Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU

Shi Muntu Osenswe Wafu

Shi Muntu Osenswe Wafu

“Kokidila . . . mulunda, Leza mwine uyukile.”

Bino binenwa basongwele’byo mwana-mukaji umo witwa bu Bebe. Wadi pa lufu lwa shandi, wafwile ku akishida ya motoka.

Bebe wadi uswele shandi bininge. Wamunene bino binenwa’bi i mulunda nandi wa mu kisaka, ino byamusense pa kyaba kya kumusenga. Wadi wibivuluka ne kunena’mba “Nanshi usangele byafwa tata.” Waijije na bulanda myaka mivule, mwanda wasekunwine monka mwanda’wa mu kitabo.

Monka mobyaikadile kudi Bebe, bilombanga kitatyi kilampe pa kwilwa lufu lwa muntu, nakampata shi wadi mulunda wa pa mutyima. Mu Bible, lufu i lutelwe bu “walwana wa mfulo.” (1 Kodinda 15:26) Lufu lwitufyutukilanga mu kitulumukila, kadi divule i mu kitatyi kyoketulangilapo, lwetusela muntu otusenswe bininge. I kutupu muno motudi kateñwangapo na musala walo. Nanshi ke kya kutulumukapo shi twimvwananga bushiyena pangala pa lufu ne pa byobya bilupuka’ko.

Padi kodi mwiipangule amba: ‘Bulanda bwijanga mafuku anga? I muswelo’ka otukokeja kulwa nabo? I muswelo’ka ombwanya kusenga boba bafwidilwe? Le kudi lukulupilo lwa kukemona monka na baswe betu bafwile?’