YOANO 2:1-12

  • MASOBO A BUTUNDAILE MU KANA

  • YESU WAALAMUNA MEMA KE VINYU

Pano ke mafuku tamba Natanela wikala mu bana ba bwanga babajinji ba Yesu. Yesu ne bana ba bwanga bamo babajinji abaenda kungala ku kipindi kya ntanda ya Ngadilea, kwabo. Kobenda i ku kibundi kya Kana, ku ba Natanela. Kibundi kya Kana kidi mu ngulu ya kungala kwa Nazala, kwine kwatamine Yesu. I betwe ku masobo a butundaile mu Kana.

Inandya Yesu nandi i mwiye’ko. Byadi mulunda na kisaka kya boba basa kwisonga, Madia i mwiele bininge mu kukwasha’ko ku beni. Na pano kala wamone amba kudi byatyepa, wakasapwila Yesu amba: “Kebadipo na vinyu.”​—Yoano 2:3.

Na bubine, Madia walombe Yesu alonge’po kintu pa vinyu yapwa. Yesu waingidija lukindi pa kupela amba: “A mwana-mukaji, le bitutala namani abe ne ami? Nsá yami keyafikile?” (Yoano 2:4) Yesu byadi Mulopwe mutongwe na Leza, mwingilo wandi i owa umunena kulonga Shandi wa mūlu, ke ba kisakapo nansha balunda. Madia na tunangu, washila wandi mwana mwanda’wa, wasapwila’tu boba bengila amba: “Longai byonso byakemulombola.”​—Yoano 2:5.

Kwadi milondo ya mabwe isamba, mulondo ne mulondo ubwanya kutweja malitele 40. Yesu wasoñanya bengidi amba: “Dingai mema mu milondo.” Kupwa Yesu webanena’mba: “Tapulai’mo mukape mutangidiji wa masobo.”​—Yoano 2:7, 8.

Mutangidiji wa masobo watulumuka ino vinyu milumbuluke aye kuyuka mpika amba ibalupulwa mu kingelengele. Waita musoñañani kamunena’mba: “Muntu ense ulupulanga bidi vinyu milumbuluke, ebiya shi bantu abakolwe, kalupula yoya miyampe bityetye. Abe ukilamine vinyu milumbuluke kufika ne pano.”​—Yoano 2:10.

Kino i kingelengele kibajinji kyalonga Yesu. Bandi bana ba bwanga bapya pa kumona kino kingelengele, abakomeja lwitabijo lwabo mwadi. Kupwa, Yesu, inandi, ne bamwanabo abaenda ku Kapanama kibundi kidi pa bukata bwa kungala ne kushika kwa Dijiba dya Ngadilea.