‘Kyabuntu kyonso kiyampe ne kya kupānwa kyonso kibwaninine kitambanga kudi Tata.’YAKOBA 1:17.

ÑIMBO: 148, 109

1. Le i bintu’ka biyampe byotumwena mu kinkūlwa?

KITAPWA kya kinkūlwa kya Yesu Kidishitu i kilete madyese mavule. Kimfwa, mpangiko ya kinkūlwa i mishitule kibelo ku bana bonso ba Adama basenswe boloke bakekale mu kisaka kya Leza difuku kampanda. Kadi dyese dikwabo i dya kukekala nyeke na būmi bwa nsangaji. Ino kya mvubu mpata, kinkūlwa i kikwatañane na myanda ya mvubu mpata ku bonso badi mūlu ne pano panshi.Bahebelu 1:8, 9.

2. (a) Le i myanda’ka ya mvubu mpata mūlu ne pano panshi yātwejeje Yesu mu milombelo? (Tala kifwatulo ku ngalwilo.) (b) I bika byotusa kwisambila’po mu kino kishinte?

2 Kintu kya myaka ibidi kumeso kwa Yesu afwe, wāfundije bana bandi ba bwanga kulombela’mba: “Tata wetu wa mūlu, dijina dyobe dipandulwe. Bulopwe bobe bwiye. Kiswa-mutyima kyobe kilongeke, pamo na momwa mūlu, ne pano pa ntanda pene.” (Mateo 6:9, 10) Tubandaulei muswelo ukwatañene kinkūlwa na kupandulwa kwa dijina dya Yehova, kubikala kwa Bulopwe bwa Leza, ne kulongeka kwa kiswa-mutyima kya Leza.

 “DIJINA DYOBE DIPANDULWE”

3. Le dijina dya Yehova difunkilanga padi ani? Lelo Satana wāpunikile namani dijina dya Yehova?

3 Dibajinji bidi, Yesu wālombele amba dijina dya Yehova dipandulwe, nansha kwidimona bu dijila. Dijina dya Yehova ditelelwanga’nka Yehova mwine kete ne mwaikadile. I Muntu mukomo ne moloke kupita bonso mūlu ne panshi. Kadi Yesu wāmwityile bu “Tata ujila.” (Yoano 17:11) Yehova byadi ujila, o mwanda bintu byonso byalonga ne mbila yonso yatūdile’ko i bijila. Inoko mu Edena, Satana wātatene na budyumuku lupusa lwa Leza lwa kutūdila bantu misoñanya. Wābepele Yehova Leza bubela, wāpunika dijina dyandi ne kumufutulula.Ngalwilo 3:1-5.

4. Lelo Yesu wālombwele namani amba dijina dya Leza i dijila?

4 Kadi Yesu wādi usenwe na bubine dijina dya Yehova, ne kulonga bukomo bwandi bonso mwanda wa kwidipandula. (Yoano 17:25, 26) Muswelo’ka? Yesu kupityila ku mwiendelejo ne bufundiji bwandi, wākweshe bantu bakwabo bamone amba misoñanya ya Yehova i myoloke ne amba bintu byonso byaetulomba i pa mwanda wa kamweno ketu. (Tanga Ñimbo ya Mitōto 40:8-10.) Nansha Satana byaāmukolomwenine masusu ne lufu lusansa, Yesu wālamine kikōkeji. Wālombwele amba muntu mubwaninine ubwanya kukōkela Yehova ne pa mfulo.

5. I muswelo’ka otulombolanga’mba dijina dya Yehova i dijila?

5 I muswelo’ka otubwanya kulombola’mba tusenswe dijina dya Yehova? I kupityila ku mwiendelejo wetu. Yehova usakanga twikale bajila. (Tanga 1 Petelo 1:15, 16.) Kino kishintulula’mba tumutōtanga’nka aye ne kumukōkela na mutyima wetu onso. Nansha shi tubapangwapangwa, tuloñanga bukomo bwa kulonda byobya bitufundija Yehova. Shi twiendeja mungya misoñanya ya Yehova, nabya tutumbijanga dijina dyandi. (Mateo 5:14-16) Tulombolanga’mba bijila byandi i biyampe ne amba Satana Dyabola i mbepai. Byoketubwanininepo, o mwanda tulubanga. Ino shi tubaluba, twisāsei ne kulonga bukomo bwa kwepuka bintu bifutulwija dijina dya Yehova.Ñimbo ya Mitōto 79:9.

6. Mwanda waka Yehova ubwanya kwitumona bu boloke nansha byotudi ba kubulwa kubwaninina?

6 Twikale bashingwe māni nansha “mikōko mikwabo,” Yehova witulekelanga bubi bwetu shi tudi na lwitabijo mu kinkūlwa. Witabijanga boba bepāna kwadi bekale batōtyi bandi. Utelanga bene Kidishitu boloke bashingwe māni bu bandi bana ne “mikōko mikwabo” myoloke bu balunda nandi. (Yoano 10:16; Loma 5:1, 2; Yakoba 2:21-25) Nanshi, tamba’nka pano, kinkūlwa kitupanga mukenga wa kwikala mu kipwano kiyampe na Tata wetu ne kupandula dijina dyandi.

“BULOPWE BOBE BWIYE”

7. I madyese’ka aletelwe na kinkūlwa?

7 Mu milombelo ya kulondela’po, Yesu wānenene’mo amba: “Bulopwe bobe bwiye.” Le kinkūlwa i kikwatañane namani na Bulopwe bwa Leza? Bulopwe bwa Leza, nansha umbikalo wandi, i bubundwe na Yesu ne bantu 144 000 batongelwe mu bantu. Kinkūlwa i kilengeje bano bantu basangulwe ne kwenda mūlu. (Kusokwelwa 5:9, 10; 14:1) Bakekala balopwe ne babitobo bakaludika pa ntanda ponso na Yesu mu  bula bwa myaka kanunu. Mu bula bwa kino kitatyi, Yehova ukengidija Bulopwe mwanda wa kwalamuna ntanda ke paladisa ne kukwasha bantu bonso bakekale ke babwaninine. Ku mfulo bengidi ba Yehova ba mūlu ne ba pano pa ntanda bakekala kisaka kimo. (Kusokwelwa 5:13; 20:6) Yesu ukonakanya Satana ne kutalula’ko makambakano onso alengeje.Ngalwilo 3:15.

8. (a) Lelo Yesu wākweshe namani bandi bana ba bwanga bevwanije mvubu ya Bulopwe bwa Leza? (b) Le i muswelo’ka otukwatakanyanga Bulopwe dyalelo?

8 Yesu wākweshe bandi bana ba bwanga bevwanije mvubu ya Bulopwe bwa Leza. Namani? Aye upwa’tu kubatyijibwa, Yesu wāshilula kusapula “myanda miyampe ya Bulopwe bwa Leza” konso kwaādi wenda. (Luka 4:43) Kadi wālombwele bandi bana ba bwanga bekale batumoni bandi “ne kulakula kwine kwa ntanda.” (Bilongwa 1:6-8) Dyalelo, kupityila ku mwingilo wa kusapula Bulopwe, bantu badi na mukenga wa kwifunda myanda itala kinkūlwa ne kwikala babikalwa ba Bulopwe bwa Leza. Tulombolanga’mba twi babikalwa ba kikōkeji ba Bulopwe potukwasha’ko bashingwe māni na kusapula myanda miyampe ntanda yonso.Mateo 24:14; 25:40.

“KISWA-MUTYIMA KYOBE KILONGEKE”

9. Mwanda waka tubwanya kukulupila’mba Yehova ukafikidija mpango yandi pa bantu?

9 Lelo Yesu wādi usaka kunena bika paānenene monka amba: “Kiswa-mutyima kyobe kilongeke”? Shi Yehova walaya kintu, poso’nka kifikidile. (Isaya 55:11) Butomboki bwa Satana kebubwanyapo kukalakanya Yehova. Lelo Yehova wādi na kiswa-mutyima’ka kitala ino ntanda? Wādi usaka pa ntanda payule bana babwaninine ba ba Adama ne Eva. (Ngalwilo 1:28) Shi ba Adama ne Eva bāfwile pampikwa kubutula bana, longa mpango ya Leza ya kuyuja ntanda na babo bana keyadipo ya kufikidila. O mwanda Yehova wēbalekele babutule bana. Kinkūlwa i kipe bonso balombola lwitabijo mukenga wa kwikala na būmi bwa nyeke ne kwikala babwaninine. Yehova usenswe bantu kadi usakanga twikale na būmi bwa kutendelwa bwaādi witusakila.

10. Lelo bantu bafwe bakamwena namani mu kinkūlwa?

10 Le midiyo ne midiyo ya bantu bāfwile pampikwa kwikala na mukenga wa kuyuka Leza nabo le? Yehova usakanga bantu bekale bōmi. O mwanda ukaluja boba bafwile ku būmi. Kinkūlwa i kibape mukenga wa kujokela ku būmi. Kupwa bakabwanya kwifunda myanda ya Yehova ne kwikala’ko nyeke. (Bilongwa 24:15) Yehova i Nsulo ya būmi. Yehova pakajokeja boba bafwile ku būmi, ukekalanga Tata wabo. (Ñimbo ya Mitōto 36:9) Mu milombelo ya kulondela’po, Yesu wānenene’mo amba Yehova i “Tata wetu wa mūlu.” (Mateo 6:9) Yehova i mupe Yesu mwingilo wa mvubu wa kusangula bafwile. Yesu wānenene amba: “Ami ne lusangukilo ne būmi.”Yoano 6:40, 44; 11:25.

11. Lelo i kiswa-mutyima’ka kya Leza pa “kibumbo kikatampe”?

11 Kadi Yesu wānenene amba: “Yewa ense ulonga kiswa-mutyima kya Leza, yao ye mwanetu mwana-mulume, ye mwanetu mwana-mukaji, ye mama.” (Mako 3:35) Leza usaka bantu ba mu mizo yonso, bisaka ne ndimi bekale batōtyi bandi. I batelwe bu “kibumbo kikatampe kya bantu, kekikokejapo kubalwa na muntu nansha umo.” Badi na  lwitabijo mu kinkūlwa kadi basakanga kukōkela Leza. Bamutendelanga ne kunena’mba: “Lupandilo lwetu lutambanga kudi Leza wetu, ushikete pa lupona, ne kudi Kana ka Mukōko.”Kusokwelwa 7:9, 10.

12. I bika byotwifunda kupityila ku milombelo ya Yesu pa mwanda utala mpango ya Yehova itala bantu?

12 Tubefunde myanda mivule itala Yehova ne mpango yandi pa bantu kupityila ku milombelo ya kulondela’po ya Yesu. Kibajinji, tufwaninwe kulonga bukomo bwa kupandula dijina dya Yehova ne kumulēmeka. (Isaya 8:13) Kitapwa kya kinkūlwa kya Yesu, kyo kine kilengeje tukamone lupandilo, kadi kikalēmekeja ne dijina dya Leza. Na bubine dijina dine dya Yesu dishintulula’mba “Yehova I Lupandilo.” Kya bubidi, Yehova ukengidija Bulopwe bwandi pa kuletela bantu ba kikōkeji madyese onso a kinkūlwa. Ne kya busatu, tudi na kikulupiji kya amba i kutupu kintu nansha kimo kibwanya kukalakanya kiswa-mutyima kya Yehova kileke kulongeka.Ñimbo ya Mitōto 135:6; Isaya 46:9, 10.

LOMBOLA’MBA UFWIJANGA’KO YEHOVA PA KINKŪLWA

13. Mwanda waka tubatyijibwanga?

13 Muswelo muyampe wa kufwija’ko pa kinkūlwa i wa kupāna būmi bwetu kudi Yehova ne kubatyijibwa. Shi tulonge namino, nabya tubalombola’mba tudi na lwitabijo mu kinkūlwa ne amba “twi bantu ba Yehova.” (Loma 14:8) Shi tubabatyijibwa, twikalanga tulomba Yehova etupe “mutyima wa mundamunda muyampe.” (1 Petelo 3:21) Yehova witulondololanga na kwitupa bya buyabuya bitamba ku kinkūlwa. Kadi tudi na  kikulupiji kyonso amba uketupa byonso bya nyeke byaetulaile.Loma 8:32.

Le tulombolanga namani amba tufwijanga’ko pangala pa kinkūlwa? (Tala musango 13, 14)

14. Mwanda waka Yehova witusoñanyanga tusanswe bantu bakwabo?

14 Bintu byonso bilonga Yehova wibiloñanga na buswe. Byasaka i batōtyi bandi bamwiule ne kwisanswa abo bene na bene. (1 Yoano 4:8-11) Shi tusenswe bantu, nabya tubalombola patōka’mba tusakanga kwikala “bana ba [Tata] udi mūlu.” (Mateo 5:43-48) Mbila ibidi mikatampe i ino: Imbajinji, i kusanswa Yehova, ne ya bubidi, kusanswa bakwabo. (Mateo 22:37-40) Muswelo umo bidi otulombolanga’mo buswe ku bantu i wa kwibafundija myanda miyampe ya Bulopwe bwa Leza. Shi tukōkela mbila ya Yehova ya kusanswa bakwabo, nakampata banabetu, nabya buswe botumuswele nabo “bubafikijibwa ku bubwaninine.”1 Yoano 4:12, 20.

YEHOVA WITWESELANGA KUPITYILA KU KINKŪLWA

15. (a) Lelo i madyese’ka etupa Yehova dyalelo? (b) Le i madyese’ka otukatambula mu mafuku āya kumeso?

15 Yehova witukulupija’mba byotudi na lwitabijo mu kinkūlwa, bubi bwetu i “bujimankanibwe.” Ubwanya kwitulekela bubi bwetu lonso. (Tanga Bilongwa 3:19-21.) Monka motwekimwenanga ku ngalwilo, kinkūlwa i kilengeje Yehova atonge bantu bamo bekale bu bandi bana momwa mūlu. Ke bashingwe māni kadi. (Loma 8:15-17) Witanga boba ba mu “mikōko mikwabo” belunge ku kisaka kyandi kya pano pa ntanda. Pobakekala babwaninine, kukekala ditompo dya mfulo. Shi bakalamate kudi Yehova, nabya ukebekadija nabo bu bandi bana. (Loma 8:20, 21; Kusokwelwa 20:7-9) Yehova ukasanswa nyeke bandi bana bonso. Kinkūlwa kikendelela na kwituletela madyese a nyeke. (Bahebelu 9:12) Yehova i mwitupe kino kyabuntu kilēme, kadi i kutupu muntu nansha umo ubwanya kwitusompola’kyo.

16. Lelo kinkūlwa i kitukwashe namani tunyongololwe?

16 Shi tubesāsa bubi bwetu, nabya kekukidipo kintu nansha kimo kibwanya kulonga Dyabola mwanda wa kuketukalakanya tuleke kwikala mu kisaka kya Yehova. Yesu wāfwile “dimo kupwididile.” Kinkūlwa i kifutwe lonso. (Bahebelu 9:24-26) Adama wētupyanikile lufu, inoko kitapwa kya Yesu kiketuletela būmi bwa nyeke. Kinkūlwa i kitunyongolole mu ntanda ya Satana ne ku moyo wa kutyina lufu.Bahebelu 2:14, 15.

17. Le buswe bwa Yehova bushintulula bika kodi?

17 Milao ya Leza ifikidilanga nyeke. Monka kemushintyilangapo bijila bya Yehova bya mu bupangi, mo monka ne kiswa-mutyima kya Yehova nakyo kekikashintapo nansha dimo. Kaketutyumunapo mutyima nansha dimo. (Malaki 3:6) Kutentekela pa kyabuntu kya būmi, Yehova i mwitupe kadi ne bintu bikwabo bivule. I mwitupe buswe. “Tubayuka ne kwitabija buswe bwitusenswe Leza. Leza i buswe.” (1 Yoano 4:16) Milao yandi ifikidilanga nyeke. Panopano ponka, ntanda isa kwikala ke paladisa ya buya bwa dyangi. Bantu bonso bakeula Yehova ne kwisanswa abo bene na bene. Kupwa bengidi bandi bonso ba mūlu ne ba pano panshi bakanena’mba: “Dyese ne ntumbo ne tunangu ne kufwija’ko ne bulēme ne bukomo ne buninge bipebwe Leza wetu nyeke ne nyekeke. Amena.”Kusokwelwa 7:12.