Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | KUSHINTULULA BIMONWA BITALA KĪKALO KYA KU MUSHIPIDITU

Bipangujo pa Boba Badi mu Kīkalo kya ku Mushipiditu

Bipangujo pa Boba Badi mu Kīkalo kya ku Mushipiditu

Lelo kodi mwiipangule pa myanda itala kīkalo kya ku mushipiditu ne bene badi’mo? Shi i amo, nankyo kudipo bunka. Pano ke myaka tununu na tununu īpatanya bantu pa uno mwanda. Bamo balañanga amba bankambo badi mu ntanda ya mishipiditu kadi bafwaninwe kulēmekwa. Bakwabo nabo amba mūlu i kīkalo kya nsangaji mudi talala, mushikete bamwikeulu ne bantu bonso bayampe ke bafwe. Bangi nabo amba ntanda ya mishipiditu i kīkalo kidi’mo midiyo tutwa na tutwa ya baleza.

Bantu bavule bapatanyanga amba ketubwanyapo kuyuka kintu nansha kimo kitala pa kīkalo kya ku mushipiditu, mwanda i kutupu muntu nansha umo watambile’mo wa kwitusapwila momwikadile. Inoko uno mulangilo i wa bubela. Yesu Kidishitu wādi mūlu, mu kīkalo kya ku mushipiditu kumeso kwa kwiya’ye pano pa ntanda. Wālombwele patōkelela bendeji ba bipwilo ba mu myaka katwa kabajinji amba: “Natūkile mūlu naiya kulonga, ke kiswa-mutyima kyamipo, aa, ino i kiswa-mutyima kya yewa wantumine.” Kadi Yesu wēsambile aye mwine ino myanda na batumibwa bandi amba: “Mu njibo ya Tata mudi bīkalo bivule.”Yoano 6:38; 14:2.

Shandya Yesu i Leza, wa dijina dya bu Yehova, kadi “njibo” ya Yehova i mūlu. (Ñimbo ya Mitōto 83:18) Shi ke pano, i kutupu ubwanya kushintulula senene mwikadile kīkalo kekimweka kupita Yehova Leza ne Yesu Kidishitu. I betusokwele myanda mivule itala kīkalo kya ku mushipiditu kupityila ku bimonwa bitendelwa byobāpele bantu ba kikōkeji.

Kishinte kilonda’ko kīsambila pa bipindi bya mu Bible bilombola bintu bimo byāmwene bantu mu bimonwa palapala. Pobandaula bino bimonwa, vuluka’mba, kīkalo kya ku mushipiditu ke kya ku ngitupo, kya bintu byotubwanya kumona nansha kutenga. O mwanda, pa kyaba kya kwitushintulwila myanda mu bishima bya ku mushipiditu byoketubwanyapo kwimvwana, Leza wāletele bimonwa bilombola bintu bya ku mushipiditu mu bishima byotubwanya kwimvwana. Bino bimonwa bikakukwasha uyuke biyampe boba badi mu kifuko kya ku mushipiditu, mwine “mudi bīkalo bivule.”