“Boba banangila mwendele mushipiditu [batanga mutyima wabo] ku bintu bya mushipiditu.”—LOMA 8:5.

ÑIMBO: 57, 52

1, 2. Mwanda waka bene Kidishitu bashingwe māni batalwanga na Loma shapita 8?

PADI kodi mutange Loma 8:15-17 mu kitatyi kya Kivulukilo kya lufu lwa Yesu. Ano mavese ashintulula muyukilanga bene Kidishitu bashingwe māni amba badi na lukulupilo lwa kwikala’ko nyeke momwa mūlu. Loma 8:1 unena’mba bashingwe māni “badi umbumo na Kidishitu.” Lelo Loma shapita wa 8 utala enka bashingwe māni kete? Nansha, le ubwanya ne kukwasha boba bakulupile kukekala’ko nyeke pano pa ntanda?

2 Loma shapita wa 8 wālembēlwe nakampata bashingwe māni. Batambulanga “mushipiditu” pamo bwa abo ‘batengele na kipyupyu kwalamunwa bu bana, kunyongololwa mu imbidi yabo.’ (Loma 8:23) Kumeso’ku, basa kwikala bu bana ba Leza momwa mūlu. Yehova i mwibalekele bubi bwabo kupityila ku kinkūlwa. I mwibatele bu boloke amba bekale bu bandi bana.Loma 3:23-26; 4:25; 8:30.

3. Mwanda waka boba badi na lukulupilo lwa kwikala’ko nyeke pano pa ntanda nabo bafwaninwe kwifunda Loma shapita 8?

3 Inoko Polo, ku ngalwilo kwa mukanda wandi ku bene  Loma, i mutele’ko muntu umo kādipo ushingilwe māni inoko aye mumonwe bu moloke ku meso a Leza. Uno muntu i Abalahama. Uno mwana-mulume wa kikōkeji wāikele’ko kitatyi kilampe kumeso kwa Yesu kupāna būmi bwandi bu kinkūlwa. (Tanga Loma 4:20-22.) Dyalelo nadyo, Yehova ubwanya kumona bene Kidishitu ba kikōkeji badi na lukulupilo lwa kwikala’ko nyeke pano pa ntanda bu boloke. Nabo babwanya kumwena mu madingi adi mu Loma shapita 8.

4. I bika byotufwaninwe kwiipangula potutanga Loma 8:21?

4 Mu Loma 8:21, Yehova witukulupija’mo amba ukaleta ntanda mipya ne amba bantu bakakūlwa ku bubi ne ku lufu. Uno vese unena’mba bakekala “na bwanapabo bwa ntumbo budi na bana ba Leza.” Le wimonanga bwa abe udi kala mu ino ntanda mipya? Nanshi lekai tubandaule byotufwaninwe kulonga pa kwikala’mo.

“KUTA MUTYIMA KU NGITU”

5. Lelo i myanda’ka īsambile’po Polo mu Loma 8:4-13?

5 Tanga Loma 8:4-13. Mu Loma shapita wa mwānda, Polo utela’mo bantu ba miswelo ibidi mishile, boba “banangila mwendele ngitu” ne boba “banangila mwendele mushipiditu.” Bamo balañanga’mba Polo wādi wisambila pa bene Kidishitu ne pa boba kebādipo bene Kidishitu. Inoko pano Polo wālembēle bene Kidishitu, boba bādi “betyilwe kwikala bajila.” (Loma 1:7) Nanshi boba bādi “banangila mwendele ngitu” ne boba bādi “banangila mwendele mushipiditu” bonso bādi bene Kidishitu. Lelo bādi beshile namani?

6, 7. (a) Mu Bible, le kishima “ngitu” kifunkilanga pa bika? (b) I muswelo’ka wingidijibwe kishima “ngitu” mu Loma 8:4-13?

6 Bible paingidija kishima “ngitu,” kibwanya kufunkila pa bintu bivule. Kitatyi kimo kifunkilanga pa umbidi wetu. (Loma 2:28; 1 Kodinda 15:39, 50) Kadi kibwanya  ne kufunkila pa bubutule. Kimfwa, Bible unena’mba Yesu “watambile ku lukunwa lwa Davida mwendele ngitu,” kadi Polo wātelele Bayuda bu ‘babutulwa nabo ku ngitu.’Loma 1:3; 9:3.

7 Pene’po, i bika byādi bisaka kunena Polo pa kutela bantu “banangila mwendele ngitu,” mu Loma 8:4-13? Tutana malondololo mu Loma 7:5. Polo i mulembe’mo amba: “Potwadi twiendeja mu bu ngitu, bya kusakasaka bya bubi byobya byadi bilangulwanga na Bijila byadi bingila mu bya ku ngitu byetu.” Pano Polo ushintulula’mba bantu “banangila mwendele ngitu” i boba batele mutyima bininge ku bya kusakasaka byabo bya bubi ne kwibilondalonda, boba balonga byonso byobasaka.

8. Mwanda waka Polo wādyumwine bene Kidishitu bashingwe māni baleke kunangila “mwendele ngitu”?

8 Mwanda waka Polo wādyumwine bene Kidishitu bashingwe māni baleke kunangila “mwendele ngitu”? Ne mwanda waka bene Kidishitu bonso dyalelo basakilwa kino kidyumu? Mwanda mwingidi wa Leza e-ense wa kikōkeji ubwanya kushilula kumona bya kusakasaka bya aye mwine bu bintu bya mvubu kutabuka mu bwandi būmi. Kimfwa, Polo wālembele amba banabetu bamo mu Loma bādi ke bapika ba “bya kusakasaka bya abo bene.” Ko kunena’mba kusambakena pamo, bidibwa, nansha bikwabokwabo byo byādi ke bintu bya mvubu kutabuka mu bwabo būmi. (Loma 16:17, 18; Fidipai 3:18, 19; Yude 4, 8, 12) Kadi mwenda mafuku, kwālupuka mwanda mu kipwilo kya mu Kodinda, mwanetu umo mu kino kipwilo wādi ulonga busekese “na mukaja shandi.” (1 Kodinda 5:1) Bine, Polo wādi na bubinga bwa kudyumuna bano bene Kidishitu babajinji baleke kunangila “mwendele ngitu.”Loma 8:5, 6.

9. Lelo Loma 8:6 kesambilangapo pa bika?

9 Kino kidyumu kikidi na kamweno ne dyalelo. Nansha muntu ke mwingidile Yehova myaka mivule ubwanya kushilula kunangila “mwendele ngitu.” Pene’pa, le Polo wādi usaka kunena’mba ketufwaninwepo kulangulukila pa bidibwa, kaji, kwipwija mukose nansha pa bukena?  Ke amopo. Bino bintu bidi na mvubu mu būmi. Nansha ke Yesu mwine wādīle bidibwa ne kudisha bantu bakwabo. Wādi uyukile amba nandi usakilwa kukōkolokwa. Kadi Polo wālembele amba kusambakena pamo kudi na mvubu mu busongi.

Mīsambo yetu ilombolanga bika? (Tala musango 10, 11)

10. Lelo bishima, “kuta mutyima ku” bishintulula bika?

10 Lelo i bika byādi bisaka kunena Polo pa kwingidija bishima, “kuta mutyima ku”? Kishima kya Kingidiki kingidije Polo kifunkila pa kuta mutyima pa kintu kampanda ne kulangulukila’po bininge. Mwifundi umo ushintulula’mba bino bishima bīsambilanga pa boba “beelele bininge mu kintu kampanda, besambila’po kyaba kyonso,” ne batele mutyima bininge ku bya kusakasaka bya abo bene. Balekanga bino bya kusakasaka bitādile būmi bwabo.

11. I bintu’ka bimo bibwanya padi kwikala bu bya mvubu mpata kotudi?

11 Bene Kidishitu ba mu Loma bādi basakilwa kwibandaula pa kuyuka bintu byobādi batele’ko mutyima. Le bādi batele’o ku “bintu bya ku ngitu”? Dyalelo, netu tufwaninwe kulangulukila pa bintu bya mvubu mpata kotudi. Lelo i bintu’ka byotusenswe kwisambila’po? I bika na bubine byotusenswe kulonga? Bamo babwanya kumona’mba balangulukilanga kyaba kyonso pa kutoma malwa meshileshile, pa kuneñenya mobo abo, kupota bivwalwa bipya, kwivudidija lupeto, nansha kuteakanya makonje. Bino bintu ke bibipo. Bibwanya kwikala na mvubu mu būmi bwetu. Kimfwa, nansha ke Yesu wāletele malwa ku butundaile, kadi Polo nandi wādingile Temote atome’mo “tuvinyu” mwanda wa kubelabela. (1 Temote 5:23; Yoano 2:3-11) Inoko malwa keādipo bu kintu kya mvubu mpata mu būmi bwabo. Le batwe netu? Le i bintu’ka byotutele’ko mutyima bininge mu būmi?

12, 13. Mwanda waka tufwaninwe kutadija pa bintu byotutele’ko mutyima?

12 Polo wādyumwine amba: “Kuta mutyima ku ngitu i lufu.” (Loma 8:6) Le wādi ukimba kunena bika? Shi tunangila “mwendele ngitu,” tubwanya kujimija kipwano kyetu na Yehova pano ne kujimija būmi bwa kumeso. Inoko kino kekifwaninwepo kulongeka. Mwanda muntu ubwanya kushinta. Le ubavuluka mwana-mulume wa busekese wa mu Kodinda wādi unenwe kupangwa? Wāshintyile, wāleka ne kulondalonda bya kusakasaka byandi bya busekese. Ino wāshilula monka kwingidila Yehova mu muswelo utōka.2 Kodinda 2:6-8.

13 Uno mwana-mulume wādi unangila bininge “mwendele ngitu,” nansha nabya wābwenye kushinta. O mwanda shi mwine Kidishitu dyalelo wadi kemushilule kulonda bya kusakasaka byandi bya bubi pa kyaba kya kulonda misoñanya ya Yehova, nandi ubwanya kushinta. Kuvuluka kidyumu kya Polo kubwanya kwitutonona tushinte ponso potusakilwa kushinta.

“KUTA MUTYIMA KU MUSHIPIDITU”

14, 15. (a) Lelo Polo wētusoñenye tute mutyima ku bika? (b) Le “kuta mutyima ku mushipiditu” kekushintululapo bika?

14 Polo pa kupwa kwisambila pa byaka bidi mu “kuta mutyima ku ngitu,” wāshintulwile amba: “kuta mutyima ku mushipiditu i būmi ne ndoe.” Bine ino i mpalo ya kutendelwa keidingakanibwa!

15 Ino “kuta mutyima ku mushipiditu” kekushintululapo amba muntu kakitanwapo  na myanda itananga bonso. Kekushintululapo amba muntu ukalangulukila ne kwisambila enka padi Yehova ne pa Bible. Kimfwa bengidi ba Leza ba mu myaka katwa kabajinji bādi na būmi’nka na budi na bonso. Bādi badya, batoma, basonga ne kusongwa, balelele bisaka, ne kwingila twaji.Mako 6:3; 1 Tesalonika 2:9.

16. Le i kintu’ka kyādi na mvubu mpata mu būmi bwa Polo?

16 Inoko Polo ne bene Kidishitu bakwabo babajinji kebālekelepo mingilo ya ku ngitu ikale bu bintu bya mvubu kutabuka mu būmi bwabo. Kimfwa, tuyukile amba Polo wādi wikwatakanya mu būmi na kupunga mapema. Inoko kādipo umwene kandi kaji bu kintu kya mvubu mpata mu bwandi būmi. Mu būmi bwa Polo, kwingidila Leza kyo kyādi kintu kya mvubu mpata. Polo wādi utele mutyima ku mwingilo wa kusapula ne kufundija. (Tanga Bilongwa 18:2-4; 20:20, 21, 34, 35.) Batutu ne bakaka ba mu Loma bādi basakilwa kwiula Polo, ne batwe netu mo monka.Loma 15:15, 16.

17. Le i madyese’ka adi mu “kuta mutyima ku mushipiditu”?

17 Le būmi bwetu bukekala namani shi tuta mutyima ku kwingidila Yehova? Loma 8:6 unena’mba: “kuta mutyima ku mushipiditu i būmi ne ndoe.” Kulonga namino i ne kuleka mutyima wetu uludikwe na mushipiditu wa Yehova ne kwifunda kulanga na mwalangila. Yehova i mwitulaye būmi bwa nsangaji ne kuloelelwa dyalelo ne būmi bwa nyeke mu mafuku āya kumeso.

18. Le tubwanya namani kwikala na ndoe shi tuta “mutyima ku mushipiditu”?

18 I bika byādi bisaka kunena Polo paānenene amba “kuta mutyima ku mushipiditu” kubwanya kwituletela ndoe? Muntu e-ense usakanga ndoe, nakampata ndoe ya mutyima, ino i batyetye kete beisokola. Dyese, na bukwashi bwa Yehova, tubwanya kwikala na ndoe ya mutyima ya binebine. Kadi tubwanya kwikala mu ndoe na ba mu kyetu kisaka ne ba mu kipwilo. Byotukidi ba kubulwa kubwaninina, kyaba kimo tubwanya kwipya myanda na batutu ne bakaka. Shi kino kibalongeka, tulondanga madingi a Yesu a amba: “Kapwane bidi na mwanenu.” (Mateo 5:24) Vuluka’mba tutu obe nansha kaka obe nandi wingidilanga Yehova, “Leza upāna ndoe.”Loma 15:33; 16:20.

19. I ndoe’ka ya pa bula yotubwanya kwikala nayo?

19 Shi tuta “mutyima ku mushipiditu,” kadi tukekala mu ndoe na Leza. Mupolofeto Isaya wālembele amba: “[Yehova] ukamulama mu ndoe, senene she-e, yewa utanga mutyima wandi podi; ke-muntu ukukulupilanga.”Isaya 26:3; tanga Loma 5:1.

20. Mwanda waka ubasangela madingi adi mu Loma shapita 8?

20 Twikale tukulupile kwikala’ko nyeke momwa mūlu nansha pano pa ntanda, batwe bonso tubwanya kumwena mu madingi a tunangu adi mu Loma shapita 8. Tufwijanga’ko Yehova pa kwitupa Bible witukwasha tumwingidile pa kyaba kya kwingidila bya kusakasaka bya batwe bene. Tuyukile amba shi tuta “mutyima ku mushipiditu,” nabya tukamona mpalo ya kutendelwa. Polo wālembele amba: “Kyabuntu kya Leza i būmi bwa nyeke monka mudi Kidishitu Yesu Mfumwetu.”Loma 6:23.