Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami—Kya Kwifunda  |  Kweji 2 2018

Nsangaji—Ngikadila Itamba Kudi Leza

Nsangaji—Ngikadila Itamba Kudi Leza

NA BUBINE bantu basakanga kwikala na nsangaji mu būmi. Inoko mu ano mafuku a mfulo, bantu bonso batanwanga na makambakano makomo “ne mwa kulongela.” (2 Temote 3:1) Bukondame, misongo, bulofwa, njia, kutyumukwa mutyima, ne makambakano makwabo, abwanya kulengeja bantu bamo bajimije bityebitye nsangaji yobadi nayo. Enka ne bengidi ba Leza nabo babwanya kutyumukwa mutyima ne kujimija nsangaji yabo. Shi kino ke kikufikile, le i muswelo’ka obwanya kujokeja nsangaji?

Pa kulondolola ku kino kipangujo, tufwaninwe bidi kwivwanija mwikadile nsangaji ya bine ne kumona muswelo walamine bantu bamo nsangaji yabo mu bitatyi bya byamalwa. Ebiya ketumone byobya byotubwanya kulonga pa kulama nsangaji yetu ne kwiivudija.

LE NSANGAJI I BIKA?

Kwikala na nsangaji i kwishile na kusepelela’tu bitupu. Tulete kimfwa: Shi muntu watome mālwa mavule, ubwanya kwanza kusepakana. Inoko, shi abamutōka, waleka’byo kusepakana, kadi ubwanya kujokela’nka mu ngikadilo yaadi’mo ya kutyumukwa mutyima. Nanshi nsangaji yaadi nayo kitatyi kyaadi mukolwe keyadipo ya bine.​—Nkindi 14:13.

Ino nsangaji ya bine ayo, i ngikadila ishilukanga ku mutyima. Ishintululwanga bu “mwiivwanino wa kusangala pa mwanda wa kintu kiyampe kyowayuka nansha kyotengēle.” Nsangaji yo ngalwilo ya katōkwe nansha kuloelelwa, mine keishintangapo ekale mu ngikadilo miyampe nansha mibi. (1 Tesalonika 1:6) Na bubine, muntu ubwanya kuzumbija mutyima pa kintu kampanda aye’ko na nsangaji ku mutyima. Kimfwa, batumibwa bādi bakupilwa pa mwanda wa kwisambila pa myanda ya Yesu. Nansha nankyo, bātalukile “ku meso a Sanedini, benda basangele mwanda abamweka bu bantu bafwaninwe kufutululwa pa mwanda wa dijina dyandi.” (Bilongwa 5:41) Na bubine, kebāsangedilepo bikupilwa. Ino byobādi bengidi ba Leza, bāivwene nsangaji ya bine pa kulama bululame bwabo kwadi.

Ketubutulwangapo na ino nsangaji; kadi keivudilanga’kopo mu kitulumukila. Mwanda waka? Mwanda nsangaji ya bine i ngikadila ibadilwa mu bipa bya mushipiditu ujila wa Leza. Na bukwashi bwa mushipiditu wa Leza, tubwanya kutamija ne pa mfulo “bumuntu bupya,” mwine mubadilwa ne nsangaji. (Efisesa 4:24; Ngalatea 5:22) Kadi shi tutamije nsangaji, nabya tukabwanya kulwa na makambakano a mu būmi.

BIMFWA BIYAMPE BYOTUFWANINWE KWIULA

Yehova kādipo usaka bintu bibi bilongeke pano pa ntanda na motwibimwena dyalelo’di, inoko wādi usaka palongeke’nka bintu biyampe. Nansha nankyo, bilongwa bibi bya bantu kebijimijijangapo Yehova nsangaji yandi. Kinenwa kya Leza kinena’mba: “Bukomo ne nsangaji bidi mu kikalo kyandi.” (1 Bilongwa 16:27) Kadi, bintu biyampe bilongwa na bengidi ba Yehova ‘bisangajanga mutyima wandi.’​—Nkindi 27:11.

Tubwanya kwiula kimfwa kya Yehova na kuleka kuzumbija mutyima bininge shi bintu kampanda kebilongekelepo na motwadi twibilangila. Pa kyaba kya kujimija nsangaji yetu,  tufwaninwe kuta mutyima pa bintu biyampe byotudi nabyo pano ne kukungila na kitūkijetyima bintu biyampe bikwabo bīya kumeso. *

Kadi kudi bimfwa bivule bya mu Bible bya bantu bālamine nsangaji yabo mu bitatyi bya makambakano. Kimfwa Abalahama wāuminine ngikadilo ne makambakano makomo āmukolomwenine bantu bakwabo. (Ngalwilo 12:10-20; 14:8-16; 16:4, 5; 20:1-18; 21:8, 9) Nansha Abalahama byaātenwe na bino bikoleja, aye wālamine nsangaji ku mutyima. Le wēilamine namani? Wātele mutyima bininge ku mulao wa kukekala mu ntanda mipya mu buludiki bwa Meshiasa. (Ngalwilo 22:15-18; Bahebelu 11:10) Yesu wānenene amba: “Shenu Abalahama wāsangele bikatampe pa kutengela kumona difuku dyami.” (Yoano 8:56) Netu tubwanya kwiula kimfwa kya Abalahama na kulangulukila pa nsangaji itutengēle kumeso.​—Loma 8:21.

Pamo bwa Abalahama, mutumibwa Polo ne mwingidi nandi Shilasa, nabo bādi batele mutyima ku milao ya Leza. Bādi na lwitabijo lukomo, kadi bālamine nsangaji yabo nansha byobātenwe na byamalwa. Kimfwa, abo pa kupwa kukupilwa bininge ne kwelwa mu buloko, “ino dya pa bukata bwa bufuku . . . badi balombela ne kutendela Leza na lwimbo.” (Bilongwa 16:23-25) Kadi pa kukomeja lukulupilo lwabo, ba Polo ne Shilasa bālamine nsangaji yabo mwanda bāsusukidile dijina dya Kidishitu. Netu tubwanya kwiula kimfwa kya ba Polo ne Shilasa na kuta mutyima ku bintu biyampe bitamba ku kwingidila Yehova na kikōkeji.​—Fidipai 1:12-14.

Dyalelo, mu bubana na bana bwetu mudi bimfwa biyampe bivule bya bantu balamine nsangaji yabo mu bitatyi bya byamalwa. Kimfwa, mu Kweji 11, 2013, kwalongekele kintenshi kikatampe kya typhon Haiyan mu kipindi kya pa bukata kya mu Filipine, kyaonakenye mobo 1 000 ne musubu a bisaka bya Batumoni. George, mwine wadi na njibo yaonakene yonso mu kibundi kya Tacloban, unena’mba: “Banabetu badi na nsangaji nansha byobatenwe na ano makambakano. I bikomo’tu ne mwa kushintulwila nsangaji yotudi nayo.” Ponso potutanwa na makambakano makomo, tukalama nsangaji yetu enka shi tulangulukila na mutyima wa kufwija’ko pa bintu bitulongēle Yehova. Le i bintu’ka bikwabo bitulongēle Yehova bitupa bubinga bwa kwikadila na nsangaji?

BUBINGA BWETU BWA KWIKADILA NA NSANGAJI

Le kudi bubinga bukwabo bwa kwikadila na nsangaji bupityile kipwano kyetu na Leza? Langulukila bidi pa kino: Tuyukile Mubikadi wa diulu ne ntanda. I Tata wetu, Leza wetu, kadi Mulunda netu!​—Ñimbo ya Mitōto 71:17, 18.

Kadi tudi na kyabuntu kilēme kya būmi ne ñeni ya kwibusangela. (Musapudi 3:12, 13) Byotudi bipangwa bya ñeni bipangilwe mu kyelekejo kya Yehova, o mwanda twivwanije byobya bisaka Leza kotudi. (Kolose 1:9, 10) Nanshi, tudi na kitungo ne bwendeji buyampe mu būmi bwetu. Kadi bantu bavule kebayukilepo senene kitungo kya būmi. Pa kulombola kuno kwishila, Polo wālembele amba: “‘Diso kedyamwene’byopo ne kutwi nako kekwaivwene’byopo, nansha mutyima wa muntu kufwatakanya bintu byālongolwedile Leza boba bamusenswe.’ Mwanda batwe bo basokwedilwe’byo na Leza kupityila ku mushipiditu wandi.” (1 Kodinda 2:9, 10) Mwene tudi na nsangaji pa kwivwanija kiswa-mutyima kya Yehova ne mpango yandi?

Tala bintu bikwabo Yehova byalongēle bantu bandi. Lelo kusangelepo pa kuyuka’mba tubwanya kulekelwa bubi bwetu? (1 Yoano 2:12) Kupityila pa lusa lwa Leza, tukulupile bya binebine amba panopano ponka tusa kwikala mu ntanda mipya. (Loma 12:12) Enka ne dyalelo, Yehova witupele bantu bayampe botumutōta nabo. (Ñimbo ya Mitōto 133:1) Kadi Kinenwa kya Leza kitukulupija’mba Yehova ukiñanga bantu bandi kudi Satana ne ku bandemona bandi. (Ñimbo ya Mitōto 91:11) Shi tulangulukila pa ano madyese onso atamba kudi Leza, nabya tukalama nsangaji yetu ne kwiivudija.​—Fidipai 4:4.

 MWA KUVUDIJIJA NSANGAJI

Lelo mwine Kidishitu udi kala na nsangaji ubwanya kwiivudija? Yesu wānenene amba: “Bino’bi nemulombola’byo, amba nsangaji yami ikale momudi ne nsangaji yenu iyule bā.” (Yoano 15:11) Le kino kekilombolapo amba tubwanya kuvudija nsangaji yetu? Dingakanya bukomo bolonga pa kuvudija nsangaji na kulama mudilo mubanze kala. Pa kusaka’mba uleke kubula, bikulomba kwiusonshila. Mo monka, nobe ufwaninwe kutama ku mushipiditu pa kuvudija nsangaji yobe. Vuluka’mba: Nsangaji iletwanga na mushipiditu wa Leza. O mwanda nanshi ukavudija nsangaji na kulomba Yehova kitatyi ne kitatyi mushipiditu wandi ne kulangulukila na mushike pa Kinenwa kyandi kisonekelwe ku bukomo bwa mushipiditu.​—Ñimbo ya Mitōto 1:1, 2; Luka 11:13.

Kadi ubwanya kuvudija nsangaji yobe na kwingila bininge mingilo isangaja Yehova. (Ñimbo ya Mitōto 35:27; 112:1) Mwanda waka? Mwanda twapangilwe pa mwanda wa kwakamwa “Leza ne kulama bijila byandi, mwanda yo mingilo mituntulu ya muntu.” (Musapudi 12:13) Mu muneneno mukwabo, twi bapangwe mwanda wa kulonga kiswa-mutyima kya Leza. O mwanda shi twingidila Yehova, twikalanga na nsangaji ya bine mu būmi bwetu. *

BYABUYABUYA BILUPUKA KU KWIKALA NA NSANGAJI

Potwenda tutamija nsangaji itamba kudi Leza, tukemwena byabuyabuya bivule kutabuka ne motwiivwanina mwine. Kimfwa, tukasangaja mpata Tata wetu wa mūlu potumwingidila na nsangaji nansha shi tubatanwa na makambakano’ka. (Kupituluka 16:15; 1 Tesalonika 5:16-18) Kadi kwikala na nsangaji ya bine kuketukwasha twepuke mwikadilo wa mu būmi wa kusanswa bintu bya ku ngitu, ino tukakimba mikenga ya kwipāna bininge pa mwanda wa tumweno twa Bulopwe bwa Leza. (Mateo 13:44) Potwimwena bino byabuyabuya, po pene tukekala na nsangaji mivule, mutyima-ntenke, ne kuvudijija bakwetu nsangaji yabo.​—Bilongwa 20:35; Fidipai 1:3-5.

Mukimbi umo wa ku Iniveleshite ya Nebraska mu États-Unis pa kupwa kwifunda misunsa mivule pa mwanda utala bukomo bwa ngitu walembele amba, “Shi udi na nsangaji ne kuloelelwa būmi bobe bwa dyalelo, nabya ukekala na bukomo bwa ngitu buyampe mwenda mafuku.” Bine kino i kikwatañane na byobya binena Bible amba: “Mutyima wa nsangaji bo bwanga bulumbuluke.” (Nkindi 17:22) Bine, poenda uvudija nsangaji yobe, po pene ukekala na bukomo bwa ngitu buyampe.

Shi ke pano, nansha byotudi mu bitatyi bya makambakano, tubwanya kutamija nsangaji ya bine kadi ya endaenda potupebwa mushipiditu ujila kupityila ku milombelo, potwifunda ne kulangulukila pa Kinenwa kya Yehova. Kadi tuvudijanga nsangaji yetu na kuta mutyima ku madyese mavule otutengēle, kwiula lwitabijo lwa bantu bakwabo, ne kulonga kiswa-mutyima kya Leza. Shi tulonge uno muswelo, nabya tukakwatakanya bubine budi mu Ñimbo ya Mitōto 64:10, bwa amba: “Boloke bakaloelelwanga mudi Yehova, ne kukamukulupila.”

^ mus. 10 Ngikadila ya kutūkija mutyima ikesambilwapo mu kishinte kikwabo kya mu bino bishinte bisambila pa ngikadila ne ngikadila ya “bipa bya mushipiditu.”

^ mus. 20 Kadi pa kuyuka miswelo mikwabo ya mwa kuvudijija nsangaji, tala kapango “ Miswelo Mikwabo ya Kuvudija Nsangaji.”