Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami—Kya Kwifunda  |  Kweji 5 2016

Lelo Bible Ukyalamunanga Bobe Būmi?

Lelo Bible Ukyalamunanga Bobe Būmi?

“Alamukai na kushinta ñeni yenu.”—LOMA 12:2.

ÑIMBO: 61, 52

1-3. (a) I bintu’ka bibwanya kwitukomena kushinta pa kupwa kubatyijibwa? (b) I bipangujo’ka padi byotubwanya kwiipangula shi tubakomenwa kushinta motwadi tusakila? (Tala kifwatulo ku ngalwilo.)

MYAKA mivule, Kevin wadi ukaya makayo a kwidya lupeto, utoma mfwanka, ukolwa bininge ne kutoma dyamba. [1] (Tala bilembwa bya ku mfulo.) Kupwa wefunda myanda ya Yehova kadi wasaka kwikala mulunda nandi. Inoko pa kubwanya’byo, byadi bimulomba kushinta bininge būmi. Wabwenye kwalamuka kupityila ku bukwashi bwa Yehova ne ku bukomo bwa Kinenwa kyandi, Bible.—Bahebelu 4:12.

2 Kevin pa kupwa kubatyijibwa, byadi bikimulomba kushinta bumuntu bwandi pa kusaka ekale mwine Kidishitu muyampe. (Efisesa 4:31, 32) Kimfwa, kadipo wija kuloba. Watulumulukile mobyadi bikadile bikomo kwitūkija shi walobe. Kevin wanene amba kwifunda kutūkija bulobo kwadi kukomo kupita’ko kuleka bibidiji bibi byaadi nabyo kumeso kwa kubatyijibwa!  Ino wabwenye kushinta na kuzenza Yehova amukwashe ne na kwifunda bininge Bible.

3 Batwe bavule kumeso kwa kubatyijibwa, byadi bitulomba kushinta bininge mu būmi bwetu amba twikale na būmi bukwatañene na bitulomba Bible. Ino ne pano, tumonanga’mba kukitushadile tubintu totufwaninwe kushinta pa kwiula Leza ne Kidishitu. (Efisesa 5:1, 2; 1 Petelo 2:21) Kimfwa, tukokeja padi kwimona’mba tukitompwejanga bininge nansha kadi tukidi na lubabo ne kunenena bakwetu bibi. Pakwabo kadi padi tutyinanga byobya bibwanya kulanga nansha kunena bakwetu amba ketwibiloñangapo senene. Padi ketudi balonge bukomo bwa kushinta mu myaka mivule, inoko tukijokela mu bilubo bimo byonka. Pakwabo tubwanya kwiipangula’mba: ‘Mwanda waka i binkomene kushinta mu tuno tubintu tutyetutye? I bika kadi binomba kulonga pa kulonda byobya binena Bible amba numbulule bumuntu bwami?’

UBWANYA KUSANGAJA YEHOVA

4. Mwanda waka ketubwanyangapo kusangaja Yehova mu byonso byotulonga?

4 Tusenswe Yehova kadi tusakanga kumusangaja na mutyima wetu onso. Ino i kya bulanda, mwanda byotudi ba kubulwa kubwaninina ketubwanyangapo kumusangaja kyaba kyonso. Divule dine twiimvwananga bwa mutumibwa Polo wānenene amba: “Ngabilanga kulonga kilumbuluke, ino bukomo bwa kulonga’kyo mpika.”Loma 7:18; Yakoba 3:2.

5. I kushinta’ka kotwashintyile kumeso kwa kubatyijibwa, ino i bukōkekōke’ka padi botukilwa nabo?

5 Kumeso kwa kutwela mu kipwilo, twalekele kulonga bintu bishikilwe Yehova. (1 Kodinda 6:9, 10) Ne pano tukidi bampikwa kubwaninina. (Kolose 3:9, 10) O mwanda tulubanga nansha shi twabatyijibwe ke padi myaka mivule. Tubwanya kwimvwana kyaba ne kyaba bilokoloko bibi ne kwikala na milangwe mibi, nansha kadi tubwanya kumona bu i bikomo kunekenya bukōkekōke bwetu. Na bubine, tukokeja kulwa na bukōkekōke bumo bonka mu myaka mivule.

6, 7. (a) I kika kitulengeje twikale balunda na Yehova nansha byoketubwanininepo? (b) Mwanda waka ketufwaninwepo kwikaka kulomba Yehova etufwile lusa?

6 Nansha byotudi ba kubulwa kubwaninina, tubwanya kupwana nyeke na Yehova ne kumwingidila. Vuluka nyeke mowashilwidile kwikala mulunda na Yehova. I aye wamwene biyampe bidi modi, kadi wakusakila umuyuke. (Yoano 6:44) Wadi uyukile bilubo ne bukōkekōke bobe ne amba usa kuluba ne dikwabo. Nansha nabya Yehova ukikusakila wikale mulunda nandi.

7 Yehova i mwitusanswe bininge pa kwitupa kyabuntu kilēme. Wātumine Yesu wandi Mwana pano pa ntanda amba apāne būmi bwandi bu kinkūlwa pangala pa bubi bwetu. (Yoano 3:16) Shi tubaluba, tubwanya kulomba Yehova etulekele. Kadi byokudi kinkūlwa, tubwanya kukulupila amba uketulekela ne amba ukekala nyeke mulunda netu. (Loma 7:24, 25; 1 Yoano 2:1, 2) Vuluka, Yesu wāfwidile banonga-bibi besāsa. Nansha shi twimona amba twi balonge bibi kutabuka, ketufwaninwepo kuleka kulomba Yehova etulekele. Shi tuleke kumulomba lusa, bidi bwa batwe bapela koya ku masaka kufīta. Bine tufwijanga’ko Yehova mwine witupele mukenga wa kwikala balunda nandi nansha byotudi bampikwa kubwaninina!—Tanga 2 Temote 1:15.

8. Mwanda waka ketufwaninwe kusula bukōkekōke bwetu?

8 Shako, ketufwaninwepo kupumpunya bukōkekōke bwetu nansha kwibingija. Yehova i mwitusapwile mwikadile balunda basaka. (Ñimbo ya Mitōto 15:1-5) Nanshi shi tusaka kumufwena, tufwaninwe kulonga  bukomo bwa kumwiula aye ne wandi Mwana. Tufwaninwe kadi kulonga bukomo bwa kulwa na bilokoloko byetu bibi, ne tubwanya kufundwila bimo kulampe. Nansha shi ke padi myaka na potwabatyijibwe, tufwaninwe kulumbulula nyeke bumuntu bwetu.—2 Kodinda 13:11.

9. Le tubayuka namani amba tubwanya kwendelela kuvwala bumuntu bupya?

9 Mutumibwa Polo wāsapwidile bene Kidishitu amba: “Nanshi, mufwaninwe kuvūla bumuntu bwa kala, bukwatañene na mwiendelejo wenu wa pa kala, bwenda bubola mwendele bya kusakasaka byabo bya kyongo. Kadi kyaba kyonso mufwaninwe kwalamunwa kemudi bapya mu mulangilo wenu mwinemwine, kadi mufwaninwe kuvwala bumuntu bupya bwapangilwe mwendele kiswa-mutyima kya Leza mu boloke ne kwipāna kwa binebine.” (Efisesa 4:22-24) Kino kishintulula amba tufwaninwe kwendelela na kulonga bukomo bwa kushinta ne “kuvwala bumuntu bupya.” O mwanda nansha shi ke tudi bengidile Yehova myaka mivule, tubwanya nyeke kwifunda bintu bivule pa ngikadilo yandi. Kadi Bible ubwanya kwitukwasha twendelele na kushinta bumuntu bwetu amba tumwiule bininge.

MWANDA WAKA KEBIPĒLANGAPO?

10. I bika byotufwaninwe kulonga pa kusaka’mba Bible etukwashe twendelele kushinta, ne i bipangujo’ka byotubwanya kwiipangula?

10 Batwe bonso tusakanga kulonda byobya binena Bible. Ino tufwaninwe kulonga bukomo pa kushinta. Mwanda waka tusakilwa kulonga buno bukomo? Mwene Yehova ubwanya’tu kwitupēlejeja’ko amba tulonge byoloke?

11-13. Mwanda waka Yehova usakanga tulonge bukomo bwa kukomena bukōkekōke bwetu?

11 Potulangulukila pa umbuo wa diulu ne ntanda ne pa byonso bidi’mo, tukulupilanga’mba  bine Yehova udi na bukomo bwa kulonga kintu kyo-kyonso. Kimfwa, wāpangile dyuba, dine didi na bukomo bukatampe. Mu sekonde ne sekonde, dilupulanga kitōkeji ne kyanga kikatampe. Ino i bukomo’tu butyetye bwa dyuba bulombwa pa kukwatakanya būmi pano pa ntanda. (Ñimbo ya Mitōto 74:16; Isaya 40:26) Kadi Yehova upānga bengidi bandi ba pano pa ntanda bukomo ponso pobasakilwa’bo. (Isaya 40:29) I kimweke patōka amba shi Yehova wasake, ubwanya kwitupēlejeja bininge tulwe na bukōkekōke bwetu ne kwitutalula bilokoloko byetu bibi. Penepo mwanda waka kalongelepo namino?

12 Yehova i mwitupe bwanapabo bwa kwitongela. Ulekanga tutonge batwe bene kumukōkela nansha kuleka kumukōkela. Shi tutonge kumukōkela ne kwielela’ko kulonga kiswa-mutyima kyandi, tubalombola’mba tumusenswe ne tusakanga kumusangaja. Satana unenanga amba Yehova kafwaninwepo kuludika. Ino shi tukōkele Yehova, tubalombola’mba tusakanga ekale Muludiki wetu. Kadi tubwanya kukulupila amba Tata wetu wa buswe ukwete na mvubu bukomo botulonga bwa kumukōkela. (Yoba 2:3-5; Nkindi 27:11) Shi tulonge bukomo bwa kunekenya bukōkekōke bwetu nansha byokebipēlangapo, nabya tulamete kudi Yehova ne kulombola’mba tusakanga ekale Muludiki wetu.

13 Yehova witunena’mba tufwaninwe kulonga bukomo bwa kwiula ngikadilo yandi. (Kolose 3:12; tanga 2 Petelo 1:5-7.) Kadi witusakilanga tulonge bukomo bwa kunekenya byotulanga ne byotwiimvwana. (Loma 8:5; 12:9) Ponso potulonga bukomo bwa kushinta ne kubwanya twabwanya, tusangalanga bininge.

LEKA KINENWA KYA LEZA KIKWALAMUNE NYEKE

14, 15. I bika byotubwanya kulonga pa kutamija ngikadila isenswe Yehova? (Tala ne kapango “ Bible ne Milombelo Byashintyile Būmi Bwabo.”)

14 I bika byotufwaninwe kulonga pa kutamija ngikadila isenswe Yehova? Pa kyaba kya kwitongela batwe bene byobya byotusaka kushinta, tulekanga Leza etuludike. Loma 12:2 unena’mba: “Lekai kwiula ino ngikadilo ya bintu, ino alamukai na kushinta ñeni yenu, amba mujingulule banwe bene kiswa-mutyima kya Leza kiyampe, kitabijibwe ne kibwaninine.” Nanshi pa kuyuka byobya bisaka Yehova, tufwaninwe kukulupila bukwashi bwaleta. Tufwaninwe kutanga Bible difuku ne difuku, kulangulukila’po, ne kulomba Yehova etupe mushipiditu wandi ujila. (Luka 11:13; Ngalatea 5:22, 23) Nabya, Yehova uketukwasha twimvwanije byobya bimusangaja, ne kulanga mwalangila. Ku mfulo, milangwe, binenwa, ne bilongwa byetu bikasangaja Yehova, kadi tukabwanya kunekenya  bukōkekōke bwetu. Nansha ke pano pene, biketulomba’nka kulwa nyeke.—Nkindi 4:23.

Lemba bishinte bya mu mabuku etu nansha bisonekwa bya mu Bible bikakukwasha ulwe na bukōkekōke bobe, kadi wibitange kyaba ne kybulebe aba (Tala musango 15)

15 Kutentekela pa kutanga Bible difuku ne difuku, bilomba ne kwifunda’ye kupityila ku mabuku etu, kimfwa Bishinte bivule bidi mu Kiteba kya Mulami ne Réveillez-vous ! bitufundijanga mwa kwiwila ngikadila ya Yehova ne mwa kulwila na bukōkekōke bwetu. Tukatana’mo bishinte bimo nansha bisonekwa bīsambila pa yetu myanda. Tubwanya kulemba bino bisonekwa ne bishinte amba twibitange kyaba ne kyaba.

16. Mwanda waka ketufwaninwepo kuzoza shi tubatunya kushinta bukidi-bukidi?

16 Kwiula ngikadilo ya Yehova kulomba kitatyi. Shi umona’mba kwalamuka kobe kwendanga bityebitye, tūkija mutyima. Ku ngalwilo, bikakulomba padi bukomo bwa kwingidija byobya binena Bible. Ino poenda ulanga ne kwiendeja musakila Yehova, papo bikakupēlela ulange mwalangila ne kulonga byoloke.—Ñimbo ya Mitōto 37:31; Nkindi 23:12; Ngalatea 5:16, 17.

LANGULUKILA PA BŪMI BWA KUMESO BWA KUTENDELWA

17. I bika byotukokeja kutengela kumeso shi tukōkela Yehova?

17 Tutengele kitatyi kyotukekala babwaninine ne kwingidila Yehova nyeke ne nyeke. Mu kine kitatyi’kya, ketukalwepo na bukōkekōke nansha bumo, kadi biketupēlela bininge kwiula Yehova. Inoko tamba pano tubwanya kutōta Yehova mwanda i mwitupe kyabuntu kya kinkūlwa. Nansha byotudi bampikwa kubwaninina, tubwanya kumusangaja shi twendelele kulonga bukomo bwa kwalamuka ne kulonda byobya byetufundija mu Bible.

18, 19. Le tukakulupila namani amba Bible udi na bukomo bwa kwalamuna būmi bwetu?

18 Kevin walongele bukomo bwandi bonso bwa kutūkija bulobo. Walangulukile pa byaadi utanga mu Bible kadi weelele’ko kwalamuna būmi bwandi. Kadi walondele madingi amupele banababo bene Kidishitu. Nansha byobyamulombele myaka pa kwilemununa, wabwenye mwenda mafuku kwingila bu mwingidi wa mingilo. Kadi pano ke myaka 20 yaingila bu mukulumpe. Ne pano pene, uyukile amba bimulomba kwendelela kulwa na bukōkekōke bwandi.

19 Pamo bwa Kevin, netu tubwanya kulēmununa nyeke bumuntu bwetu. Shi twilemunune, tukekala nyeke pabwipi na Yehova. (Ñimbo ya Mitōto 25:14) Kadi shi twielele’ko kwalamuka ne kumusangaja, nandi uketukwasha twalamuke. Nanshi tukulupilei amba tukendelela kwalamuna būmi bwetu na bukwashi bwa Bible.—Ñimbo ya Mitōto 34:8.

^ [1] (musango 1) Majina i mashintwe.