Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 12

Yesu Wabatyijibwa

Yesu Wabatyijibwa

MATEO 3:13-17 MAKO 1:9-11 LUKA 3:21, 22 YOANO 1:32-34

  • YESU WABATYIJIBWA NE KUSHINGWA MĀNI

  • YEHOVA WATELA YESU BU WANDI MWANA

Myeji isamba ibapite na pashilwile Yoano Mubatyiji kusapula. Yesu padi na kintu kya myaka 30, waiya kudi Yoano ku Munonga wa Yodano. Mwanda waka? Ke mwandapo wa kumunangila bitupu. Kadi Yesu kailepo kutala mwendela mwingilo wa Yoano, aa. Ino kyaila Yesu, i kunena Yoano amubatyije.

Yoano wapele na bubinga amba: “Ami ye ufwaninwe kubatyijibwa nobe, ino abe koiya’ko kondi, a?” (Mateo 3:14) Yoano uyukile amba Yesu i Mwana wa pa bula wa Leza. Vulukai, paadi ukidi mu ndá ya inandi, Yoano watombojokele na nsangaji paile Madia na dīmi dya Yesu kupempula Edisabeta inandya Yoano. Inandya Yoano ye uno wamusapwidile’mo byalongekele’bya. Kadi Yoano kabudilwepo kuyuka’mba mwikeulu ye wasapwile kubutulwa kwa Yesu ne myanda ya bamwikeulu bamwekēle bakumbi bufuku bwabutwilwe Yesu.

Yoano uyukile amba lubatyijo i lwa boba basaka kwisāsa bubi bwabo. Ino Yesu kadipo na bubi. Nansha byapela Yoano, Yesu aye wamunena’mba: “Pano’ko leka bidi, mwanda i kitufwaninwe uno muswelo pa kulonga kyokya kyonso kyoloke.”​—Mateo 3:15.

Mwanda waka i kyendele’mo Yesu abatyijibwe? Yesu kabatyijibwepo mwanda wa kilomboji kya kwisāsa bubi. Lubatyijo lwandi lulombola’mba wepāna aye mwine mwanda wa kulonga kiswa-mutyima kya Shandi. (Bahebelu 10:5-7) Yesu wadi sendwe wa mbao, pano’ko ke kitatyi kya aye kushilula mwingilo wamutumīne Shandi wa mūlu kwingila pano pa ntanda. Le ulanga’mba Yoano utengele kumona kintu kekyamwekele pasa kubatyijibwa Yesu?

Yoano wanenene mwenda mafuku amba: “Yewa mwine wantumine kubatyija mu mema wanombwele amba, ‘Ense owakamona mushipiditu umutūkila ne kwikala padi, ye aye ubatyija mu mushipiditu ujila.’” (Yoano 1:33) Nanshi Yoano utengēle mushipiditu wa Leza wiye pa muntu umo mu boba babatyija. Ne na bubine, Yesu uvubuka’tu mu mema, wabamone “mushipiditu wa Leza utūka pamo bwa nkunda wiya [padi Yesu].” Yoano kadipo ne kyatulumukila pa kumona kino.​—Mateo 3:16.

Ino pa kubatyijibwa kwa Yesu kubalongeka kintu kikatampe kupita. ‘Madiulu abamushitukila.’ Le kino kishintulula bika? Padi kishintulula’mba  mu kitatyi kya kubatyijibwa kwa Yesu būmi bwandi bwa mūlu kumeso kwa kwiya pano pa ntanda bubamwiya mu ñeni. Nanshi, Yesu wavuluka būmi bwandi bwa bu mwana wa ku mushipiditu wa Yehova, kutentekela’po ne bubine bwamufundije Leza mūlu kumeso kwa kwiya pano pa ntanda.

Kadi, Yesu pa kubatyijibwa kubatambe diwi mūlu amba: “Uno’u i wami Mwana, muswedibwe, ondoelelwe.” (Mateo 3:17) Le i diwi dya ani? Ke diwipo dya Yesu mwine; mwanda aye udi padi Yoano. I diwi dya Leza. Na bubine, Yesu i Mwanā Leza. Aye ke Lezapo.

Tufwaninwe kuyuka’mba pano Yesu i mwanā Leza pamo na mwādi mwikadile Adama, muntu mubajinji. Mwanā bwanga Luka, pa kushintulula lubatyijo lwa Yesu, i mulembe amba: “Pashilwile Yesu mwingilo wandi, wadi na kintu kya myaka 30, aye wadi monka mwadi mulangila bantu amba, i mwanā Yosefa, mwanā Hedi, . . . mwanā Davida, . . . mwanā Abalahama, . . . mwanā Noa, . . . mwanā Adama, mwanā Leza.”​—Luka 3:23-38.

Monka mwādi mwikadile Adama bu “mwanā Leza,” mo mwikadile ne Yesu. Yesu pa kubatyijibwa, watwela mu kipwano kipya na Leza, pene’pa waikala ke Mwanā Leza wa ku mushipiditu. Mu uno muswelo, Yesu waikala na kyepelo kya kufundija bubine bwa Leza ne kulombola dishinda dya būmi. Yesu washilula būmi bukamufikija ku kushiya būmi bwandi bwa pano panshi bu kitapwa mwanda wa bantu ba bubi.