Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 13

Wifunde Uyuke Byālongele Yesu Pobāmutompele

Wifunde Uyuke Byālongele Yesu Pobāmutompele

Yesu upwa’tu kubatyijibwa na Yoano, mushipiditu wa Leza ubamutwala mu ntanda mutuputupu ya Yudea. Udi na bintu bivule bya kulangulukila’po. Yesu pa kubatyijibwa, “madiulu ashituka.” (Mateo 3:16) Pano ubwanya kuvuluka bintu byāefundile ne byālongele mūlu. Na bubine, udi na bintu bivule bya kulangulukila’po!

Yesu wapityija mafuku 40 mu ntanda mutuputupu, dyuba ne bufuku. Mu ano mafuku onso wadi kadile. Yesu pa kwivwana nzala bininge, Satana Dyabola waiya kumutompa amba: “Shi wi mwanā Leza, nena ano mabwe ālamuke ke mikate.” (Mateo 4:3) Yesu pa kuyuka’mba i bibi kwingidija bukomo bwa kulonga kingelengele mwanda wa kwisangaja, wapele ditompo.

Dyabola kuleka’byo mpika. Wamutompa monka mu muswelo mukwabo. Wanena Yesu eele munshi kutamba pa musaka wa tempelo. Ino Yesu wapele ano makayo a kwimwekeja. Yesu watela Bisonekwa ne kumulombola’mba i kibi kutūla Leza pa ditompo uno muswelo.

Ebiya mu ditompo dya busatu, Dyabola walombola Yesu mu muswelo kampanda “malopwe onso a ntanda ne ntumbo yao,” kanena’mba: “Nkakupa bino bintu byonsololo’bi shi upone panshi ne kulonga kilongwa kya kuntōta.” Yesu wapele monka na kusumininwa’mba: “Taluka papo, Satana!” (Mateo 4:8-10) Ketabijepo kulonga bibi, mwanda uyukile amba mwingilo ujila ufwaninwe kwingidilwa enka Yehova. Bine, watonge kukōkela nyeke Leza.

Tubwanya kuboila ñeni ku ano matompo ne ku malondololo a Yesu. Matompo ādi a bine kadi alombola’mba Dyabola ke ngikadilopo ya bubi na mulangila bamo. Ino i muntu wambulwa kumweka udi’ko bine. Kadi ino nsekununi itulombola’mba imbikalo ya ntanda dyalelo i ya bene ya Dyabola; aye ye wiyendeja. Mwanda shi keyadipo yandi, le yadi ya kwikala namani bu ditompo kudi Kidishitu pa kumupa’yo?

Kadi Dyabola wānenene amba usaka kupala Yesu shi alonge kilongwa kimo kya kumutōta, kumupa Yesu malopwe onso a ntanda. Dyabola ukokeja kwitutompa mu muswelo umo onka, padi na kutūla ku meso etu mikenga ya kupeta bininge, lupusa, nansha kitenta. Shi tulonde kimfwa kya Yesu na kushala nyeke bakōkele kudi Leza mu matompo o-onso nabya tubaikala ba tunangu. Ino vuluka’mba Dyabola wāshile Yesu “kufika ne pa kitatyi kikwabo kifwaninwe.” (Luka 4:13) Ne batwe netu mo monka, tufwaninwe kutadija nyeke.