Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 70

Yesu Wabelula Muntu Mubutulwe Mpofu

Yesu Wabelula Muntu Mubutulwe Mpofu

YOANO 9:1-18

  • MUNTU WA LULOMBO MUBUTULWE MPOFU WABELULWA

Yesu ukidi mu Yelusalema dya Sabato. Aye ne bandi bana ba bwanga abaenda mu kibundi, abatana muntu umo wa lulombo mubutulwe mpofu. Bana ba bwanga abaipangula Yesu amba: “A Labi, le ulongele bubi i ani, i uno muntu’ni, i bambutwile bandi, amba abutulwe mpofu?”​—Yoano 9:2.

Bana ba bwanga bayukile amba uno muntu kadipo bidi na muya keumweka kumeso kwa kubutulwa, mhm, ino padi beipangulanga shi muntu ubwanya kwikala na bubi pakidi munda mwa inandi. Yesu webalondolola’mba: “Ke uno muntupo nansha bambutwile bandi balongele bubi, ino i mwanda wa mingilo ya Leza isokokele patōka pa mwanda wandi.” (Yoano 9:3) Nanshi ke bambutwilepo nansha uno muntu balongele kilubo kampanda nansha bubi byalengeja bupofu bwandi. Ino bubi bwa Adama bo bulengeje bantu bonso babutulwe bampikwa kubwaninina badi na bulema, kimfwa bupofu. Ino bupofu bwa muntu bubape Yesu mukenga wa kusokola mingilo ya Leza patōka, na mwaadi ulongela kitatyi kikwabo na kubelula misongo yabo.

Yesu wamone amba ino mingilo ifwaninwe kwingilwa bukidibukidi. Wanena’mba: “Tufwaninwe kwingila mingilo ya Yewa wantumine pano pakidi’ko dyuba; bufuku bwiyanga kebukokejapo muntu kwingila. Pano pondi mu ino ntanda, ami ne kitōkeji kya ino ntanda.” (Yoano 9:4, 5) Bine panopano ponka lufu lwa Yesu lusa kumutweja mu mfindi ya mu kibundu mwakabwanyapo kulonga kintu. Pano’ko bidi, ukidi nsulo ya kitōkeji kya ino ntanda.

Le Yesu usa kubelula uno muntu, shi i amo, namani? Yesu wapelela mata pa nshi ne kuvuba nao bitoto. Bitoto bimo webishinga mu meso a muntu’wa ne kunena’mba: “Enda ukoye mu kijiba kya Sailoma.” (Yoano 9:7) Muntu’wa wakōkela. Aye pa kulonga’byo, kamone! Fwatakanya’po nsangaji yamukwata paamona musunsa umbajinji mu būmi bwandi!

Balondakani ne bantu bakwabo bayukile uno mpofu abatulumuka. “Mwene uno ye muntu wadi ushikatanga ulomba bya kulomba?” Bamo abalondolola’mba: “I aye.” Bakwabo nabo abapele amba: “Aa, umwifwene.” Ino muntu aye mwine wanena’mba: “I amiwa.”​—Yoano 9:8, 9.

Ponka’po, abamwipangula’mba: “Le penepo meso abakupūtuka namani?” Walondolola’mba: “Muntu witwa bu Yesu wavubanga bitoto wanshinga’byo mu meso, kupwa waunena’mba, ‘Enda ku Sailoma ukoye.’ Ebiya nami naenda’ko naoye kemone ne kumona.” Ebiya kebamunena’mba: “Lelo yao muntu udi kwepi?” Wa lulombo’wa amba: “Nkiyuka.”​—Yoano 9:10-12.

Bantu’ba abakatwala uno muntu kudi Bafadiseo, nabo kebasake kuyuka mwaamwena. Webalombola’mba: “Wadi waunshinga bitoto mu meso, kupwa nakoye, pano kemone.” I kyendele’mo Bafadiseo basangale na uno wa lulombo wabelulwa.  Ino bamo mobadi kebafutulula Yesu. Abanena’mba: “Uno muntu katambilepo kwa Leza, mwanda kalaminepo Sabato.” Ino bakwabo amba: “Le kipya-mambo ubwanya namani kulonga biyukeno bya uno muswelo?” (Yoano 9:15, 16) Ponka’po abekalañanya.

Pa mwanda wa kuno kukalañana, abaalamukila kwipangula muntu washilula kumona’wa amba: “Le nobe ubanena namani pa uno muntu, byaapūtula meso obe?” Aye byakatatenepo Yesu, walondolola amba: “I mupolofeto.”​—Yoano 9:17.

Bayuda abapele kwitabija’byo. Abalanga’mba Yesu ne uno muntu i bakute nkuku ya kongola bantu. Abamone amba muswelo umo wa kupwija uno mwanda i kwipangula bambutwile ba wa lulombo shi bine uno muntu wadi mpofu.