Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Lelo I Ani Wendeja Bantu ba Leza Dyalelo?

Lelo I Ani Wendeja Bantu ba Leza Dyalelo?

“Vulukai boba bemutangidile kumeso.”BAHEBELU 13:7.

ÑIMBO: 125, 43

1, 2. Pāendele Yesu mūlu, lelo batumibwa ye bano bēipangwile bika?

BATUMIBWA ba Yesu bādi pa Lūlu lwa Impafu batala Mfumwabo ne mulunda nabo Yesu paselelwa mūlu ne kuputwa na makumbi. (Bilongwa 1:9, 10) Mu bula bwa myaka ibidi, Yesu wādi wibafundija, wibakankamika ne kwibendeja. Pano waenda. Le basa kulonga bika?

2 Kumeso kwa Yesu kwenda mūlu, wāsapwidile balondi bandi amba: “Mukekala bami batumoni mu Yelusalema, monsomonso mu Yudea ne mu Samadia, ne kulakula kwine kwa ntanda.” (Bilongwa 1:8) Le bādi ba kubwanya namani uno mwingilo? Yesu wēbalaile amba mushipiditu ujila ukebakwasha. (Bilongwa 1:5) Ino le i ani wadi wa kwibendeja ne kulongolola mwingilo wa busapudi ntanda yonso? Batumibwa bādi bayukile amba Yehova wāingidije bantu mwanda wa kwendeja bene Isalela pa kala. O mwanda nanshi bādi padi beipangula shi Yehova usa kutonga mwendeji mukwabo.

3. (a) Yesu pa kupwa kwenda mūlu, i butyibi’ka bwa kamweno bwākwete batumibwa ba kikōkeji? (b) I bipangujo’ka bisa kulondololwa mu kino kishinte?

 3 Yesu pa kupwa’tu kwenda mūlu, bandi bana ba bwanga bābandawile Bisonekwa, bālomba Leza ebakwashe kupwa bātonga Matyiasa mwanda wa kupingakana Yudasa Isakadiota bu mutumibwa wa 12. (Bilongwa 1:15-26) Mwanda waka kutonga uno muntu kwādi na kamweno kobadi ne kudi Yehova? Bana ba bwanga bāmwene amba batumibwa bafwaninwe kwikala 12. * (Tala kunshi kwa dyani.) Yesu wātongele batumibwa ne kwibateakanya ku mwingilo wa mvubu mpata mu bantu ba Leza. Le wādi mwingilo’ka, ne le Yehova ne Yesu bēbateakenye namani ku uno mwingilo? Le i mpangiko’ka iifwene na ino idi’ko dyalelo? Ne i muswelo’ka otubwanya ‘kuvuluka boba betutangidile kumeso,’ nakampata “umpika mukōkele ne mudyumuke”?—Bahebelu 13:7; Mateo 24:45.

YESU WENDEJANGA KITANGO KYENDEJI

4. I mwingilo’ka wādi na batumibwa ne bakulumpe bakwabo ba mu Yelusalema?

4 Batumibwa bāshilwile kutangidila kipwilo kya bene Kidishitu mu Pentekosa wa mu mwaka wa 33. Bible unena’mba “Petelo waimana pamo ne boba dikumi ne umo” kebafundisha kibumbo bubine bupāna būmi. (Bilongwa 2:14, 15) Bavule mu kino kibumbo bāikele ke bene Kidishitu. Kadi, bano bene Kidishitu bapya “badi batakamene nyeke mu lufundijo lwa batumibwa.” (Bilongwa 2:42) Batumibwa bādi na kiselwa kya kulama lupeto lwa kipwilo. (Bilongwa 4:34, 35) Kadi bāfundishe bantu ba Leza ne kulombela pobadi, kebanena’mba: “batwe twipāne mu milombelo ne mu mwingilo wa kufundija mwanda.” (Bilongwa 6:4) Kadi bātumine bene Kidishitu ba bwino ku kasapula mu myaba mipya. (Bilongwa 8:14, 15) Mwenda mafuku, bakulumpe bakwabo bashingwa māni belunga na batumibwa mu mwingilo wa kutangidila kipwilo. Byobādi bu kitango kyendeji, bādi batumina bipwilo byonso bulombodi.Bilongwa 15:2.

5, 6. (a) Le mushipiditu ujila wāpele kitango kyendeji bukomo muswelo’ka? (Tala kifwatulo ku ngalwilo.) (b) Le bamwikeulu bākweshe namani kitango kyendeji? (c) Le Kinenwa kya Leza kyāludikile namani kitango kyendeji?

5 Bene Kidishitu ba mu myaka katwa kabajinji bādi bayukile amba Yehova ye wendeja kitango kyendeji kupityila kudi Yesu. Bāyukīle ku bika? Kibajinji, mushipiditu ujila wādi upa kitango kyendeji bukomo. (Yoano 16:13) Bashingwe māni bonso bātambwile mushipiditu ujila, ino mushipiditu wāpele batumibwa ne bakulumpe ba mu Yelusalema bukomo bwa kuvuija mwingilo wabo wa bu batadi. Kimfwa, mu mwaka wa 49, mushipiditu ujila wāludikile kitango kyendeji mwanda wa kukwata butyibi butala pa kutwejibwa kwisao. Bipwilo byālondele buno bulombodi. Mfulo mfulō, “bipwilo byadi bininga mu lwitabijo ne kwivudija difuku ne difuku.” (Bilongwa 16:4, 5) Kupityila ku mukanda wātuminwe bipwilo pa mwanda utala kutwela kwisao, tubwanya kumona’mba kitango kyendeji kyādi na mushipiditu wa Leza kadi kyālombwele ngikadilo pamo bwa buswe ne lwitabijo.Bilongwa 15:11, 25-29; Ngalatea 5:22, 23.

6 Kya bubidi, bamwikeulu bākweshe kitango kyendeji. Kimfwa, mwikeulu wāsapwidile Konilusa akemone na mutumibwa Petelo. Petelo pa kupwa kusapwila Konilusa ne babutule bandi, bātambula mushipiditu ujila, nansha byobādi bampikwa kutwejibwa kwisao. Konilusa ye  mubajinji kwikala mwine Kidishitu mu Bajentaila bampikwa kutwejibwa kwisao. Batumibwa ne banabetu bakwabo pobāivwene uno mwanda, bāitabija kiswa-mutyima kya Leza ne kutambula Bajentaila bampikwa kutwejibwa kwisao mu kipwilo kya bene Kidishitu. (Bilongwa 11:13-18) Pa kino, tubamone amba bamwikeulu bākwatakenye bya binebine mwingilo wa busapudi wādi utalwa na kitango kyendeji. (Bilongwa 5:19, 20) Kya busatu, Kinenwa kya Leza kyāludikile kitango kyendeji. Bano bana-balume bādi bengidija Bisonekwa mwanda wa bibakwashe bakwate butyibi bwa mvubu butala nkulupilo ya bene Kidishitu ne mwanda wa kuludika bipwilo.Bilongwa 1:20-22; 15:15-20.

7. Mwanda waka tunena’mba Yesu ye wādi wendeja bene Kidishitu babajinji?

7 Nansha kitango kyendeji byokyādi na lupusa mu kipwilo, inoko bonso bādi’mo bādi bevwanije amba Yesu Kidishitu ye Mwendeji wabo. Le tubekiyuka namani? Mutumibwa Polo wānenene amba Kidishitu ye wātongele “bamo bu batumibwa.” Wānenene kadi amba Kidishitu ye “mutwe,” nansha Mwendeji wa kipwilo. (Efisesa 4:11, 15) Pa kyaba kya kwiyukanya abo bene bu batumibwa, ino bana ba bwanga bātelelwe “na buludiki bwa Leza bu bene Kidishitu.” (Bilongwa 11:26) Polo wājingulwile amba i kya kamweno kulonda bufundiji bwimanine pa Bible bwa batumibwa ne bana-balume bakwabo bādi batangidile kumeso. Nansha nabya, Polo wānenene amba: “Ino nsaka muyuke amba mutwe wa mwana-mulume ense i Kidishitu.” Bino binenwa byādi bitala ne bonso ba mu kitango kyendeji. Kupwa Polo wābweja’ko amba: “Mutwe wa Kidishitu i Leza.” (1 Kodinda 11:2, 3) Kibamweka patōka’mba, Yehova wātongele wandi Mwana, Kidishitu Yesu mwanda wa kwendeja kipwilo.

“UNO MWINGILO KE WA MUNTUPO”

8, 9. Le i mwingilo’ka wa mvubu waingile Tutu Russell?

8 Kushilwila mu 1870, Charles Taze Russell ne bapwani nandi bashilwile kutōta Leza kukwatañana na Bible ne kukwasha bakwabo nabo bamutōte uno muswelo. Muno mubadilwa ne kukwasha bantu besamba ndimi palapala. O mwanda Zion’s Watch Tower Tract Society wāyukene mungya bijila mu 1884, ne Tutu Russell waikala bu mwendeji. * (Tala kunshi kwa dyani.) Wefundile Bible na katentekeji kadi kadipo na moyo wa kusapwila bantu bakwabo amba bufundiji bwa bipwilo kimfwa Busatu Busantu ne bufundiji bwa amba muya keufungapo kebudipo mu Bible. Wefundile amba kujoka kwa Kidishitu kukekala kwampikwa kumweka ne amba “bitatyi bitungwe bya mizo” byadi bya kufula mu 1914. (Luka 21:24) Tutu Russell waingidije kitatyi kyandi, bukomo, ne lupeto lwandi mwanda wa kufundija bantu bakwabo buno bubine. Kibamweka patōka’mba Yehova ne Yesu baingidije Tutu Russell ekale mwendeji mu kino kitatyi kya mvubu mu mānga.

9 Tutu Russell kadipo usaka bantu bamumone bu muntu wa pa bula. Mu 1896, walembele amba aye ne bana-balume bakwabo badi batangidile kumeso kebadipo basaka kutumbijibwa. Kebadipo basaka kwityilwa pa bitenta bya pa bula nansha kisumpi kampanda kityilwe pa dijina dyabo. Wanenene mwenda mafuku amba: “Uno mwingilo ke wa muntupo.”

10. (a) Lelo Yesu Kidishitu watongele “umpika mukōkele ne mudyumuke” kitatyi’ka? (b) Shintulula mobyamwekele patōka’mba Kitango Kyendeji i kishile na Watch Tower Society.

10 Mu 1919, myaka isatu pa kupwa kufwa kwa Tutu Russell, Yesu watonga “umpika mukōkele ne mudyumuke.” Na  kitungo’ka? Mwanda wa kupa balondi bandi “byakudya byabo pa kitatyi kifwaninwe.” (Mateo 24:45) Enka ne mu bula bwa ino myaka mine, kisumpi kityetye kya batutu bashingwe māni ku kité kya mu Brooklyn, New York, kyadi kipa balondi ba Yesu byakudya bya ku mushipiditu. Bishima “kitango kyendeji” byashilwile kulembwa mu mabuku etu pa kupwa kwa mwaka 1940. Mu kino kitatyi, bendeji ba Watch Tower Bible and Tract Society ye bonka badi bu kitango kyendeji. Inoko, mu 1971, kyamwekele patōka’mba Kitango Kyendeji i kishile na Watch Tower Society, mine yadi itala’nka myanda ya bijila kete. Tamba mu kino kitatyi, batutu bashingwe māni kebadipo mu Sosiete ya batangidiji bashilula kutwejibwa mu Kitango Kyendeji. Kitatyi kityetye’tu pa kupita’po, batutu babadilwa mu “mikōko mikwabo” badi batangidile kumeso bashilula kwingila bu batangidiji ba ino Sosiete ne masosiete makwabo adi engidijibwa na bantu ba Leza. Penepa, Kitango Kyendeji kyata mutyima ku kuleta bufundiji bwa mu Bible ne bwendeji. (Yoano 10:16; Bilongwa 6:4) Kiteba kya Mulami kya 15 Kweji 7, 2013, kyashintulwile amba “umpika mukōkele ne mudyumuke” i kisumpi kityetye kya batutu bashingwe māni kine kibundile Kitango Kyendeji.

Kitango Kyendeji, mu myaka ya 1950

11. Lelo Kitango Kyendeji kikwatanga butyibi muswelo’ka?

11 Kitango Kyendeji kikwatanga butyibi bwa mvubu mpata petana yenga ne yenga boba bekibundile. Kwitana uno muswelo kwibakwashanga bekale kwisambila pamo ne kushala mu bumo. (Nkindi 20:18) I kutupu nansha umo wa mu Kitango Kyendeji upityile bakwabo mvubu, o mwanda mwaka ne mwaka batutu beshintanga mwanda wa kwimanina malenyo abo a mīsambo. (1 Petelo 5:1) Ye mobikadile ne mu makomite asamba a Kitango Kyendeji. I kutupu muntu mu Kitango Kyendeji wimonanga bu mwendeji wa bakwabo. Umo ne umo mobadi i wa mu njibo kadi utambulanga bidibwa bya ku mushipiditu bitamba kudi umpika mukōkele ne kulonda bwendeji bwandi.

Tamba umpika mukōkele utongwa mu 1919, uteakenyanga bantu ba Leza bidibwa bya ku mushipiditu (Tala musango 10, 11)

“NA BUBINE, LE UMPIKA MUKŌKELE NE MUDYUMUKE I ANI LE?”

12. Le i bipangujo’ka byotusa kulondolola?

12 Kitango Kyendeji kekipebwangapo bimonwa kadi ke kibwanininepo. Babwanya’nka ne kulonga bilubo pobashintulula Bible ne kwendeja bulongolodi. Kimfwa, mu kitabo Index des publications des Témoins de Jéhovah mudi mutwe wa mwanda, “Compréhensions affinées,” mo mutanwa mulongo wa myanda ijadikilwe mu mwivwanino wetu wa Bible tamba mu 1870. Yesu kānenenepo amba umpika wandi mukōkele ukekala uleta bidibwa bya ku mushipiditu bibwaninine. Pene’pa tukalondolola namani kipangujo kya Yesu kya amba: “Na bubine, le umpika mukōkele ne mudyumuke i ani le?” (Mateo 24:45) Le i bubinga’ka bulombola’mba Kitango Kyendeji ye umpika mukōkele? Tubandaulei enka bintu bisatu byotwamonanga byākweshe kitango kyendeji mu mafuku a batumibwa.

13. Lelo mushipiditu ujila i mukwashe namani Kitango Kyendeji?

13 Mushipiditu ujila ukwashanga Kitango Kyendeji. Mushipiditu ujila i mukwashe Kitango Kyendeji kivwanije bubine bwa mu Bible bokebadipo bevwanije mafuku kunyuma. Kimfwa, tala mulongo otwatelanga wa myanda ya mwivwanino mujadikwe. I kutupu muntu wadi wa kwiivwanina aye mwine “bintu bya mushike bya Leza!” (Tanga 1 Kodinda 2:10.) Kitango Kyendeji kiivwananga pamo bwa mutumibwa Polo, wālembele amba: “Bino bintu’bi kadi tunenanga’byo, ke na binenwapo bya kufundijibwa na tunangu twa bantu, aa, ino i na byobya bya kufundijibwa  na mushipiditu.” (1 Kodinda 2:13) Pa kupwa kwa myaka tutwa na tutwa twa bufundiji bwa bubela, pampikwa bulombodi bupotoloke, le byabwanikile namani kwivwanija kwa Bible kwendelele uno muswelo tamba 1919? Bubinga i buno amba mushipiditu wandi ujila wa Leza o wadi ukwasha!

14. Mungya Kusokwelwa 14:6, 7, le bamwikeulu bakwashanga namani Kitango Kyendeji ne bantu ba Leza dyalelo?

14 Bamwikeulu bakwashanga Kitango Kyendeji. Kitango Kyendeji kidi na kiselwa kikatampe kya kwendeja mwingilo wa busapudi ntanda yonso wingilwa na basapudi midiyo mwānda ne kupita. Mwanda waka i mubwanike? Bubinga bumo bidi i mwanda ukwatakanibwanga na bamwikeulu. (Tanga Kusokwelwa 14:6, 7.) Kudi bimfwa bivule bya basapudi baludikilwe na bamwikeulu ku bantu badi’tu bakitamba mu kulomba Leza * (Tala kunshi kwa dyani.) Mwingilo wa kusapula ne kufundija wendelelanga kumeso nansha byokudi lwana lukomo. Kino nakyo i kibwanike’nka na bukwashi bwa bamwikeulu.

15. Lelo Kitango Kyendeji i kishile namani na bendeji ba kine Kidishitu? Leta kimfwa.

15 Kinenwa kya Leza kiludikanga Kitango Kyendeji. (Tanga Yoano 17:17.) Tala byalongekele mu 1973. Kiteba kya Mulami kya 1 Kweji 6 kyaipangwile shi “bantu kebalekele kibidiji kya kutoma mfwanka babwenye bisakibwa bya kubatyijibwa.” Kyalondolwele amba kebabwenyepo, ne ano malondololo adi emanine  pa misoñanya ya mu Bible! Kiteba kya Mulami kyatelele bisonekwa palapala ne kushintulula kine kifwaninwe kupangilwa muntu upela kuleka kutoma mfwanka. (1 Kodinda 5:7; 2 Kodinda 7:1) Kyanenene amba uno musoñanya musumininwe keutambilepo ku bantu ino i mutambe kudi “Leza, mwine ulombwele milangwe yandi kupityila ku Kinenwa kyandi kisonekwe.” Kekudipo bulongolodi bukwabo bwa bipwilo bukulupile ne pa mfulo mu Kinenwa kya Leza nansha shi bamo mu kipwilo bamona’mba i bikomo. Dibuku dyalupwilwe panopano mu États-Unis dīsambila pa bipwilo dinena’mba: “Bendeji ba kine Kidishitu bashintanga kyaba kyonso bufundiji bwabo mwanda wa bukwatañane na byobya bikulupile bantu bavule ne byobalanga mwanda wa bantu betabile mu bipwilo byabo.” Inoko Kitango Kyendeji kekiludikwangapo na byobya bisaka bantu bavule. Ino, boba babundile’kyo baludikwanga na Kinenwa kya Leza, kine kibingija’mba Yehova ye aye na bubine uludika bantu bandi dyalelo.

“VULUKAI BOBA BEMUTANGIDILE KUMESO”

16. Le i muswelo’ka umo wa kuvuluka Kitango Kyendeji?

16 Tanga Bahebelu 13:7. Bible witunena ‘kuvuluka boba betutangidile kumeso.’ Muswelo umo bidi i wa kutela Kitango Kyendeji mu milombelo yetu. (Efisesa 6:18) Kidi na mingilo mivule, mubadilwa ne kupāna bidibwa bya ku mushipiditu, kuludika mwingilo wa busapudi wa ntanda yonso ne kutala byabuntu bitūlwa mu bulongolodi. O mwanda tufwaninwe kwibatela kyaba ne kyaba mu milombelo!

17, 18. (a) Le i muswelo’ka otulondanga bwendeji bwa Kitango Kyendeji? (b) Potusapula, le tukwatakanyanga namani Kitango Kyendeji ne Yesu?

17 Kadi tubwanya kuvuluka Kitango Kyendeji na kulonda bulombodi ne bwendeji bwakyo. Kitango Kyendeji kitwendejanga kupityila ku mabuku, kupwila ne ku bitango bikatampe ne bityetye. Kadi kitoñanga batadi ba bipindi, nabo batonga bakulumpe. Shi batadi ba bipindi ne bakulumpe balonda bulombodi bobapebwa, nabya balombolanga’mba bavulukanga Kitango Kyendeji. Kadi batwe bonso tukalombola’mba tulēmekele Mwendeji wetu Yesu na kukōkela bana-balume baingidija dyalelo.Bahebelu 13:17.

18 Muswelo mukwabo wa kuvuluka Kitango Kyendeji i wa kusapula na bukomo bwetu bonso. Bahebelu 13:7 usoñanya bene Kidishitu beule lwitabijo lwa boba batangidile kumeso. Kitango Kyendeji kimwekejanga lwitabijo lukomo na kusapula na bupyasakane ne kwendeja kumeso myanda miyampe. Lelo tukwatakanyanga bano batutu mu uno mwingilo wa mvubu? Shi twibakwatakanyanga, nabya tukevwana nsangaji paketunena Yesu amba: “Monka momwalongēle’byo umo wa mu batyetyetyetye wa mu bano banabetu, i amiwa omwalongēle’byo.”Mateo 25:34-40.

19. Mwanda waka wi musumininwe kulonda Yesu, Mwendeji wetu?

19 Yesu pa kujokela mūlu, kāelelepo balondi bandi. (Mateo 28:20) Wādi uyukile amba mushipiditu ujila, bamwikeulu ne Kinenwa kya Leza byāmukweshe ebatangidile paādi pano panshi. Byo byonka byakwasha nabyo ne umpika mukōkele dyalelo. Kitango Kyendeji kyendelelanga na kulonda Yesu, “Kana ka Mukōko konso kwaenda.” (Kusokwelwa 14:4) Nanshi shi tulonda bwendeji bwa Kitango Kyendeji, nabya tulondanga Mwendeji wetu Yesu. Panopano ponka, usa kwituludikila ku būmi bwa nyeke. (Kusokwelwa 7:14-17) Kadi i kutupu muntu nansha umo ubwanya kulaya namino!

^ mus. 3 Kibamweka amba Yehova wādi usaka batumibwa bekale 12 mwanda wa kubunda “mabwe a kyalwilo dikumi ne abidi” a Yelusalema mupya. (Kusokwelwa 21:14) O mwanda kekwādipo kusakilwa wa kupingakana bano batumibwa ba kikōkeji bāfwile mwenda mafuku.

^ mus. 8 Tamba mu 1955, ino sosiete yayukene bu Watch Tower Bible and Tract Society of Pennsylvania.

^ mus. 14 Tala ‘ Rends pleinement témoignage au sujet du Royaume de Dieu ’, paje 58-59.