Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami—Kya Kwifunda  |  Kweji 12 2016

Yehova Upalanga Mpalo Boba Bamukimba na Mikeketo

Yehova Upalanga Mpalo Boba Bamukimba na Mikeketo

“Yewa umufwena ufwaninwe kwitabija’mba udi’ko ne amba upalanga mpalo boba bamukimba na mikeketo.”BAHEBELU 11:6.

ÑIMBO: 85, 134

1, 2. (a) Lelo buswe ne lwitabijo bikwatañene namani? (b) Le i bipangujo’ka byotusa kubandaula?

YEHOVA, Tata wetu, i mulaye kupala mpalo bengidi bandi. Uno i muswelo umo bidi witulombola’mo Yehova buswe, kadi tumusenswe “mwanda aye wetusenswe dibajinji.” (1 Yoano 4:19) Shi tuswe Yehova bininge, lwitabijo lwetu nalo mwadi lukakomena’ko kadi tukakulupila’mba Yehova ukapala mpalo boba bonso baswele.Tanga Bahebelu 11:6.

2 Yehova upalanga mpalo! Kino i kintu kya mvubu kilombola ngikadilo ne bilongwa byandi. O mwanda lwitabijo lwetu mudi Leza lukakoma enka shi tukulupile amba upalanga mpalo boba bamukimba na mikeketo. Mwanda waka? Mwanda “lwitabijo i kutengela na kikulupiji byobya byokulupile.” (Bahebelu 11:1) Lwitabijo i kwikala na kikulupiji kya binebine kya amba Leza ukesela bantu bandi ba kikōkeji. Pene’pa, le tukamwena namani mu lukulupilo lwa kupalwa mpalo? Le Yehova i mupale namani mpalo bengidi bandi ba pa kala ne ba dyalelo? Tutalei.

 YEHOVA I MULAYE KWESELA BENGIDI BANDI

3. I mulao’ka otutanga mu Malaki 3:10?

3 Yehova Leza i mulaye kupala mpalo bengidi bandi ba kikōkeji. Usakanga tumupe byobya bitabukile kunengela ne kukulupila’mba uketwesela. Yehova amba: “Ino pano namino kadi ntompei bidi.” Ubweja’ko kadi amba: “Shi nkikemushitwilakopo malolo a mūlu, ne kwimupungulwila dyese, ino kekukekalapo kyaba kibwane kya kutambula’dyo.” (Malaki 3:10) Tufwijanga’ko Yehova pa dino dyese shi twitabija kumutompa.

4. Mwanda waka tukulupile mulao wa Yesu udi mu Mateo 6:33?

4 Yesu wālaile bana bandi ba bwanga’mba shi batūle Bulopwe bwa Leza pa kifuko kibajinji, nabya Leza ukebakwatakanya. (Tanga Mateo 6:33.) Yesu wānenene kino mwanda wādi uyukile amba milao ya Leza ifikidilanga nyeke. (Isaya 55:11) Nanshi netu tubwanya kukulupila’mba shi twikale na lwitabijo lukomo mudi Yehova, nabya nandi ukafikidija mulao wandi wa amba: “Nkikakushiyepo nansha dimo kadi nkikakwelapo nansha dimo.” (Bahebelu 13:5) Uno mulao wa Yehova witukwashanga tukulupile binenwa bya Yesu bidi mu Mateo 6:33.

Yesu wālombwele amba bana bandi ba bwanga bakeselwa pa kwipāna kwabo (Tala musango 5)

5. Mwanda waka kilondololwa kya Yesu kudi Petelo kitukankamika?

5 Mutumibwa Petelo nandi wāipangwile Yesu amba: “Batwe tubashiye bintu byonso ketukulonda; penepo i bika bine byotukatambula?” (Mateo 19:27) Yesu kātopekelepo Petelo pa kino kipangujo. Ino Yesu wāsapwidile bandi bana ba bwanga’mba bakapalwa mpalo pa mwanda wa kwipāna kwabo. Batumibwa ne bantu bakwabo ba kikōkeji bakaludikanga na Yesu momwa mūlu mu mafuku āya kumeso. Kadi Yesu wālombwele mpalo idi’ko dyalelo paānenene amba: “Yewa ense washile  mobo nansha banababo bana-balume nansha banababo bana-bakaji nansha shandi nansha inandi nansha bana nansha madimi pa mwanda wa dijina dyami ukebitambulanga misunsa mivule kutabuka kadi ukapyananga būmi bwa nyeke.” (Mateo 19:29) Dyalelo, mulondi e-ense wa Yesu ubwanya kutana bashandi, bainandi, batutu wandi, bakaka wandi, ne bana mu kipwilo. Na bubine kino i kintu kya mvubu mpata kutabuka kintu kyo-kyonso kyotupēne pa mwanda wa Bulopwe.

“ÑANGA WA MUYA WETU”

6. Mwanda waka Yehova i mulaye kupala mpalo bengidi bandi?

6 Kutentekela pa madyese a kutendelwa a dyalelo, tutengele kadi madyese makatampe mu mafuku āya kumeso. (1 Temote 4:8) Yehova i mulaye kupala mpalo bengidi bandi ba kikōkeji, kadi kuyuka kino kwitukwashanga tūminine makambakano. Shi tukulupile ne pa mfulo amba Yehova “upalanga mpalo boba bamukimba na mikeketo,” nabya tukalama kikōkeji nyeke.Bahebelu 11:6.

7. Le lukulupilo ludi pamo bwa ñanga namani?

7 Yesu wānenene mu Busapudi bwandi bwa ku Lūlu amba: “Sepelelai ne kutombojoka nsangaji, mwanda mpalo yenu i mikatampe mūlu, ke-pantu e monka mobādi bapangilapangila ne bapolofeto bēmubadikidile.” (Mateo 5:12) Bengidi ba Leza bamo bakatambula mpalo ya momwa mūlu. Bakwabo nabo bakatambula mpalo ya būmi bwa nyeke mu paladisa pano pa ntanda. Kadi buno i bubinga bwa kusepelela “ne kutombojoka nsangaji.” (Ñimbo ya Mitōto 37:11; Luka 18:30) Inoko batwe bonso lukulupilo lwetu lubwanya kwikala pamo bwa “ñanga wa muya wetu, lwa binebine kadi lushimate.” (Bahebelu 6:17-20) Monka mukwashishanga ñanga kyombo kileke kweja mu kivula, lwitabijo lwetu lukomo nalo lubwanya kwitukwasha twimanije nshinkidingi. Kadi lubwanya kwitupa bukomo bwa kūminina makambakano.

8. Le lukulupilo lwetu lutyepejanga’ko namani kukambakanya mutyima?

8 Lukulupilo lwetu lubwanya kwitukwasha tutyepeje’ko kukambakanya mutyima. Pamo na mutalejanga māni misanshi ya ngitu, milao ya Leza nayo ibwanya kutalaja milangwe yetu ya mutyima. I kikankamika’po kashā pa kuyuka’mba Yehova witutanga mutyima shi twela kiselwa kyetu padi. (Ñimbo ya Mitōto 55:22) Tubwanya kwikala na kikulupiji kyonso amba Leza “ukokeja kulonga byobya bivulevule kupita ne byonso byotulomba.” (Efisesa 3:20) Yehova uketukwasha, ke enkapo na bivule, ino i ne na “byobya bivulevule kupita”!

9. I muswelo’ka otubwanya kukulupila kutambula madyese a Yehova?

9 Pa kutambula mpalo, tufwaninwe kwikala na lwitabijo lukomo mudi Yehova ne kukōkela bwendeji bwandi. Mosesa wāsapwidile muzo wa Isalela’mba: “(Yehova kwesela ukakwesela dyese byamwiko mu ntanda’ya, yakupa Yehova Leza obe, ke ya kadīlo ka kupyana ne kupyanununa, ya bu-kishi kyobe); ino’nka shi wibikako kuteja nakampata diwi dya Yehova Leza obe, kutentekela kulonga bijila byandi byo nakusoñanya ami dyalelo dino’di. Mwanda Yehova Leza obe, ukakwesela dyese mwākulaile.” (Kupituluka 15:4-6) Le ukulupile binebine amba Yehova ukakwesela shi wendelele kumwingidila na kikōkeji? Udi na bubinga bwendele’mo bwa kukulupidila kino.

YEHOVA WĒBAPADILE MPALO

10, 11. Lelo Yehova wāpadile Yosefa mpalo muswelo’ka?

10 Bible wālembelwe mwanda wa kamweno ketu. Tutana’mo bimfwa bivule pa muswelo wāpadile Leza mpalo bengidi bandi ba kikōkeji ba pa kala. (Loma 15:4) Kimfwa kimo bidi i kya Yosefa. Dibajinji, bamwanabo bāmupoteje bu mupika. Mwenda mafuku, mukaja mfumwandi wāmubepela bya bubela, wāmweleja  mu kifungo kya bene Edipito. Lelo Yehova wāelele Yosefa paādi mu kifungo? Kijila! Bible unena’mba: “Yehova wadi na Yosefa wamufwila lusa,” kadi “Yehova wadi nandi; ne kyokya kyalongele Yosefa, Yehova wekilonga ke kyadyese.” (Ngalwilo 39:21, 23) Nansha ke mu bino bitatyi bya makambakano, Yosefa wāilaije na kitūkijetyima Leza alonge’po kintu.

11 Myaka pa kupita’po, Felo wākutulula Yosefa mu kifungo, uno mwingidi mwityepeje wāikala ke muludiki mukatampe wa bubidi mu Edipito. (Ngalwilo 41:1, 37-43) Yosefa ne wandi mukaji pobābutwile bana babidi, “Yosefa wamwinika umbedi bu-Manase mwanda aye’mba: Leza wamvulamija malwa ami onso ne njibo yonso ya tata. Ino dijina dya wa bubidi wamwinika bu-Efelaimi; mwanda Leza wamvudije muno mu ntanda ya bususuke bwami.” (Ngalwilo 41:51, 52) Yehova wāpadile Yosefa mpalo pa mwanda wa kikōkeji kyandi ne kumwingidija mwanda wa kupandija bene Isalela ne bene Edipito bene ku kipupo kya nzala. Kadi Yosefa wāyukile amba i Yehova wamupala mpalo ne kumwesela.Ngalwilo 45:5-9.

12. Lelo Yesu wālamine kikōkeji namani mu matompo?

12 Yesu Kidishitu nandi wālamine kikōkeji kyandi kudi Leza mu matompo mavule, Yehova nandi wāmupadile mpalo. Lelo i bika byākweshe Yesu alame kikōkeji? Kinenwa kya Leza kinena’mba: “Pa mwanda wa nsangaji yādi imutūdilwe kumeso waūminine mutyi wa masusu, ne kubanga bumvu mpika.” (Bahebelu 12:2) Yesu wāsangele bininge pa kupandula dijina dya Leza. Kadi Yesu wāpadilwe mpalo ya kwitabijibwa na Shandi ne kutambula madyese makwabo mavule a kutendelwa. Bible unena’mba “washikata ku lundyo lwa lupona lwa Leza.” Kadi tutanga’mba: “Leza nandi wamuzunzwile pa kyaba kya peulu kutabuka kadi wamupa na mutyima tō dijina didi peulu pa majina makwabo onso.”Fidipai 2:9.

YEHOVA KEDILWEPO BYOTULONGA

13, 14. Lelo Yehova wiivwananga namani pa byotumulongela?

13 Tubwanya kukulupila’mba Yehova ukwete na mutyika kintu kyo-kyonso kyotulonga mwanda wa kumwingidila. Witwivwanga kitatyi kyotwityepelwa nansha kyotwimona’mba tubabulwe bwino. Witutanga mutyima bininge potukambakana pa mwanda wa kaji, nansha kukwatakanya kisaka. Kadi witwivwananga shi ketukiloñangapo bivule mu mwingilo wandi na motwadi twibilongela pa kala mwanda wa misongo ne kutyumukwa mutyima. Tubwanya kukulupila ne pa mfulo amba Yehova ukwete na mutyika kikōkeji kyetu nansha byotudi na makambakano.Tanga Bahebelu 6:10, 11.

14 Vuluka kadi amba, Yehova i “Wivwananga kulombela.” Tubwanya kukulupila’mba shi tumulomba, nabya uketwivwana. (Ñimbo ya Mitōto 65:2) “Tata wa lusa lukatampe ne Leza wa kusenga konso” uketupa kintu kyo-kyonso kyotusakilwa amba twikale nyeke pabwipi nandi. Mu bitatyi bimo ubwanya kulonga kino na kwingidija batutu ne bakaka. (2 Kodinda 1:3) Yehova usangalanga shi twivwanina bantu bakwabo lusa. “Yewa ufwila mulanda lusa wāpuja kudi Yehova; kadi kilongwa kyandi kiyampe ukamulubwilanga monka.” (Nkindi 19:17; Mateo 6:3, 4) Nanshi shi twikale na buntu ne kukwasha banabetu, Yehova umonanga bino bintu biyampe byotulonga bu mapu otumwapwija. Kadi ulaile kupala mpalo balonga uno muswelo.

MPALO YA DYALELO NE YA NYEKE NE NYEKE

15. Lelo i mpalo’ka yotengēle? (Tala kifwatulo ku ngalwilo.)

15 Bene Kidishitu bashingwe māni badi na lukulupilo lwa kutambula “kilukwa kya  boloke,” mpalo itamba kudi Yesu. (2 Temote 4:7, 8) Inoko, yuka’mba udi na mvubu ku meso a Leza nansha shi udi na lukulupilo lwishile na luno. Midiyo ne midiyo ya “mikōko mikwabo” ya Yesu itengele na kipyupyu mpalo ya būmi bwa nyeke mu paladisa pano pa ntanda mu mafuku āya kumeso. “Bakēsangaja mu bungi bwa ndoe.”Yoano 10:16; Ñimbo ya Mitōto 37:11.

16. Lelo i busengi’ka botutana mu 1 Yoano 3:19, 20?

16 Kitatyi kimo tubwanya padi kwimona’mba ketukiloñangapo bivule mu mwingilo wa Yehova, pakwabo ketwiipangula shi Yehova usangedile byotulonga. Tubwanya’nka ne kwimona’mba ketukifwaninwepo kutambula mpalo nansha imo. Ino ketufwaninwepo kwilwa’mba “Leza i mukatampe kupita mityima yetu kadi uyukile bintu byonso.” (Tanga 1 Yoano 3:19, 20.) Shi twingidila Yehova na lwitabijo ne buswe, nabya tukakulupila’mba uketupala mpalo, nansha shi byotulonga twibimona bu bya mvubu mityetye.Mako 12:41-44.

17. Lelo i mpalo’ka imo yotupalwa dyalelo?

17 Yehova weselanga bantu bandi nansha ke mu ano mafuku a mfulo a ngikadilo mibi ya Satana. Usakanga twikale na buyuki buvule ne ndoe ya kubadilwa mu kisaka kya bu bana na bana ntanda yonso. (Isaya 54:13) Bine, monka mwālaile’kyo Yesu, Yehova witupalanga mpalo dyalelo na kwitupa kisaka kya buswe kya batutu ne bakaka ntanda yonso. (Mako 10:29, 30) Kadi, boba bakimba Leza na mikeketo bapalwanga mpalo mikatampe ya ndoe ya mutyima, kuloelelwa, ne nsangaji.Fidipai 4:4-7.

18, 19. Lelo bengidi ba Yehova beivwananga namani pa mpalo yobapalwa?

18 Bengidi ba Yehova kujokoloka ntanda yonso bemwenanga ino mpalo ya kutendelwa itamba kudi Tata wetu. Kimfwa, Bianca wa mu Alemanye unena’mba : “Ne muswelo wa kufwija’ko Yehova ubampumbe pa kunkwasha mu makambakano ami ne kwikala nami mafuku onso. Mu ino ntanda mudi bibi ne tuvutakanya. Ino byoñingila pamo na Yehova, ndi mulamwe mu maboko andi. Ponso ponepāna bininge kwadi, ungeselanga katwa pa katwa.”

19 Tala kadi Paula wa myaka 70 mu Kanada, ubelanga bininge misongo ya muongo. Unena’mba nansha misongo yandi byoimukambakanyanga pa kwenda, inoko keikankejepo mwingilo wandi. Ubweja’ko amba: “Ñingidijanga manwa palapala a busapudi, kimfwa busapudi bwa ku telefone ne bwa kiponka na ponka. Nkankamikwanga na kulemba bisonekwa ne milangwe ya mu mabuku etu byomandaulanga kitatyi ne kitatyi. Nebitelanga bu ‘Bilembwa Byami Bimpandija.’ Ketukendelelapo na kutyumukwa mutyima shi tubambila meso ku milao ya Yehova. Yehova udi’ko nyeke mwanda wa kwitukwasha, nansha shi tudi na makambakano’ka.” Padi makambakano obe i meshile na a Bianca ne a Paula. Ino, ubwanya kulangulukila pa miswelo ikupadile’mo Yehova mpalo ne yapadile’mo bantu bakwabo. I kintu kiyampe’po kashā kulangulukila pa miswelo ikupadile’mo Yehova mpalo mu kino kitatyi ne muswelo wakakupala mu mafuku āya kumeso!

20. Le i bika byotubwanya kutengela shi twendelele kulonga bukomo bwetu bonso bwa kwingidila Yehova na kikōkeji?

20 Kokelwa nansha dimo amba milombelo yobe yampikwa budimbidimbi ikakupadilwa “mpalo ya ntanda ne miseke.” Kulupila’mba shi upwe “kulonga kiswa-mutyima kya Leza,” ukamona “kufikidila kwa mulao.” (Bahebelu 10:35, 36) Nanshi twendelelei kukomeja lwitabijo lwetu ne kulonga kintu kyo-kyonso kyotubwanya mwanda wa kwingidila Yehova. Tukulupilei amba Yehova uketupala mpalo!Tanga Kolose 3:23, 24.