Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Lelo Ubavuluka?

Lelo Ubavuluka?

Lelo utañanga manimelo a Kiteba kya Mulami a panopano? Eyo, tala bidi shi ubwanya kulondolola bino bipangujo:

I bubi’ka bwēsambile’po Yesu mu madingi adi mu Mateo 18:15-17?

Wādi wisambila pa myanda ibwanya kupwijibwa na bene bepile’yo. Ino shi myanda keipwijibwepo kadi i ilomba kupangilwa muntu, nabya bwabo ke bubi bukatampe. Kimfwa, buno bubi bubwanya kwikala buvubavuba nansha manyengenyenge.​—w16.05, p. 11.

Le i bika byobwanya kulonga pa kusaka’mba umwene ne pa mfulo mu butangi bwa Bible?

Ubwanya kulonda ano madingi: Ta mutyima ku byotanga, kimba ñeni yobwanya kuboila’ko; wiipangule amba, ‘Le nkakwasha nabyo bakwabo namani?’; kadi longa bukimbi pa myanda yotanga’ya mu bingidilwa byodi nabyo.​—w16.05, p. 29-31.

Lelo i bibi mwine Kidishitu kudila nansha shi ukulupile mu lusangukilo?

Kukulupila mu lusangukilo kekukankajangapo bulanda bukatampe bubwanya kwivwana mwine Kidishitu. Abalahama wādidile pāfwile Sala. (Ngalwilo 23:2) Mwenda mafuku, bulanda’bwa bwapwa.​—w16.05, p. 4.

Le muntu udi na kibīko kya mwino wa mulembi ne bantu basamba badi na bilonda bya butapani batelelwe mu Ezekyele shapita 9 belekeja bāni?

Twi bevwanije amba belekeja bipangwa bya mūlu bya bukomo byākweshe’ko pa konakanya Yelusalema kadi bikakwasha ne pa bonakani bwa pa Amakedona. Dyalelo, muntu udi na kibīko kya mwino welekeja Yesu Kidishitu, mwine utūla biyukeno pa boba ba kukapanda.​—w16.06, p. 31-32.

Le Bible wapandile ku miswelo’ka ya kutambwa?

Wapandile (1) ku koneka kwa bingidilwa byadi byandikwa’po pa kupita kwa myaka, kimfwa mbuba ne biseba; (2) ku lwana lwa bendeji ba politike ne ba bipwilo badi bakimba konakanya’ye; ne (3) ku bantu bamo badi batompa kushinta musapu wandi.​—w16.07, p. 4-7.

Le mwine Kidishitu ubwanya kupēleja būmi bwandi mu miswelo’ka imoimo?

Jingulula bintu byosakilwa, kokasupakanya lupeto ku bintu byokusakilwapo. Pikula lupeto lobwanya kwingidija. Fundula bintu byokwingidijangapo, ne kujokeja ndeni yodi nayo. Tyepeja kitatyi kyopityija ku kaji, ino ukwate mpango ya mwa kutandabwila mwingilo obe wa busapudi.​—w16.07, p. 12.

Le Bible ulombola bintu’ka bitabukile olo ne ndalama bulēme?

Yoba 28:12, 15 ulombola’mba ñeni itamba kudi Leza i milēme kutabuka olo ne ndalama. Powiikimba, longa bukomo bwa kwikala mwityepeje ne mwimanije mu lwitabijo.​—w16.08-F, p. 18-19.

Le i kyendele’mo dyalelo tutu aleke kutenda myevu?

Mu bibidiji bimo, kutenda myevu biyampe kubwanya kwitabijibwa ne kekulengejapo bantu bapele kwivwana musapu wa Bulopwe. Nansha nabya, batutu bamo bakwatanga butyibi bwa kutenda’yo. (1 Kodinda 8:9) Mu bifuko ne bibidiji bikwabo namo, kulama myevu kumonwanga bu kekufwaninwepo ku bene Kidishitu.​—w16.09, p. 21.

Mwanda waka tubwanya kukulupila mānga ya mu Bible ya Davida wālwile na Ngodiata?

Ngodiata i mutelwe bu mulampe, mupite muntu wa dyalelo utelwa bu mulampe bininge ku masantimetele 15. Davida i muntu wādi’ko bine, monka mwikilombwela bilembwa bīsambila pa njibo ya Davida ne mungya mwānenene Yesu. Kadi mānga itala kifuko nayo i mikwatañane na bisokwelwe.​—wp16.5-F, p. 13.

Lelo buyuki, kwivwanija, ne ñeni i bishile namani?

Muntu udi na buyuki ukongakanyanga myanda nansha mānga. Yewa udi na kwivwanija umonanga muswelo ukwatañene myanda kampanda na myanda mikwabo. Ino muntu udi na ñeni (tunangu) udi na bukomo bwa kusambakanya buyuki na kwivwanija ne kwibwingidija senene.​—w16.10, p. 18.