Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami—Kya Kwifunda  |  Kweji 3 2016

A Bankasampe—Le Muketeakanya Namani pa Kubatyijibwa?

A Bankasampe—Le Muketeakanya Namani pa Kubatyijibwa?

“Ndoelelwe monka mu kulonga kiswa-mutyima obe, abe Leza wami.”—ÑIMBO 40:8.

ÑIMBO: 51, 58

1, 2. (a) Nshintulula mwanda waka kubatyijibwa i ditabula disumininwe. (b) I bika bifwaninwe kuyuka muntu kumeso kwa kubatyijibwa, ne mwanda waka?

A NKASAMPE, le usakanga kubatyijibwa? Shi i amo, dino i dyese dikatampe dyokufwaninwepo kubulwa. Monka mokyalombwedilwe mu kishinte kibadikile, lubatyijo i mwanda musumininwe. Lulombolanga bantu amba wepēne abe mwine kudi Yehova, ko kunena’mba, wamulaile kumwingidila nyeke ne amba kulonga kiswa-mutyima kyandi kyo kintu kya mvubu mpata mu būmi bobe. Kulaya Leza namino byokudi kusumininwe, nanshi ufwaninwe kubatyijibwa enka shi ubatama’ko bidi, shi i abe mwine wasaka, ne shi wimvwanije mushintulwila kwipāna kudi Leza.

2 Inoko, padi wimwene bu kwafikile pa kitatyi kya kubatyijibwa. Nansha padi umwene amba ubafikila pa kubatyijibwa, ino bambutwile amba ilaija’ko bidi ukule ne kuvudija’ko bwino mu būmi. Le ukalonga’po namani?  Kokatyumukwa mutyima. Ino, kino kyo kitatyi kya abe kwendelela amba ubwanye bisakibwa bya kubatyijibwa. Povuluka uno mwanda, ubwanya kwitungila bitungo mu myanda isatu palapala: (1) nkulupilo yobe, (2) bilongwa byobe, ne (3) mutyima obe wa kufwija’ko.

NKULUPILO YOBE

3, 4. Le bankasampe babwanya kuboila ñeni’ka ku kimfwa kya Temote?

3 Langa mobwanya kulondolwela bino bipangujo: I kika kyongitabijije amba Leza udi’ko? I kika kinkulupije amba Bible i mutambe kudi Leza? Mwanda waka nkōkele mbila ya Leza pa kyaba kya kulonda mwikadilo wa ino ntanda? Bino bipangujo bikakukwasha ulonde madingi a mutumibwa Polo a amba: “Mujingulule banwe bene kiswa-mutyima kya Leza kiyampe, kitabijibwe ne kibwaninine.” (Loma 12:2) Namani le?

4 Kimfwa kya Temote kibwanya kukukwasha. Wāyukile Bisonekwa biyampe mwanda inandi ne nkambo wandi bāmufundije myanda ya mu Bisonekwa. Inoko, Polo wāsapwidile Temote amba: “Endelela mu bintu byowafundile ne byobakunekenye nobe waitabija.” (2 Temote 3:14, 15) Pano kishima “byobakunekenye” kishintulula “kukulengeja witabije ne kukulupila bubine bwa kintu.” Nanshi Temote wādi ufwaninwe kunekenibwa amba’nka mu Bisonekwa mo mutanwa bubine. Kēbitabijepo’tu mwanda inandi ne nkambo wandi bo bāmulombwele’byo, ino i mwanda wālangulukidile pa byaāfundile ne kunekenibwa wānekenibwa.—Tanga Loma 12:1.

5, 6. Mwanda waka i kya kamweno wifunde kwingidija biyampe “malango” obe pokidi nkasampe?

5 Le abe nobe? Padi ke peje na powayukile bubine. Shi bidi nankyo, witungile kitungo kya kulangulukila pa bubinga bwa nkulupilo yobe. Kino kikakukwasha ukomeje lwitabijo lobe ne kwepuka kukwata butyibi mwanda’po’tu ubaningilwa na bakwenu, na mulangilo wa ntanda, nansha na mwiivwanino obe.

6 Shi wifunde kwingidija biyampe “malango” obe pokidi nkasampe, ukabwanya kulondolola bakwenu pobakwipangula kimfwa amba: ‘Le ubayuka namani amba Leza udi’ko? Shi witusenswe, mwanda waka ulekele bibi bilongeka? Le bibwanika namani Leza ekale’ko’tu nyeke?’ Shi wi mwiteakanye, bino bipangujo kebikakulengejapo utatane ino bikakutonona wifunde Bible bininge.

7-9. Lombola muswelo okokeja kuningija nkulupilo yobe na bishinte “Qu’enseigne reellement la Bible ?” bidi pa Entelenete.

7 Kwifunda pa kasuku na kusumininwa kukakukwasha ulondolole bino bipangujo, ufundwile kulampe kutatana ko-konso, kadi ukomeje nkulupilo yobe. (Bilongwa 17:11) Tudi na mabuku mavule abwanya kukukwasha mu  uno mwanda. Bavule bakwashibwe na kwifunda boloshile Cinq questions à se poser sur l’origine de la vie ne dibuku Y a-t-il un Créateur qui se soucie de vous ? Kadi, bankasampe bangi i basangele ne kumwena mu bishinte bya “Qu’enseigne reellement la Bible ?” bidi pa jw.org. Ukokeja kwibitana mu LA BIBLE ET VOUS. Kingidilwa kyonso kya kwifunda nakyo kya bino bishinte i kitūlwe’po mwanda wa kukomeja nkulupilo yobe mu myanda ya mu Bible.

8 Byowifundanga Bible, nanshi kodi musokole bilondololwa ku bipangujo bimobimo bidi mu bino bingidilwa bya kwifunda nabyo. Le ukulupile malondololo obe? Bingidilwa bya kwifunda nabyo bikakukwasha ulangulukile na katentekeji pa bisonekwa palapala ne kukupa muswelo wa kulemba bubinga bokulupidile bintu’bya. Kino kikakukwasha uyuke mwa kushintulwila nkulupilo yobe ku bakwenu. Shi utwelanga pa Entelenete mu mulongo wa bishinte “Qu’enseigne reellement la Bible ?” kwingidija’byo mu kifundwa kyobe kya pa kasuku kukakukwasha ukomeje nkulupilo yobe.

9 Ufwaninwe kujingulula abe mwine amba buno i bubine. Nabya uketeakanya pa kubatyijibwa. Kaka umo nkasampe wanene amba: “Kumeso kwa kukwata butyibi bwa kubatyijibwa, nefundile Bible ne kumona’mba bine kino i kipwilo kya bine. Kadi kyaba kyonso kyondi mūmi, kino kikulupiji kyendanga kiningila’ko.”

BILONGWA BYOBE

10. Mwanda waka i kyendele’mo kukimba mwine Kidishitu mubatyijibwe ekale na bilongwa bikwatañene na lwitabijo lwandi?

10 Bible unena’mba: “Lwitabijo lonkalonka nalo, shi i lwampikwa mingilo, i lufwe.” (Yakoba 2:17) Shi nkulupilo yobe i mikomo, kino kikamweka mu bilongwa byobe. Ukekala na byobya bitela Bible bu “bilongwa bijila bya mwikadilo ne mingilo ya bwine Leza.”—Tanga 2 Petelo 3:11.

11. Shintulula mwikadile “bilongwa bijila bya mwikadilo.”

 11 Lelo “bilongwa bijila bya mwikadilo” i bika? Shi bilongwa byobe i bijila, nankyo udi na mwikadilo utōka. Kimfwa, vuluka myeji isamba ishele kunyuma. Powatenwe na ditompo dya kulonga bubi, le wabwenye kujingulula kibi i kyepi ne kiyampe nakyo i kyepi? (Bahebelu 5:14) Le ubavuluka difuku dyowakomene ditompo kampanda nansha kuningilwa na bakwenu? Le udi kimfwa kiyampe ku bakwenu ba ku masomo? Le ulamanga kikōkeji kyobe kudi Yehova’ni, nansha usakanga kwikala pamo bwa bakwenu kutyina’mba bakakuzawila? (1 Petelo 4:3, 4) Shako, kekudipo muntu mubwaninine. Kyaba kimo, enka ne boba ke bengidile Yehova myaka mivule babwanya kwimvwana bumvu ne kukomenwa kusapwila bakwabo. Inoko muntu wipēne kudi Leza ukemvwana fyedi ya kwikala bu Kamoni wa Yehova, ne kulombola kino mu mwikadilo wandi utōka.

12. Tela’ko “mingilo ya bwine Leza” imo, ne kulombola mofwaninwe kwiimwena?

12 Lelo “mingilo ya bwine Leza” i bika? Ayo, ibadilwa’mo mingilo yolonga mu kipwilo, kimfwa kupwila ne kusapula. Ino kadi mubadilwa ne mingilo keikokejapo kumona bakwabo, kimfwa milombelo yobe ya pa kasuku kudi Yehova ne kifundwa kyobe kya kasuku. Muntu upēne būmi bwandi kudi Yehova kakamonepo ino mingilo bu kiselwa kilēma. Ukeimvwana bwa Mulopwe Davida, wānenene amba: “Ndoelelwe monka mu kulonga kiswa-mutyima obe, abe Leza wami; eyo i binebine, mukanda-obe-wabijila udi umutyima wami.”—Ñimbo 40:8.

13, 14. Lelo i kingidilwa’ka kibwanya kukukwasha wingile “mingilo ya bwine Leza,” ne bankasampe bavule i bamwene namani mu kino kingidilwa?

13 Pa kukukwasha witungile bitungo, mu dibuku Les jeunes s’interrogent—Réponses pratiques, volime 2, paje 308 ne 309 padi bipangujo bya kulondolola. Pa ano mapaje ubwanya kulemba’po malondololo ku bipangujo pamo bwa bino: “Lelo milombelo yobe i mishilakane, ne le ilombola bika pa moswelele Yehova?” “I myanda’ka yotwejanga mu kifundwa kyobe kya pa kasuku?” “Lelo wendanga mu busapudi nansha shi bambutwile bobe kebendele’mopo?” Ano mapaje adi ne na byaba bidi pululu pa kwandika kitungo kyo-kyonso kyokimba kwitungila mu mwanda utala milombelo, kifundwa kya pa kasuku, ne busapudi.

14 Bankasampe badi basaka kubatyijibwa, bamwene amba ano mapaje i kingidilwa kya mvubu. Kaka umo nkasampe witwa bu Tilda wanene amba: “Naingidije ano mapaje mwanda wa kwitungila bitungo. Nafikile bityebitye pa bino bitungo, kadi kupwa’tu kwa mwaka umo nabatyijibwa.” Tutu umo nkasampe witwa bu Patrick nandi wabwenye’byo. Unena’mba, “Nadi ndyukile kala bitungo byami, inoko kwibilemba kwankweshe nonge bukomo bwa kufikila’po.”

Le ukendelela kwingidila Yehova nansha shi bambutwile bobe kebamwingidilangapo? (Tala musango 15)

15. Shintulula mwanda waka kwipāna i butyibi bukutala abe mwine.

 15 Kipangujo kimo kidi pa ano mapaje i kya amba: “Le ukengidila Yehova nansha shi bambutwile ne balunda nobe abaleka’byo?” Popāna būmi bobe kudi Yehova ne kubatyijibwa, i abe mwine wasamba nandi bulunda. O mwanda byobya byolongela Yehova kebitalwepo na bambutwile bobe nansha na muntu ye-yense. Bilongwa byobe bijila bya mu mwikadilo ne mingilo ya bwine Leza bilombola’mba wi munekenibwe kwitabija amba bodi nabo i bubine kadi usaka kulonda misoñanya ya Leza. Panopano ponka usa kubwanya bisakibwa bya kubatyijibwa.

MUTYIMA OBE WA KUFWIJA’KO

16, 17. (a) Le i kika kifwaninwe kutonona muntu ekale mwine Kidishitu? (b) Le mutyima wa kufwija’ko pangala pa kinkūlwa ubwanya kwelekejibwa namani?

16 Difuku dimo, muntu umo uyukile senene Bijila bya Mosesa wāipangwile Yesu amba: “Lelo i mbila’ka itabukile bukatampe?” Yesu wāmulondolola amba: “Sanswa Yehova Leza obe na mutyima obe onso ne na muya obe onso ne na ñeni yobe yonso.” (Mateo 22:35-37) Yesu wāshintulwile amba kusanswa  Yehova bo bubinga bufwaninwe kutonona muntu abatyijibwe ne kwikala mwine Kidishitu. Muswelo umo wa kukomeja buswe botuswele Yehova i kulangulukila na katentekeji pa kinkūlwa, kyabuntu kikatakata kya Leza kyapēle bantu. (Tanga 2 Kodinda 5:14, 15; 1 Yoano 4:9, 19.) Kulanguluka uno muswelo, kukakukwasha wikale na mutyima wa kufwija’ko pa kino kyabuntu kya kutendelwa.

17 Mutyima obe wa kufwija’ko pangala pa kinkūlwa ubwanya kwelekejibwa uno muswelo: Langa shi ubalobela kofu, ino muntu waiya kukwabula. Le usa’tu kwipampula mema, kojokela kwinjibo, ne kwilwa byonso byakulongela muntu’wa? Leka, leka, leka! Ukafwija’ko nyeke uno muntu wakupandija! Mo monka netu, tufwaninwe kufwija’ko bininge Yehova ne Yesu pangala pa kinkūlwa. Abo bo betupēle būmi! Betunyongolwele mu bubi ne mu lufu. Shi pano tudi na lukulupilo lwa kwikala nyeke mu Paladisa pano pa ntanda, i mwanda wa buswe bobetuswele!

18, 19. (a) Mwanda waka kufwaninwepo kutyina kwikala wa Yehova? (b) Kwingidila Yehova kulumbululanga būmi bobe muswelo’ka?

18 Le ufwijanga’ko Yehova pa byakulongēle? Shi i amo, nankyo kwipāna ne kubatyijibwa i bintu biyampe kodi. Kwipāna kobe i mulao olaile Leza amba ukalonga kiswa-mutyima kyandi nyeke. Le ufwaninwe kutyina uno mulao? Mhm! Yehova ukusakilanga bintu biyampe, kadi ukapala mpalo boba balonga kiswa-mutyima kyandi. (Bahebelu 11:6) Shi wipāne kudi Leza ne kubatyijibwa, būmi bobe bukekala bulumbuluke, kebukonekapo nansha dimo! Tutu umo wa myaka 24, ino wabatyijibwe pa bunkasampe unena’mba, “Shi nadi mukulu longa nadi wa kwimvwanija bininge myanda, ino butyibi bonakwete bwa kwipāna kudi Yehova bwankingile ku kulondalonda bya ino ntanda.”

19 Yehova ukusakilanga bintu biyampe. Ino Satana aye wisakilanga, kadi kakutelepo mutyima. Shi umulonde, kekudipo kyasa kukupa. Le ukakupa namani kintu kyakadipo nakyo? Kadipo na myanda miyampe, kadi kadipo na lukulupilo nansha lumo. Kyakimba’tu i enka kukonena būmi bwa kumeso, mwanda momonekele ne bwandi!—Kusokwelwa 20:10.

20. Le i bika bikokeja kulonga nkasampe mwanda wa afikile ku kwipāna ne kubatyijibwa? (Tala ne kapango “Myanda Ikukwasha Wendelele.”)

20 Kupāna būmi bobe kudi Yehova i butyibi buyampe mpata bokokeja kukwata. Lelo wi mwiteakanye? Shi wi mwiteakanye, kokatyina kulaya Yehova uno mulao. Ino shi umona’mba kweteakenye, nabya londa milangwe idi mu kino kishinte ya kwendelela kumeso. Polo wāsapwidile banabetu ba mu Fidipai bendelele kumeso. (Fidipai 3:16) Shi ulonde ano madingi, kusapo kwija ubepāna kudi Yehova ne kubatyijibwa.