Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | KUSHINTULULA BIMONWA BITALA KĪKALO KYA KU MUSHIPIDITU

Bimonwa Bitala pa Boba Badi Mūlu

Bimonwa Bitala pa Boba Badi Mūlu

Bible witulombola bimonwa bivule bitukwasha tuyuke mwikadile kīkalo kya mūlu. Tukulomba wibibandaule na katentekeji. Nansha myanda imo ya mu bimonwa byoilombwelwe mu muswelo wa kyelekejo, bimonwa bikakukwasha uyuke boba badi mu kīkalo kya ku mushipiditu ne kwivwanija muswelo obadi na lupusa podi.

YEHOVA I MWINE MUKATAKATA MWINE

“Lupona lumo lwikele mūlu, kadi kwadi umo wadi ushikete pa lupona’lwa. Kadi yewa wadi ushikete’po wadi umweka pamo bwa dibwe dya yasepe ne dibwe dilēme dya musombelo utyila, kadi lupona lwadi lujokolokwe na nkongolo umweka bwa emelode.”Kusokwelwa 4:2, 3.

“Kwadi kulelema kujokoloke. Pamo’nka bwa kumweka kwa nkongolo udi mu dikumbi mu difuku dya mvula, enka nenki e mwadi mwikadile ne kumweka kulelema kujokoloke. Kwine kuno’ku ko kwadi kumweka kwa kīfwa kya ntumbo ya Yehova.”Ezekyele 1:27, 28.

Bino bimonwa byāpelwe mutumibwa Yoano ne mupolofeto Ezekyele, bilombola bukatampe bwa Yehova Leza, Mwine Mukatakata Mwine, kupityila ku bintu byotubwanya kumona—kimfwa mabwe mayampe a bulēme, nkongolo, ne bukatampe bwa lupona. Bitulombola’mba kifuko kikele’po Yehova i kiyampe mpata, kisangaja, kadi kya ndoe.

Muswelo umweka kifuko kya Leza ukwatañene na binenwa bya mulembi wa mitōto wāsonekele amba: “Ke-muntu Yehova i mukatampe, wakutendelwa pakatampe pene; u tabukile baleza bonso kwakamibwa. Ke-bantu baleza bonso ba bantu i bankishi; ino Yehova aye wapangile madiulu. Buleme ne bulopwe bidi mu kifuko kyandi; bukomo ne buya bidi mu njibo mipandulwemo yandi.”Ñimbo ya Mitōto 96:4-6.

Yehova byadi Mwine Mukatakata Mwine, witwitanga tumufwene mu milombelo ne kwitukulupija’mba uketwivwana. (Ñimbo ya Mitōto 65:2) Leza witutele mutyima ne kwitusanswa bininge, bilengeje ne mutumibwa Yoano asoneke na bubine amba: “Leza i buswe.”1 Yoano 4:8.

YESU WIKELE PAMO NA LEZA

“[Shitevani mwanā bwanga wa Kidishitu], byawadi muyulwe mushipiditu ujila, watala mūlu sō wamona ntumbo ya Leza ne Yesu wimene ku kuboko kwa lundyo lwa Leza, wanena’mba: ‘Talai! Namone madiulu ashituka ne Mwanā muntu wimene ku kuboko kwa lundyo lwa Leza.’”Bilongwa 7:55, 56.

Kinondanonda’tu na pāmwene Shitevani kino kimonwa, Yesu wāipailwe enka na bantu bādi besamba na Shitevani—ke bendeji ba Bayuda kadi. Kino kyālombwele patōkelela’mba Yesu i mūmi, kadi wāsangukile ne kutumbijibwa. Pa kino, mutumibwa Polo wāsonekele amba: “[Yehova wāsangwile Yesu] mu bafwe, wamushikatyija ku kuboko kwandi kwa lundyo mu bifuko bya mūlu, bidi peulu kutabuka umbikalo o-onso ne lupusa ne bufumu ne dijina dyo-dyonso dikokeja kutelwa, ke’nkapo mu ino ngikadilo ya bintu kete, aa, ino i ne mu yoya ikāya’ko mine.”—Efisesa 1:20, 21.

Kadi pa kulombola kifuko kyandi kya peulu, Bisonekwa bīsambila padi Yesu amba pamo bwa Yehova, nandi utele bantu mutyima bininge. Mu bula bwa mwingilo wandi pano pa ntanda, Yesu  wābelwile babela, wāundapa babilema ne kusangula bafwe. Kupityila ku kitapwa kya lufu lwandi, i mulomboje buswe bukatampe bwaswele Leza ne bantu. (Efisesa 2:4, 5) Yesu byashikete ku lundyo lwa Leza, panopano ponka kasa kwingidija lupusa lwandi ne kwesela bantu ba kikōkeji ba pano pa ntanda ponso.

BAMWIKEULU BENGIDILANGA LEZA

“[Ami mupolofeto Danyele] nabandila enka ne byatūdilwe bipona, ne umo mwine Kafulamoba [Yehova] washikata. . . . Tununu ne tununu tumwingidila, kabidi misungu dikumi dya tununu ya tununu dikumi baimana kumeso andi.”Danyele 7:9, 10.

Mu kimonwa kya mūlu, Danyele kāmwenepo’tu mwikeulu umo, i bamwikeulu bavule. Bine ye kino kyādi kimonwa kileta moyo! Bamwikeulu i bipangwa bya ku mushipiditu bya ntumbo, bya ñeni ne bya bukomo. Mobadi mubadilwa baselafimi ne bakelubi. Bible utela bamwikeulu misunsa 250 ne kupita.

Bamwikeulu ke bantupo bāikele’ko bidi pano pa ntanda, mhm. Leza wāpangile bidi bamwikeulu kitatyi kilampe kumeso kwa kupanga bantu. Pāpangilwe ntanda, bamwikeulu bādi babandila ne kwela nsadi ya tusepo.Yoba 38:4-7.

Mwingilo umo bidi bamwikeulu ba kikōkeji obengidila Leza i wa kukwatakanya mwingilo mukatampe wingilwa pano pa ntanda dyalelo—ke wa kusapula kadi myanda miyampe ya Bulopwe bwa Leza. (Mateo 24:14) Muswelo obakwatakanya uno mwingilo wāsokwelwe mu kimonwa kya mutumibwa Yoano, wālembele amba: “Kadi namwene mwikeulu mukwabo wipapa umbukata mwa mūlu, wadi na myanda miyampe ya nyeke ya kusapwila boba bekele pano pa ntanda, mizo yonso ne bisaka ne ndimi ne bantu.” (Kusokwelwa 14:6) Nansha bamwikeulu byokebesambengapo na bantu dyalelo na mobādi besambila dimodimo pa kala, ino baludikilanga boba basapula myanda miyampe ku bantu ba mityima myoloke.

SATANA ONGOLANGA BAVULE

“Kadi kwatambile divita mūlu: Mikele [Yesu Kidishitu] ne bamwikeulu bandi balwa na mpumina, mpumina nandi ne bamwikeulu bandi kebalu nabo ino kanekenyepo, nansha kifuko kyabo kutanwa monka momwa mūlu mpika. Ebiya mpumina mukatampe’wa waelwa  panshi, nyoka wa kala na kala, yewa witwa bu Dyabola ne bu Satana, mwine ongolanga ntanda yonso ikelwe na bantu; waelwa pano pa ntanda, ne bamwikeulu bandi bene baelwa panshi pamo nandi.”Kusokwelwa 12:7-9.

Mūlu kemwādipo ndoe nyeke. Ku ngalwilo’tu kwa mānga ya muntu, mwikeulu umo wātamije kilokoloko kya kutōtwa, wātombokela Yehova, ne kwikala ke Satana, kushintulula ko kunena’mba “Kinkwa.” Mwenda mafuku bamwikeulu bakwabo belunga nandi mu butomboki bāikala ke bandemona. I balwe Yehova na mutyima mubi ne kulengeja bantu bavule baleke kulonda buludiki bwa Yehova bwa buswe.

Satana ne bandemona bandi i babi kadi i bantapani. I balwana na bantu kadi i bakolomone masusu mavule adi’ko pa ntanda. Kimfwa, Satana wāipaile bimunanwa ne bengidi ba Yoba, mwingidi wa kikōkeji. Ebiya, wāipaya bana bonso dikumi ba Yoba na kutonona “luvula lukatampe” luponeje njibo mobadi bashikete. Kupwa, Satana “wameneja Yoba mpusu isansa nakampata sū! kushilwila ku kinyantyilo kya kulu kwandi, kutūla ne ku nsongo ya mutwe wandi.”—Yoba 1:7-19; 2:7.

Nansha nankyo, panopano ponka, Satana usa kutalulwa’ko. Tamba welwa pano pa ntanda, uyukile amba “udi na kakitatyi katyetye.” (Kusokwelwa 12:12) Satana i mutyibilwe butyibi bwa lufu, ne uno bine i mwanda muyampe!

BOBA BATAMBILE PANO PA NTANDA

“[Yesu] wapotēle Leza bantu ba ku bisaka byonso ne ndimi ne bantu ne mizo, kadi webālamwine ke bulopwe ne babitobo ba Leza wetu, bakabikalanga bu balopwe ba ntanda.”Kusokwelwa 5:9, 10.

Monka mwāsangwidilwe Yesu ku būmi bwa mūlu kutamba pano pa ntanda, nanshi kudi ne bakwabo bakasangwilwa’ko. Yesu wāsapwidile batumibwa bandi ba kikōkeji amba: “Keñenda kukemulongolwela kifuko. Ne kadi, . . . nsa kwiya monka kadi nkemutambulanga kwami, amba kokwa kondi nenu mwikale konka.”Yoano 14:2, 3.

Boba ba kwenda mūlu, kudi byobakalonga’mo. Bakabunda pamo na Yesu umbikalo wa Bulopwe ukaludika mwenda mafuku, ntanda yonso ikelwe na bantu ne kwibaletela madyese. Buno bo Bulopwe bwānenene Yesu balondi bandi kulomba mu lulombelo lwa kulondela’po amba: “Tata wetu wa mūlu, dijina dyobe dipandulwe. Bulopwe bobe bwiye. Kiswa-mutyima kyobe kilongeke, pamo na momwa mūlu, ne pano pa ntanda pene.”Mateo 6:9, 10.

BIKALONGA BOBA BADI MŪLU

“[Ami mutumibwa Yoano] naivwana diwi dikatampe ditamba mu lupona kedinena’mba: ‘Talai! Pema wa Leza udi na bantu, . . . kadi ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.’”Kusokwelwa 21:3, 4.

Kino kimonwa kya bupolofeto kīsambila pa kitatyi, Bulopwe bwa Leza bubundilwe na Yesu ne na boba basangwilwe pano panshi kyobukafudija buludiki bwa Satana ne kwalamuna ntanda ke paladisa. Bintu bine biletela bantu misanshi ne tusuwa kebikekala’kopo monka. Enka ne lufu lwine ne kolwaya jimejime.

Le bikekala namani ku midiyala ya bantu bafwile kebakasangulwapo kwenda mūlu? Kumeso’ku, bakajokejibwa ku būmi na kyepelo kya kwikala’ko nyeke mu Paladisa pano pa ntanda.Luka 23:43.

Bino bimonwa bitufundija’mba Yehova Leza ne wandi Mwana, Yesu Kidishitu, bamwikeulu ba kikōkeji ne boba bapotelwe pano pa ntanda, bonso betutele mutyima bininge ne kwitusakila biyampe. Pa kuyukila’ko bivule bitala pa byobakalonga, tukulomba wisambe na Batumoni ba Yehova nansha kutwela pa diteba dyetu, www.jw.org, ne kutentula dibuku Lelo I Bika Bine Bifundija Bible?