DANIEL NE MIRIAM besongele mu Kweji 9, 2000 kadi badi na būmi buyampe mu Barcelone, mu Eshipanye. Daniel unena’mba: “Twetu twaji twadi twitukwasha tudye ku maleshitola mayampe, kukananga kungi, ne kuvwala bisandi bya katutu. Kadi twadi tusapula kyaba ne kyaba.” Inoko kwalongekele mwanda umo.

Ku kitango kya mu 2006, Daniel waivwene paipangwilwe kino kipangujo mu mwisambo kya amba: “Le tuloñanga bukomo bwetu bonso mwanda wa kukwasha ‘boba basaka kwipaibwa’ balonde dishinda dya būmi bwa nyeke?” (Nkindi 24:11) Uno mwisambo washintulwile amba tudi na kiselwa kya kusapula musapu wa mu Bible mwanda popemanine būmi bwa bantu. (Bilongwa 20:26, 27) Daniel uvuluka’mba, “Namwene amba Yehova ye wadi wisamba kondi.” Kadi uno mwisambo washintulwile amba twikalanga na nsangaji shi tulonga bivule mu mwingilo wa Yehova. Daniel waitabije amba kino i kya bine mwanda wadi umona’mba Miriam udi na nsangaji, kasha ushilula mwingilo wa bupania.

Uno mwisambo watengele Daniel bininge, penepa wakwata butyibi amba kino kyo kitatyi kya kushinta bintu mu būmi bwandi. Washilula kwingila mansá matyetye, ne kushilula mwingilo wa bupania, kupwa walangulukila pa nsangaji yobabwanya kwikala nayo aye ne Miriam shi bakengidile kokwa kusakilwa basapudi bavule ba Bulopwe.

MAKAMBAKANO KU ÑANJILO—KUPWA KE NSANGAJI

Mu Kweji 5, 2007, Daniel ne Miriam balekele twabo twaji, bavilukila ku Panama, mu ntanda mobakanangile dibajinji. Wabo mwaba wadi na bisanga bivule mu Bocas del Toro Archipelago mu Dijiba dya Caraïbes. Bantu bavule bekalanga’ko i ba Ngabe. Daniel ne Miriam badi balanga’mba babwanya kushikata mu Panama mu bula bwa myeji mwānda kukwatañana na kalupeto kobadi nako.

Badi benda pa bisanga na botyi ne na nkinga. Bavulukanga musunsa wabo mubajinji obaendele na makinga mu bula bwa makilometele 30, bakandija mikuna mu kyanga kikatampe. Daniel wadi ukōka bininge kyaba ne kyaba. Nansha nankyo, bisaka bya ba Ngabe byobadi betana nabyo, byadi bibatambula na kizaji, nakampata kitatyi kyobefundile bishima bimo bya mu ludimi lwa ba Ngabe. Ne kwija kwine mpika, baikala na bifundwa bya Bible 23.

Le i bika byalongekele pebapwile tonso tobadi nato? Daniel unena’mba: “Twalangile ya kujokela mu Eshipanye koku mipolo ituyengayenga mu meso. Ketwadipo tusaka kushiya bifundwa byetu bya Bible.” Inoko kweji umo pa kupita’po, batambula musapu wa nsangaji. Miriam unena’mba: “Twanenenwe kwingila bu bapania ba pa bula. Bine twasangedile kwingila uno mwingilo!”

NSANGAJI YABO MIKATAMPE

Pa mwanda wa kushinta kulongeka mu bulongolodi, Daniel ne Miriam banenenwe kwimika mwingilo wa bu bapania ba pa bula mu 2015. Le balongele namani? Bakulupile mu mulao udi mu Ñimbo ya Mitōto 37:5 wa amba: “Fikija dishinda dyobe kudi Yehova; umukulupile, nandi ukekifikijanga.” Basokwele kaji pa kusaka’mba bekwatakanye pobengila mwingilo wa bu bapania ba lonso, kadi dyalelo bengidilanga mu kipwilo kya mu Veraguas, mu Panama.

Daniel unena’mba: “Kumeso kwa kutaluka mu Eshipanye, ketwadipo tulanga’mba tukabwanya kwikala na būmi bupēla. Dyalelo twi babwanye kwikala nabo, kadi ketubudilwepo kintu nansha kimo kya mvubu.” Le i nsangaji’ka yabo mikatampe? Abo amba: “Kukwasha bantu betyepeje befunde myanda ya Yehova kyo kintu kileta nsangaji keidingakanibwa!”