Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Kilongwa kya Kanye ka Bwine Kidishitu

Kilongwa kya Kanye ka Bwine Kidishitu

MU kibundi kimo kityetye kya mu Gujerat, mu India, Shandya John wabatyijibwe bu Kamoni wa Yehova ku mfulo kwa myaka ya 1950. Inoko John, bamwanabo batano bana-balume ne bana-bakaji, ne inandi badi bene Katolika Loma, kadi badi basenswe myanda ya kipwilo. Pa kino, badi balwa shandi pa mwanda wa lwitabijo lwandi.

Difuku dimo, shandya John wamutuma kukapa tutu umo wa mu kipwilo mukanda. Inoko enka mu lwine lubanga’lwa, John wetapile ku munwe paadi ufungula kinkopo. Nansha nankyo, wakōkele shandi, wekuta kakisasa pa kilonda’pa ne kwenda kukatūla mukanda.

John pa kufika kobamutumine, wapa mukaja tutu’wa mukanda. Wadi Kamoni wa Yehova. Aye pa kumona kilonda ku munwe wa John, wamunena amukwashe. Watambija bisokonto bya malawa, wamukenda pa kilonda, ne kumukuta’po bandaje. Kupwa watekela John tyai. Kitatyi kyonso kyobalongele nandi, wadi wisamba nandi bya bulunda myanda ya mu Bible.

Kupityila ku kino kilongwa kya kanye kyamulongelwe, John waanza kushinta mumweno wandi pa Batumoni. Kupwa wamwipangula bipangujo bibidi bitala nkulupilo ya Batumoni ba Yehova mishile na ya Kipwilo kya Katolika. Wamwipangwile shi Yesu ye enka Leza ne shi bene Kidishitu bafwaninwe kulombela kudi Madia. Kaka’wa byaefundile ludimi lwa Gujarati, o mwanda wabwenye kulondolola John mu luno lwandi ludimi. Wamulondolwele kupityila ku Bible ne kumupa kabuku “Myanda Miyampe ya Bulopwe.”

John pa kupwa kutanga kano kabuku, wajingulwile amba byaadi utanga’bya bo bubine. Waenda kudi mumpe wa kyabo kipwilo ne kumwipangula enka bipangujo bibidi’bya. Mumpe waloba ne kumwasa Bible, kamufunina’mba: “Abe Satana! Nombole mu Bible palembelwe amba Yesu ke Lezapo. Nombole panena’mba ketufwaninwepo kutōta Madia. Nondolole!” Byalongele mumpe’wa byasense John mpanta. Wasapwila mumpe’mba natambe lonso mu kipwilo kya Katolika. Ne ye mwaalongele!

John waanza kwifunda Bible na Batumoni, waitabija bubine ne kushilula kwingidila Yehova. Mafuku pa kupita’po, bantu bavule ba mu kyabo kisaka nabo balonga uno muswelo. Pano ke padi myaka 60, mukovu udi ku munwe wa John ukimuvulujanga kilongwa kya kanye ka bwine Kidishitu, kine kyamutonwene engidile Yehova mu būmi bwandi.​—2 Kodinda 6:4, 6.