MU MAFUKU 26 Kweji 3, 1937, bañenda babidi abataluka bityebitye na motoka wabo kebenda ku Sydney, mu Ostrali. Tamba kasha batamba mu kibundi ku ngalwilo kwa mwaka, baendele lwendo lwa makilometele 19 300 ne musubu bapita mu bifuko bya ntanda bidi kunja bininge kadi bya mabwe. Bano bantu kebadipo benda kukananga nansha kukakimba bya kusokola. Arthur Willis ne Bill Newlands badi’tu bapania babidi bapyasakane basumininwe kukasapula myanda miyampe ya Bulopwe bwa Leza ku bibundi bivule bya kunja bya mu Ostrali.

Mu myaka ya 1920, kakisumpi katyetye ka Befundi ba Bible * ba mu Ostrali badi ke basapule bininge mu bibundi bikata ne bityetye bya ku kubwipi na mema. Ku kifuko kya kulampe na mema kwikalanga bantu batyetye, kadi i kikatampe kupita ne kipindi kya États-Unis. Inoko banabetu, badi bayukile na kusumininwa amba balondi ba Yesu badi ba kusapula bukamoni bwandi “ne kulakula kwine kwa ntanda,” kubadila’mo ne bifuko bya kunja bya mu Ostrali. (Bilongwa 1:8) Ino i muswelo’ka obadi ba kubwanya uno mwingilo mukatampe? Byobadi bakulupile amba Yehova ukebesela pa bukomo bobalonga, o mwanda basumininwe kulonga kyokya kitabukile kunengela.

BAPANIA ABASHILULA BUSAPUDI

Mu 1929, bipwilo bya mu Queensland ne mu Western, mu Ostrali byelamije’ko myotoka mwanda wa kukafika ku kifuko kya kulampe na mema. Myotoka yadi yendejibwa na bapania bakomo badi babwanya kupita nayo ne pa bifuko ponekele dishinda ne kwiilongolola shi ibaonekana. Bano bapania bafikile ku bifuko bivule kwadi kekwasapwilwe kashā.

Bapania kebadipo na myotoka badi benda’ko lwa makinga. Kimfwa, mu 1932, Bennett Brickell paadi na myaka 23 watambile ku Rockhampton, mu Queensland, waenda lwendo lwa myeji itano wenda usapula mu bibundi bya mufula bya kungala kwa ntanda’ya. Ku nkinga yandi wadi usela’ko bulangetyi, bisandi, bidibwa ne mabuku mavule. Shi nkinga yandi ibaoneka, wadi wiitantanya, koku ukulupile amba Yehova ukamulama. Watantenye nkinga yandi kintu kya makilometele 320 upita mu bifuko mwadi mufwa bantu kyumwa pa kala. Mu bula bwa myaka 30 ne kupita, Tutu Brickell waendele makilometele tununu tutwa na tutwa mu Ostrali lwa  nkinga, tukutuku ne motoka. Washilwile mwingilo wa kusapula ku bene kibundi ne kukwasha ku kubundwa kwa bipwilo bipya, wayukene bininge ne kulēmekwa mu bibundi bya kunja.

KUNEKENYA BIKOLEJA

Ostrali ye ntanta idi na bifuko bityetye bidi’mo bantu pano pa ntanda, nakampata ku bifuko bya kunja. O mwanda bantu ba Yehova i basumininwe kukimba bantu mufula mwa ino kontina.

Stuart Keltie ne William Torrington i bapania balombwele kininga kya uno muswelo. Mu 1933, batyibulula mu Dilungu dya Simpson, dilungu dikatampe didi’mo mutyanga muvule, mwanda wa kukasapula mu kibundi kikatampe kya Alice Springs, pabukata bwa kontina. Paonekele kamotoka kabo bekashile, Tutu Keltie—wadi mulemane kulu—waendelele na kusapula, inoko pano wadi wenda na ngamedia! Bukomo bwalongele bano bapania bwalupwile bipa biyampe pobetene na muntu wadi na hotela ku ngala ya kudiye mu William Creek, kibundi kya mufula. Charles Bernhardt, mwinē hotela’ya, waitabije bubine mwenda mafuku, wapoteja hotela yandi, ne kwingila bupania kasuku kandi mu bula bwa myaka 15 mu bifuko bya ku ntanda kadi bya kulampe bya mu Ostrali.

Arthur Willis weteakanya kwenda kukasapula ku bibundi bivule bya mu Ostrali bidi mufula.—Perth, Kupona kwa Ostrali, mu 1936

Na bubine bapania babajinji badi basakilwa bukankamane ne kininga pa kunekenya makambakano mavule obatenwe nao. Pobadi basapula mu bibundi bya mufula bya mu Ostrali, ba Arthur Willis ne Bill Newlands, batelelwe mu ntwelelo, mu lwendo lumo, baendele makilometele 32 mu bula bwa mayenga abidi pa mwanda wa mvula mukatampe wanokele walengeja mu dilungu mwikale mema ne bitoto. Kyaba kikwabo, badi baputuma mu dyuba mobadi batonona motoka mu mutyanga, bapita mu misanza ne mu byalo bya minonga ya mabwe. Kitatyi kivule kyadi kibonekela motoka, badi benda mafuku mavule lwa panshi nansha na nkinga ku kibundi kya kubwipi ne kukungila kintu kya mayenga pa kusaka’mba bapote byuma bya kupingakanya pa byonekele. Nansha byobadi batanwa na ano makambakano, ino abo balamine mumweno wabo muyampe. Arthur Willis, pa kwisambila pa myanda yadi mu dipepala dya L’Âge d’or, wanenene mwenda mafuku amba: “I kutupu dishinda dibi bininge kadi dilampe bininge ku Batumoni ba Yehova.”

Charles Harris kemwingile bupania kitatyi kilampe ushintulula’mba kwikala kwa bunka ne makambakano a ku ngitu adi amutana ku bibundi bya mufula, na bubine byamufwenyenye kudi Yehova. Ubweja’ko amba: “I biyampe mpata kwikala na būmi bupēla. Shi Yesu wāitabije kulāla panja ponso pobyādi bimulomba kulāla’po, nanshi netu tufwaninwe kwitabija na nsangaji kulonga uno muswelo shi mwingilo wetu witulomba kulonga namino.” Ye mwalongele ne bapania bavule. Twibafwija’ko, mwanda kupityila ku bukomo bwabo bwa kininga, myanda miyampe i misambakane mu kontina yonso, kadi ikwashanga bantu bavule balamate ku Bulopwe bwa Leza.

^ mus. 4 Befundi ba Bible baselele dijina dya bu Batumoni ba Yehova mu 1931.Isaya 43:10.