Lelo mu Bijila bya Mosesa mwādi misoñanya ingidijibwa pa kupwija myanda mu bisambo mu Isalela wa kala?

EN-EN, mu myanda imo yādi’mo. Tala kimfwa kimo. Kupituluka 24:14, 15 unena’mba: “Kokadimbapo mwingidi umpadibwa mulanda mufudile, nansha wa bobe badi mu ntanda yobe . . . kutyina’mba wakakudidila kudi Yehova, nabya kyakalonga ke bubi kodi.”

Kibese kya mutyibi palembelwe kisambo kya kidimye

Myanda itala bisambo bya uno muswelo yālembelwe mu myaka katwa ka busamba-bubidi Yesu Kaile, yasokwelwe kubwipi na Ashedoda. Bimweka bu ino myanda isambilanga pa kidimye umo wākomenwe kufuta mwingidi wandi buvule bwa miseke yobeivwanikile, ino nsekununi yālembelwe pa bibese bya mutyibi inena’mba: “Mwingidi obe [muntu ukatūdile mwanda mu kidye] pa kupwa mwingilo wa mwangulo mu mafuku’tu matyetye, Hoshayahu mwanā Shobay waile kusela kisandi kya mwingidi obe. . . . Bakwetu bonso botwadi twangula nabo mu kyanga kya dyuba bakāya kuleta bukamoni amba . . . Byonanena’bi i bya bine. I kutupu kibi kyonongele. . . . Abe mbikavu munene ajokejeje mwingidi wandi kisandi, amufwile’ko lusa! Kokyūba talala shi kapelwepo kyandi kisandi.”

Simon Schama, mulembi umo wa mānga unena’mba, Kino kisambo “kekisambilangapo’tu’nka pa mwingidi mutyumukwe mutyima wādi ukimba bamujokejeje [kisandi], ino kilombola kadi amba yewa wākatūdile myanda mu kidye wādi uyukile myanda imo itala mbila ya mu Bible, nakampata mbila idi mu Levi ne mu Kupituluka isambila pa kuleka kususula mulanda.”