“Monka mwātwelele bubi mu ino ntanda kupityila ku muntu umo [Adama] ne lufu kupityila ku bubi.”—Loma 5:12

Le ukalondolola namani shi abakwipangula amba, “Usakanga kwikala na būmi bwa nyeke?” Bavule padi bakanena amba basakanga, inoko kebakulupilepo amba bikokejika. Banenanga’mba, kipangila kyetu i kya kufwa, ye bilupuka ku būmi bwetu.

Langa bidi shi, abafulamuna kipangujo ne kukwipangula’kyo amba, “Le usakanga kufwa?” Bavule badi mu ngikadilo miyampe’ko, bakalondolola’mba, aa. Mwanda? Mwanda kipangila kyetu i kya kusaka būmi, nansha byotutanwa na matompo ne ngikadilo mikomo. Bible ulombola’mba Leza wāpangile bantu na mutyima wa kwikala na būmi. Unena’mba, “wabika [bu nyeke] panopanshi mu mutyima wabyo.”—Musapudi 3:11.

Bubine i buno amba bantu bafwanga. Pene’pa, i bika byākambakenye? Le kudi kintu kilongele Leza mwanda wa kupwa myanda? Malondololo a Bible akankamikanga mutyima, ne emanine pa kine kyāsusukile Yesu ne kyaāfwidile.

MWĀONEKELE MYANDA

Mashapita asatu mabajinji a mukanda wa Ngalwilo etulombola’mba Leza wāpele ba mulume ne mukaji babajinji, ba Adama ne Eva, lukulupilo lwa būmi kebudi mfulo, kadi wēbasapwila ne bya kulonga pa kumona’bo. Kupwa nsekununi ilombola mobākomenenwe kukōkela Leza ne kujimija lukulupilo’lwa. Mānga i minenwe mu muswelo upēla—bine upēla ulengeja bamo baleke kwiikwata na mvubu bwa lufumo. Ino Ngalwilo idi pamo bwa Maevanjile, mwanda itelanga kanda ne kanda kalombola bubine bwa ino mānga. *

I bika bilupukile ku kubulwa kikōkeji kwa Adama? Bible ulondolola amba: “Monka mwātwelele bubi mu ino ntanda kupityila ku muntu umo [Adama] ne lufu kupityila ku bubi, ne lufu nalo lwasambakana ku bantu bonso mwanda bonso balongele bubi.” (Loma 5:12) Adama wālongele bubi na kuleka kukōkela Leza. Wājimija lukulupilo lwa būmi kebudi mfulo kupwa wāfwa. Byotudi bandi bana, twi bapyane ngikadilo yandi ya bubi. O mwanda, tubelanga, tununupa ne kufwa. Ino nshintulwilo ya kyotufwila i mikwatañane na byotuyukile dyalelo pa mwiifwaninanga mwana na mbutwile.  Ino le Leza kadipo kyalongele pa kupwija uno mwanda?

BILONGELE’PO LEZA

Bine Leza wākwete’ko mpango ya kukūla, nansha kupota monka kyokya kyājimijije Adama bana bandi, ke lukulupilo kadi lwa būmi kebudi mfulo. Le Leza wāfikidije’byo namani?

Bible unena mu Loma 6:23 amba, “mpalo ipala bubi i lufu.” Kino kishintulula’mba lufu kyo kintu kilupuka ku bubi. Adama wālongele bubi, pene’pa wāfwa. Mo monka netu, byotulonga bubi tunenwe kwimwena byobya bilupuka’ko, lo lufu’lo. Napo ke pa kilubopo kyetu, ino i pa kubutulwa kotubutwidilwe mu ino ngikadilo ya bubi. O mwanda Leza pa buswe bwandi, wātumine Yesu wandi Mwana etuselele ‘mpalo ya bubi.’ Le wāselele’yo namani?

Lufu lwa Yesu lubaseba dishinda dya būmi bwa nsangaji, kebudi mfulo

Muntu umo mubwaninine, Adama byaētuletele bubi ne lufu na kubulwa kukōkela kwandi, kwadi kusakibwa muntu mukwabo mubwaninine wa kukōkela kufika ne ku lufu etunyongolole mu kino kiselwa. Bible unena’po uno muswelo amba: “Monka mwālengeje kubulwa kikōkeji kwa muntu umo bavule ke babipya-mambo, ne kikōkeji kya muntu umo nakyo mo monka kikalengeja bavule ke boloke.” (Loma 5:19) Uno “muntu umo” i Yesu. Wātambile mūlu, wāiya kwikala muntu mubwaninine *, ne kwitufwila. Mfulo mfulō, netu twabwanya kwitabijibwa na Leza ne kwikala na lukulupilo lwa būmi kebudi mfulo.

KYĀSUSUKĪLE YESU NE KYAĀFWIDILE

Mwanda waka byādi bilomba Yesu afwe pa kufikidija bino bintu? Lelo Leza Mwinē Bukomo Bonso kādipo’tu wa kutūla’ko musoñanya amba bana ba Adama bapebwe bitupu būmi bwa nyeke? Shako Leza wādi na lupusa lwa kulonga namino. Ino kulonga namino kwādi kwa kwipatanya na binenwa byandi bya amba mpalo ya bubi i lufu. Kino kijila’ki ke kityetyepo kikokeja kufundulwa nansha kushintwa kitatyi kyo-kyonso. I kimanine pa boloke bwa bine.—Ñimbo 37:28.

Shi Leza walekele kulonda boloke mu uno mwanda, bantu badi ba kulanga’mba ukabulwa’bo ne mu myanda mikwabo. Kimfwa, le kyādi kya kwikala kyendele’mo atunge i bana ba Adama banga  bafwaninwe būmi bwa nyeke? Le bantu bādi ba kukulupila’mba ukafikidija milao yandi? Kulamata kwalemete Leza ku boloke pa kufikidija lupandilo lwetu kwitukulupija amba ukalonga nyeke byoloke.

Leza wāpele bantu lukulupilo lwa būmi kebudi mfulo mu Paladisa pano pa ntanda, kupityila ku kitapwa kya lufu lwa Yesu. Tala binenwa bya Yesu bilembelwe mu Yoano 3:16: “Leza byaasenswe ino ntanda bikatampe mpata, wapēne wandi Mwana mubutulwe bunka, amba ense ulombola lwitabijo mudi aye kakyonakanibwa, ino amone būmi bwa nyeke.” Nanshi lufu lwa Yesu ke kilombojipo’tu kya amba Leza ulamete ku boloke bwandi, ino kadi i kilomboji kya buswe bukatampe bwasenswe bantu.

Penepo, mwanda waka Yesu wādi ufwaninwe kususuka ne kufwa mu muswelo usansa na mokilombwedilwe mu Maevanjile? Byaātenwe na matompo makomo mpata, ino wāshala mukōkele, Yesu wābepulwile dimo kupwididile bubela bwa Dyabola bwa amba bantu kebabwanyapo kushala na kikōkeji kudi Leza mu matompo. (Yoba 2:4, 5) Byānene Satana byāmwekele bu bya bine paāongwele Adama muntu mubwaninine alonge bubi. Ino Yesu—muntu mubwaninine bwa Adama ku ngalwilo—wākōkele nansha ke mu masusu makatampe mene. (1 Kodinda 15:45) Mu uno muswelo, wālombwele amba ne Adama mwine wādi ukokeja kukōkela shi wāsakile. Yesu pa kūminina matompo, wētushidile kimfwa kya kulonda. (1 Petelo 2:21) Leza wāpadile wandi Mwana mpalo na kumulaya būmi bwa kubulwa kufwa momwa mūlu pa mwanda wa kikokeji kyandi kibwaninine.

MUSWELO OKOKEJA KUMWENA’MO

Yesu bine wāfwile. Dishinda dya būmi kebudi mfulo dyāsebwa. Lelo usaka kwikala na būmi bwa nyeke? Yesu wālombwele kyotufwaninwe kulonga amba: “Buno’bu bo būmi bwa nyeke, bekale kukuyuka abe, Leza umo kete wa bine, ne yewa owatumine, Yesu Kidishitu.”—Yoano 17:3.

Boba balupwile dino dipepala bakwita wifunde myanda mivule itala padi Yehova, Leza wa bine, ne padi wandi Mwana, Yesu Kidishitu. Batumoni ba Yehova ba mu kyenu kibundi bakasangela kukukwasha. Kadi ubwanya kumona myanda mikwabo ya mvubu na kutwela pa diteba dyetu, www.jw.org.

^ mus. 8 Tala “Historicité de la Genèse,” mu dibuku Étude perspicace des Écritures, volime 1, pa paje 986-988, dilupwilwe na Batumoni ba Yehova.

^ mus. 13 Kutundulula kwātundulwile Leza būmi bwa Mwana wandi mu difu dya Madia ko kwālengeje Madia emite, kadi mushipiditu ujila wa Leza wākingile Yesu wakasambulwilwa kubulwa kubwaninina kwa Madia.—Luka 1:31, 35.