Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 72

Yesu Watume Bana ba Bwanga 70 Kukasapula

Yesu Watume Bana ba Bwanga 70 Kukasapula

LUKA 10:1-24

  • YESU WATONGE BANA BA BWANGA 70 KADI WEBATUME KUKASAPULA

Ke ku mfulo kwa mwaka 32 Yesu ke mwiye, ke kintu kya myaka isatu tamba Yesu ubatyijibwa. Kepaijije aye ne bandi bana ba bwanga badi mu Yelusalema ku Masobo a Tabenakulo. Mobimwekela bakidi dya kubwipi. (Luka 10:38; Yoano 11:1) Ino Yesu, mu myeji isamba yamushadila’ko ya mwingilo wandi, kitatyi kivule wekipityija mu Yudea nansha bukila bwa Munonga wa Yodano mu kipindi kya ntanda ya Pelea. Ufwaninwe kusapula ne mu kino kipindi kya ntanda.

Pashika ya mu 30 Yesu ke mwiye ipwa’tu, Yesu wasapwile myeji kampanda mu Yudea ne mu Samadia. Ebiya kubwipi na Pashika ya mu 31 Yesu ke mwiye, Bayuda mu Yelusalema bakimbile kumwipaya. Ino mu mwaka umo ne kipindi walondele’po, Yesu wafundije bininge mu kipindi kya kungala, ku Ngadilea. Mu kine kitatyi’kyo, bantu bavule baikele ke balondi bandi. I mu Ngadilea mwafundije Yesu batumibwa bandi, webatuma ne kwibapa bulombodi amba: “Sapulai amba: ‘Bulopwe bwa mūlu bubafwena pabwipi.’” (Mateo 10:5-7) Pano wateakanya’ko kampanye ka busapudi mu Yudea.

Pa kushilula kano kampanye, Yesu watonge bana ba bwanga 70 webatume babidi babidi. Nanshi, kwaikele bisumpi 35 bya basapudi ba Bulopwe mu ntanda’ya, mwine mudi “mwangulo . . . mukatampe, ino bengidi . . . batyetye.” (Luka 10:2) Basa kubadikila kwenda mu bifuko bikebalonda’mo Yesu. Ba 70 bafwaninwe kubelulañana ne kusambakanya musapu umo onka usapula Yesu.

Bano bana ba bwanga kebafwaninwe kwela kyaba na kufundija mu mashinankonka. Yesu webasapwila kwenda ku mobo a bantu. Webalombola’mba: “Konso komutwela mu njibo, nenai bidi amba: ‘Ndoe ikale mu ino njibo.’ Kadi shi mwine’mwa mudi mulunda na ndoe, nankyo ndoe yenu ikekala pādi.” Le musapu wabo i musapu’ka? Yesu webanena’mba: ‘Mwikale kwibalombola’mba: “Bulopwe bwa Leza kebudi pabwipi nenu.”’​—Luka 10:5-9.

Bulombodi bwapa Yesu ba 70 i bumo bonka na bwaapele batumibwa 12 paebatumine pano kepadi kintu kya mwaka mutuntulu. Webadyumuna’mba ke bonsopo bakebatambula biyampe. Ino bukomo bwabo bukateakenya Yesu dishinda pakebalonda’ko amba boba basangela musapu bekale na kipyupyu kya kumona Mfumu ne kufundijibwa nandi.

Na pano kala, bisumpi 35 bya basapudi ba Bulopwe bibajokela kudi Yesu. Kebamulombola na nsangaji amba: “A Mfumwetu, ne bandemona bene badi betukōkela pa kutela dijina dyobe.” Ino lapolo miyampe ibasangaja Yesu mwanda webalondolola’mba: “Namone Satana ke mupone kala pamo bwa dipeni momwa mūlu. Talai! Nemupe lupusa lwa kutyimpa banyoka ne tuminye mu mayo.”​—Luka 10:17-19.

 Mu uno muswelo, Yesu wakulupija balondi bandi amba bakabwanya kukomena kintu kyonso kya kwibasanshija, mu muneneno wa kyelekejo i kutyampa banyoka ne tuminye. Kadi, i biyampe bakulupile amba mwenda mafuku Satana ukapona mūlu. Kadi Yesu wakwasha ba 70 bayuke kine kya mvubu mu lwendo lwabo lulampe. Wanena’mba: “Kemwakisangalai mwanda mishipiditu ibemukōkela, ino sangalai mwanda majina enu i malembwe mūlu.”​—Luka 10:20.

Yesu wasangala bininge ne kutendela Shandi patōkelela pa kwingidija bano bengidi bandi betyepeje mu uno muswelo utendelwa. Yesu waalamukila kudi bana bandi ba bwanga, webasapwila amba: “Katōkwe kao meso amona byomumona’bi. Mwanda nemulombola’mba: Bapolofeto ne balopwe bavule bāsakile kumona bintu byomubandila’bi ino kebāmwene’byopo, ne kwivwana bintu byomwivwana’bi ino kebāivwene’byopo.”​—Luka 10:23, 24.