Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Mwena ne pa Mfulo mu Bidibwa Bitupa Yehova

Mwena ne pa Mfulo mu Bidibwa Bitupa Yehova

“Ami ne Yehova Leza obe ukulombola kakumwenamo.”—ISAYA 48:17.

ÑIMBO: 117, 114

1, 2. (a) Le Batumoni ba Yehova bamwene Bible namani? (b) Le i kipindi’ka kya mu Bible kyosenswe bininge?

BATWE Batumoni ba Yehova tusenswe Bible. wituseñanga, witupa lukulupilo, ne bufundiji bukulupilwa. (Loma 15:4) Ke dibukupo dya milangwe ya bantu ino i “kinenwa kya Leza.”—1 Tesalonika 2:13.

2 Bimweka’mba muntu ne muntu udi ne kipindi kyasenswe bininge mu Bible. Bamo basenswe Maevanjile mwanda alombolanga ngikadilo miyampe ya Yehova kupityila kudi Yesu. (Yoano 14:9) Bakwabo basenswe mikanda ya bupolofeto pamo bwa Kusokwelwa, mwine witulombola “bintu bifwaninwe kulongeka panopano.” (Kusokwelwa 1:1) Bamo baseñwanga pobatanga Ñimbo ya Mitōto, ino bangi nabo basangelanga kutanga madingi mavule adi mu mukanda wa Nkindi. Nanshi kibamweka patōka’mba Bible i dibuku dya bantu bonso.

3, 4. (a) Le tumonanga namani mabuku etu? (b) Le i mabuku’ka alupwilwa bisumpi bya bantu kampanda?

3 Byotusenswe Bible, o mwanda tusenswe ne mabuku etu mwanda emanine pa Kinenwa kya Leza. Bintu byonso byotutambula, mabuku, maboloshile, mapepala, ne bintu bikwabo i  bidibwa bitamba kudi Yehova. Bitukwashanga tumufwene ne kuningija lwitabijo lwetu.—Tetusa 2:2.

4 Mabuku etu mavule alembelwanga Batumoni ba Yehova bonso’tu. Inoko, kudi bitabo bimo bilembēlwe bisumpi kampanda, kimfwa bankasampe nansha bambutwile. Kudi bishinte bivule ne mavideo bidi pa diteba dyetu i bilupwilwe bantu ba kubulwa kwikala Batumoni ba Yehova. Bino bingidilwa byonso bilombola’mba Yehova ufikidije mulao wandi wa kufundija bantu bonso bintu bivule bine.—Isaya 25:6.

5. Le tukulupile amba Yehova usangelanga bika?

5 Bavule bene motudi betūdilanga’ko kitatyi kivule kya kutanga Bible ne mabuku etu. Kebibwanikapo kupityija kitatyi kya muswelo umo pa kwifunda kintu ne kintu kyotutambula. Tukulupile amba Yehova usangalanga potwingidija kitatyi kyetu na tunangu mwanda wa kutanga ne kwifunda Bible ne mabuku etu. (Efisesa 5:15, 16) Inoko, kudi kyaka kyotufwaninwe kuta’ko mutyima wa kwikyepuka. Le i kyaka’ka?

6. I bika bibwanya kwitulengeja tubulwe kumwena mu bidibwa bitupa Yehova?

6 Shi ketutadijepo, tubwanya kulanga’mba bipindi bimo bya mu Bible nansha mabuku amo keetutalepo. Kimfwa, bikekala namani shi kipindi kampanda kya mu Bible kimweka bu kekitalepo ngikadilo yotudi’mo? Le tukalonga bika shi ketudipo mu bene balupwidilwe kitabo kampanda? Le twikitañanga’tu bya lubilolubilo nansha kwikileka’tu? Shi bidi nankyo, tukabulwa myanda ya mvubu yotwadi ba kumwena’mo. Tukepuka namani kino kyaka? Tufwaninwe kuvuluka amba myanda yonso yotutambula itambanga kudi Yehova. Tutanga mu Bible amba: “Ami ne Yehova Leza obe ukulombola kakumwenamo.” (Isaya 48:17) Mu kino kishinte, tusa kufunda’mo myanda isatu iketukwasha tumwene mu bidibwa byonso bitupa Yehova.

MYANDA ITUKWASHA TUMWENE MU BUTANGI BWA BIBLE

7. Mwanda waka tufwaninwe kuta’ko mutyima potutanga Bible?

7 Ta mutyima ku byotanga. Shako i bine kudi bipindi bimo bya mu Bible bilembēlwe muntu nansha kisumpi kya bantu kampanda. Nansha nankyo, Bible unena patōkelela amba “Kisonekwa kyonso i kisonekejibwe na mushipiditu wa Leza kadi i kya kamweno.” (2 Temote 3:16) O mwanda tufwaninwe kuta’ko mutyima potutanga Bible. Tutu umo unena’mba wikalanga uboila ñeni mivule ku mwanda’tu umo. Kino kimukwashanga amone’mo bintu byampikwa kulombolwa patōkelela. O mwanda kumeso kwa kutanga Bible, tufwaninwe kulomba Yehova etukwashe tute’ko mutyima ne kwitupa tunangu twa kwimvwanija ñeni yasaka tuboile’ko.—Ezela 7:10; tanga Yakoba 1:5.

Potanga Bible, le umwenanga’mo ne pa mfulo? (Tala musango 7)

8, 9. (a) I bipangujo’ka byotukokeja kwiipangula potutanga Bible? (b) Bisakibwa bilombwa pa kwikala mukulumpe mwine Kidishitu bitufundija bika padi Yehova?

8 Wiipangule bipangujo. Potanga Bible, imana kadi wiipangule bino bipangujo amba: ‘Le bino bibamfundija bika padi Yehova? I muswelo’ka onkokeja kwingidija bino mu bwami būmi? Le nkakwasha nabyo bakwabo namani?’ Shi tulangulukila pa bino bipangujo, tukamwena bininge mu butangi bwetu bwa Bible. Tutalei’ko kimfwa kimo. Bible utela bisakibwa bifwaninwe kubwanya bakulumpe bene Kidishitu. (Tanga 2 Temote 3:2-7.) Nansha bavule motudi byokebadipo bakulumpe, tubwanya kulanga’mba ino myanda keibwanyapo kwitukwasha. Ino, leka bidi twiipangule enka bipangujo byatelwanga ne kumona muswelo otumwena batwe bonso mu bino bisakibwa.

 9 “Le bino bibamfundija bika padi Yehova?” Yehova i mwitupe mulongo wa bisakibwa pa kwikala mukulumpe. I mutūdile bana-balume ba kutala kipwilo misoñanya ya peulu. Kino kilombola’mba kipwilo i kilēme ku meso a Yehova. Bible unena’mba wāpotele’kyo “na mashi a wandi Mwana.” (Bilongwa 20:28) O mwanda Yehova usaka bakulumpe bekale bimfwa biyampe, kadi bakeshintulwila pa muswelo obekele na bantu ba mu kipwilo. Witusakilanga twikale na mutyima-ntenke pobetulama. (Isaya 32:1, 2) Shi tutanga bino bisakibwa, tukamona muswelo witutele Yehova mutyima bya binebine.

10, 11. (a) Potutanga bisakibwa bya kubwanya bakulumpe, tukebingidija namani mu bwetu būmi? (b) Tukengidija namani ino myanda pa kukwasha bakwabo?

10 “I muswelo’ka onkokeja kwingidija bino mu bwami būmi?” Shi wi mukulumpe kala, ufwaninwe kubandaula kyaba ne kyaba bino bisakibwa ne kwilumbulula. Shi “ukimba kwikala mutadi,” ufwaninwe kulonga bukomo bwa kubwanya bino bisakibwa senene mungya bukomo bobe. (2 Temote 3:1) Bene Kidishitu bonso babwanya kuboila ñeni ku bino bisakibwa. Kimfwa, Yehova usaka umo ne umo ekale na mutyima unekena ne ñeni mibwane. (Fidipai 4:5; 1 Petelo 4:7) Shi bakulumpe abaikala bu “bimfwa bya kulondela’po luombe,” tubwanya kuboila ñeni kobadi ne kwiula “lwitabijo lwabo.”—1 Petelo 5:3; Bahebelu 13:7.

11 “Le nkakwasha nabyo bakwabo namani?” Tubwanya kwingidija bino bisakibwa bya bakulumpe bene Kidishitu mwanda wa kukwasha botwifunda nabo Bible ne boba basangela musapu bemvwanije mwishidile bakulumpe na bendeji ba bipwilo. Bino bisakibwa bitukwashanga tuvuluke mingilo mikomo ingila bakulumpe pa kipwilo kyetu. Ne kino, kikalengeja tulēmeke bano batutu. (1 Tesalonika 5:12) Shi twibalēmeke, po pene nabo bakekala na nsangaji mu mwingilo wabo.—Bahebelu 13:17.

12, 13. (a) I bukimbi’ka botukokeja kulonga na kwingidija bingidilwa byotudi nabyo? (b) Leta kimfwa kilombola motukokeja kuboila ñeni ku myanda keilombwelwepo patōka.

12 Longa bukimbi. Potwifunda Bible, tukimbei malondololo ku bino bipangujo:

  • I ani wālembele kino kipindi kya mu Bible?

  • Wālembēle’kyo kwepi ne kitatyi’ka?

  • I myanda’ka mikatampe yālongekele kitatyi kyālembelwe uno mukanda?

Kuyuka ino myanda kubwanya kwitukwasha tuboile’ko ñeni yoketwadipo tumwene patōka.

13 Kimfwa, Ezekyele 14:13, 14 unena’mba: “Ntanda po yalongele bubi ko ndi pa kulonga kyakujilula kabidi naolwele kuboko kwami pa ayo, ne kutyumuna mukombo wa bidībwa wayo, ne kutuma kipupo kya nzala pa ayo, ne kutukija ku ayo muntu ne nyema mwine kumo; ino bano bantu bano’ba basatu, Noa, Danyele, ne Yoba, nansha bādi monka mwayo, kebakōkejepo kunyongolola nansha umo, poso’nka myuya ya abo bene pa boloke bwabo; i Mfumwetu Leza unena.” Shi tulonge bukimbi, tukamona’mba Ezekyele wālembele bino binenwa myaka 612 kumeso kwa Kidishitu kwiya. Ba Noa ne Yoba bādi ke bafwe kala ke padi myaka tutwa na tutwa, inoko Yehova wādi ukivuluka kikōkeji kyabo. Inoko, Danyele wādi ukidi mūmi. Bimweka bu wādi ukidi na kintu kya myaka 20 pāmutelele Yehova bu moloke pamo bwa Noa ne Yoba. I ñeni’ka yotuboila’ko? Yehova umonanga kadi ukwete na mvubu bengidi bandi bonso ba kikōkeji, enka ne bankasampe bene.—Ñimbo ya Mitōto 148:12-14.

 MWENA MU MABUKU PALAPALA

14. Le mabuku alupwidilwe bankasampe ebakwashanga namani, ne bantu bakwabo nabo bamwenanga’mo namani? (Tala kifwatulo ku ngalwilo.)

14 Mabuku alupwidilwe bankasampe. Tubefunde amba tubwanya kumwena mu bipindi byonso bya Bible. Mo monka kadi, tubwanya ne kumwena mu mabuku etu onso. Tutale’ko bidi bimfwa bimo. Panopano, Yehova i mulupwile bankasampe myanda mivule palapala. [1] (Tala bilembwa bya ku mfulo.) Ino myanda ibakwashanga bakomene kuningilwa na bakwabo ku masomo ne myanda mikwabo pobatama. Ino le i muswelo’ka otubwanya kumwena’mo batwe bonso potutanga bishinte bya mu ano mabuku? Potutanga ino myanda, tuyukanga myanda ilwa nayo bankasampe pene’pa ke tubwanya kwibakwasha ne kwibakankamika.

15. Mwanda waka bene Kidishitu batame bafwaninwe kuta mutyima ku myanda ilupwidilwe bankasampe?

15 Bene Kidishitu batame kebafwaninwepo kwikala na mitatulo ya kupela kutanga myanda itala bankasampe. Makambakano mavule anenenwe mu bino bishinte atalanga bene Kidishitu bonso. Kimfwa, batwe bonso tufwaninwe kubingija nkulupilo yetu, kwifula mu malango etu, kukomena kuningilwa na bakwetu, ne kwepuka balunda babi ne kwipwija mukose kubi. Nansha ano mabuku byoalembelwe bankasampe, myanda idi’mo i mitambe mu Bible, kadi bene Kidishitu bonso babwanya kumwena’mo.

16. Mabuku etu akwashanga bankasampe kulonga bintu’ka bikwabo?

16 Mabuku alembēlwe bankasampe abwanya kadi kwibakwasha baningije kipwano kyabo na Yehova. (Tanga Musapudi 12:1, 13.) Kadi batame nabo babwanya kumwena’mo. Kimfwa, mu Réveillez-vous ! wa Kweji 4, 2009 mwadi kishinte kya “Les jeunes s’interrogent” kinena’mba “Comment trouver du plaisir à lire la Bible?” Mu kino kishinte mudi milangwe mivule ikankamika ne kapango kakokeja muntu kuketa ne kwikalama mwanda wa kwikengidija pa kwifunda. Le kudi batame bamwenine mu kino kishinte? Lolo umo wanene amba wadi ukomenwanga kutanga Bible. Ino waingidije madingi adi mu kishinte’kya ne pano usangalanga pa kumona mukwatañenine mikanda ya mu Bible ne kumulengeja emvwanije bintu senene mu ñeni. Aye amba:  “Nsakanga kutanga Bible,” kadi ubweja’ko amba, “Kashā nkyasangedile butangi bwa Bible namino!”

17, 18. I muswelo’ka otukamwena mu kutanga myanda ilupwidilwe bantu bonso? Leta kimfwa.

17 Mabuku atala bantu bonso. Tamba mu 2008 twasangele kutambula Kiteba kya Mulami kya kwifunda. Kino kiteba kilembelwanga bininge Batumoni ba Yehova, ino tudi ne mapepala makwabo alembēlwa bantu bonso. I muswelo’ka otukokeja kumwena mu bino byonso? Tala kino kimfwa. Usangalanga shi muntu owaityile ku Njibo ya Bulopwe waiya. Panena muneni dishikulu, ubavuluka oityile’wa. Kowiipangula musa kumwena uno muntu myanda yaimvwana ne moibwaninya kushinta būmi bwandi. Ku mfulo, bibakutenga ku mutyima ne kufwija’ko bininge pa mwanda’wa.

18 Ye mobikokeja kwikadila ne potutanga mabuku alembēlwe bantu bonso. Kimfwa, Kiteba kya Mulami kya bantu bonso ne bishinte bidi pa jw.org bishintulula Bible na kwingidija bishima ne binenwa bipēla kwimvwana. Potutanga ino myanda, twimvwanijanga mpata myanda ne kuswa bubine bwa mu Bible botuyukile kala. Kadi twifundanga’mo ne miswelo mipya ya mwa kushintulwila nkulupilo yetu mu busapudi. Mo monka ne dipepala Réveillez-vous ! nadyo dikomejanga lukulupilo lwetu lwa kwikala’ko kwa Umpangi. Kadi ditukwashanga tuyuke mwa kubingijija nkulupilo yetu.—Tanga 1 Petelo 3:15.

19. I muswelo’ka otukafwija’ko Yehova pa bidibwa byaetupa?

19 Kibamweka patōka amba Yehova witufundijanga ne kwitupa madingi mavule mwanda wa kamweno ketu. (Mateo 5:3) Twendelelei kutanga ne kulonda mu būmi myanda yonso yaetusapwila. Nabya, tukamwena mu bidibwa byonso bitupa Yehova ne kulombola mutyima wetu wa kufwija’ko.—Isaya 48:17.

^ [1] (musango 14) Mu ino myanda mudi ne yoya idi mu Les jeunes s’interrogent—Réponses pratiques, Volime 1 ne 2, ne bishinte “Les Jeunes s’interrogent,” bidi’nka pa Entelenete kete.