New York City. Tutu Russell ye wanenene mwisambo wa lubatyijo. Kitatyi kityetye pa kupita’po, Tata wavilukila ku Trinité, kwine kwaasongele Constance Farmer, Mwifundi wa Bible mupyasakane. Tata wadi ukwasha mulunda nandi William Brown pa kutadija “Foto-Drame ya Bupangi.” Badi balonga nyeke namino kufika’nka ne byatuminwe ba Brown mu Afrika wa Kushika mu 1923. Ba Tata ne Mama, abo bonso badi na lukulupilo lwa kwenda mūlu, abo bashele’nka mu Trinité.

BAMBUTWILE BETUSENSWE

Bambutwile bami badi na bana kitema, wabo mwana mubajinji bamwinika bu Rutherford, majina wa yewa wadi ne bu mwimaniji wa Watch Tower Bible and Tract Society. Ami pa kubutulwa mu mafuku 30 Kweji 12, 1922, baunginika bu Woodworth, majina wa Clayton Woodworth, wadi mulembi wa Âge d’Or (dyalelo ke Langukai!). Bambutwile betu betutumine ku masomo batwe bonso mwanda wa tufundijibwe bufundiji bwa kyalwilo, ino badi betukankamika bininge twitungile bitungo bya ku mushipiditu. Mama wadi na bwino bwa pa bula bwa kulangulukila pa Bisonekwa mu muswelo unekenya. Tata aye wadi usenswe kwitusekunwina mānga ya mu Bible, wadi wiela’mo mwanda wa ikale isangaja.

Bukomo bwabo bwalupwile bipa biyampe. Mu batwe bana-balume batano, basatu bakafundile Masomo a Ngileade. Banabetu basatu bana-bakaji nabo baingile bu bapania mu bula bwa myaka mivule mu Trinité ne mu Tobago. Kupityila ku bufundiji ne ku kimfwa kyabo kiyampe, bambutwile betu betukunine “mu njibo ya Yehova.” Kukankamika kobetukankamikile kwetukweshe twikale’mo nyeke ne kumona biyampe “mu bipango bya Leza wetu.”—Ñim. 92:13.

Njibo yetu yaikele ke kitako kya mwingilo wa busapudi. Bapania badi betanina’mo ne kwisambila divule padi Tutu George Young, mishonele  wa mu Kanada waile mu Trinité. Bambutwile bami badi besambila na nsangaji pa balunda nabo, ba Brown, bene badi mu Afrika wa Kushika mu kine kitatyi’kya. Bino byonso byaunengeje nshilule mwingilo wa busapudi na myaka dikumi.

MINGILO MIBAJINJI

Mapepala etu adi anena pampikwa kafinda mu mene mafuku’a, adi asokwela patōka mutōtelo wa bubela, malongolodi a busunga a makomwa-meso, ne malongolodi a politike a budimbidimbi. Pa kino, mu 1936 bendeji ba bipwilo basoñanya mbikavu wa mu Trinité apeleje mabuku onso a Watch Tower. Twafile mabuku adi ashele’ko, ino twaendelela kwiengidija kufika ne byoapwile onso. Twadi twenda kibumbo lwa panshi ne na makinga, tusapula na tukanda ne na matabulo. Potwakasapwile na kisumpi kyadi na kotoka ka diwi, kyatambile mu kibundi kya Tunapuna, twakasapwile’nka ne ku bifuko bya kulampe bya mu Trinité. Byadi bisangaja’po kashā! Kwitana na bano bantu ba ku mushipiditu, kwaunengeje mbatyijibwe na myaka 16.

Kisumpi kya mu Tunapuna na kotoka ka diwi

Kipyanwa kyetu kya kisaka ne ino myanda yonemwenine, byaunkweshe ntamije mutyima wa kwikala bu mishonele. Nadi nakidi na uno mutyima ne ponaendele ku Aruba mu 1944, kwine kotwetene na Tutu Edmund Cummings. Twaivwene nsangaji pa kutanwa bantu dikumi ku Kivulukilo kya mu 1945. Mwaka ulonda’po, kwabundwa kipwilo kibajinji pa kino kisanga.

Na Oris, būmi bwami bwalumbulukile’ko

Kitatyi kityetye pa kupita’po, nasapwila Oris Williams bya kiponka na ponka, mwana-mukaji otwadi twingila nandi. Oris wapatanya bininge mwanda wa kubingija mfundijo yobamufundije. Inoko, kupityila ku kifundwa kya Bible, wefunda byobya binena Kinenwa kya Leza, wabatyijibwa mu mafuku 5 Kweji 1, 1947. Mu kine kitatyi’kya, twesanswa kupwa twesonga. Oris washilula bupania mu Kweji 11, 1950. Na Oris, būmi bwami bwalumbulukile’ko.

MWINGILO WA NSANGAJI MU NIJERIA

Mu 1955, betwita kukafunda Masomo a Ngileade. Pa kwiteakanya mwa kwendela’ko, ami ne Oris twaleka twetu twaji, twapoteja njibo yetu ne bintu bikwabo byotwadi nabyo, ne kutamba mu Aruba. Mu mafuku 29 Kweji 7, 1956, twavuya kalasa ka 27 ka Ngileade, kupwa betutuma mu Nijeria.

Na kisaka kya Betele mu Lagos, mu Nijeria mu 1957

Oris uvuluka’mba: “Mushipiditu wa Yehova ubwanya kukwasha muntu ebidile mu bitatyi biyampe ne mu bibi bya mu būmi bwa bu mishonele. Kwishila na wami mulume, nkyadipo nsaka nansha dimo kwikala bu mishonele. Ino nadi nsaka kwikala na njibo ne kulela bana. Nashintyile mulangilo wami ponajingulwile amba kusapula myanda miyampe i kwa kampeja-bukidi. Kitatyi kyotwavuile Masomo a Ngileade, naikele na mutyima wa kusapula bu mishonele. Batwe pa kwikila mu kyombo kikatampe kya Queen Mary, Worth Thornton, wadi wingila mu bilo ya Tutu Knorr, wetunena’mba ‘Lwendo luyampe!’ Wetusapwila’mba tusa kukengidila ku Betele. Nami namulondolola’mba ‘Kebibwanikapo!’ Ino bukidi bonka naibidila ne kusanswa Betele, kwine konaingile mingilo mishileshile. Mwingilo onasenswe’ko bininge i wa kutundaila beni. Nasanswa bantu, kadi uno mwingilo waunengeje nemone kyaba kyonso na banabetu ba mu Nijeria. Bavule badi bāya batokane, bakōke, bevwene kyumwa, ne nzala. Nadi ngivwana nsangaji pa kuvuija bisakibwa byabo na kwibapa twakudya ne twa kutoma ne kwibakankamika. Ino yonso yadi mingilo ikola yonadi ñingidila Yehova, kadi yaundetele nsangaji ne kuloelelwa.” Bine, mwingilo o-onso wadi witukwasha twendelele.

Potwaketene na kisaka mu Trinité mu 1961, Tutu Brown wetusekunwina myanda isangaja yobemwenine mu Afrika. Kupwa nami nebabangila myanda itala kwendelela kwa mwingilo mu Nijeria. Tutu Brown waumpamba makasa na buswe, kanena Tata amba: “John, abe kwafikile kashā mu Afrika, inoko aye Woodworth wafika’mo!” Kupwa Tata waunena’mba: “Woodworth endelela! Endelela mwanami!” Kukankamikwa na bano bantu batame ku mushipiditu kwaumpele mutyima wa kuvuija mwingilo wami ne pa mfulo.

William “Bible” Brown ne wandi mukaji Antonia, betukankamikile bininge

Mu 1962, naikele na dyese dya kukafunda bufundiji bwa ntentekelo ku kalasa ka 37 ka Ngileade, mu bula bwa myeji dikumi. Tutu Wilfred Gooch, wadi mutadi wa musambo mu Nijeria mu kine kitatyi’kya, nandi wakatanwa ku  kalasa ka 38, kupwa bamutuma mu Angeletele. Ebiya naikala bu mutadi wa musambo wa mu Nijeria. Pa kulonda kimfwa kya Tutu Brown, nadi ñenda ñendo milampe, neyuka na banabetu ba mu Nijeria ne kwibasanswa. Nansha byokebadipo na bintu bivule bya ku ngitu bidi na bantu ba mu matanda mashidimuke, nsangaji yabo ne kuloelelwa, byalombwele patōka’mba būmi bwa nsangaji kebwimaninepo pa kwikala na lupeto nansha na bintu bya ku ngitu. Pa kumona ngikadilo yobadi’mo, i kya kutendelwa pa kwibamona bekele na dyangi, bavwele biyampe, ne kwikala bya bulēmantu ku kupwila. Pobāyanga ku bitango, bavule bāyanga na myotoka mikatampe ne myotoka imo itwa bu bolekaja * (myotoka ya kipululu yobapunga mwabo). Pa myotoka mivule padi palembe bilembwa bisangaja. Pa motoka umo padi palembe amba: “Mano a mema alamukanga ke dijiba dikatampe.”

Bino binenwa i bya bine’po kashā! Bukomo bonso bulonga muntu ne muntu budi na mvubu; kubadila’mo ne botwalongele. Dya mu 1974, Nijeria ye ntanda mibajinji yabwenye basapudi 100 000, kutalula’mo États-Unis. Bine, mwingilo waendelele kumeso!

Mu kuno kwendelela, kwalupuka Divita dya Basivile mu Nijeria tamba mu 1967 kutūla mu 1970. Mu myeji mivule, banabetu ba mu Biafra, badi bukila bwa Munonga wa Nijer, kebadipo bakimona na bilo ya musambo. Ino byadi bitulomba kukebapa bidibwa bya ku mushipiditu. Enka na mokilombwedilwe ku ngalwilo, kupityila ku milombelo ne kikulupiji mudi Yehova, twadi twabuka bukila bwa munonga misunsa mivule.

Mvulukanga senene ino ñendo ya kyaka ya kutyibulula Nijer, kutūla būmi mu kyaka kya kwipaibwa na basola, kyaka kya misongo, ne bikwabokwabo. Byadi bikomo pa kupita milongo ya bulwi, ino byadi bikomo bininge pa kupita badiye ya bobwa bukila bwa Biafra. Difuku dimo bufuku, naabuka na bwato Munonga wa Nijer ukuka mulungu bininge, kutamba mu Asaba ne kwenda mu Onitsha, kupwa naenda kukakankamika batadi mu Enugu. Mu lwendo lukwabo nakakankamikile bakulumpe mu Aba, mwine mobaketele mudilo wa nshinga. Ku Kyabu kya Harcourt, twafudije kupwila mu kitulumukila na milombelo pobatambile’dyo bantu ba mu Biafra badi bajikile badiye panja pa kibundi kudi balwana nabo.

Kuno kupwila kwadi na mvubu pa kukankamika banabetu baswe amba Yehova wibatele mutyima na buswe ne kwibapa madingi mene obadi basakilwa a kuleka kwikuja mu bya ino ntanda ne kwikala mu bumo. Banabetu ba mu Nijeria kebekujijepo mu tuno tuvutakanya tubi. Bamwekeje buswe, bwine bunekenyanga mushikwa wa tubila, kadi balamine bumo bwa bwine Kidishitu. Bine dyadi dyese’po kashā kwikala nabo mu kino kitatyi kya byamalwa!

Mu 1969, Tutu Milton Henschel wadi mwimaniji ku kitango kya matanda kinena’mba “Ndoe Pano pa Ntanda” kyalongelwe mu Yankee Stadium, mu New York, kadi byonadi mukwashi wandi, nefundile bintu bivule. Kino kyadi na mvubu mwanda mu 1970 twalongēle mu Lagos, mu Nijeria kitango kya matanda kinena’mba “Bantu Batōkēlwe.” Byokyalongelwe’tu pa kupwa kwa divita dya basivile, kino kinkumenkume kyabwanikile’tu na bukwashi bwa Yehova. I kinkumenkume kyalongelwe mu ndimi 17, kwatenwe bantu 121 128. Tutu Knorr ne Henschel ne bantu bakwabo baile na maamviyo obaluile, batambe mu États-Unis ne mu Angeletele, bemwenine kibalwa kikatampe kutabuka kya lubatyijo lwa bwine Kidishitu tamba pa Pentekosa—bana ba bwanga bapya 3 775! Kitatyi kyonakweshe’ko pa kuteakanya kino kinkumenkume, bimweka’mba kyo kitatyi kyonavudilwe bya kulonga mu bwami būmi. Kibalwa kya basapudi kyadi kyenda kikanda lubilolubilo!

Kitango kya matanda kinena’mba “Bantu Batōkēlwe” kyatenwe’ko bantu 121 128, badi besamba ndimi 17 mishileshile, kubadila’mo ne ludimi lwa Ibo

Mu bula bwa myaka 30 ne musubu yotwalongele mu Nijeria, nadi na nsangaji ya kwingila na dimodimo bu mutadi wendakana ne bu mutadi wa zone mu Afrika wa Kushika. Bine bamishonele badi bafwija’ko bininge pa kwibata mutyima umo ne umo ne kwibakankamika! Bine naikele na nsangaji pa kwibakulupija’mba ketwibedilwepo! Uno mwingilo waumfundije amba kuta bantu mutyima i kintu kya kamweno pa kwibakwasha bendelele, balame bumo ne kuningija bulongolodi bwa Yehova.

 I kupityila ku bukwashi bwa Yehova kotwabwenye kulwa na makambakano alupukile ku divita dya basivile ne a misongo. Twadi twimwena nyeke bukwashi bwa Yehova. Oris unena’mba:

“Batwe bonso twadi tubela malaria kyaba ne kyaba. Difuku dimo twatwelele na Woodworth mupungile mu lupitalo. Baunsapwila’mba kasapo kupanda, ino na bya dyese wapanda! Aye pa kwialuja, wasapwila muñanga wadi umulama myanda ya Bulopwe bwa Leza. Mwenda mafuku twaenda na Woodworth kukajokela muñanga’wa, dyandi i Nwambiwe, mwanda wa kutamija kusangela kwandi kwa myanda ya mu Bible. Waitabija bubine ne mwenda mafuku waikala ke mukulumpe mu Aba. Nami nakweshe bantu bavule, kubadila’mo ne Bamizilma bakulupilwe, baikala ke bengidi ba Yehova bepāne. Twasangele bininge pa kuyuka ne kusanswa bantu ba mu Nijeria, bibidiji byabo, bitamina, ne ludimi lwabo.”

Kintu kikwabo kyotwefundile i kino: Pa kuvuija biyampe mwingilo wetu mu ntanda-bene, twadi tufwaninwe kusanswa batutu ne bakaka nansha byobadi na bibidiji bishile na byetu.

MINGILO MIPYA

Pa kupwa kwingila ku Betele ya mu Nijeria, mu 1987 betutuma mu mwingilo mupya wa bumishonele pa kisanga kiyampe kya St. Lusia mu Karaibe. Wadi mwaba usangaja, ino mwadi bikoleja bikwabo. Kwishila na mu Afrika, mwine mwadi kibidiji kya kusonga bakaji bavule, muno mu St. Lusia, mudi balume ne bakaji bavule bashikete bya ntekele-nkuvwike. Bukomo bwa Kinenwa kya Leza bwakweshe bantu bavule botwadi twifunda nabo Bible bashinte.

Nadi nsenswe Oris bininge mu bula bwa myaka 68 ya busongi bwetu

Bukomo bwetu bwa ngitu byobwadi bwenda butyepa pa mwanda wa bununu, mu 2005 Kitango Kyendeji kyetutundulwidile na buswe ku kité kya ntanda yonso mu Brooklyn, mu New York, mu États-Unis. Difuku ne difuku mfwijanga’ko Yehova pa kumpa Oris. Wafwile mu 2015, kadi ngidi na bushiyena bukatampe. Wadi mukwashi wa buswe, mukena wami. Nadi musenswe bininge mu bula bwa myaka 68 yotwalongele nandi. Twajingulwile amba kintu kileta nsangaji mu busongi ne mu kipwilo, i kulēmeka bumutwe, kwilekela na mutyima umo, kwityepeja, ne kumwekeja kipa kya mushipiditu.

Kitatyi kyotwadi tutyumukwa mutyima nansha kulangalanga, twadi tulomba Yehova etukwashe twendelele nyeke na kwipāna. Potwadi tulonga bukomo bwa kwilumbulula, bintu byadi byenda biyampe kitatyi kyonso—kadi bintu bilumbuluke kutabuka bitutengēle kumeso’ku!—Isa. 60:17; 2 Ko. 13:11.

Mu Trinité ne mu Tobago, Yehova waesele mwingilo waingile bambutwile bami ne bantu bakwabo, ebiya—kukwatañana na lapolo ya mfulo—bantu 9 892 belunga ku mutōtelo wa bine. Mu Aruba, nami nadi mu bantu baingile mwanda wa kukomeja kipwilo kibajinji. Dyalelo pa kino kisanga padi bipwilo 14 byendelela. Mu Nijeria, kibalwa kya basapudi i kikande bininge, ke kibumbo kikatampe kya bantu 381 398. Pa kisanga kya St. Lusia napo, padi basapudi 783 bakwatakanya Bulopwe bwa Yehova.

Pano kendi na myaka 90 ne musubu. Ñimbo ya Mitōto 92:14 isambila pa boba bakunwe mu njibo ya Yehova amba: “Nansha ke pa bununu pene bakatūbuluka nyeke; bakekala nyeke na bukomo kadi bafufuma.” Mfwijanga’ko bininge pa kupāna būmi bwami mu mwingilo wa Yehova. Kipyanwa kilēme kya bwine Kidishitu kyonapyene i kinkwashe ñingidile Yehova ne pa mfulo. Kupityila ku buswe bwandi bwa ndamatyidile, Yehova i munkwashe mone “biyampe mu bipango bya Leza [wami].”—Ñim. 92:13.

^ mus. 18 Tala Langukai! wa mafuku 8 Kweji 7, 1972, p. 24-26, Falanse.