Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Le Ukwatanga Butyibi Namani?

Le Ukwatanga Butyibi Namani?

“Jingululai nyeke kiswa-mutyima kya Yehova i kyepi.”—EFISESA 5:17.

ÑIMBO: 69, 57

1. I bijila’ka bimo bidi mu Bible, ne kwibikōkela i kwa kamweno namani kotudi?

YEHOVA i mwitupe bijila mu Bible bilombola patōka byasaka tulonge. Kimfwa, witusapwila’mba ketufwaninwepo kutōta bilezaleza, kwiba, kukolwa, nansha kulonga busekese. (1 Kodinda 6:9, 10) Kadi Yesu Mwanā Yehova wāpele balondi bandi uno musoñanya mupotoloke wa amba: “Endai mukalonge bana ba bwanga mu bantu ba ku mizo yonso, mwibabatyijei mu dijina dya Tata ne dya Mwana ne dya mushipiditu ujila, mwibafundijei kulama byonso byonemusoñenye. Kadi talaipo! Ami ngidi nenu mafuku onso kufika ne ku mvuyo ya ino ngikadilo ya bintu.” (Mateo 28:19, 20) Byonso bitulomba Yehova ne Yesu kulonga i pa mwanda wa kamweno ketu. Bijila bya Yehova bitufundijanga tuyuke kulama būmi bwetu ne bwa ba mu kisaka kyetu kadi bitukwashanga twikale na bukomo bwa ngitu buyampe ne kwikala mu nsangaji. Kya mvubu kutabuka, shi tukōkela misoñanya ya Yehova, kubadila’mo ne wa kusapula, usangalanga kadi uketwesela.

2, 3. (a) Mwanda waka Bible kaletelepo bijila mu kamwanda ne kamwanda ketutana mu būmi? (b) I bipangujo’ka byotusa kubandaula mu kino kishinte? (Tala kifwatulo ku ngalwilo.)

 2 Inoko Bible ketupelepo bijila ku mwanda onso otutanwa nao. Kimfwa, mu Bible kemudipo kijila kya byotufwaninwe kuvwala. Kino kilombola’mba Yehova i wa tunangu. Nansha ntanda yonso bantu byobadi na miswelo mishileshile ya bivwalwa ne myondele, ne ino myondele ishintanga kyaba ne kyaba, inoko Bible aye kashintyilepo. Kadi Bible kadipo na bijila kapwila bitala pa kaji, kwipwija mukose kotufwaninwe kutonga nansha ke bine byotufwaninwe kulonga pa kuleka kubela. Yehova i mushīle muntu ne muntu ne mitwe ya bisaka itongele ayo mine.

3 O mwanda potukwata butyibi bukatampe butala būmi bwetu ino kumona mpika kijila kya mu Bible kīsambila’po, tubwanya padi kwiipangula’mba: ‘Le Yehova usangedile buno bwami butyibi? Le ukasangela bino byonatonga nansha shi kebijilulapo kijila kya mu Bible? Le nkayuka namani amba usa kusangela butyibi bonakwata?’

BUTYIBI BWETU BUDI NA LUPUSA POTUDI NE PA BAKWETU

4, 5. Le butyibi bwetu bubwanya kwikala na lupusa potudi ne pa bakwetu namani?

4 Bantu bamo balañanga’mba babwanya kulonga kyonso kyobasaka. Inoko batwe tusakanga kulonga bintu bisangaja Yehova. O mwanda kumeso kwa kukwata butyibi, tufwaninwe kulangulukila pa byobya binena Bible ne kwibikōkela. Kimfwa, Bible witulombola mwiimvwaninanga Yehova pa mwingidijijo wa mashi, o mwanda tulondanga byanena. (Ngalwilo 9:4; Bilongwa 15:28, 29) Tubwanya kulomba Yehova etukwashe tukwate butyibi bumusangaja.

5 Butyibi bwetu budi na lupusa potudi. Butyibi buyampe bwitukwashanga tufwene pabwipi na Yehova. Butyibi bubi bōnanga kipwano kyetu nandi. Kadi butyibi bwetu bukokeja kwikala na lupusa pa bakwabo. Ketusakilepo kulonga kintu kampanda kibwanya kukalaja banabetu nansha kuzozeja lwitabijo lwabo. Kadi ketusakengapo kuleta myanda mu banabetu pa kipwilo. O mwanda tukwatanga butyibi buyampe.—Tanga Loma 14:19; Ngalatea 6:7.

6. I bika bifwaninwe kwituludika potukwata butyibi?

6 Le tubwanya namani kukwata butyibi buyampe shi Bible ketulombwelepo kine kyotufwaninwe kulonga? Pa kyaba’tu kya kulonga byobya byotusaka, tufwaninwe bidi kulangulukila pa mwanda otudi nao ebiya ke tukwata butyibi busangaja Yehova. Nabya tukakulupila’mba usa kwitukwasha tumone biyampe.—Tanga Ñimbo ya Mitōto 37:5.

LE YEHOVA UNSAKILANGA NONGE BIKA?

7. Le tukayuka namani kyokya kisaka Yehova tulonge mu mwanda kampanda shi kepadipo kijila kya mu Bible?

7 Le tukayuka namani kyokya kisangaja Yehova? Efisesa 5:17 witusapwila amba: “Jingululai nyeke kiswa-mutyima kya Yehova i kyepi.” Shi kepadipo kijila kipotoloke kya mu Bible, bitulomba kujingulula, nansha kwimvwanija kisaka Yehova tulonge mu owa mwanda. Namani? Tufwaninwe kumulomba ne kwitabija kuludikwa na mushipiditu wandi ujila.

8. Le Yesu wājingulwile namani bimusakila Yehova kulonga? Leta kimfwa.

8 Yesu wādi nyeke ujingulula kimusakila Yehova kulonga. Kimfwa, bibumbo pobyāimvwene nzala, Yesu wālombele ne kwibidisha mu kingelengele misunsa ibidi mituntulu. (Mateo 14:17-20; 15:34-37) Ino aye mwine paāimvwene nzala mu ntanda mutuputupu, kadi Dyabola wāmunena alamune mabwe ke mikate, Yesu wāpelele. (Tanga Mateo 4:2-4.) Wādi uyukile Shandi  biyampe, o mwanda wāyukile amba Yehova kakamusakilapo engidije mushipiditu ujila pa kamweno ka aye mwine. Wādi uyukile amba Shandi ubwanya kumuludika ne kumupa bidibwa pa kitatyi kifwaninwe.

9, 10. I bika biketukwasha tukwate butyibi bulumbuluke? Leta kimfwa.

9 Netu pamo bwa Yesu, tubwanya kukwata butyibi biyampe shi tukulupila Yehova etuludike. Bible unena’mba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine; mu mashinda obe onso muyuke, kadi aye ukōlolanga tushinda tobe. Ko kekalapo bu-wañeni mu meso obe abe mwine; akamwa Yehova ne kusonsoloka ku kibi.” (Nkindi 3:5-7) Shi twifunde Bible ne kuyuka mulangilo wa Yehova, nabya tukemvwanija byasaka tulonge mu mwanda kampanda. Kadi potwenda tuyukila’ko bininge mulangilo wa Yehova, biketupēlela kukwata butyibi bumusangaja. Mu uno muswelo, tukekala na “mutyima wa kikōkeji.”—Ezekyele 11:19, Dibuku Dijila.

10 Langa’po bidi, lolo umo waenda kukapota bintu wamone’ko kilato kiyampe. Inoko kidi na bei. Nansha byakadipo pamo na mulume, ino uyukile bisa kunena wandi mulume shi walupula lupeto luvule. Le webiyuka namani? I besonge ke padi myaka, o mwanda uyukile milangwe ya wandi mulume pa mwingidijijo wa lupeto lobadi nalo. Mo monka netu, shi twifunde mulangilo wa Yehova ne byaālongele pa kala, tukayuka byaetusakila tulonge mu myanda palapala.

LELO UKAYUKA NAMANI BILANGA YEHOVA?

11. Le i bipangujo’ka byotubwanya kwiipangula potutanga nansha potwifunda Bible? (Tala kapango “Powifunda Bible, Wiipangule Amba.”)

11 Le tubwanya kuyuka namani bilanga Yehova? Kintu kya mvubu kyotufwaninwe  kulonga i kutanga ne kwifunda Bible kitatyi ne kitatyi. Potwifunda namino, tufwaninwe kwiipangula’mba: ‘Bino bimfundija bika padi Yehova? Mwanda waka wālongele bintu namino?’ Kadi pamo bwa Davida, tufwaninwe kulomba Yehova etukwashe tumuyuke biyampe. Davida wālembele amba: “Bandaīje mashinda obe, abe Yehova; ne kumfundija makoka obe. Banombole mu byabinebine byobe, umfundije, Ke-wi-muntu abe wi Leza wa lupandilo lwami; kudi abe e ko nkungila dyuba dyonso ne bukata.” (Ñimbo ya Mitōto 25:4, 5) Shi kudi bintu byotwefunda padi Yehova, tulangulukilei pa ngikadilo yotubwanya kwibingidija’mo. Le tubulwe’po kwingidija myanda’ya mu kisaka, ku kaji, ku masomo, nansha mu busapudi? Shi tulangulukila pa mwanda kabidye, biketupēlela kuyuka muswelo usaka Yehova twingidije myanda’ya.

12. Le mabuku etu ne kupwila bitukwashanga namani tuyuke mulangilo wa Yehova mu myanda palapala?

12 Muswelo mukwabo wa kuyuka mulangilo wa Yehova i kuta mutyima ku bintu bya mu Bible bitufundija bulongolodi bwandi. Kimfwa, shi ke tukwata butyibi, tudi na Index des publications Watch Tower ne Guide de recherche pour les Témoins de Jéhovah bikokeja kwitukwasha tusokole milangwe ya Yehova. Kadi tukokeja kumwena mu kupwila kwetu kwa bwine Kidishitu na kuteja na katentekeji ne kulondolola ne na kulangulukila pa byotwifunda. Kino kiketukwasha tulange mulangila Yehova. Ku mfulo, tukabwanya kukwata butyibi bumusangaja, ebiya nandi uketwesela.

LANGULUKILA BIDI PA MULANGILA YEHOVA KUMESO KWA KUKWATA BUTYIBI

13. Leta kimfwa kilombola motubwaninya kukwata butyibi bwa tunangu shi twifunda milangwe ya Yehova.

13 Tutalei kino kimfwa kya muswelo otubwanya kukwata butyibi bwa tunangu potuta bidi mutyima ku bilanga Yehova. Padi usaka kwingila bu pania. Pakwabo wi mushinte bintu kampanda mu būmi pa kusaka’mba upityije kitatyi kivule mu busapudi. Ino ukiipangula shi kalupeto ne tubintu towashala nato tukakubwana. Na bubine, Bible kanenapo amba tufwaninwe’nka kwikala bapania pa kwingidila Yehova. Tubwanya ne kumwingidila na kikōkeji bu musapudi. Ino pakwabo napo, Yesu wānene amba Yehova ukesela boba bepānanina bininge Bulopwe. (Tanga Luka 18:29, 30.) Kadi Bible unena’mba Yehova usangalanga potulonga bukomo bwa kumutumbija, kadi usakanga tumwingidile na nsangaji. (Ñimbo ya Mitōto 119:108; 2 Kodinda 9:7) Shi tulombela pa bino bintu ne kulangulukila’po, tukakwata butyibi bukwatañane na ngikadila yetu, bwine bukalengeja Yehova etwesele.

14. I muswelo’ka obwanya kujingulula shi muvwadilo kampanda usangajanga Yehova?

14 Tala kimfwa kikwabo: Usenswe kuvwala bivwalwa kabidye, inoko uyukile amba shi uvwale’byo bikakukaja bantu mu kipwilo. Bible kanenenepo kintu pa muvwadilo kamukaya. Penepo, ukayuka namani mulangila’po Yehova? Bible witusapwila amba: “Mo monka nsaka bana-bakaji nabo beneñenye na kuvwala bisandi bya bulēmantu, na butūkanye ne ñeni mibwane, ke na biselapo bya kwibanda nywene ne olo nansha na malungo ne mbwija ya lupoto lukomo, ino i mu muswelo ufwaninwe bana-bakaji betela bu bene Leza, ko kunena’mba, na mingilo miyampe.” (2 Temote 2:9, 10) Eyo, bengidi bonso ba Yehova bonso, enka ne bana-balume bene babwanya kuboila ñeni ku bino binenwa. Shi twi batūkanye, tukalangulukila pa mubwanya kwiimvwanina bakwabo potutonga bya kuvwala. Kadi byotusenswe banabetu, twepukanga kwibakukaja ne kwibasanshija. (1 Kodinda 10:23, 24; Fidipai 3:17) Shi tute mutyima ku binena Bible ne ku bilanga  Yehova, nankyo tukakwata butyibi bumusangaja.

15, 16. (a) Le Yehova wiimvwananga namani shi twendelela na kulangulukila pa myanda ya busekese (b) potutonga kwipwija mukose, le tukayuka namani byobya bisangaja Yehova? (c) I muswelo’ka otufwaninwe kukwata butyibi bukatampe?

15 Twifunda mu Bible amba Yehova ufītwanga mpata palonga bantu bibi ne pobebilanga pene. (Tanga Ngalwilo 6:5, 6.) I kimweke patōka amba Yehova ketusakilangapo tulangulukile pa myanda ya busekese. Na bubine, shi twendelele kulangulukila’po, tukafula ku kwibulonga. Ino Yehova witusakila tulangulukile pa bintu biyampe kadi bitōka tō. Yakoba mwanā bwanga wālembele amba tunangu twa Yehova “ato dibajinji i tutōka tō, kupwa i twa ndoe, twa mutyima unekena, tukōkela bukidi bonka, tuyule lusa ne bipa biyampe, twampikwa mboloji, ne buzazangi bwine mpika.” (Yakoba 3:17) O mwanda Bible witufundija’mba tufwaninwe kwepuka kwipwija mukose kwitulengeja tulangulukile nansha kulangula kilokoloko kya bintu bibi ne bya disubi. Kadi shi twimvwanije byobya bisenswe Yehova ne byashikilwe, biketupēlela kuyuka bitabo, mafilime, nansha makayo a kutonga. Ketufwaninwepo kwipangula bakwabo betulombole byotufwaninwe kutonga.

16 Shi ke kutonga, kwikalanga nyeke bintu bivule byotubwanya kukimba’po byobya bisangaja Yehova. Ino shi tukwata butyibi bukatampe mpata, i biyampe padi kwipangula mukulumpe umo, tutu nansha kaka mukwabo wa bwino etupe’po madingi. (Tetusa 2:3-5; Yakoba 5:13-15) Shako, ketufwaninwepo kulomba muntu’o etukwatyile butyibi. Ino, tufwaninwe kulangulukila bininge pa byobya byotuyukile mu Bible kupwa ketwikwatyila butyibi. (Bahebelu 5:14) Mutumibwa Polo wānene amba: “Muntu ne muntu ukeselelanga kiselwa kyandi.”—Ngalatea 6:5.

17. I muswelo’ka otumwenanga mu kukwata butyibi busangaja Yehova?

17 Shi tukwate butyibi busangaja Yehova, tukapwana nandi ne kwitabijibwa nandi, kadi uketwesela. (Yakoba 4:8) Nabya lwitabijo lwetu mudi Yehova lukakomena’ko. Nanshi, tulangulukilei pa byotutanga mu Bible amba twimvwanije milangwe yandi. Bine, kukekala nyeke, bintu bipya bya kwifunda padi Yehova. (Yoba 26:14) Ino shi tubalonga bukomo bwa kwifunda myanda yandi pano, tukekala na tunangu kadi tukabwanya kukwata butyibi bumusangaja. (Nkindi 2:1-5) Milangwe ne mpango ya bantu bishintanga, inoko Yehova kashintangapo nansha dimo. Kaimba wa mitōto wāimbile amba: “Ñeni ya Yehova īmene pototo, pō, nyeke ne nyeke; ne mifwatakanyo ya wandi mutyima ku nkongo yonso.” (Ñimbo ya Mitōto 33:11) Kibamweka patōka amba, tubwanya kukwata butyibi bulumbuluke shi twifunda kulanga mulangila Yehova ne kulonga bimusangaja.