Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 76

Udya kwa Mufadiseo

Udya kwa Mufadiseo

LUKA 11:37-54

  • YESU WATOPEKA BAFADISEO BANZAZANGI

Yesu padi mu Yudea, waitabija kukadya kwa Mufadiseo umo wamwita. Mobimwekela, ke bidibwapo bya ku kyolwa ino i bya mu dyuba. (Luka 11:37, 38; dingakanya na Luka 14:12.) Kumeso kwa kudya, Bafadiseo badi na kisela kyabo kya koya ku makasa kufika ne mu nkongweba. Ino Yesu aye kafikijepo mu nkongweba. (Mateo 15:1, 2) Bijila bya Leza kebilombelepo bantu koya kufika ne mu nkongweba, ino kadi kebipēleje’kopo.

Uno Mufadiseo watulumuka mwanda waka Yesu kalondelepo kino kisela. Yesu pa kujingulula’kyo wanena’mba: “Banwe Bafadiseo mutōkejanga panja pa kitomeno ne pa nsāni, ino munda mwenu mwi bayule makomwa-meso ne bubi bā. Banwe bampikwa ñeni! Yewa wālongele panja mwene ye wālongele ne munda mwine?”​—Luka 11:39, 40.

Koya ku makasa kumeso kwa kudya ke mwandapo, ino mwanda udi’po i buzazangi bwa bipwilo. Bafadiseo ne bakwabo boyanga mungya kisela mwanda wa kutōkeja makasa abo, ino kutalula mutyima wabo ku bibi amba utōke kutupu. O mwanda Yesu webadingila’mba: “Pānai bintu bidi munda bu byabuntu bya ku lusa, kadi talai! bintu byenu byonso bikekala bitōka.” (Luka 11:41) Bino i bya bine! Kupāna kufwaninwe kutamba ku mutyima, ke pa mwandapo wa kusaka kutulumuna bakwabo na kwimwekeja bu moloke.

Ke kunenapo amba bano bantu kebapānangapo. Yesu wanena’mba: “Mutūlanga kya dikumi kya mante ne kya penganona ne kya bikwabo byonso bya mani bya mu budimi, ino mupēlula’ko boloke ne buswe bwa Leza! Bino bintu e byomwadi munenwe kulonga, inoko kwampikwa kupēlula byobya bikwabo.” (Luka 11:42) Bijila bya Leza byādi bilomba kupāna bya dikumi (kipindi kimo pa bipindi 10) bya byangulwa. (Kupituluka 14:22) Mu bino bintu mubadilwa ne mante ne penganona, biyombo nansha munamuna ingidijibwa pa kutobaja bidibwa. Bafadiseo i basumininwe kutūla bya dikumi bya biyombo, ino bine bilombelwe mu Bijila kulonga’byo mpika, kimfwa kwikala na boloke ne butūkanye ku meso a Leza.​—Mika 6:8.

Yesu waendelela na kunena’mba: “Malwa enu banwe Bafadiseo, mwanda muswile byaba bya kumeso mu mashinankonka ne kwimunwa mu mansoko! Malwa enu, mwanda mudi bwa byobya bibundu byampikwa kumweka senene, binanga’po bantu kuyuka mpika!” (Luka 11:43, 44) Bine, bantu bādi bakukala pa bino bibundu, ne kwikala ba disubi mungya bisela. Yesu watela uno mwanda pa kulombola amba disubi dya Bafadiseo i difyame.​—Mateo 23:27.

Muntu umo uyukile Bijila bya Leza senene wetompwela amba: “A Mufundiji, byonena’byo witutukanga ne batwe bene.” Bano bantu basakilwa kuyuka amba kebakwashangapo bantu. Yesu wanena’mba: “Malwa enu ne banwe bene bajingulwile Bijila, mwanda mutwikanga bantu biselwa bikomo kusela, ino banwe bene kemuteñangapo biselwa’bya nansha na munwe umo! Malwa enu, mwanda mūbakanga bibundu bya bapolofeto, ino bakulutuba benu bo bēbepaile!”​—Luka 11:45-47.

Biselwa bīsambila’po Yesu i bisela bya ku kanwa ne muswelo ushintulula Bafadiseo Bijila. Bano bantu kebapēlejejangapo bantu kiselwa. Ino bakomenejanga’mba muntu ense ufwaninwe kulama biselwa byobebalēmejeja. Bakulutuba babo bāipaile bapolofeto ba Leza, kushilwila pa Abele ne kwenda kumeso. Ino pano abo kebamwekeja ku bantu amba balēmekele bapolofeto na kūbaka bibundu byabo, mu uno muswelo beulanga mityima ne bilongwa bya bakulutuba babo. Pano bakimbanga ne kwipaya Mupolofeto mwine wa Leza. Yesu wanena’mba Leza ukalandula mambo a luno  lukongo. Ne kino kyalongekele myaka 38 pa kupita’po, ko kunena’mba mu 70 Yesu ke mwiye.

Yesu wabweja’ko amba: “Malwa enu banwe bajingulwile Bijila, mwanda mwatalwile lufungulo lwa buyuki. Banwe bene kemwatwelele’mopo, kadi mukankaja ne boba batwela’mo bene!” (Luka 11:52) Bano bantu badi bafwaninwe kufungwila bantu Kinenwa kya Leza na kwibashintulwila’kyo, ino abo bebajimijija mukenga wa kwikiyuka ne kwikivwanija.

Le Bafadiseo ne basonekeji abalonga’po namani? Pa kumona Yesu kaenda, abashilula kulwa nandi na kumutūta bipangujo na bulobo. Kebepangulangapo na mutyima wa kusaka kuyuka. Ino, batanga Yesu tudiba mwanda wa anene bintu bya kumukwatyila’po.